འཕུར་སྐྱོད་ལས་འགན་ཕུན་སུམ་ཚོགས་པོའི་ངང་ལེགས་གྲུབ་བྱུང་།

སྤྱི་ཟླ4པའི་ཚེས16ཉིན། ལྷ་གྲུ་ཨང་བཅུ་གསུམ་པའི་མི་བཞུགས་འཕུར་གྲུའི་ཕྱིར་ལོག་གྲུ་ཚང་ཤར་རླུང་སྐམ་སའི་འབབ་ཡུལ་གྱི་སྔོན་ཚོད་གཏན་འཁེལ་བའི་ཁྱབ་ཁོངས་སུ་བདེ་བླག་ངང་བབས་པ།

ཀྲའེ་ཀྲི་ཀང་། ཝང་ཡ་ཕིང་། ཡེ་ཀོང་ཧྥུ། སྤྱི་ཟླ4པའི་ཚེས16ཉིན། ལྷ་གྲུ་ཨང་བཅུ་གསུམ་པའི་མི་བཞུགས་འཕུར་གྲུའི་ཕྱིར་ལོག་གྲུ་ཚང་ཤར་རླུང་སྐམ་སའི་འབབ་ཡུལ་དུ་བདེ་བླག་ངང་བབས་ཤིང་། འདི་ནི་འཇིག་རྟེན་འཕུར་སྐྱོད་པ་ཀྲའེ་ཀྲི་ཀང་དང་། ཝང་ཡ་ཕིང་། ཡེ་ཀོང་ཧྥུ (གཡོན་ནས་གཡས) བཅས་བདེ་འཇགས་ངང་གྲུ་ཚང་ནས་དོན་བཞིན་པ།

མི་དམངས་ཉིན་རེའི་ཚགས་པར་ཐོག་གནས་ཚུལ་སྤེལ་བར་གཞིགས་ན། སྤྱི་ཟླ4པའི་ཚེས16ཉིན། ཀྲུང་གོའི་མི་བཞུགས་འཇིག་རྟེན་འཕུར་སྐྱོད་ལས་གྲྭའི་གཞུང་ལས་ཁང་གིས་ཁྱབ་བསྒྲགས་བྱས་དོན། པེ་ཅིང་དུས་ཚོད2022ལོའི་སྤྱི་ཟླ4པའི་ཚེས16ཉིན་གྱི་སྔ་དྲོའི་ཆུ་ཚོད9དང་སྐར་མ56ཐོག ལྷ་གྲུ་ཨང་བཅུ་གསུམ་པའི་མི་བཞུགས་འཕུར་གྲུའི་ཕྱིར་ལོག་གྲུ་ཚང་ཤར་རླུང་སྐམ་སའི་འབབ་ཡུལ་དུ་བདེ་བླག་ངང་བབས་པ་རེད། ཡུལ་དངོས་ཀྱི་སྨན་དོན་མི་སྣས་འཇིག་རྟེན་འཕུར་སྐྱོད་པ་ཀྲའེ་ཀྲི་ཀང་དང་། ཝང་ཡ་ཕིང་། ཡེ་ཀོང་ཧྥུ་བཅས་གསུམ་གྱི་གཟུགས་གཞི་བདེ་ཐང་ཡིན་པ་གཏན་འཁེལ་བྱས། དེའི་ཐོག་ནས་ལྷ་གྲུ་ཨང་བཅུ་གསུམ་པའི་མི་བཞུགས་འཕུད་སྐྱོད་ཀྱི་ལས་འགན་ཕུན་སུམ་ཚོགས་པོའི་ངང་ལེགས་གྲུབ་བྱུང་བ་མཚོན་པ་རེད།

སྔ་དྲོའི་ཆུ་ཚོད9དང་སྐར་མ6གི་ཐོག པེ་ཅིང་འཇིག་རྟེན་འཕུར་སྐྱོད་ཚོད་འཛིན་ལྟེ་གནས་ཀྱིས་ས་ངོས་ཚད་ལེན་ཚོད་འཛིན་ས་ཚུགས་ནས་ཕྱིར་ལོག་བཀའ་བཏང་བར་བརྒྱུད་ལྷ་གྲུ་ཨང་བཅུ་གསུམ་པའི་མི་བཞུགས་འཕུར་གྲུའི་འཁོར་ལམ་གྲུ་ཚང་དང་ཕྱིར་ལོག་གྲུ་ཚང་བདེ་བླག་ངང་ཁ་གྱེས་ཤིང་། སྔ་དྲོའི་ཆུ་ཚོད9དང་སྐར་མ30ཡི་ཐོག འཕུར་གྲུའི་ཕྱིར་ལོག་སྒུལ་བྱེད་འཕྲུལ་འཁོར་ལ་མེ་སྤར་བ་དང་ཕྱིར་ལོག་གྲུ་ཚང་དང་སྐུལ་འདེད་གྲུ་ཚང་ཁ་གྱེས་པ་རེད། ཕྱིར་ལོག་གྲུ་ཚང་བདེ་བླག་ངང་སྐམ་སར་བབས་རྗེས་འཚོལ་སྐྱོབ་ཚུར་བསྡུའི་ལས་འགན་འཁུར་བའི་འཚོལ་སྐྱོབ་ཡན་ལག་རུ་ཁག་གིས་དུས་ཐོག་ཏུ་དམིགས་ས་ཤེས་རྟོགས་ཐུབ་པ་དང་འབྲེལ་འཕྲལ་མར་སྐམ་སའི་འབབ་ཡུལ་དུ་འབྱོར། ཕྱིར་ལོག་གྲུ་ཚང་གི་སྒོ་ཕྱེ་མ་ཐག་སྨན་དོན་མི་སྣས་འཇིག་རྟེན་འཕུར་སྐྱོད་པའི་གཟུགས་གཞི་བདེ་ཐང་ཡིན་པ་གཏན་འཁེལ་བྱས། མི་བཞུགས་འཕུར་སྐྱོད་ལས་གྲྭའི་བར་སྣང་ས་ཚུགས་ཀྱི་དུས་མཚམས་འཕུར་སྐྱོད་ལས་འགན་གྱི་སྤྱི་ཁྱབ་བཀོད་འདོམས་པུའུ་ཡི་འབྲེལ་ཡོད་མགོ་ཁྲིད་ཀྱིས་ཤར་རླུང་སྐམ་སའི་འབབ་ཡུལ་དུ་འཇིག་རྟེན་འཕུར་སྐྱོད་པར་བསུ་བ་ཞུས་པ་རེད།

ལྷ་གྲུ་ཨང་བཅུ་གསུམ་པའི་མི་བཞུགས་འཕུར་གྲུ་ནི2021ལོའི་སྤྱི་ཟླ10པའི་ཚེས16ཉིན་ཅིའུ་ཆོན་སྲུང་སྐར་འཕེན་གཏོང་ལྟེ་གནས་ནས་འཕེན་གཏོང་བྱས་པ་དང་། དེའི་རྗེས་མཁའ་མཐུན་ལྟེ་བའི་གྲུ་ཚང་དང་འབྲེལ་མཐུད་བྱས་ཏེ་སྡེབ་སྒྲིག་གྲུ་ཚང་ཞིག་ཏུ་གྱུར་ཡོད། འཇིག་རྟེན་འཕུར་སྐྱོད་པ་གསུམ་ལྟེ་བའི་གྲུ་ཚང་དུ་དུས་ཡུན་ཟླ་བ6ཙམ་ལ་བསྡད་དེ་ཀྲུང་གོའི་འཇིག་རྟེན་འཕུར་སྐྱོད་པ་བསྟུད་མར་འཁོར་ལམ་དུ་འཕུར་སྐྱོད་བྱེད་པའི་དུས་ཡུན་རིང་ཤོས་ཀྱི་ཟིན་ཐོ་གསར་པ་བཏོད་ཡོད་པ་རེད།

ལྷ་གྲུ་ཨང་བཅུ་གསུམ་པའི་མི་བཞུགས་འཕུར་སྐྱོད་ལས་འགན་ཕུན་སུམ་ཚོགས་པའི་ངང་ལེགས་གྲུབ་བྱུང་བ་དེའི་ཐོག་ནས་བར་སྣང་ས་ཚུགས་ཀྱི་འགག་རྩའི་ལག་རྩལ་གྱི་ར་སྤྲོད་དུས་མཚམས་ཀྱི་ལས་འགན་ཕུན་སུམ་ཚོགས་པོའི་ངང་ལེགས་གྲུབ་བྱུང་བ་དང་། ཀྲུང་གོའི་བར་སྣང་ས་ཚུགས་མི་རིང་བར་འཛུགས་སྐྲུན་དུས་མཚམས་སུ་སླེབས་པ་མཚོན་གྱི་ཡོད་པ་རེད།།