ཉེ་ཆར། རང་རྒྱལ་གྱི་སྐད་གྲགས་ཆེ་བའི་ཆོས་ལུགས་གནའ་རྫས་རྟོག་ཞིབ་པ་ཝུན་ཡུས་ཁྲེང་དང་གསར་འགོད་པ་མཉམ་དུ་རང་ཁུལ་གྱི་ས་གནས་ཁ་ཤས་སུ་ཆོས་ལུགས་ཀྱི་གནའ་རྫས་རྟོག་བྱེད་སར་སོང་བ་ཡིན། ང་ཚོས་རོང་བྲག་རྫོང་གི་སྤྲོ་སྣང་ཤང་གི་ས་གླང་ཁོག་ཅེས་པའི་གྲོང་སྡེའི་ཟུར་གྱི་ལྷ་ཁང་རྙིང་པ་ཞིག་གི་ནང་གྱང་ལྷ་ཡོད་པ་ཐོས་པས་ཆེད་དུ་ཐེངས་གཉིས་སོང་ཡང་བདག་གཉེར་བ་ཁྱིམ་དུ་བསྡད་མེད་རྐྱེན་མཇལ་རྒྱུའི་གོ་སྐབས་མ་བྱུང་། ཟླ་བ6པའི་ཚེས8ཉིན་རོང་བྲག་རྫོང་ཆོས་ལུགས་སྡེ་ཁག་དང་རིག་གནས་སྡེ་ཁག་གི་མི་སྣའི་སྣེ་ཁྲིད་འོག་ང་ཚོ་ཡང་དུ་གྱང་ལྷའི་དེ་མཇལ་སར་སོང་བ་ཡིན།
སྤྲོ་སྣང་ནས་ཕར་ས་གླང་ཁོག་གི་དགོན་པར་ལྟ་དུས་དགོན་པའི་འདུ་ཁང་དང་དེའི་ཟུར་དུ་ཐོག་བརྩེགས་ལྔ་ཅན་གྱི་ཁང་པ་ཞིག་རལ་ཞིག་ཡོད་པ་ནི་མཁར་རྫོང་ལྷ་ཁང་ཞེས་པ་དེ་ཡིན་པར་རྒྱང་རིང་ནས་མཐོང་ཐུབ། ཁང་བདག་གིས་སྒོ་ཕྱེ་སྐབས་སྒོ་ལྕགས་ཡང་ཡུན་རིང་མ་ཕྱེས་པའི་རྐྱེན་གྱིས་བཙའ་རྒྱག་ནས་ཕྱེ་དཀའ་བར་གྱུར་འདུག  གྱང་ལྷ་ཡོད་ས་ནི་ཐོག་བརྩེགས་གཉིས་པ་ཡིན་ཞིང་། ནང་དུ་སྐར་ཁུང་ཆུང་བས་ཧ་ཅང་མུན་ནག་འཐིབས་འདུག ང་ཚོས་གློག་སྒྲོན་སྤར་ནས་གནའ་རྫས་ཞིབ་རྟོག་པ་ཝུའུ་ཡུས་ཁྲེང་ལགས་ལ་ཞིབ་པར་ལྟ་བཅུག ཁོང་གིས་ཡུན་རིང་ཞིག་ཏུ་བལྟས་རྗེས་གྱང་ལྷའི་ལྡེབས་རིས་དེ་དག་ནི་མིག་སྔར་རྒྱལ་ཡོངས་སུ་ཆེས་ཐོག་མར་མིག་ལམ་དུ་མངོན་པར་མཐོང་ཐུབ་པའི་ཡོན་རྒྱལ་རབས་དུས་འགོའི་ལྡེབས་རིས་ཡིན་པའི་ངོས་འཛིན་གནང་།
  ཝུན་ཡུས་ཁྲེང་ལགས་ནི་རང་རྒྱལ་གྱི་ཆེས་སྐད་གྲགས་ལྡན་པའི་ཆོས་ལུག་ས་གནའ་རྫས་རྟོག་ཞིབ་པ་ཡིན་ཞིང་། སྔོན་ཆོད་ལའོ་ཡམ་ལུང་མིན་བྲག་བརྐོས་ཕུག་པའི་ཞིབ་འཇུག་ཁང་གི་སའོ་ཀྲང་གི་འགན་གནང་མྱངས། རིག་གནས་གསར་བརྗེའི་སྔོན་དུ་པེ་ཅིན་སློབ་ཆེན་དུ་ཆོས་ལུགས་གནའ་རྫས་རྟོག་ཞིབ་སྦྱོང་མཁན་མི་བཞི་ལས་བྱུང་མེད་ཅིང་དེའི་ནང་གི་གཅིག་ཤོས་དེ་ཡིན། མི་ཚོས་ཁོང་ཚོ་བཞི་ལ་རྒྱལ་ཆེན་སྡེ་བཞི་ཞེས་འབོད་ཀྱིན་ཡོད། ཁོང་གིས་སྔོན་རྗེས་སུ་ཆོས་ལུགས་གནའ་རྫས་རྟོག་ཞིབ་སྐོར་གྱི་ཆེད་དེབ་11པར་སྐྲུན་བྱེད་མྱངས་ལ་དཔྱད་རྩོམ་170ཙམ་འབྲི་མྱངས།
མཁས་དབང་ཝུན་ཡུས་ཁྲེང་ལགས་ཀྱིས་རོང་བྲག་མཁར་རྫོང་ལྷ་ཁང་གི་ལྡེབས་རིས་དེ་ད་བར་གནས་ཐུབ་པ་ལ་ཧ་ཅང་གལ་ཆེའི་རིན་ཐང་ལྡན་ཞིང་། འདི་ནི་ཡོན་རྒྱལ་རབས་ཀྱི་དུས་འགོ་རུ་བྲིས་པའི་ལྡེབས་རིས་ཡིན་པས་ད་བར་ཧ་ལམ་ལོ་800ཙམ་གྱི་ལོ་རྒྱུས་ཡོད་འདུག འདི་དང་ཧ་ལམ་དུས་མཉམ་གྱི་ལྡེབས་རིས་ནི་ཧྲན་ཞི་ཞིང་ཆེན་གྱི་ཡུན་ཁྲེང་ཡུང་ལའོ་ཕོ་བྲང་གི་ནང་དུ་ཏའོ་ཆོས་ལུགས་ཀྱི་རི་མོ་ཞིག་ཡོད་ཚུལ་དང་ཏུན་ཧང་ལའང་ལྡེབས་རིས་འདི་འདྲ་ཡོད་རུང་ད་ལྟའང་དུས་ཚོད་གསལ་པོར་ཤེས་ཀྱིན་མེད། མངའ་རིས་སུ་དགོན་པའི་ལྡེབས་རིས་ཡོད་སྐད་ཐོས་ཀྱང་དུས་ཚོད་གཏན་འཁེལ་མ་བྱུང་བས་མིག་སྔར་རྒྱལ་ནང་དུ་རོང་བྲག་གི་མཁར་རྫོང་ལྷ་ཁང་གི་ལྡེབས་རིས་ལས་དུས་ཚོད་སྔར་བའི་དགོན་སྡེའི་ལྡེབས་རིས་ཕལ་ཆེར་མེད་པས་འདི་རྒྱལ་ཁབ་རིམ་པ་དང་པོའི་སྲུང་སྡེ་ཁག་ནང་བཞག་ཆོག་ཆོག་རེད་གསུངས།
ལྷ་ཁང་དེའི་གཙོ་ལྷ་ནི་སྟོན་པ་ཤཀྱ་ཐུབ་པ་དང་། འོད་དཔག་མེད། སྨན་ལྷ་བཅས་དང་། ཤར་ཕྱོགས་སུ་སྤྱན་རས་གཟིགས་ཕྱག་སྟོང་སྤྱན་སྟོང་། དུ་དུང་གུ་རུ་དང་འདྲ་བའི་ལྷ་སྐུ་ནི་ཝུན་ལགས་ཀྱིས་ཆ་ལུགས་དང་ཚོན་མདོག  རྒྱན་གོས་གས་ལ་དཔག་ན་འགྲོ་མགོན་ཆོས་འཕགས་ཡིན་འདུག་ཟེར། འོན་ཏེ། གནས་འགོ་དགོན་པའི་མཆོག་སྤྲུལ་བསྟན་པའི་རྒྱལ་མཚན་གྱིས་ལྷ་དེ་དག་ནི་རྙིང་མའི་བླ་རྒྱུད་ཡིན་པ་འདྲའང་ཟེར། བྱང་ཕྱོགས་སུ་ལྷ་བདུན་ཡོད་པ་གནོད་སྐྱོན་ཐེབས་པས་གསལ་པོར་ངོས་འཛིན་བྱ་མི་ཐུབ། ལྷོ་ཕྱོགས་ཀྱི་སྒོ་འགྲམ་གཡས་གཡོན་དུ་རྒྱལ་ཆེན་སྡེ་བཞི་དང་། དཔལ་ལྡན་ལྷ་མོ། གུར་མགོན་སོགས་ཡུལ་ལྷ་ཆོས་སྐྱོང་མང་པོ་བྲིས་འདུག
ཝུན་ཡུས་ཁྲེང་གིས་གྱང་ལྷ་དེ་དག་གི་ཚོན་མདངས་དང་། བཟོ་བཀོད། ངོ་གཟུགས་དང་རྒྱན་རིས་སོགས་ཀྱི་འབྲི་རྩལ་ནི་ཧ་ཅང་ཕུལ་དུ་བྱུང་ཞིང་ངོ་མཚར་རྨད་དུ་བྱུང་འདུག་ཅེས་བསྟོད་བསྔགས་གནང་ངོ་།
གསར་འགོད་པས་གྱང་ལྷ་དེ་དག་ཡོན་གི་དུས་རབས་ཡིན་པའི་མཚོན་རྟགས་དང་ཁྱད་ཆོས་ཅི་ཡོད་ཅེས་འབྲི་སྐབས། ཝུན་ཡུས་ཁྲེང་ལགས་ཀྱིས་གཅིག་ནི་ལྷའི་དབུ་ཡི་རིགས་ལྔ་དེ་རྩེ་གསུམ་ལས་མེད་པ་དང་། གཉིས་ནི་ལྷ་སྐུའི་མཛུབ་མོ་གདན་ལས་མར་བུད་ཡོད་པ། གསུམ་ནི་ལྷའི་རྒྱབ་ཡོལ་གྱི་རྒྱན་དྲུག་ལས་རྒྱན་ལྔ་མ་གཏོགས་མེད་པ་སོགས་རྣམ་པ་དུ་མའི་ཐོག་ནས་ཡོན་རྒྱལ་རབས་ཀྱི་དུས་འགོ་ཡིན་པ་ཤེས་སླ་ཟེར།
ཐེངས་འདིར་རང་ཁུལ་ས་གནས་མང་པོ་རུ་རྟོག་ཞིབ་གནང་སྐབས་ཡོན་རྒྱལ་རབས་སྐབས་ཀྱི་ལྡེབས་རིས་མང་དག་རྙེད་ཅིང་། དེ་ལས་སྡེ་དགེའི་ཐང་རྒྱལ་ལྷ་ཁང་གི་སྒོ་ཤུབ་རི་མོ་དེ་ཡོན་རྒྱལ་རབས་ཀྱི་དུས་དཀྱིལ་ཙམ་ཡིན་པ་དང་། རོང་བྲག་གི་གླིང་ཆེན་དགོན་གྱི་ཐོག་རྩེག་གཉིས་པའི་ནང་གི་ལྡེབས་རིས་དེའང་ཡོན་རྒྱལ་རབས་ཀྱི་དུས་དཀྱིལ་ཙམ་ཡིན་པ། འོག་གི་ལྷ་ཁང་ལྡེབས་རིས་ནི་ཡོན་རྒྱལ་རབས་ཀྱི་མཇུག་ཙམ་དུ་ཡིན་པའི་ངོས་འཛིན་བྱས་ཡོད། མ་ཚད་སྡེ་ཐང་རྒྱལ་ལྷ་ཁང་གི་སྒོ་འགྲམ་དང་རོང་བྲག་གླིང་ཆེན་དགོན་གྱི་གཙོ་ཁང་གི་སྒོ་འགྲམ་དུ་འགྲོ་མགོན་ཆོས་འཕགས་ཀྱིས་གསར་བརྩམས་གནང་བའི་ཧོར་ཡིག་གསར་མ་མཐོང་རྒྱུ་ཡོད་པ་རེད།