སྔོན་མདོ་ཁམས་ཕྱོགས་ལ་དར་ཆེ་བའི་འཛམ་གླིང་གེ་སར་རྒྱལ་པོའི་སྒྲུང་འདི་ཉིད་རིམ་བཞིན་སྔོན་བྱོན་མཁས་དབང་དག་གིས་འཚོལ་སྡུད་དང་བརྒྱུད་སྒྲོག དཔྱད་གཏམ་གཞལ་མེད་སྤེལ་བའམ་མ་གཞི་སྒྲུང་རང་ཉིད་ལ་སྐྱེས་སྟོབས་ཀྱི་དཔའ་ཕྱུག་པོ་མངའ་བའི་རྐྱེན་གྱིས་རྒྱལ་ཁབ་ཕྱི་ནང་ཀུན་དུ་ས་ཁྱབ་རྡོ་ཁྱབ་ཏུ་གྱུར་བ་དང་བསྟུན། སྙན་པའི་བ་དན་སྲིད་གསུམ་རྩེ་མོར་གཡོ་ཞིང་འཛམ་གླིང་རྩོམ་རིག་གི་བང་མཛོད་ནང་དུའང་བཀྲག་མདངས་རབ་ཏུ་འཚེར་བའི་མུ་ཏིག་ཆུན་གཅིག་སྟེ་གོ་གནས་ངེས་ཅན་ཞིག་བཟུང་ཡོད་པ་གཟུར་གནས་ཀུན་གྱིས་མཁྱེན་གསལ་ལྟར། སྤྱིར་རྩོམ་རིག་གང་དང་གང་ཡིན་རུང་དངོས་ཡོད་འཚོ་བའི་རྨང་གཞིའི་སྟེང་གྲུབ་པ་ཞིག་ཡིན་ཏེ། སྤྱི་ཚོགས་ཀྱི་འདུ་ཤེས་འཛིན་སྟངས་རིགས་ཤིག་གམ་སྤྱི་ཚོགས་ཀྱི་འཚོ་བ་ངེས་ཅན་ཞིག་མིའི་རིགས་ཀྱི་ཀླད་པའི་ནང་ཚུར་སྣང་བའི་ཐོན་དངོས་ཤིག་ཏུ་འདོད་པ་ལྟར། གེ་སར་རྒྱལ་པོའི་སྒྲུང་འདི་ཉིད་ཀྱང་དེ་ལས་མ་འདས་ཤིང་དུས་རབས་ངེས་ཅན་ཞིག་གི་བོད་མིའི་འདུ་ཤེས་འཛིན་སྟངས་དང་། ཡུལ་སྲོལ་གོམས་འདྲིས། མཛེས་སྤྱོད་ཀྱི་རིན་ཐང་། ལོ་རྒྱུས་དོན་རྐྱེན་བཅས་ཚུར་སྣང་བྱས་ཡོད་པ་བཞིན། གེ་སར་སྒྲུང་དུ་སྟོན་པའི་བླ་གནས་ཀྱི་ཞིབ་འབྲི་ཕུན་སུམ་ཚོགས་པ་དེས་བོད་མིའི་བླ་འཛིན་གྱི་འདུ་ཤེས་མེ་ལོང་ལྟར་མཚོན་ཡོད་པས་གཞུང་ངོས་སམ་འཕྲེད་ངོས་གང་རུང་ནས་ཞིབ་འཇུག་བྱས་ཀྱང་དཔྱད་གཞི་རིན་ཐང་བྲལ་བ་ཞིག་ཡིན་པར་སེམས།
གཅིག བླ་ཞེས་པ་གང་ལ་ངོས་འཛིན་དགོས།
སློབ་དཔོན་གླུ་སྒྲུབ་ཀྱིས། ཐ་སྙད་ལ་ནི་མ་བརྟེན་པར། །དམ་པའི་དོན་ནི་རྟོགས་ནུས། །ཞེས་གསུངས་ཡོད་པ་ལྟར། འདིར་བརྗོད་པར་བྱ་བའི་བོད་མིའི་བླ་འཛིན་གྱི་འདུ་ཤེས་དེ་མཐའ་དཔྱད་ལེགས་པོ་ཞིག་ཡོང་དགོས་ན་ཐོག་མར་བླ་ཞེས་པའི་ཐ་སྙད་འདིའི་གོ་དོན་དང་བྱུང་ཚུལ། དེ་དང་འབྲེལ་བའི་རིག་གནས་ཀྱི་རྒྱབ་ལྗོངས་ངེས་ཅན་ཞིག་རྟོགས་དགོས་ཤིང་དེ་ལྟར་མིན་ཚེ་རྩེ་མོ་བཟུང་ནས་རྩ་བ་དོར་བའི་དཔེ་རུ་འགྱུར་སྲིད། དེ་ཡང་བོད་ཀྱི་མཁས་དབང་གྲགས་ཆེན་མཁར་རྨེའུ་བསམ་གཏན་གྱིས་བླ་བསླུ་སོགས་ཀྱི་ཆོ་ག་དེ་ནི་བོད་རང་གི་གདོད་མའི་དད་པ་ལས་བྱུང་བ་ཡིན་པ་དང་བླ་ཞེས་པའི་ཐ་སྙད་དེ་ནི་གནའ་སྔ་མོའི་དུས་ནས་བྱུང་བའི་བོད་རང་གི་ཐ་སྙད་ཅི་ཡིན་པར་འདོད། ཁོ་བོས་བོན་གྱི་ཡིག་རྙིང་རྩ་ཆེན་མང་པོ་ཞིག་དཔྱད་གཞི་རུ་བཟུང་ནས་བླ་དང་བླ་བསླུའི་ཆོ་ག་ལ་ཞིབ་མོའི་སྒོས་དཔྱད་པ་བཏང་ཡོད། <<གཟི་བརྗིད>>ཞེས་པའི་བོན་གྱི་ཡིག་རྙིང་པོད་ག་བ། ལེའུ༡༠<<སྲིད་ཤིང་ཐེག་པ>>ལས། བླ་ཞེས་པ་ནི་འགྲོ་བ་མིའི་ནང་སེམས་དང་ཤེས་པ་གནས་ས་ཞིག་ཏུ་ངོས་འཛིན་བྱེད་པ་ཡིན། བླ་ཉིད་མིའི་གཟུགས་ནས་བྲལ་རྗེས་གནས་ག་གེ་མོ་ཞིག་ཏུ་ཉེན་ཁ་དང་བྲལ་ནས་གནས་སྐབས་སུ་གནས་ཤིག་ཏུ་སྡོད་དོ་ཞེས་བརྗོད་ཚུལ་ཡོད་པས་དེ་དང་འབྲེལ་བའི་ཐ་སྙད࿎བླ་གནས࿎ཞེས་པ་ཐོན། ད་དུང་སྲོག་ཆགས་ཀྱིས་མཚོན་པར་བྱེད་པའི“བླ་རྟགས”ཞེས་པའི་ཐ་སྙད་ཀྱང་ཡོད་པ་དང་། བླ་དང་ཕྱ་གཉིས་དོན་གཅིག་ཡིན་ཚུལ་སོགས་ང་ཚོས་གཙིགས་སུ་འཛིན་རུང་བའི་དཔྱད་གཏམ་རིན་ཐང་བྲལ་བ་སྤེལ་ཡོད།