ཡིད་ལྷུང་ལྷ་མཚོའི་བསང་མཆོད།

ཐེག་མཆོག་གླིང་པ གཉན་པོ་གཡུ་རྩེ། 2011-05-31

ཡང་སྙིང་ཐུགས་ཀྱི་ཟབ་གཏེར་དག་སྣང་སྙན་བརྒྱུད་སྐོར་ལསཿ ཡིད་ལྷུང་ལྷ་མཚོའི་བསང་མཆོད་ལྷ་ལམ་ཀུན་ཁྱབ་བཞུགས་སོ༔

་གུ་རུ་སྤྲུལ་པའི་སྐུ་ལ་འདུད༔ གནས་ཀྱི་སྲུང་མ་མཆོད་འདོད་ན༔ རིན་པོ་ཆེ་ཡི་སྣོད་ནང་དུ༔ དཀར་གསུམ་མངར་གསུམ་ཕྱེ་མར་དང་༔ རིན་ཆེན་འབྲུ་སྨན་དར་ཟབ་སྤོས༔ དཀར་དམར་གཏོར་མ་སྐྱེམས་ཕུད་དང་༔ ཤིང་རྩི་སྣ་ལྔའི་དུད་པ་བཏང༌། དུང་དཀར་རོལ་མོའི་འདི་སྐད་དོ༔ ཀྱཻཿ རང་བཞིན་སྤྲོས་བྲལ་གཉུག་མའི་ཀློང་༔ འགགས་མེད་རོལ་པ་ཧེ་རུ་ཀ༔ སྣང་སྲིད་ཟིལ་གནོན་དྲག་པོ་རྩལ༔ བསྐྱེད་པའི་མདུན་གཞི་དྭངས་གསལ་ནས༔ མདོ་ཁམས་གནས་མཆོག་ཀུན་གྱི་གཙོ༔ འབྲི་ཟླ་ཟར་མའི་གཡུ་མཚོ་ནི༔ དཀར་ལ་མཐིང་གི་མདངས་ཆགས་པ༔ ཕྱི་ལྟར་ཁྲུས་ཀྱི་རྫིང་བུར་འཁྱིལ༔ ནང་ལྟར་རིན་ཆེན་གཞལ་ཡས་ཁང་༔ གསང་བ་ཆོས་དབྱིངས་དཀྱིལ་འཁོར་བརྡལ༔ མ་བྱས་གཉིས་མེད་ཕོ་བྲང་དུ༔ དུས་གསུམ་བྱོན་པའི་སངས་རྒྱས་དང་༔ ས་བཅུའི་རྒྱུན་མཐར་བྱང་ཆུབ་སེམས༔ རྩ་གསུམ་དཔའ་བོ་མཁའ་འགྲོའི་ཚོགས༔ དམ་ཅན་རྒྱ་མཚོ་ཐམས་ཅད་ལ༔ ཟག་མེད་བདུད་རྩི་་བསང་མཆོད་འབུལ༔ མཆོག་དང་ཐུན་མོང་དངོས་གྲུབ་འབད་མེད་རྩོལ༔ ཁྱད་པར་གནས་ཀྱི་བསྲུང་མ་མཆོག༔ ལྷ་ཀླུ་སྨན་མོ་ཀུན་གྱི་གཙོ༔ ལྷ་མོ་རྡོ་རྗེ་གཞོན་ནུ་མ༔ དཀར་མོ་དུང་གི་ལེན་ཕྲེང་གསོལ༔ ཕྱག་གཉིས་མདའ་དར་མེ་ལོང་བསྣམས༔ འཇའ་ཚོན་སྣ་ལྔས་ལུས་མདངས་བརྒྱན༔ དར་སྣ་ལྔ་ཡིས་ཅོད་པཎ་འཕུར༔ སྒྱུ་འཕྲུལ་གར་གྱི་དབང་ཕྱུག་མ༔ ལྷ་ཀླུ་སྨན་མོ་འབུམ་གྱིས་བསྐོར༔ དྲི་ཞིམ་བདུད་རྩིས་བསང་མཆོད་འབུལ༔ ཡུལ་ཕྱོགས་ནད་གདོན་མུ་གེ་བཟློག༔ གཞན་ཡང་ལས་བྱེད་ཕོ་ཉའི་ཚོགས༔ འདིར་གཤེགས་དྲི་ཞིམ་བདུད་རྩི་དང་༔ རོ་བརྒྱ་ལྡན་པའི་གཏོར་མ་ཡིས༔ ཡབ་རྗེ་ཟིལ་ཁྲོམ་རྡོ་རྗེ་བསང་༔ གཡས་ཀྱི་དུང་སྤྱང་དཀར་པོ་བསང་༔ གཡོན་གྱི་ནུ་བོ་དབང་ཕྱུག་བསང་༔ རྒྱབ་ཀྱི་རྡོ་རྗེ་ཟིལ་གནོན་བསང་༔ མདུན་གྱི་ཁ་རག་དཔལ་མོ་བསང་༔ སྒོ་སྐྱོང་ནོར་བུ་དབང་རྒྱལ་བསང་༔ དེ་ལྟར་བསང་བའི་ཡོན་ཏན་གྱིས༔ བདག་ཅག་ཡོན་མཆོད་འཁོར་བཅས་ལ༔ གང་ལ་རེ་བའི་དོན་རྣམས་ཀུན༔ ཐོགས་པ་མེད་པར་མྱུར་འགྲུབ་མཛོད༔ སྦྲ་དང་ཞིང་མཁར་མི་ནོར་ཀུན༔ བཀྲ་མི་ཤིས་པའི་ངན་སྦྱོར་རྣམས༔ ཡུད་ཙམ་གཅིག་གིས་བརླག་པར་མཛོད༔ སྲིད་ཞི་དཔལ་གཡང་དབང་བསྡུས་ལ༔ བསྟན་འགྲོར་ཡུལ་ཕྱོགས་ཕྱྭ་གཡང་སྩོལ༔ བཅོལ་བའི་ཕྲིན་ལས་འགྲུབ་པར་མཛོད༔ ས་མ་ཡཱ༔ རྒྱ་རྒྱ་རྒྱ༔ ཅེས་པ་འདི་འང་མཁན་བསོད་ནམས་འགྱུར་མེད་ཀྱིས་བསྐུལ་ངོར་མི་ལྡོག་པའི་ཆེད་དུ། སྤྲང་སྨྱོན་གཏེར་མིང་པ་ཐེག་མཆོག་གླིང་པས་ཆུ་ཡོས་ཧོར་ཟླ་བའི་ཚེས་ལ་གང་ཤར་དུ་བྲིས་པ་དགེ་ལེགས་འཕེལ། བཀྲ་ཤིས། །

ཡིད་ལྷུང་ལྷ་མཚོའི་བསང་མཆོད།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10