ཞིང་ཆེན་ཏང་ཨུའི་ཧྲུའུ་ཅི་གཞོན་པ་ཏེང་ཞའོ་ཀང་གིས་འདི་ལྟར་གསུངས།

སྐལ་ཐུབ་ཀྱིས་བསྒྱུར་ཞུས་བྱས།        2020-02-22

སྤྱི་ཟླ2པའི་ཚེས18ཉིན། ཞིང་ཆེན་ཏང་ཨུའི་ཧྲུའུ་ཅི་དང་ཞིང་ཆེན་ཏོག་གསར་གློ་ཚད་ཀྱི་རིམས་ཚུལ་ལ་ཁ་གཏད་འཇལ་བའི་འགོ་ཁྲིད་ཚོ་ཆུང་གི་འགོ་གཙོ་ཕེང་ཆིང་ཧྭ་ཡིས་མངགས་བཅོལ་གནང་བ་ལྟར་ཞིང་ཆེན་ཏང་ཨུའི་ཧྲུའུ་ཅི་གཞོན་པ། འགོ་ཁྲིད་ཚོ་ཆུང་གི་འགོ་གཙོ་གཞོན་པ་ཏེང་ཞའོ་ཀང་གིས་དཀར་མཛེས་ཁུལ་རྟའུ་རྫོང་གི་ཏོག་གསར་གློ་ཚད་ཀྱི་རིམས་ཚུལ་འགོག་བཅོས་ཚོད་འཛིན་གྱི་བརྙན་འཕྲིན་བཀོད་གཏོང་གྲོས་ཚོགས་ཀྱི་གཙོ་འགན་བཞེས་ཏེ་འཚོགས་པ་རེད། ཚོགས་ཐོག་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་མཆན་བཀོད་མཛུབ་སྟོན་གལ་ཆེན་དང་གསུང་བཤད་ཀྱི་དགོངས་དོན་སློབ་སྦྱོང་ལག་ལེན་དངོས་སུ་བྱེད་པ་དང་། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་། ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་བཅས་ཀྱི་ཐབས་ཇུས་བཀོད་སྒྲིག་ཁྱོན་ཡོངས་ནས་ལག་ལེན་བྱེད་ཅིང་། དཀར་མཛེས་ཁུལ་རྟའུ་རྫོང་གི་ཏོག་གསར་གློ་ཚད་ཀྱི་རིམས་ཚུལ་འགོག་བཅོས་ཚོད་འཛིན་ལས་དོན་ལ་བཀོད་གཏོང་བྱས་ཤིང་། རིམས་ཚུལ་ཁྱབ་མཆེད་འགྲོ་བར་གཏན་འགོག་མཐའ་གཅིག་ཏུ་བྱས་ཏེ་བོད་ཁུལ་མང་ཚོགས་ཀྱི་ཚེ་སྲོག་བདེ་འཇགས་དང་ལུས་པོ་བདེ་ཐང་ཡོང་བར་ཁག་ཐེག་བྱ་དགོས་པ་བསྟན།

     ཏེང་ཞའོ་ཀང་གིས་ཞིང་ཆེན་ཏང་ཨུ་དང་ཞིང་ཆེན་སྲིད་གཞུང་གི་ཚབ་མཛད་དེ་རིམས་ཚུལ་འགོག་བཅོས་ཚོད་འཛིན་གྱི་ཡུལ་དངོས་སུ་འབད་འཐབ་བྱེད་བཞིན་ཡོད་པའི་ལས་བྱེད་པ་དང་རྒྱ་ཆེ་བའི་མང་ཚོགས་ལ་བསམ་པ་རྣམ་དག་གིས་འཚམས་འདྲི་ཞུས་པ་དང་བླ་ན་མེད་པའི་གུས་འདུད་ཞུས་པ་རེད།

     ཏེང་ཞའོ་ཀང་གིས་ནན་གསུང་གནང་དོན། ཚན་རིག་དང་མཐུན་པའི་སྒོ་ནས་དཀར་མཛེས་ཁུལ་རྟའུ་རྫོང་གི་རིམས་ཚུལ་དང་དེའི་ཁྱད་ཆོས་ཁོང་དུ་ཆུད་པར་བྱ་དགོས་ཤིང་། རིམས་ཚུལ་འགོག་བཅོས་ཚོད་འཛིན་གྱི་གནས་བབ་ཛ་དྲག་ཆེ་བ་དང་རྙོག་འཛིང་ཆེ་བ། དམིགས་བསལ་ཆེ་བ་བཅས་ཡིན་པར་ངོས་འཛིན་ཟབ་མོ་བྱ་དགོས། རིམས་ཚུལ་འགོག་བཅོས་ཚོད་འཛིན་གྱི་ལས་དོན་ཁྲོད་དུ་གནས་པའི་མི་འདང་བ་དང་ཞན་ཆ་གནད་ལ་འཁེལ་བ་བཙལ་ཐུབ་པ་བྱས་ནས།རིམས་ཚུལ་འགོག་བཅོས་ཚོད་འཛིན་གྱི་འགོག་རྒོལ་དམག་འཐབ་ལས་རྒྱལ་ཁ་མཐའ་གཅིག་ཏུ་འཐོབ་བྱ་རྒྱུ་དེ་འདུ་ཤེས་བཞི་ཇེ་དྲག་ཏུ་གཏོང་བ་དང་། གདེང་ཚོད་བཞི་བརྟན་པོར་གཏོང་བ།སྲུང་སྐྱོང་གཉིས་བྱ་ཐུབ་པ་བཅས་ཀྱི་རང་རྟོགས་ཀྱི་བྱ་སྤྱོད་དུ་བཞག་ནས།སྔར་ལྷག་གིས་བསམ་བློའི་ངོས་འཛིན་ཇེ་ཟབ་ཏུ་གཏོང་བ་དང་། ཆབ་སྲིད་དང་སྤྱི་ཡོངས་ཀྱི་མཐོ་ཚད་ནས་བོད་ཁུལ་རིམས་ཚུལ་འགོག་བཅོས་ཚོད་འཛིན་གྱི་མི་དམངས་དམག་འཐབ་དང་སྤྱི་ཁྱབ་དམག་འཐབ། འགོག་རྒོལ་དམག་འཐབ་བཅས་ལས་མཐའ་གཅིག་ཏུ་རྒྱལ་ཁ་འཐོབ་པར་བྱ་དགོས། སྔར་ལྷག་གིས་འགོག་བཅོས་ཚོད་འཛིན་བྱེད་ཐབས་དོན་ཐོག་འཁྱོལ་ཤུགས་ཆེ་རུ་གཏོང་བ་དང་། དམིགས་སའི་རང་བཞིན་མངོན་གསལ་བྱས་ནས་མི་འདང་ས་ཁ་གསབ་དང་། ཞན་ཆ་སྟོབས་ཆེར་གཏོང་བ། སྐྱོན་ཆ་སེལ་བ་བཅས་ལ་ཤུགས་ཆེན་རྒྱག་ཅིང་། ཡུལ་ཤོག་ལྔ་དང་གྲོང་རྡལ་གཅིག་གི་མི་ཡོད་ཚད་དང་ནད་པ་དང་འབྲེལ་འདྲིས་བྱེད་མཁན་མི་ཚོགས་ལ་མ་ཁེབས་པ་མེད་པར་གཙང་བཤེར་བྱེད་པ་དང་། ནད་པར་ལུགས་མཐུན་སྨན་བཅོས་ཡག་པོ་བྱེད་ཅིང་དམིགས་ས་རང་བཞིན་ལྡན་པས་སྨན་བཅོས་སྟོབས་ཤུགས་གསར་སྣོན་བྱེད་པ་དང་། སྨན་བཅོས་དང་འཚོ་བའི་དངོས་རྫས་སོགས་ཀྱི་དགོས་མཁོ་ཧུར་ཐག་བསྐང་དགོས།

    སྔར་ལྷག་གིས་རིགས་བགོ་བ་དང་ས་ཁོངས་བགོས་ནས་ཁྲིད་སྟོན་བྱ་རྒྱུ་མངོན་གསལ་བྱེད་པ་དང་། རིམ་པ་གསུམ་གྱི་འགོག་བཅོས་ཚོད་འཛིན་མ་ལག་ལག་ལེན་ནན་པོ་བྱ་རྒྱུ་དང་། ཚན་རིག་དང་མཐུན་པའི་འགོག་སྲུང་ཤེས་བྱ་དྲིལ་བསྒྲགས་བྱེད་ཤུགས་ཆེ་རུ་གཏོང་ཞིང་། རིམས་ཚུལ་ཁུལ་ནང་ཁུལ་དུ་མཆེད་པ་དང་ཁུལ་ཕྱི་ལ་མཆེད་པ་མཐའ་གཅིག་ཏུ་གཏན་འགོག་བྱ་དགོས། སྔར་ལྷག་གིས་དགོན་པ་བདག་གཉེར་བྱེད་ཤུགས་ཆེ་རུ་གཏོང་བ་དང་། ཆོས་ལུགས་ལས་རིགས་ཀྱི་འཐུས་ཚབ་མི་སྣའི་དགེ་མཚན་ལྡན་པའི་ནུས་པ་འདོན་སྤེལ་བྱེད་ཅིང་། རིམས་ཚུལ་འགོག་བཅོས་ཚོད་འཛིན་གྱི་བྱེད་ཐབས་དགོན་པ་ཚང་མ་དང་དགོན་པའི་བདག་གཉེར་ཨུ་ལྷན་གྱི་བདག་གཉེར་མི་སྣ།གྲྭ་བཙུན་ཚང་མ་བཅས་ལ་དོན་འཁྱོལ་བྱ་དགོས། སྔར་ལྷག་གིས་སྤྱི་ཚོགས་གླེང་ཕྱོགས་ལ་ཁྲིད་སྟོན་བྱེད་ཤུགས་ཆེ་རུ་གཏོང་བ་དང་། མ་བསྐུལ་དང་ལེན་གྱིས་གནས་ཚུལ་བཀོད་པ་དང་ཕན་ནུས་ཡོད་པའི་སྒོ་ནས་མང་ཚོགས་མཉམ་འགོག་མཉམ་བཅོས་མཉམ་འཛིན་བཅས་ཀྱི་ཁྲོད་དུ་ཞུགས་པ་སྣེ་ཁྲིད་བྱས་ཏེ། གླེང་ཕྱོགས་ཀྱི་ཁོར་ཡུག་ཡག་པོ་ཞིག་བསྐྲུན་དགོས།སྔར་ལྷག་གིས་བོད་ཁུལ་སྤྱི་ཚོགས་ཀྱི་སྤྱི་ཡོངས་བརྟན་པོར་ཡོང་བ་སྲུང་སྐྱོང་བྱེད་ཅིང་། མཐའ་ཚད་ཀྱི་བསམ་ཕྱོགས་དང་ཉེན་ཁའི་འདུ་ཤེས་ཇེ་དྲག་ཏུ་གཏོང་བ་དང་། ཁྲིམས་ལྟར་འགོག་བཅོས་ཚོད་འཛིན་བྱ་རྒྱུ་རྒྱུན་འཁྱོངས་བྱས་ཏེ། མི་སེམས་བདེ་བ་དང་སྤྱི་ཚོགས་བདེ་འཇགས་སྒྲིག་ལམ་ཡོད་པ་ཁག་ཐེག་བྱ་དགོས། སྔར་ལྷག་གིས་འགན་འཁྲི་དང་སྒྲིག་ལམ་ནན་པོར་བཟོ་བ་དང་། མི་བཟོས་ཀྱི་རྒྱུ་རྐྱེན་དང་ལས་དོན་དོན་ཐོག་མི་འབྱོར་བ། ལས་སྒྲུབ་མི་འཇོན་པ་དང་ལས་སྒྲུབ་གང་མོས་བྱེད་པ་བཅས་ཀྱིས་རིམས་ཚུལ་ཁྱབ་མཆེད་དུ་སོང་བ་དང་། སྤྱི་ཚོགས་བརྟན་བརླིང་གི་དོན་རྐྱེན་བྱུང་བ་ཡིན་ན་ཁྲིམས་སྒྲིག་ལྟར་ཆད་གཅོད་ནན་པོ་བྱ་དགོས།སྔར་ལྷག་གིས་རིམས་འགོག་གི་ཡུལ་དངོས་སུ་ཡོད་པའི་བློ་མཐུན་ཚོ་ལ་སེམས་ཁུར་དང་གཅེས་སེམས་ཡག་པོ་བྱས་ཏེ། དངོས་ཡོད་དཀའ་ངལ་ཐག་གཅོད་དང་སེམས་ཁྲལ་མེད་པར་བྱ་དགོས།

   དུས་མཉམ་དུ། རིམས་ཚུལ་འགོག་བཅོས་ཚོད་འཛིན་ལས་དོན་དང་དཔལ་འབྱོར་སྤྱི་ཚོགས་འཕེལ་རྒྱས་ལ་གཅིག་གྱུར་འཆར་འགོད་བྱ་དགོས་ཤིང་། འབྱོར་འབྲིང་སྤྱི་ཚོགས་ཁྱོན་ཡོངས་ནས་སྐྲུན་ཐུབ་པ་རྒྱལ་ཁ་ཕུ་ཐག་ཆོད་པ་བླང་བ་དང་། དབུལ་ཐར་འགག་སྒྲོལ་གྱི་མཇུག་འཐབ་སོགས་དང་འབྲེལ་བ་ཡོད་པ་གཙོ་གནད་ལས་དོན་དམ་འཛིན་ཡག་པོ་བྱས་ཏེ་ལོ་ཧྲིལ་པོའི་དམིགས་འབེན་ལས་འགན་འགྲུབ་པར་བྱ་དགོས།

  ཚོགས་ཐོག་གཟུགས་ལམ་ནས་དཀར་མཛེས་ཁུལ་དང་རྟའུ་རྫོང་གི་རིམས་ཚུལ་འགོག་བཅོས་ཚོད་འཛིན་གྱི་ཡུལ་དངོས་ཀྱི་ལས་དོན་གནས་ཚུལ་ལ་བཀོད་གཏོང་བྱས་ཤིང་། འབྲེལ་ཡོད་གནས་ཚུལ་སྙན་སེང་ཞུས་པར་ཉན་འཇོག་བྱས་པ་རེད། ཞིང་ཆེན་འགོ་ཁྲིད་ཐེན་ཞང་ལི་དང་། རྡོ་རྗེ་རབ་བརྟན། ཡེ་ཧན་པིང་། ཝང་དབྱི་ཧུང་། ཞིང་ཆེན་སྲིད་གཞུང་གི་དྲུང་ཡིག་ཆེན་མོ་བ་ཀྲང་ཡན་བཅས་གྲོས་ཚོགས་སུ་ཞུགས།།



  • ལེ་ཚན་སྔོན་མ།:བོད་སྨན་ཁྱེར་ནས་ནད་དུག་འགོག་བཅོས་བྱེད།
  • ལེ་ཚན་རྗེས་མ།:ཧྲུའུ་ཅིས་རིམས་འགོག་དང་གཙོ་གནད་ལས་གཞི་མཉམ་འཛིན་བྱ་དགོས་ཟེར།
  • དོ་སྣང་ཆེ་བའི་རྩོམ།