ཁམས་ཀྱི་ཐང་དཀར་རྒོད་པོ་ཡིས།། དབུལ་ཐར་གཤོག་རྩལ་མཁའ་ལ་ངོམས།།

མིག་དམར་དོན་གྲུབ་ཀྱིས་བྲིས།        2020-07-08

   དཀར་མཛེས་ཁུལ་ནི་རང་རྒྱལ་གྱི་བོད་ཁུལ་ཆེན་པོ་གཉིས་པ་ཡིན་ལ། ཁམས་པའི་ལྟེ་བའི་ས་ཁུལ་ཡང་ཡིན་པ་རེད། ཉེ་བའི་ལོ་འགའི་རིང་། རང་ཁུལ་གྱིས་ཁམས་པའི་མཁས་མཛངས་བྱ་རྒོད་པོའི་འཆར་གཞི་ཞེས་པ་ལག་བསྟར་བྱས་ནས་རིགས་ཁག་གི་ཤེས་ཡོན་མི་སྣ་གཞི་རིམ་དུ་སྐོར་སྐྱོད་དང་འཐབ་ས་དང་པོར་གཅིག་སྡུད་བྱེད་པར་ལྕག་སྐུལ་དང་ཁྲིད་སྟོན་བྱས་ཤིང་། བློ་ཐག་རྦད་ཆོད་ཀྱིས་དབུལ་ཐར་འགག་སྒྲོལ་བྱས་ཏེ། ཁྱོན་ཡོངས་ནས་འབྱོར་འབྲིང་སྤྱི་ཚོགས་བསྐྲུན་རྒྱུ་ལེགས་འགྲུབ་བྱེད་པར་རྨང་གཞི་བརྟན་པོ་འདིང་བར་བསྔགས་སྐུལ་བྱས། མིག་སྔའི་བར་ཁུལ་ཡོངས་ཀྱི་རྫོང་ཁག18ཀྱིས་དབུལ་ཞྭ་ཕུད་ཅིང་། ཡིག་ཚགས་བྱང་བུ་བཟོས་པའི་དུད་ཚང་དབུལ་པོ50461གི་མི2222981དབུལ་ཐར་ཕྱུག་འགྱུར་བྱུང་བ་དང་། སྔོན་དཔག་བྱས་ན2020ལོའི་ལོ་སྨད་དུ་ཡིག་ཚགས་བྱང་བུ་བཟོས་པའི་དུད་ཚང་དབུལ་པོ564ཡི་མི2191ཡོད་ཚད་དབུལ་ཐར་ཐུབ་རྒྱུ་རེད།

  ཆེད་མཁས་མི་སྣའི་ཐབས་བརྒྱ་ཡིས།། ཁྱད་ཆོས་ཟོང་རྟགས་གཉེར་སྐྱོང་བྱས།།

   ཕྱག་ཕྲེང་རྫོང་སྒྲོ་མདོག་ཡུལ་ཤོག་བོན་པོ་གྲོང་ཚོའི་གྲོང་མི་ཡོན་རྒྱ་མའི་ངོ་གདོང་ནས་བདེ་སྐྱིད་ཀྱི་འཛུམ་དང་བཅས་དགེ་རྒན་ཝན་སླེབས་རྗེས། ང་ཚོར་རང་ཉིད་ཀྱི་མཐོ་སྒང་གི་སྟར་ཀའི་ཟོང་རྟགས་ཡོད་པར་མ་ཟད། ད་དུང་རང་ཉིད་ཀྱི་སྟར་ཀའི་སྣུམ་ཡང་ཡོད། རིན་གོང་ཡག་པོ་ལོན་བྱུང་ཞེས་བཤད།

    ཡོན་རྒྱ་མ་ཡིས་བཤད་པའི་དགེ་རྒན་ཝན་ལགས་ནི་སི་ཁྲོན་ཞིང་ཆེན་གྱི་ཚན་རྩལ་དབུལ་སྐྱོར་ལེ་དབར་ཁྲིར་བསྐྱོད་ཅེས་པའི་བྱེད་སྒོ་ནང་གི་སྟར་ཀའི་ཐོན་ལས་ཐོན37པའི་དབུ་བཞུགས་ཆེད་མཁས་དང་སི་ཁྲོན་ཞིང་ལས་སློབ་ཆེན་གྱི་དགེ་རྒན་ཆེན་མོ་བ་ཝན་ཞུའེ་ཆིན་ལགས་རེད། 2018ལོར་སི་ཁྲོན་ཞིང་ཆེན་གྱིས་ཚན་རྩལ་དབུལ་སྐྱོར་ལེ་དབར་ཁྲིར་བསྐྱོད་ཅེས་པའི་བྱེད་སྒོ་སྤེལ་མགོ་བཙུགས་ཏེ་ཝན་ཞུའེ་ཆིན་ཚུད་པའི་ཆེད་མཁས་ཤེས་ཡོན་མི་སྣ346དཀར་མཛེས་བོད་ཁུལ་དུ་བསྐྱོད་དེ་ཚན་རྩལ་དབུལ་སྐྱོར་གྱི་བྱེད་སྒོ་རྒྱུན་མཐུད་ངང་སྤེལ་ནས་ཞིང་འབྲོག་མང་ཚོགས་ལ་ལག་རྩལ་མཛུབ་ཁྲིད་བྱེད་པ་དང་ཁྱད་ཆོས་ཟོང་རྟགས་གཉེར་སྐྱོང་བྱས་ཏེ་འཕེལ་རྒྱས་ཀྱི་དཀའ་གནད་བསལ་བ་རེད།

    གཞི་རྩའི་རྨོ་འདེབས་ནུས་རྩལ་ནས་དེང་རབས་ཀྱི་གསོ་སྤེལ་ལག་རྩལ་དང་། ལག་རྩལ་མཛུབ་ཁྲིད་ནས་ཟོང་རྟགས་ཁྱབ་གདལ་གཏོང་ཞིང་། གྲོང་ཚོའི་ད་ཡོད་གནས་ཚུལ་ལ་དབྱེ་ཞིབ་བྱས་ནས་འབྱུང་འགྱུར་གྱི་འཕེལ་རྒྱས་ལ་དབྱེ་ཞིབ་བྱས་ནས་ཆེད་མཁས་པ་རྣམས་ཀྱིས་ཁ་ཁོག་པས་མ་གསང་བློ་རྒྱུ་མས་མ་བསྐུངས་ཏེ་ངོ་ཐུག་གདོང་འཕྲད་ཀྱི་སྒོ་ནས་འདེབས་འཛུགས་དང་གསོ་སྤེལ་གྱི་དཀའ་གནད151ཐག་གཅོད་བྱས་པ་དང་། གཅིག་གཏད་གཅིག་གིས་འདེབས་འཛུགས་དང་ནད་འབུའི་གནོད་པ་འགོག་བཅོས། གསོ་སྤེལ་ནད་རིགས་སྔོན་འགོག་སོགས་ཀྱི་ཤེས་བྱ་ཐེངས117འགྲེལ་བཤད་བྱས། སོན་འདེབས་ལག་རྩལ་དམར་ཁྲིད་བྱས་པ་དང་། ལུད་རྒྱག་ཐབས། འབྲས་ཤིང་མཐུད་སྦྱོར་སོགས་ཀྱི་ལག་རྩལ་ཐེངས192བསྟན་ཞིང་། རིགས་རྒྱུད་གསར་པ106ནང་འདྲེན་དང་ལག་རྩལ་གསར་པ120ཁྱབ་གདལ་བཏང་ཡོད། ཐོན་རྫས་གསར་པ7གསར་སྤེལ་བཅས་བྱས་པས་དབུལ་ཐར་ཕྱུག་འགྱུར་ཡོང་རྒྱུར་ཚན་རིག་ལག་རྩལ་གྱི་འདེགས་སྐྱོར་ནུས་ལྡན་མཁོ་འདོན་བྱས་པ་རེད།

   ཤེས་ཡོན་མི་སྣ་ཡུལ་དུ་ལོག། ལས་གཏོད་ཕྱུག་འགྱུར་ལམ་དུ་བསྐྱོད།།

   2015ལོར་ཡོན་ཏན་སློབ་གྲྭ་ཆེན་མོ་ནས་མཐར་ཕྱིན་རྗེས། ཕ་ཡུལ་དུ་ལོག་ནས་དཀར་མཛེས་ཁུལ་གོང་སྣེའི་སྐྱེ་ཁམས་ཞིང་ལས་ཚད་ཡོད་སྤྱི་གཉེར་ཁང་བཙུགས་ཏེ་རི་སྐྱེས་ཤ་མོ་དང་དབྱར་རྩྭ་དགུན་འབུ་སོགས་ལས་སྣོན་དང་ཕྱིར་ཚོང་བྱེད་ཀྱི་ཡོད། དེ་ནས་བཟུང་བྱ་གཞག་གསར་གཏོད་བྱས་ཏེ་ཕྱུག་འགྱུར་གྱི་ལམ་དུ་བསྐྱོད། 2019ལོའི་སྤྱི་ཟླ12པར། ཁོ་ལ་སི་ཁྲོན་ཞིང་ཆེན་གྱི་གྲོང་སྡེའི་ཤེས་ཡོན་མི་སྣའི་གསར་འབྱེད་ལས་སྐྲུན་འགྲན་བསྡུར་ཆེན་མོ་སྐབས་བཞི་པའི་ཐོག་གསེར་གྱི་བྱ་དགའ་ཐོབ་ཅིང་། འདི་ནི་དཀར་མཛེས་ཁུལ་གྱི་གཟིགས་སྐྱོང་གི་གསར་འབྱེད་ལས་སྐྲུན་སྲིད་ཇུས་ལ་ཐུགས་རྗེ་ཞུས་པ་རེད།

ཉེ་བའི་ལོ་ཤས་རིང་། རང་ཁུལ་གྱིས་རང་ཡུལ་གྱི་ཤེས་ཡོན་མི་སྣའི་ཕ་ཡུལ་ལ་དགའ་ཞེན་དང་ཕ་ཡུལ་གྱི་གནས་ཚུལ་ཤེས་པའི་ཁྱད་ཆོས་ཁོང་དུ་བརྟན་པོ་ཆུད་པ་བྱས་ཏེ《སྒྲིག་སྲོལ་དང་ལམ་སྲོལ་བཅོས་བསྒྱུར་དང་འཐུས་སྒོ་ཚང་དུ་བཏང་ནས་སློབ་ཆེན་སློབ་མའི་གསར་འབྱེད་ལས་སྐྲུན་ལ་སྐུལ་འདེད་ཤུགས་ཆེན་གཏོང་བའི་ལག་བསྟར་ཇུས་གཞི》དང་།《དཀར་མཛེས་ཁུལ་གྱིས་ཞིང་པ་ལས་མིའི་ཞབས་ཞུ་འགན་ལེན་ལ་ཤུགས་སྣོན་རྒྱག་པའི་བྱེད་ཐབས་དོན་ཚན་ཉེར་གཉིས་དང་ལས་ཀའི་ཇུས་གཞི》 《དཀར་མཛེས་ཁུལ་གྱིས་ཤེས་ཡོན་མི་སྣ་གཞི་རིམ་དུ་སྐོར་སྐྱོད་བརྟན་བརླིང་ཡོང་བའི་གཞི་རིམ་ཤེས་ཡོན་པའི་དཔུང་སྡེ་ཕྱོགས་སུ་བསྐྱོད་རྒྱུར་སྐུལ་ལྕག་དང་ཁྲིད་སྟོན་བྱེད་པའི་བྱེད་ཐབས་དོན་ཚན་བཅུ་བདུན》བཅས་སྔ་རྗེས་སུ་བཏོན་པ་རེད། ནུས་ཤུགས་ཡོད་རྒུས“རྫོང་ནང་དུ་ལས་གཏོད་ཐུབ་པ་དང་ཁྱིམ་དུ་ཕྱུག་འགྱུར་ཐུབ་པའི”ལས་ཞུགས་ལས་གཏོད་ལ་མཐུན་རྐྱེན་བསྐྲུན་པ་རེད།

     མིག་སྔའི་བར། གླ་རྒྱག་ཞིང་པ2998དང་ཐེམ་ཁུངས་རང་ཁུལ་ནས་ཡིན་པའི་སློབ་ཆེན་དང་འབྲིང་རིམ་ཆེད་ལས་སློབ་གྲྭའི་སློབ་ཐོན་སློབ་མ་ཁྲི4ལྷག་ལྡོག་ཕྱོགས་སུ་སྐོར་སྐྱོད་དང་ཕ་ཡུལ་དུ་ལོག་ནས་ལས་གཏོད་བྱེད་པར་ཁྲིད་སྟོན་བྱས་པ་དང་། གསར་འབྱེད་ལས་སྐྲུན་གསོ་སྐྱོང་རྟེན་གཞི17འཛུགས་སྐྲུན་བྱེད་པར་བསྔགས་སྐུལ་དང་རྒྱབ་སྐྱོར་བྱས་ཡོད། ཐོན་ཁུངས་ཕྱོགས་བསྡུས་བེད་སྤྱོད་དང་ཞིང་ཞོར་ཐོན་རྫས་ལས་སྣོན། དེང་རབས་ཞབས་ཞུ་སོགས་ཐོན་ལས་སྦྲེལ་མཐུད་འཛུགས་སྐྱོང་བྱས་པར་སྐུལ་འདེད་བཏང་སྟེ། ལས་ལམ་གསར་གཏོད་ཀྱི་གྲུབ་འབྲས70ལྷག་སྐྱེད་སྲིང་བྱས་ནས་མཐའ་སྐོར་གྱི་ཞིང་འབྲོག་མང་ཚོགས4400ལྷག་ཕྱུག་འགྱུར་ལམ་དུ་བསྐྱོད་རྒྱུར་སྐུལ་ཁྲིད་བྱས་ཡོད།

   འཇོན་ཐང་ཅན་གྱིས་སྣེ་ཁྲིད་བྱས།། དམངས་འཚོའི་ཡོང་སྒོ་ལྡབ་བརྒྱ་འཕར།།

   ཉེ་བའི་ལོ་ཤས་རིང་། རང་ཁུལ་གྱིས་གསོ་སྐྱོང་གཉིས་དང་སྣེ་ཁྲིད་གཉིས་ཞེས་པའི་གདོང་ལེན་འདུ་འགོད་གཏིང་ཟབ་ཏུ་བཏང་ཞིང་། ཕ་ཡུལ་གྱི་ཤེས་ཡོན་མི་སྣ་སྔོག་འདོན་གཏིང་ཟབ་བྱས་ནས་ཕྱུག་འགྱུར་འཇོན་ཐང་ཅན6119གསོ་སྐྱོང་བྱས་ཤིང་། མང་ཚོགས་དབུལ་ཐར་འབབ་འཕར་ཡོང་བར་སྐུལ་ཁྲིད་བྱས་པ་རེད།

    ཏང་གི་ཚོགས་ཆེན་བཅུ་དགུ་པའི་འཐུས་མི། རོང་བྲག་རྫོང་ཧྲུན་ཀྲི་ཡུལ་ཤོག་ཧྲུན་ཀྲི་གྲོང་སྡེ་དང་པོའི་ཕྱུག་འགྱུར་སྣེ་ཁྲིད་པ་ཡུས་ཏེ་ཁྲུན་གྱིས་ཡིད་ཆེས་ཆེན་པོའི་ངང་ད་ཆ་ཏང་གི་སྲིད་ཇུས་ཡག་པོ་ཡོད་ཀྱང‘སྒུག་བརྟེན་སློང་གསུམ’བྱེད་མི་རུང་། ངས་ཡུལ་མི་ཚོ་སྣེ་ཁྲིད་བྱས་ནས་ཕྱུག་འགྱུར་གྱི་ཐབས་ལམ་མང་ཙམ་འཚོལ་ངེས་ཡིན། ལས་ལ་བརྩོན་ཞིང་རང་ཉིད་ཀྱི་ལག་ཟུང་ལ་བརྟེན་ནས་དབུལ་ཕོངས་ཀྱི་གནས་ལས་བསྒྲལ་རྒྱུ་ཡིན་ཞེས་བཤད། ཉེ་ལམ་ལོ་ཤས་རིང་། ཡུས་ཏེ་ཁྲུན་གྱིས་གྲོང་མི་ཁྲིད་དེ་ཁྲེང་ཏུའུ་སོགས་སུ་རྟོག་ཞིབ་སློབ་སྦྱོང་བྱེད་དུ་ཕྱིན་ནས་རང་གི་མཐོང་རྒྱ་ཆེ་རུ་བཏང་སྟེ་ཁུ་བྱུག་ཤ་མོ་འདེབས་འཛུགས་མཉམ་ལས་ཁང་བཙུགས་པ་རེད། གྲོང་མི་དུད་ཚང50ལྷག་ལ་ཁུ་བྱུག་ཤ་མོ་འདེབས་འཛུགས་འཕེལ་རྒྱས་ཤུགས་ཆེན་གཏོང་བར་སྐུལ་ཁྲིད་བྱས་པས་དུད་ཚང་རེར་ལོ་རེར་ཆ་སྙོམས་འབབ་འཕར་སྒོར་ཁྲི3ལྷག་བྱུང་བ་དང་དུས་མཚུངས་སུ་གྲོང་སྡེ་གསར་པ་འཛུགས་སྐྲུན་བྱེད་པའི་གོ་སྐབས་དང་བསྟུན་ནས། གྲོང་མིས་རྒྱལ་རོང་བོད་རིགས་རིག་གནས་ཀྱི་ཁྱད་ཆོས་ལྡན་པའི་གྲོང་སྡེའི་ཡུལ་སྐོར་ཐོན་ལས་འཕེལ་རྒྱས་གཏོང་བར་སྐུལ་ཁྲིད་བྱས་པས་ལོ་ལྟར་མི་རེར་ཆ་སྙོམས་འབབ་འཕར་སྒོར3000ལྷག་བྱུང་བ་རེད།

    དེ་ཙམ་མ་ཟད། རང་ཁུལ་གྱི་ལས་རིགས་ཁག་གི་ཕྱུག་འགྱུར་སྣེ་ཁྲིད་པ་ཚོས་ད་དུང་ཞིང་པའི་མཚན་མོའི་སློབ་གྲྭ་དང་ཞིང་པའི“གཟའ་ཉི་མ”དང་ཆུ་རགས་འདུ་ཚོགས་སོགས་སྤེལ་རེས་དང་སློབ་སྦྱོང་གི་གཞི་རྟེན་བརྒྱུད་དེ་ཕྱུག་འགྱུར་གྱི་ཉམས་མྱོང་མཉམ་སྤྱོད་དང་འབྲོག་པའི་བསམ་བློ་བཅིངས་འགྲོལ་བཏང་བ་རེད། མི་རིགས་ལག་ཤེས་བཟོ་ལས་ལས་སྣོན་དང་གནག་ཕྱུགས་གསོ་སྤེལ། རྒྱ་བོད་སྨན་རྩྭ་འདེབས་འཛུགས་སོགས་སྣེ་ཁྲིད་དེ་མཉམ་ལས་ཁང120ལྷག་བཙུགས་ཡོད། ཕྱུག་འགྱུར་གྱི་ཐབས་ལམ431གྲུབ་འབྲས་ཐོབ་པའི་ངང་ཐོན་ལས་དངོས་ལ་འགྱུར་བར་སྐུལ་འདེད་བཏང་སྟེ་གནས་གཅིག་འཛུགས་པ་དང་ཡུག་གཅིག་ལ་སྐུལ་ཁྲིད་བྱེད་པའི་དཔེ་སྟོན་སྣེ་ཁྲིད་ཀྱི་ནུས་པ་བཏོན་ནས་མང་ཚོགས་དབུལ་པོ་ཁྲི5ལྷག་ཕྱུག་འགྱུར་ལམ་བུའི་ཐོག་བསྐྱོད་རྒྱུར་སྐུལ་ཁྲིད་བྱས་པ་རེད།། 


  • ལེ་ཚན་སྔོན་མ།:ཝང་ཧྥུང་ཁྲའོ་ཡིས་ཕྱག་ཕྲེང་རྫོང་དུ་དབུལ་ཐར་འགག་སྒྲོལ་ལས་ཀར་བརྟག་ཞིབ་དང་ལྟ་སྐུལ་ཁྲིད་སྟོན་གནང་།
  • ལེ་ཚན་རྗེས་མ།:སེར་ཤུལ་རྫོང་གིས་ཚོགས་ཆེན་གཉིས་ཀྱི་དགོངས་དོན་སྒྲོག་འགྲེལ་བྱས།
  • དོ་སྣང་ཆེ་བའི་རྩོམ།