གོང་མ་ཧྲུན་ཏྲི（顺治）ནི་ཀྲུང་གོའི་མན་ཆིང་རྒྱལ་རབས་ཀྱི་གོང་མ་ཁྲི་ཐོག་དང་པོ་དང་།མན་ཇུའི་རྒྱལ་ཐོག་གཉིས་པ་ཧོང་ཐའི་ཇིའི（皇太极）སྲས་དགུ་པ་ཡིན།རབ་བྱུང་བཅུ་གཅིག་པའི་ས་སྟག（༡༦༣༨）ལོར་འཁྲུངས།དགུང་ལོ་དྲུག་པ་རབ་བྱུང་བཅུ་གཅིག་པའི་ཆུ་ལུག（༡༦༤༣）ལོ་ནས་ལོ་བཅོ་བརྒྱད་རིང་གོང་མའི་ཁྲི་ལ་འཁོད།ཁྲི་ལོ་གཉིས་པར་ཁྲི་ལོའི་མིང་ཤུན་ཀྲིའམ་རྒྱ་སྐད་དུ་ཧྲུན་ཀྲི་ཞེས་བསྒྱུར་བ་གོང་མའི་མཚན་དུ་ཆགས་ཤིང་།མཚན་དངོས་ཧྥུ་ལིན（福临）ཟེར།
     གོང་མའི་ཁྲི་ལ་འཁོད་རྗེས་ལོ་ངོ་བརྒྱད་རིང་ཨ་ཁུ་དོར་ནུང་གིས་སྲིད་དོན་ལ་རོགས་བྱས་ཤིང་།ཨ་ཁུ་དོར་ནུང་འདས་རྗེས་ཁྲི་ལོ་དགུ་པ་རབ་བྱུང་བཅུ་གཅིག་པའི་ལྕགས་ཡོས（༡༦༥༡）ལོ་ནས་རང་ཉིད་ངོ་མས་སྲིད་དོན་བསྐྱངས།ཁྲི་ལོ་གཉིས་པ་རབ་བྱུང་བཅུ་གཅིག་པའི་ཤིང་སྤྲེལ（༡༦༤༤）ལོར་མན་ཆིང་གི་དམག་དཔུང་རྣམས་འུ་སན་ཀོན་ཀྱི་མཛུབ་སྟོན་འོག་ཧྲན་ཧེན་ཀོན（山海关）གྱི་འགག་སྒོའི་ནང་འཛུལ་ནས་ལི་ཙི་ཕྲེང་གིས་འགོ་ཁྲིད་པའི་ཞིང་པའི་གྱེན་ལངས་ཀྱི་དམག་དཔུང་གཏོར་ཕམ་བཏང་ནས་རྒྱལ་ས་ཧེ་ཐུ་ཨར་ཞེས་དེང་སང་གི་བྱང་ཤར་ལེའོ་ཉིང་ཞིང་ཆེན་ཤིན་ཕིང་རྫོང་ནུབ་ངོས་སུ་ཡོད་པའི་མཁར་གྲོང་ཪྙིང་པ་ཞིག་ནས་པེ་ཅིན་དུ་སྤོས།
     ལྷོ་ཕྱོགས་ཅང་སུའི་ཕྱོགས་སུ་ཡོད་པའི་མིང་ལྷོ་མའི་སྲིད་དབང་རྩ་གཏོར་བཏང་ནས་རང་རྒྱལ་གྱི་ས་གནས་མང་ཆེ་བ་མངའ་འོག་ཏུ་བསྡུས་ཏེ་མན་ཆིང་རྒྱལ་རབས་ཀྱི་རྨང་གཞི་ལེགས་པར་བཙུགས།སྐབས་དེར་སོག་པོ་རྣམས་མན་ཆིང་གི་མངའ་འོག་ཏུ་བསྡུ་ཐུབ་མེད་པ་དང་།དགེ་ལུགས་པའི་ཆོས་ལ་དད་པ་ཆེ་བ་བཅས་དམག་དྲངས་མི་དགོས་པར་ཞི་བའི་སྒོ་ནས་མངའ་འོག་ཏུ་བཅུག་ཆེད་ཏཱ་ལའི་བླ་མ་རིན་པོ་ཆེ་སྐུ་ཕྲེང་ལྔ་པ་པེ་ཅིན་དུ་གདན་འདྲེན་ཞུ་བའི་མི་སྣ་ཡང་ཡང་མངགས་པ་ལྟར།ཁྲི་ལོ་བཅུ་པ་ཆུ་འབྲུག（༡༦༥༢）ལོར།ཏཱ་ལའི་བླ་མ་སྐུ་ཕྲེང་ལྔ་པ་མཆོག་སྐུ་འཁོར་སུམ་སྟོང་ལྷག་ཙམ་བཅས་པེ་ཅིན་དུ་ཕེབས་ཤིང་།དེའི་ཆེད་དུ་བཞུགས་གནས་ལྷ་ཁང་སེར་པོ་ཕོ་བྲང་དང་བཅས་པ་གསར་བཞེངས་གནང་།འདི་དེང་སང་ཤུལ་ཙམ་ལས་མེད།པེ་ཅིན་དུ་ཕེབས་སྐབས་གོང་མ་ཧྲུན་ཏྲི་མཆོག་རི་དྭགས་བརྔོན་པའི་ས་ཆར་ཕེབས་པའི་ཚུལ་གྱིས་བསུ་བ་གནང་ཞིང་མཇལ་ཕྲད་སྐབས་གོང་མའི་ཁྲི་ལས་ཅུང་ཟད་དམའ་བའི་ཁྲི་མཐོན་པོ་དང་།གསོལ་ཇ་མཉམ་བཞེས་སོགས་མཐོང་བཟོས་གུས་བཀུར་ཆེན་པོ་གནང་།པེ་ཅིན་ནས་བོད་དུ་ཕྱིར་ལོག་ཕེབས་པའི་ལམ་བརྒྱུད་སོག་ཡུལ་ཏའི་ཕར（ཏའི་ཧེ）ཞེས་པའི་ས་ཆར་བཞུགས།ལི་པུ་ལས་ཁུངས་ཀྱི་བློན་ཆེན་བརྒྱུད་དེ་སྔོན་སོག་པོ་ཨལ་ཐད་རྒྱལ་པོས་ཏཱ་ལའི་བླ་མ་སྐུ་ཕྲེང་གསུམ་པར་ཏཱ་ལའི་བླ་མ་ཞེས་པའི་མཚན་གནས་ཕུལ་བ་དེ་བཞིན་རང་འཇགས་གཏན་འཁེལ་གྱི་འཇའ་ས་དང་།གསེར་ཐམ་བཅས་གནང་བར་བརྟེན།བོད་སོག་རྒྱ་ཆེའི་མི་དམངས་རྣམས་ཀྱིས་མན་ཆིང་གོང་མའི་སྲིད་གཞུང་ལ་ཡིད་ཆེས་ཆེ་རུ་འགྲོ་རྒྱུར་ནུས་པ་ཆེན་པོ་ཐོན་པ་བྱུང་།
     ཁྲི་ལོ་བཅོ་བརྒྱད་པ་དང་དགུང་ལོ་ཉི་ཤུ་རྩ་བཞི་པ་རབ་བྱུང་བཅུ་གཅིག་པའི་ལྕགས་གླང（༡༦༦༡）ལོར།སྐྱོ་སྣང་དང་སུན་སྣང་ཚད་ལས་བརྒལ་བ་ཞིག་གི་རྐྱེན་ལས་གློ་བུར་དུ་གཤེགས།སྐུ་ཕུང་མེ་ལ་སྲེག་པའི་པུར་ཐལ་ནི་ཧོ་པེ་ཞིང་ཆེན་གྱི་ཤའོ་ལིན（དེང་སང་ཧོ་པེ་ཞིང་ཆེན་ཙུན་ཧྥ་རྫོང་གི་ནུབ་བྱང་ལེ་དབར་བདུད་ཅུའི་ཕྱི་རོལ་ཁྲང་ཧུའི）རི་བོར་ཡོད།