“དམངས་ཀྱིས་འབྲུ་རིགས་མ་གཏོགས་མི་ཟ། འབྲུ་རིགས་ས་ཞིང་ལས་མ་གཏོགས་མི་སྐྱེ།”ཞེས་འབྲུ་རིགས་ཉེན་མེད་ཡོང་བར་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཐུགས་ཁུར་དམིགས་བསལ་གནང་བཞིན་ཡོད། ཁོང་གིས་ཞིང་ནང་དང་ཞིང་ཁར་ཐེངས་མང་ཕེབས་ནས་བཞའ་ཚན་བརྟག་དཔྱད་དང་། ལྗང་བུ་སྐྱེ་འཚར་ལ་གཟིགས་པ། ཐོན་འབབ་འདྲི་རྩད་བཅས་གནང་ནས“རྨོ་ཞིང་ནི་འབྲུ་རིགས་ཐོན་སྐྱེད་ཀྱི་སྲོག་རྩ་ལྟ་བུ་ཡིན”ཞེས་གསལ་པོར་བསྟན་ཡོད། རྨོ་ཞིང་ནི་རང་རྒྱལ་གྱི་ཐོན་ཁུངས་ཆེས་རྩ་ཆེན་ཡིན་ཞིང་། འབྲུ་རིགས་ས་ཞིང་ནས་གསོག་པ་དང་ཀྲུང་གོའི་ལྟོ་ཕོར་བརྟན་པོ་ཡོང་བ་མཐའ་འཁྱོངས་བྱས་ན“རེ་བས་ཁེངས་པའི་ཞིང”ནང་སྙེ་མའི་རྦ་རླབས་ལང་ལོང་དུ་འཕྱུར་རྒྱུ་རེད།