དེ་ཡང་ལྷ་དང་བཅས་པའི་འཇིག་རྟེན་ཐམས་ཅད་ཀྱི་འདྲེན་པ་མཉམ་མེད་ཤྰཀྱའི་རྒྱལ་པོ་དེ་ཉིད་སྐུ་མྱ་ངན་ལས་འདས་པའི་ཚུལ་བསྟན་པའི་རྗེས་ལོ་བརྒྱ་དང་བཅུ་ཙམ་ན།རྒྱལ་པོ་མྱ་ངན་མེད་ཅེས་བྱ་བ་བྱོན་ནས།དེ་ནི་ཧ་ཅང་གཏུམ་པས།ཉེས་མེད་ཀྱི་སེམས་ཅན་མང་པོ་ཡ་ང་བ་སྣ་ཚོགས་ཀྱི་སྒོ་ནས་བསད་པས།གཏུམ་པོ་མྱ་ངན་མེད་ཅེས་མིང་ཐོགས།དེའི་ཚེ་ན་ཁ་བ་ཅན་དང་།རི་བོ་འབིགས་བྱེད་ཀྱི་བར་དུ་དབང་བསྒྱུར།འབིགས་བྱེད་ཀྱི་ལྷོ་ཡུལ་སོགས་ཡུལ་གཞན་ཐབས་ཅད་ཀྱང་མངའ་འོག་ཏུ་བཙུད།བྱང་ཕྱོགས་ཁ་བ་ཅན་དང་ལི་ཡུལ་རྒྱབ་ཀྱི་གངས་དང་།ཤར་ལྷོ་ནུབ་གསུམ་གྱི་རྒྱ་མཚོ་ལ་ཐུག་གི་བར་འཛམ་གླིང་གི་ས་གཞི་ཐམས་ཅད་དང་།གླིང་ཕྲན་ལྔ་བཅུ་ཙམ་ལ་དབང་བསྒྱུར།དུས་ཤིག་ན་དགྲ་བཅོམ་པ་གྲགས་པ་དང་འཕྲད།དགྲ་བཅོམ་པས་ཁོ་རང་བཏུལ་ནས་ཁོ་རང་གིས་སྔར་བྱས་ཀྱི་ལས་ལ་འགྱོད་སེམས་དྲག་པོས་ཕྱི་མར་ངན་སོང་དུ་མི་འགྲོ་བའི་ཐབས་ཞུས་པ་ན།དགྲ་བཅོམ་པས་དེ་བཞིན་གཤེགས་པའི་རིང་བསྲེས་གྱི་སྙིང་བོ་བཞུགས་པའི་མཆོད་རྟེན་བྱེ་བ་གཅིག་བཞེངས་ཏེ་འཛམ་གླིང་གི་ས་གཞི་ཐམས་ཅད་བརྒྱན་པར་བྱས་ན་སྡིག་པ་འདག་པར་འགྱུར་རོ་གསུངས།དེའི་ཚེ་རྒྱལ་པོ་མ་སྐྱེས་དགྲའི་གདུང་སྐལ་རྒྱལ་བའི་ཁབ་ཀྱི་མཆོད་རྟེན་ཆེན་པོའི་འོག་ཏུ་སྦས་ནས་ཡོད་པ་བྲུས་ནས་བླངས་པ་ན།ཟངས་ཀྱི་ངོས་སུ་འདི་ན་དེ་བཞིན་གཤེགས་པའི་རིང་བསྲེལ་མ་ག་ངྷའི་བྲེ་བོ་གཅིག་ཡོད་དེ།མ་འོངས་པ་ན་རྒྱལ་པོ་དབུལ་བོ་ཞིག་གིས་འདོན་པར་འགྱུར་རོ་ཞེས་བྲིས་འདུག མཐར་མི་འབྲིང་སོགས་པ་སྒྲོམ་ཕྱི་ནང་རིམ་པ་བདུན་ཙམ་ཁ་ཕྱེ་བའི་དབུས་ནས་སྟོན་པའི་སྐུ་གདུང་མ་ག་ངྷའི་བྲེ་བོ་གཅིག་ཡོད་པ་འཕེལ་ཏེ་ཁལ་དྲུག་ཏུ་གྱུར་པ་དང་།སྒྲོམ་གྱི་གྲྭ་བཞིར་ནོར་བུ་རིན་པོ་ཆེ་རང་འོད་རྒྱང་གྲགས་ཙམ་དུ་འཕྲོ་བ་རེ་རེ་མཆོད་པའི་ཡོ་བྱད་དུ་བཞག་པ་མཐོང་།དེ་ལས་གདུང་བྲེ་བོ་ཆེན་པོ་གཅིག་བླངས་ཏེ་སྔར་བཞིན་བཞུགས་སུ་གསོལ་ཞིང་སྟེང་གཡོགས་ཏེ་སྦས།
དེ་ནས་གནོད་སྦྱིན་གྱིས་གྲོགས་བྱས་ཏེ་རྒྱལ་པོ་མྱ་ངན་མེད་ཀྱིས་ཞག་གཅིག་ལ་དེ་བཞིན་གཤེགས་པའི་རིང་བསྲེལ་གྱི་སྙིང་བོ་བཞུགས་པའི་མཆོད་རྟེན་བྱེ་བ་བཞེངས་ནས་གྲུབ་བོ།དེ་ནས་མཆོད་རྟེན་ཐམས་ཅད་ལ་མར་མེ་དང་བདུག་སྤོས་མེ་ཏོག་གི་ཕྲེང་བ་སྟོང་སྟོང་གི་ཉིན་རེ་བཞིན་མཆོད་པར་བྱེད་ཅིང་བྱང་ཆུབ་ཀྱི་ཤིང་ལ་གསེར་དངུལ་གྱི་བུམ་པ་སྟོང་ཕྲག་ཏུ་དྲི་བཟང་བོའི་ཆུ་དང་།བདུད་རྩི་ལྔས་ཡོངས་སུ་བཀང་སྟེ་མཆོད་པ་ཕུལ།རྒྱང་རིང་བོ་ནས་ཀྱང་སྤོས་དང་མར་མེ་སྟོང་ཕྲག་ཇི་སྙེད་ཀྱིས་མཆོད་པར་བྱས་སོ།།དེར་ཟླ་བ་གསུམ་དུ་དགྲ་བཅོམ་པ་སྟོང་ཕྲག་དྲུག་ཅུ་སྤྱན་དྲངས་ནས་རབ་གནས་མཛད་ཅེས་ལོ་རྒྱུས་དེབ་ཐེར་དག་ལས་གསུངས།རབ་གནས་ཟིན་པ་དང་རྒྱལ་པོ་འཁོར་བཅས་གནོད་སྦྱིན་གྱིས་ཕྲག་པ་ལ་ཁྱེར་ཏེ་ཞག་བདུན་གྱི་ནང་དུ་འཛམ་གླིང་གི་ས་གཞི་ཐམས་ཅད་ཀྱི་མཆོད་རྟེན་ཀུན་ལ་བསྐོར་ཞིང་།མཆོད་པ་ཐམས་ཅད་ལས་བཅུ་འགྱུར་གྱིས་ལྷག་པ་སངས་རྒྱས་དང་ཉན་ཐོས་ཀྱི་མཆོད་རྟེན་ཐམས་ཅད་ལ་གསེར་གྱི་རྒྱན་རེ་རེ་ཕུལ།
བྱང་ཆུབ་ཀྱི་ཤིང་ལ་རིན་པོ་ཆེས་བརྒྱན།ཐམས་ཅད་ཀྱིས་ལྷག་པར་བརྒྱན་པར་བྱས་སོ།།ཞེས་གསུངས།དེ་ནས་རྒྱ་གར་འཕགས་པའི་ཡུལ་དང་རྒྱ་ནག་གི་ཡུལ་དུ་ཆོས་རྒྱལ་མྱ་ངན་མེད་ཀྱིས་བཞེངས་པར་གྲགས་པའི་མཆོད་རྟེན་མང་པོ་ཡོད་ལ།མདོ་སྨད་ཀྱི་ཡུལ་འདིར་ཁྲི་ཀའི་མཆོད་རྟེན་དཀར་པོ་དང་།བིས་མདོ་ར་གཤོང་གི་མཆོད་རྟེན།རྡོ་སྦིས་མཆོད་རྟེན་མཐོང་གྲོལ་ཆེན་མོ།རྒྱའི་མཆོད་རྟེན་དཀར་པོ་སོགས་ཆོས་རྒྱལ་མྱ་ངན་མེད་ཀྱིས་ནུབ་གཅིག་ལ་མཆོད་རྟེན་བྱེ་བ་བཞེངས་པའི་ནང་ཚན་ཤ་སྟག་ཡིན།ཞེས་ལོ་རྒྱུས་ནང་གསལ་བོར་བཀོད་ཡོད།ཀུན་མཁྱེན་ཏྰ་ར་ནྰ་ཐས་མཛད་པའི་《རྒྱ་གར་ཆོས་འབྱུང》དུ་མཆོད་རྟེན་བརྒྱད་ཁྲི་བཞི་སྟོང་ཞེས་ཀྱང་གསུངས།དེ་ཡང་བྲག་དགོན་པ་བསྟན་པ་རབ་རྒྱས་ཀྱིས་མཛད་པའི་《མདོ་སྨད་ཆོས་འབྱུང་》དང་།རྗེ་ཞབས་དཀར་ཚོགས་དྲུག་རང་གྲོལ་གཉིས་ཞལ་མཐུན་པར་སངས་རྒྱས་འོས་སྲུངས་ཀྱི་འཕེལ་གདུང་ལྷུང་བཟེད་གང་ཡོད་ཅེས་གསལ་བོར་གསུངས་ཡོད།གནའ་མིས་བཤད་སྒྲོས་ལ་དགྲ་བཅོམ་པ་ལྔ་བརྒྱས་ཞག་གཅིག་ལ་ས་སྤུངས་མཛད་ནས་བཞེངས་ཞེས་བཤད་ནའང་།ཆོས་རྒྱལ་མྱ་ངན་མེད་ཀྱིས་བཞེངས་པའི་དབང་དུ་བྱས་ན་རྒྱལ་པོ་མ་སྐྱེས་དགྲའི་གདུང་སྐལ་དུ་ཐོབ་པའི་སྟོན་པ་ཤྰཀྱ་ཐུབ་པའི་རིང་བསྲེལ་ཡིན་ངེས་ལ།གྲུབ་ཆེན་བརྒྱད་ཅུ་ཡང་ཡོངས་གྲགས་སུ་ས་ར་ཧ་དང་།ཝུ་ཨུ་པ་སོགས་ཡིན་པས་སྟོན་པ་ཤྰཀྱ་ཐུབ་པའི་བསྟན་པའི་དུས་བྱོན་པ་ཤ་སྟག་ཡིན་པས།རིང་བསྲེལ་འདི་ཡང་སྟོན་པ་ཤྰཀྱ་ཐུབ་པའི་རིང་བསྲེལ་ཡིན་ཞེས་སྨྲས་ན་རང་ཅག་རྣམས་ཀྱི་བློ་ཁ་དང་འཚམས་པར་འགྱུར་རོ།དེ་ལྟར་གོང་གི་མཆོད་རྟེན་བྱེ་བའི་ནང་གི་གཅིག་ནི་མཐོང་གྲོལ་ཆེན་མོ་འདི་ཉིད་ཡིན་ལ།འདི་ཉིད་མཐོང་ཐོས་དྲན་པའི་ཕན་ཡོན་ནི།འདི་མཐོང་ན་ངན་སོང་གི་སྒོ་ཆོད་པ་དང་ལྷ་མིའི་ལུས་ཐོབ།དུག་གསུམ་རང་སར་ཞི་ནས་སྐུ་གསུམ་ལ་སྦྱོར།ཐོས་པའི་ཕན་ཡོད་ནི།བསྐལ་པ་ལྔ་སྟོང་གི་སྡིག་པ་འདག་ཅིང་མི་སྐྱེས་པའི་ཆོས་ལ་བཟོད་པ་ཐོབ།གཞན་ཡང་ལྷག་བསམ་རྣམ་པར་དག་པའི་སྒོ་ནས་ཕྱག་དང་བསྐོར་བ་བྱས་ན་ས་བཅུ་དང་ཀུན་མཁྱེན་ཡེ་ཤེས་ཐོབ།འཕགས་ཡུལ་གྱི་རྡོ་རྗེ་གདན་དང་ཨོ་རྒྱན་མཁའ་འགྲོའི་གསང་མཛོད་སོགས་ཀྱང་འདི་ཉིད་ལས་ལྷག་པ་མེད་པས་མཆོད་རྟེན་འདི་ལ་མཇལ་ན་ཕན་ཡོན་ཆེ་བ་ཡིན།གཞན་ཡང་སྟོན་པ་ཤྰཀྱ་ཐུབ་པའི་ཡེ་ཤེས་ཀྱི་སྣང་ཆ་གདུལ་བྱའི་སྣང་ངོར་དེ་བཞིན་གཤེགས་པའི་ལྷུང་བཟེད་ཁ་སྦུབས་པ་ལྟ་བུའི་མཆོད་རྟེན་གྱི་རྣམ་པར་འཕྲུལ་པ་འདི་ལ་བསམ་པ་དག་པས་གད་དར་དང་ཞིག་གསོ།མར་མེ་དང་ལྷ་བཤོས།ན་བཟའ་དང་སྙན་དར།འཕན་གདུགས་སོགས་མཆོད་པའི་རྣམ་གྲངས་མཐའ་ཡས་པས་མཆོད་ན།བཟང་བོ་སྤྱོད་པའི་སྨོན་ལམ་ལས་བྱུང་བ་ལྟར་ཕན་ཡོན་བསམ་གྱིས་མི་ཁྱབ་པ་ཡོད་ལ།གནས་སྐབས་སུ་ནད་དང་གནོད་པ།ཉེར་འཚེ་མཐའ་དག་ཞི་ཞིང་བསམ་པ་ཐམས་ཅད་འགྲུབ་པ་ཡིན་ནོ།།ལྷོ་རྒྱུད་འཛམ་བུ་གླིང་གི་ས་ཡི་ཆ།བྱང་ཕྱོགས་སྤྱན་རས་གཟིགས་ཀྱི་འདུལ་ཞིང་མཆོག ཨ་མདོ་རྡོ་སྦིས་ས་ཞེས་དབྱངས་སྙན་མཚན།ས་གཞི་ཕུན་ཚོགས་རྡོ་རྗེའི་སྟེགས་བུ་ལ།སྐྱེ་དགུའི་མགོན་དང་དཔུང་གཉེན་དམ་པ་དང་།རང་གཞན་མི་ཕྱེད་དད་པའི་གསོས་སྨན་དུ།ཡེ་ཤེས་སྒྱུ་འཕྲུལ་ཞིང་འདིར་ངོ་མཚར་བའི།མཆོད་རྟེན་མཐོང་གྲོལ་ཆེན་པོར་མངོན་པར་སྤྲུལ།གང་གི་གསང་གསུམ་ནམ་མཁའི་རྗེས་འགྲོ་བ།འཕགས་མཆོག་གིས་ཀྱང་ཇི་བཞིན་མི་ཤོད་ན།བྱིས་པས་ལྟ་ཅི་འོན་ཀྱང་གོང་མ་འགའི།ཡེ་གེ་བཀོད་པ་བཏུས་ཏེ་ཅུང་ཟད་བྲིས།འཁོར་བར་འཁྱམས་པའི་མ་རྒན་ཡོད་དོ་ཅོག དཀོན་མཆོག་སྐྱབས་སུ་བསྟེན་ཏེ་དགེ་བཅུའི་ཆོས།མ་ནོར་ཚུལ་བཞིན་ཉམས་སུ་ལྷུར་ལེན་ཞིང་།མཐར་གྱིས་རྒྱལ་བའི་ས་ལ་རེག་པར་ཤོག།（རྩོམ་སྒྲིག་པ་བདེ་ཆེན་དབང་མོ།）