དུང་དཀར་གསེར་དང་དངུལ་གྱི་གཤོག་པར་རིན་པོ་ཆེའི་ཕྲ་ཅན།

དུང་དཀར་ནི་འབུད་པའི་རོལ་མོའི་བྱེ་བྲག་ཅིག་སྟེ།ཡོངས་གྲགས་སུ་ཆོས་དུང་དང་ཚོགས་དུང་ཞེས་འབོད་ལ།བོན་གྱི་ཡིག་ཆ་ལ་ལའི་ནང་དུང་དཀར་གཡས་འཁྱིལ་ལ་ཨུན་ཆེན་གཡས་སུ་འཁྱིལ་བ་ཞེས་འབོད།སྤྱིར་དུང་ལ་རིགས་ལྔ་འབྱུང་སྟེ།མཆོག་དམན་བར་གསུམ་དུ་ཕྱེ་ན།དཀྵི་ཎ་ཝརྟ་ཤཾ་ཁ་ཞེས་པ་དུང་དཀར་གཡས་འཁྱིལ་འདི་ནི་སྐྱེ་བ་གཞན་གྱིས་བར་མ་ཆོད་པའི་དུང་སྐྱེ་བ་ལྔ་པ་ཡིན་པ་ཁ་དོག་ཀུནྡ་ལྟར་རབ་ཏུ་དཀར་ཞིང་བཀྲ་ཤིས་པའི་རྫས་སུ་རུང་བ་དང་།གཟི་དུང་ཞེ་དུང་མཇུག་འབུད་ཁའི་ཕྱོགས་ཕྲ་ལ་རིང་བ་ཁ་དོག་གཟི་སེར་ཁྲ་འདྲ་བ།སི་ཏ་ཤཾ་ཁའམ་ཤཾ་ཁ་ཝརྟ་ཞེས་པ་དུང་དཀར་རམ་དུང་འཁྱིལ་བ་སྟེ་ཡོངས་གྲགས་དུང་དཀར།ཀཎྚ་ཤཾ་ཁ་ཞེས་པ་དུང་ཚེར་མ་ཅན་ནམ་དུང་རྭ་ཅན་ཏེ་ཕྱི་ལ་གཟུགས་མོའི་བྱི་ཐུར་འདྲ་བའི་དུང་གི་ཚེར་མས་ཁྱབ་པ་ཞིག །རཀྟ་ཤཾ་ཁ་ཞེས་པ་དུང་དམར་ཏེ་སིནྡྷུ་རའི་མདོག་འདྲ་བ་ཞིག་བཅས་སོ།།དེ་རྣམས་ལས་སྔ་མ་སྔ་མ་ལེགས་ཤིང་ཕྱི་མ་ཕྱི་མ་ཞན་པ་ཡིན་ལ།སྔར་གཡས་འཁྱིལ་ལ་གསེར་སྒོར་བརྗེ་བྱེད་པ་དང་།ཕྱི་མ་བཞི་ལ་དངུལ་སྲང་གང་དང་དེ་ལས་རིམ་པས་ཞོ་དོ་རེ་འབྲི་བའི་རིན་ཐང་གིས་ཤེས་སོ།། དུང་དཀར་ནི་དེང་དུས་ཇོ་མོ་གླང་མའི་རི་ནས་གཏེར་རྡོར་གྱུར་པའི་དུང་གི་དངོས་པོ་འབེལ་པོ་རྙེད་རྒྱུ་ཡོད་པས་འབྱུང་ཁུངས་བོད་ལའང་ཡོད་མྱོང་བ་དང་།བོན་གྱི་བརྡ་རྙིང་དུ་དུང་དཀར་གྱི་ཐ་སྙད་ཁྱད་ཆོས་བཅས་ཡོད་པས་སྔ་མོ་ནས་རིན་ཐང་ཅན་དུ་བརྩི་བཞིན་ཡོད་པ་དང་།ནང་བསྟན་བོད་ལ་དར་ཚུན་ནས་ཆོས་ཀྱི་དུང་དང་བཀྲ་ཤིས་པའི་རྫས་སུ་བརྩིས་ནས་གཙིགས་སུ་བཟུང་ཞིང་སྤྱོད་སྒོ་རྒྱ་ཆེར་ཕྱིན་ཐོག་དུང་དཀར་གཤོག་པ་ཅན་ཞེས།དུང་དཀར་ལ་གསེར་དངུལ་ཚགས་དཀྲོལ་ཅན་ལ་རིན་པོ་ཆེའི་ཕྲ་རྒྱན་དང་དར་སྣ་ལྔའི་སྙན་ཤལ་ལམ་འཕན་གྱིས་མཛེས་པར་སྤྲས་པའི་བོད་ལག་ཤེས་ལས་བྱུང་བའི་རོལ་མོའི་བྱེ་བྲག་ཁྱད་ཆོས་ཅན་ཞིག་ཏུ་གྱུར་ཏོ།
དུང་དཀར་ནི་ཁྱབ་ཆེ་ལ་རོལ་མོའི་མཆོག་ཏུ་གསུངས་ཏེ༼སྔ་འགྱུར་རྡོ་རྗེ་ཐེག་པའི་རིག་འཛིན་རྒྱ་མཚོའི་ལོངས་སྤྱོད་ཆས་གོས་རྒྱན་དང་རོལ་མོའི་རྣམ་བཤད་སྔགས་འཆང་རྒྱན་གྱི་མེ་ཏོག༽ལས།ཁ་དོག་དྲི་མེད་དཀར་བ་ནི།དཀར་ཕྱོགས་དབུ་འཕང་བསྟོད་པའི་བརྡ།གཡོན་སྐོར་རི་མོའི་མུ་ཁྱད་ཅན།ས་ལམ་རིམ་གྱིས་བགྲོད་པའི་བརྡ།།གལ་ཏེ་རི་མོ་གཡས་འཁྱིལ་ན།བསམ་རྒུའི་རེ་སྐོང་རིན་ཆེན་བརྡ།སྦུབས་སྟོང་ཆོས་སྐུ་འགྱུར་མེད་ལ།དུང་སྒྲ་འགག་མེད་ལོངས་སྤྱོད་རྫོགས།ནང་གི་རྐན་གཉེར་རི་མོ་ནི།སྣ་ཚོགས་སྤྲུལ་བའི་དོན་བྱེད་བརྡ།རྐན་དབུགས་རྩོལ་བའི་སྒྲ་སྐད་ནི།ཆོས་རྣམས་རྟེན་ཅིང་འབྲེལ་འབྱུང་བརྡ།ལྔ་ལྡན་དར་གྱི་སྙན་ཤལ་ནི།ལམ་སྔ་མཐའ་རུ་ཕྱིན་པའི་བརྡ།ཐལ་མོ་པདྨའི་རྒྱས་འཛིན་པ།ཐབས་ཤེས་ཟུང་དུ་འཇུག་པའི་བརྡ།སྒྲ་སྐད་ཐམས་ཅད་གནོན་པ་ནི།ནག་པོའི་ཕྱོགས་ལས་རྒྱལ་བའི་བརྡ།ཞེས་རྟགས་མཚན་ཕུན་སུམ་ཚོགས་པ་དང་།དུང་འབུད་པའི་དགོས་པའང་དེ་ཉིད་ལས།དུང་སྐུད་ལན་གཅིག་སྟེང་དུ་བསྒྲགས།ལྷ་ཁམས་མ་ལུས་དབང་དུ་བསྡུས།ཚངས་པ་བརྒྱ་བྱིན་ལས་ལ་བཀོལ།དུང་དཀར་གཉིས་པ་བར་དུ་བསྒྲགས།མི་དང་མི་མིན་དབང་དུ་བསྡུ།དུང་སྐད་གསུམ་པའི་ང་རོ་ཡིས།དཀོན་མཆོག་གསུམ་དང་རྩ་བ་གསུམ།།གོང་མ་སྲི་ཞུའི་ཡུལ་ཀུན་མཆོད།བཞི་པས་ཚངས་པ་བརྒྱ་བྱིན་སོགས།མགོན་པོ་ཡོན་ཏན་མགྲོན་ཀུན་མཉེས།ལྔ་པས་ཁམས་གསུམ་འགྲོ་བ་དྲུག །སྙིང་རྗེས་མགྲོན་ཀུན་བདེ་དང་ལྡན།དྲུག་པས་བགེགས་རྒྱལ་བི་ན་ཡ་ག་སོགས།བགེགས་རིགས་ལན་ཆགས་དབང་པོ་ཚིམ།དུང་སྐད་བདུན་པའི་སྒྲ་དབྱངས་ཀྱིས།ཉན་རང་བྱང་སེམས་གནས་ནས་སྤོར།ཐེག་ཆེན་བླ་མེད་འབྲས་བུར་སྦྱོར།ཞེས་གསུངས་པ་སོགས་ལས་ཤེས་སོ།།