ལ་ལ་ནི་འཆད་པ་དང་རྩོད་པ་ལྷུར་བླངས་ནས། རྩོམ་པ་མི་མཛད་ན་འཆད་པ་གཙོ་བོར་མཛད། མདོར་ན་བོད་གངས་ཅན་ཁྲོད་འདིར། འཆད་རྩོད་རྩོམ་གསུམ་ཆ་མཉམ་པར་མཛད་པ་དང་། བཤད་སྒྲུབ་གཉིས་ཀ་སྤེལ་བར་མཛད་པ་ནི། རྗེ་རིན་པོ་ཆེ་ཉིད་ལས་ལྷག་པའི་གཞན་ནས་བྱོན་པ་མེད་དོ། །འཕྲལ་དུ་སྒོ་གསུམ་གྱི་བྱ་བ་ཐམས་ཅད་སྙོམ་ལས་ཀྱི་དབང་དུ་མི་བཏང་ཞིང་། དེའི་ཡོན་ཏན་གྱིས་སློབ་མ་རྣམས་ཀྱང་རིང་པོར་མ་ཐོགས་པར། ཕྱི་དང་ནང་དང་གསང་བའི་ཡོན་ཏན་དུ་མ་ཞིག་གིས་བརྒྱན་ནས། བསྟན་པ་ལ་ལྷག་པར་ཕན་པར་འདུག་གོ །གཞན་ཡང་རྗེ་ཉིད་གང་ན་བཞུགས་པའི་ས་ཕྱོགས་དེར། ནད་ཡམས་མུ་གེ་དུས་ཀྱི་འཁྲུགས་པ་ལ་སོགས་མི་འབྱུང་ཞིང་། ཡོན་བདག་རྣམས་ལ་ལོ་ལེགས་པ་དང་། འབྱོར་པ་ཆེ་བ་དང་། བཀྲ་ཤིས་པ་ཁོ་ན་འབྱུང་ངོ་། །ཡང་དུས་རེ་ཞིག་གི་ཚེ། རྗེ་ཉིད་བདེ་བ་སྒང་དུ། བློ་གྲོས་རིན་པོ་ཆེ་བའི་བཤད་ཁྲིད་ལ་མཇལ་དུ་བྱོན་པའི་ཚེ་ན། བཤད་ཁྲིད་དེའི་སྟེང་ན་རྗེ་ཉིད་ཀྱིས་བོན་གསུང་མྱོང་བ་དང་། སློབ་མ་རྣམས་གྲལ་ལ་འཁོད་པའི་ས་ཆའི་རིམ་པ་རྣམས་ཐུགས་ལ་གསལ་བར་ཤར་པའི་ཚེ། འོ་ལེགས་སོ་ངོ་མཚར་ཆེ་གསུངས་ནས་ཤིན་ཏུ་ཐུགས་དགྱེས་སོ། །ཞེས་བདག་གི་བླ་མ་དྲིན་ཅན་རྒྱལ་ཚབ་པས་གསུངས་སོ། །དེས་ནས་འ་ཞ་བློ་གྲོས་རིན་པོ་ཆེ་སྐྱེ་བའི་སྤྲུལ་པ་ཡིན་པ་ཐེ་ཚོམ་མེད། སྤྱིར་ཡང་འ་ཞ་བློ་གྲོས་ཀྱི་གྲུབ་མཐའ་དེ་ཉིད་སྐྱོང་བར་མཛད་དོ། །དེའི་རྒྱུ་མཚན་གྱིས་འགྲོ་མགོན་བློ་གྲོས་ཀྱིས་བརྩམས་པའི་གསུང་རབ་མཐའ་ཡས་པ། སྟོད་སྨད་བར་གསུམ་ཀུན་ལ་ཡོད་པ་རྣམས་ཀྱང་། རང་ཤུགས་ཀྱིས་ཕྱག་ཏུ་ཕེབས་སོ། །ཡང་རེ་ཞིག་གསེར་སྒོའི་ཉེ་འདབས་ན་དམུ་རྒྱལ་ཉི་མའི་དབང་པོ་དང་རྗེ་གཉིས་ཀྱིས་བསྟན་པའི་ལ་རྒྱར་དམིགས་ནས་ཉི་འོད་རྟར་ཞོན་ན་བཟའ་སྲབ་མདར་བཀལ་བ་དང་། མཁའ་ལ་འཕུར་ནས་ཉི་མར་ཉེ་བས་དབུ་ཞྭ་ཉི་འོད་ཀྱིས་འཚིགས་པ་སོགས་གྲུབ་རྟགས་ཁྱད་འཕགས་བསྟན་པར་མཛད། ཡང་རེ་ཞིག་གི་ཚེ་ན། རྗེ་ཉིད་དཔོན་སློབ་རྣམས་ཕྱུག་མོ་རི་ལ་བྱོན་པའི་ཚེ་ན། ལམ་དུ་སྡེ་པ་ཞིག་གིས་རྫོང་ལ་ཕྱག་ནས་འདེབས་པའི་ཞུ་པ་ཕུལ་ནས། རྫོང་ལ་སྤྱན་དྲངས། འབུལ་བ་མང་དུ་བྱས་ནས་ཕྱག་ནས་འཐོར་བར་མཛད་དོ། །ཕྱི་ནས་སྡེ་པ་དེ་ལ་དམག་མི་འབུམ་ཕྲག་ཙམ་གྱིས་བསྐོར་ཀྱང་རྫོང་ལ་གནོད་པ་སྨོས་ཀྱང་ཅི་དགོས། ཕྱག་ནས་ཕོག་ཚད་ལ་གནོད་པས་མ་ཚུགས་སོ། །དེ་ནས་ཡུལ་ཕྱོགས་དེའི་སྡེ་བ་འཁོར་དང་དམག་མི་དང་བཅས་པ་རྣམས་དད་པ་སྐྱེས། ཕྱི་ནས་སྡེ་བ་དེ་ཉིད་ཀྱིས་རྗེ་རིན་པོ་ཆེ་བའི་སློབ་མར་གྱུར་ཚད་ལ། བཀུར་སྟི་ཡང་དག་པ་བྱེད་དོ། །དེས་ན་མཐུ་སྟོབས་ཡང་དག་པ་བསམ་གྱིས་མི་ཁྱབ་པ་མངའ་བ་ལགས་སོ། །དེ་ལ་འཕྲལ་དུ་ངོ་མཚར་ཆེ་བའི་རྣམ་པར་ཐར་པ་མང་དུ་ཐོས་ཏེ། རེ་ཞིག་མ་བྲིས་སོ། །སྐབས་སུ་བོན་འཆད་པའི་ཚེ་ན་རྗེ་ཉིད་ཀྱི་ཞལ་ནས་འོ་ལགས་ཁོ་རེ་ཚོ་བོན་གང་དགོས་ཉན་ཤོག ང་ལྟ་བུའི་སྐྱེས་མཆོག་དང་འཕྲད་པ་བསོད་ནམས་ཆེ་བ་ཡིན། ཁྱེད་རང་རྣམས་ཕར་རྒྱུགས་ཚུར་རྒྱུགས་བྱ་ནི་མི་དགོས། གང་དགོས་ང་ལ་ཞུས་པས་ཆོག བོན་རྒན་ང་ཡིས་སྲོག་ལ་མ་བལྟས། ཕྱི་ནང་གསང་གསུམ་གྱི་ལུང་གི་བྱུང་ཁུང་རྣམས་ལེགས་པར་བརྩམས་ནས་དཀའ་བ་མང་དུ་བྱེད་དགོས་པ་བྱུང་གསུངས་སོ། །དེ་ནི་ལུང་རྣམས་ལ་བདེ་སླ་མི་ཆོག་པའི་བརྡ་རུ་ངེས་པར་གོ་དགོས། འཕྲལ་དུ་སྐུ་ཅུང་ཟད་བགྲེས་པ་དང་། དགོང་ཇ་ཞལ་རེ་ཙམ་གསོལ་ན་ཞུས་པ་ཡང་། ཉི་མ་ཕྱེད་ཕན་ཆད་དུད་བ་མི་གཏོང་བ་ཁྲིམས་ཡིག་ལ་བལྟས་པས་ཆོག་མོད། ལར་རབ་ཏུ་བྱུང་བ་རྣམས་འདོད་པ་ཆུང་ཞིང་ཆོག་ཤེས་དགོས་པ་ཡིན། གྲུབ་ཆེན་གོང་མ་རྣམས་ཀྱིས་དམན་པའི་ས་འཛིན། ཧྲུལ་པོའི་གོས་གོན། ཕ་ཚན་གྱི་ཁེ་གྲགས་སྤངས། གཉེན་འདུན་གྱི་ཐག་པ་རྦད་ཀྱིས་བཅད་གསུངས་པ་ལྟར་དུ་དགོས་མོད། དེང་སང་གི་ཁྱེད་སློབ་གཉེར་བ་འགའ་ཞིག་གི་ཇ་ཡུན་རེ་ཙམ་ལ་ཐུན་བཅགས་པ་ལ་ཚེགས་མེད་གསུངས་སོ། །ཡང་དུས་རེ་ཞིག་གི་ཚེ་ན། དཔོན་སློབ་འགའ་དང་ཆས་ཏེ། ཕྱུག་མོ་དཔལ་རི་ལ་རིག་འཛིན་སྒྲུབ་པ་མཛད་དུ་བྱོན་ནས། སྔ་སོར་གང་ཟག་མོས་གུས་དང་ལྡན་པ་མང་པོས་གསང་ཕུག་བཙལ་དུ་ཕྱིན་ཀྱང་ངེས་པ་མ་ཪྙེད་པས། རྗེ་ཉིད་ནི་ཚེ་དབང་གི་སྤྲུལ་པའམ། བྱིན་གྱིས་བརླབས་པའི་སྐྱེས་བུ་ཡིན་པས། ངོ་མཚར་ཆེ་བའི་རྟགས་དུ་མ་ཞིག་དང་ལྡན་པ། ཉམས་དགའ་བའི་གནས་ངེས་པ་ཅན་ཞིག་ཪྙེད་དོ། །སྒྲུབ་པ་ལ་ཞུགས་ནས་རྗེ་ཉིད་ཀྱིས་ཚེ་དབང་གི་ཞལ་གཟིགས་ཤིང་གནས་ཆེན་བརྒྱད་ཀྱི་སྒོ་ནས་བསྟོད་པ་མཛད་དོ། །ཡང་པོམ་རའི་སྒྲུབ་པ་མཛད་པའི་ཚེ་ན། སྔར་བསོད་བློ་རིན་པོ་ཆེས་སྒྲུབ་པ་བཞིན་དུ། ཀུན་བཟང་གི་སྒྲུབ་པ་མཛད་དུས། པོམ་རའི་ཞལ་གཟིགས་པ། པོམ་རའི་སྒྲུབ་པ་མཛད་དུས་ཀུན་བཟང་གི་ཞལ་གཟིགས་རྣམས་ནི། རྗེ་ཉིད་ལ་ཅི་ལྟ་བ་བཞིན་དུ། གཟིགས་སྣང་གི་བཀོད་པ་གཅིག་ཏུ་འདུག་གོ །ཡང་རིན་པོ་ཆེ་ཉིད་ནི་ལ་མོ་རྩེའི་མཚོའི་གོང་ན་བཞུགས་པའི་དུས་སུ། སྨྲ་བའི་སེང་གེ་དང་། ཀེང་ཙེ་ལན་མེད་སྒྲུབ་པ་མཛད་པའི་དུས་སུ། བསྟན་པའི་བདག་པོར་འོང་པའི་རྟགས་སུ། ཉི་ཟླ་ཁོང་དུ་སོང་བ་རྨིས་པ་དང་། མཁའ་ལ་བྱ་བཞིན་འཕུར་བ་དང་། ས་ལ་མེ་ཏོག་འཐུ་པ་དང་། དེ་སོགས་ཡ་མཚན་ཆེ་བའི་རྨི་ལམ་མང་དུ་བྱུང་ངོ་། །སྲིད་རྒྱལ་དྲེལ་ནག་གི་ཞལ་གཟིགས་ཀྱང་དེའི་དུས་སུ་བྱུང་བ་ཡིན་ནོ། །ཞེས་སོགས་ཡིད་ཆེས་པའི་སློབ་མ་དག་གིས་གསུངས་སོ། །ཁྱད་པར་མི་བདུད་ནི་སྐྱེ་བ་སྔ་མ་རྣམས་སུ་ཡང་བསྟེན་ཅིང་བསྒྲུབས་ནས་བསྟན་པ་སྲུང་བར་ཞལ་གྱིས་བཞེས་པ་དང་། སྐྱེ་བ་འདི་ལ་ལུས་དང་གྲིབ་མ་བཞིན་དུ་འཁོར་ཞིང་། མི་དང་མི་གཏམ་པ་བཞིན་དུ་ཕྲིན་ལས་གང་བཅོལ་ཐམས་ཅད་རྗེ་ཉིད་ཀྱིས་ཅི་ལྟར་གསུངས་པ་མྱུར་བར་སྒྲུབ་པར་བྱེད་དོ། །དེ་ནས་རྗེ་ཉིད་དགུང་ལོ་ལྔ་བཅུ་ཤིང་བྱ་ལོའི་སྟེང་དུ། སྨན་རི་བཏབས་ནས་ལོ་སྐོར་བཅུ་གཅིག་ཙམ་བར་དུ། གནས་དེ་ཉིད་ལ་ཞབས་བརྟན་པར་བཞུགས་སོ། །དེ་ནས་རྗེ་ཉིད་ཀྱི་སློབ་མ་མཁས་པ་ཆེན་པོ་མང་དུ་ཡོད་ཀྱང་། རྒྱལ་ཐེབས་སུ་བསྐོས་པ་ལ་རེ་ཞིག་རྒྱལ་ཚབ་ཆེན་པོ་རོང་པོ་རིན་ཆེན་རྒྱལ་མཚན་དང་། ཆབ་ལ་མཁས་པ་མེ་ཉག་བསོད་ནམས་རྒྱལ་མཚན་གཉིས་སོ། །དེ་ལས་རྒྱལ་ཚབ་དམ་པ་དེ་ཉིད་ཀྱིས་བཤད་སྒྲུབ་གཉིས་ལ་རྗེ་ཉིད་ཀྱིས་ཅི་ལྟར་མཛད་པ་ལྟར། སྲོལ་ལེགས་པར་བཙུགས་སོ། །དེ་དག་འདི་སྐད་དེ། བརྒྱ་བའི་མགོན་པོ་གཉིས་པ་བསྟན་འགྲོའི་མགོན། །བརྡ་དང་དངོས་ཀྱི་ལུང་བསྟན་ཐ་དག་ལྟར། །བསྟན་པ་འཛིན་སྐྱོང་སྤེལ་བའི་ཁུར་ཆེན་བཞེས། །མཉམ་མེད་ཤེས་རབ་རྒྱལ་མཚན་བརྗོད་དཀའ་བ། །འཛམ་གླིང་ས་སྟེང་དབྱར་རྔ་ལྡིར་བའི་ཚེ། །བསྟན་འཛིན་མདོངས་མཐའི་ཚོགས་རྣམས་དགྱེས་དགུས་བྲེལ། །ཞེས་པ་ལྟར་རྒྱལ་བ་དངོས་དང་མཚུངས་པའོ། །