སྤུར་རྒྱལ་བོད་ཀྱི་མཛངས་བློན་མི་བདུན་ཞེས།།སྙན་པའི་གྲགས་པ་ས་སྟེང་ཁྱབ་པ་ཡི།།ཐོག་མར་གྱུར་པ་སྟོད་ཀྱི་སྟེང་གཉིས་ལས།།ཕྱི་མ་རྒྱལ་པོ་པུ་དེ་གུང་རྒྱལ་གྱི།།མཛངས་པའི་བློན་པོ་རུ་ལས་སྐྱེས་ཡིན་ལ།།མཛངས་པའི་ལས་སུ་ཤིང་བསྲེགས་སོལ་བ་བྱུང་།།དེ་ཡིས་རྡོ་བཞུས་གསེར་དངུལ་ཟངས་ལྕགས་སྦྱངས།།ཤིང་ལ་མིག་ཕུག་གཤོལ་དང་གཉའ་ཤིང་བྱས།།ས་གཞི་བརྐོས་ནས་ཕུ་ཆུ་ཡུར་དུ་དྲངས།།རྨོན་པ་དོར་བསྡེབས་སྤང་ཐང་ཞིང་དུ་རྨོས།།བརྒལ་བར་དཀའ་བའི་ཆུ་ལ་ཟམ་པ་བཙུགས།།རྨོས་པའི་ལོ་ཏོག་ཐོག་མར་འདི་ནས་བྱུང་།།ལེགས་དྲུག་ཐོག་ཨི་ཤོ་ལེགས་ཀྱི་བློན།།བློན་པོ་རུ་ལས་སྐྱེས་ཀྱི་བུ་ཡིས་བྱས།།བློན་འདིའི་མཚན་ལ་ལྷ་བུ་མགོ་དཀར་བྱ།།འཕྲུལ་བློན་མཛངས་མི་བདུན་གྱི་གཉིས་པ་ཡིན།།མཛངས་པའི་ལས་སུ་ཞིང་ལ་དོར་ཁ་བརྩིས།།འབྲོག་ལ་ཐུལ་རྩིས་ཕུ་ཆུ་ཡུར་དུ་དྲངས།།མདའ་རུ་ཆུ་མ་རྨོ་བ་འདི་ནས་དར།།འཕྲུལ་བློན་མཛངས་མི་བདུན་གྱི་གསུམ་པ་ནི།།སྟག་རི་གཉན་གཟིགས་ཞེས་སུ་གྲགས་པ་ཡི།།བོད་ཀྱི་རྒྱལ་པོ་སོ་གཅིག་པ་ཡི་བློན།།ཁྲི་ངོར་སྣང་བཙུན་མོང་གི་བུ་ཡིན་ལ།།འདི་དུས་བྲེ་ཕུལ་སྲང་དང་ཚོང་ལས་དར།།འཕྲུལ་བློན་མཛངས་མི་བདུན་གྱི་བཞི་བ་ནི།།འཕྲུལ་གྱི་རྒྱལ་པོ་སྲོང་བཙན་སྒམ་པོ་ཡི།།ཆོས་ཀྱི་སློབ་དཔོན་ཐོན་མི་སྟེ།།ཁོང་གིས་བོད་ཡིག་ཐོག་མར་གསར་བཟོ་མཛད།།བོད་ཡུལ་མུན་པའི་སྨག་ལ་སྒྲོན་མེ་བཏེགས།།
མཛངས་བློན་བདུན་ལས་ལྔ་བ་སྲོང་བཙན་གྱི།།བློན་པོ་ཁྲི་བཟང་ཡང་སྟོན་སྙགས་ཀྱི་བུས།།མཛངས་པའི་ལས་སུ་རི་ཁྱིམ་ཀློང་དུ་ཕབ།།སྤོ་མཐོའི་མཁར་དུ་བརྩིགས་ནས་གྲོང་ཁྱེར་བཅོས།།འདི་ཡན་བོད་ཀྱི་ཁང་ཁྱིམ་རི་ལ་ཡོད།།བོད་ཀྱི་གྲོང་ཁྱེར་དུས་སྐབས་འདི་ནས་བྱུང་།།ཆོས་ཀྱི་རྒྱལ་པོ་ཁྲི་སྲོང་ལྡེའུ་བཙན་གྱི།།མགོས་རིགས་བློན་པོ་ཁྲི་བཟང་ཡབ་ལྷག（ལྷ）ནི།།འཕྲུལ་བློན་མཛངས་མི་བདུན་གྱི་དྲུག་པ་སྟེ།།བློན་པོ་འདི་ཡིས་གསོས་ཐང་སྟོང་ཐང་སོགས།།།ཁྲིམས་ཀྱི་བྱང་བུ་ཆ་དགུ་གཏན་ལ་ཕབ།།བོད་ཀྱི་ཁྲིམས་ཀྱི་ཐོག་མར་འདི་ནས་དར།།མཛངས་བློན་བདུན་པ་ཁྲི་སྲོང་ལྡེའུ་བཙན་གྱི།།བློན་པོ་སྟག་བཙན་གདོང་གཟིགས་ཞེས་བྱ་སྟེ།།བློན་པོ་འདི་ཡིས་འབངས་མི་ཁྱིམ་རེ་ལ།།རྟ་མཛོ་བ་དང་གླང་སོགས་རེ་རེ་བཞིན།།ཆ་སྙོམས་བགོས་ཤིང་དབྱར་གྱི་རྩྭ་བྲེགས་ནས།།བསྐམས་རྗེས་དགུན་དུས་ཕྱུགས་ཀྱི་གཟན་དུ་བྱིན།།ཕྱུགས་ལ་གཟན་རྩྭ་སྟེར་བའི་སྲོལ་ཀ་ཡང་།།བློན་པོ་འདི་ཡི་རིང་ནས་དར་བ་བཤད།།