དྲོད་འཇམ་གྱི་ཉི་འོད་འཚེར་ཞིང་མཁའ་དབུགས་ན་དྲི་ངད་འཐུལ་བའི་དབྱར་ཟླ་བཞི་པ་དེ་ཚེས་བྱུང་། ས་གཞི་ཡངས་པོར་སྔོ་ལྗང་གི་གོས་བཟང་བཀླུབས་ཤིང་། ཁྲ་ཆིལ་མེ་ཏོག་གིས་རི་ལུང་བརྒྱན་པ་དང་། ཁུ་བྱུག་སྔོན་མོས་མགྲིན་གླུ་གྱེར་བའི་དབྱར་གྱི་དཔལ་ཡོན་ཕྱོགས་ཀུན་བཞད་པ་ན། ཚེ་སྲོག་གི་ལྟེ་ཁྲག་འཕོ་ས་དང་ལང་ཚོའི་གཉོམ་ལག་རྒྱས་སའི་ཕ་ས་དྲོན་མོའི་རྩེད་ར་དེ་ལྷག་ཏུ་དྲན།

     ཕ་ཡུལ་གྱི་དབྱར་ཀ་ནི་ཅི་འདྲའི་མཛེས་ཤིང་ཡིད་དུ་འོང་བ་ཞིག་ལ། ཕ་ཡུལ་གྱི་དབྱར་ཀ་ནི་ཅི་འདྲའི་དྭངས་ཤིང་གཙང་བ་ཞིག་སྟེ། རི་ལུང་ཐང་གསུམ་ན་སྟག་མ་དང་སུ་རུ། འོ་སེ་དང་ཀུ་ཤུ། མཁན་པ་དང་སེར་ཆེན་སོགས་སྣ་མའི་མེ་ཏོག་རྣམ་པར་བཀྲ།

    དེ་ལྟར། ཁམས་མི་ཉག་སྐྱ་གད་ལུང་པར། །འདེབས་མི་དགོས་རང་སྐྱེས་མེ་ཏོག །ཚོན་མི་དགོས་ཁ་དོག་སྣ་ཚོགས། །བྱུག་མི་དགོས་དྲི་ཞིམ་ལྷན་སྐྱེས། །སྣ་མི་གཅིག་མེ་ཏོག་གྲངས་མེད། །ཁྱོན་ཡངས་པའི་རི་ལུང་ཁེབས་ཡོད། །