གྲོང་ཁྱེར་ལྷ་སའི་ཉེ་འདབས་སྟག་རྩེ་རྫོང་ཁོངས་བྲག་ཡེར་པ་ནི་གྲོང་ཁྱེར་ལྷ་ས་ནས་རྩིས་པའི་བྱང་ཤར་མཚམས་ཀྱི་སྤྱི་ལེ་༤༥ཙམ་གྱི་སར་གནས་ཤིང་། ལོ་ངོ་ཆིག་སྟོང་སུམ་བརྒྱ་ལྷག་ཙམ་གྱི་ལོ་རྒྱུས་ཡོད་པ་དང་སྔོན་བྱོན་སྐྱེས་བུ་དམ་པ་དུ་མས་བྱིན་གྱིས་རླབས་པའི་གནས་མཆོག་ཁྱད་པར་ཅན་ཞིག་ཡིན་པར་བརྟེན་ཕྱོགས་འགྲུལ་དད་མཇལ་ཞུ་མི་མང་ཞིང་། དེ་སྔ་ས་གནས་སྲིད་གཞུང་གི་རྩེ་ཡིག་ཚང་ལས་ཁུངས་ནས་ཐད་ཀར་འཛིན་སྐྱོང་བྱེད་པའི་གལ་ཆེའི་དགོན་གནས་གྲས་ཤིག་ཡིན།
     དེ་ནི་སྤྱི་ལོའི་དུས་རབས་བདུན་པའི་ནང་བཙན་པོའི་བཙུན་མོ་མོང་བཟའ་ཁྲི་ལྕམ་ཡུམ་སྲས་ཀྱི་རྟེན་སྐལ་དུ་བཞེངས་ཤིང་། བྲག་ཡེར་བའི་བྲག་ཕུག་ལ་ཐུན་མོང་མིན་པའི་ངོ་མཚར་ལྡན་པ་དང་། བྲག་ཕུག་རེ་རེར་ལྷ་སྒྲུང་ལྟར་གྱི་སྙན་འཇེབས་ལྡན་པའི་ཤོད་རྒྱུན་རེ་ཡོད། དེའི་ནང་ནས་གྲགས་ཆེ་ཤོས་ཤིག་ཐབ་སྐས（ཉི་མ་ཕུག་ཡང་ཟེར）དང་ཟླ་བ་ཕུག་ནི་སློབ་དཔོན་པདྨ་འབྱུང་གནས་དང་ལྷ་ལྕམ་གཉིས་དང་། གུ་རུ་མཚན་བརྒྱད་སོགས་ཀྱི་སྐུ་བརྙན་ཡོད། ཆོས་རྒྱལ་བྲག་ཕུག་ནི། ཆོས་རྒྱལ་སྲོ་བཙན་སྒམ་པོའི་སྒྲུབ་ཕུག་ཡིན། དེའི་ནང་རིག་འཛིན་གུ་རས་བཞེངས་པའི་སྐུ་རྒྱུ་ཤར་ལི་ཡིན་པའི་སྤྱན་རས་གཟིགས་ཕྱག་སྟོང་སྤྱན་སྟོང་གི་སྐུ་བརྙན་དང་། དེའི་ཕྱག་ན་རྗེ་བཙུན་སྒྲོལ་མའི་སྐུ་བརྙན་གསུང་བྱོན་ཡིན་ཟེར་བ་གཅིག་སོགས་ཡོད། ལྷ་ལུང་དཔལ་རྡོར་གྱི་སྒྲུབ་ཕུག་དུ་ལྷ་ལུང་དཔལ་རྡོར་དང་། བཻ་རོ་ཙ་ནའི་འདྲ་སྐུ་ཡོད་པ་དང་། དེའི་གཞོགས་སུ་མགོན་པོ་བེར་སོགས་ཀྱི་འདྲ་སྐུ་ཡང་ཡོད།
   ཡེར་པའི་དྲིལ་བུ་ཆེན་པོ་དེ་ནི་ཡེར་པར་ཡོད་པའི་ཆེས་སྔ་བའི་རྩ་ཆེན་རིག་དངོས་མང་དུ་ཡོད་པའི་ནང་ནས་གཅིག་ཡིན་ཞིང་། དྲིལབུ་དེའི་ཐོག་རྒྱལ་བ་རྣམས་ཀྱི་དམ་པའི་ཆོས་འཛིན་ཅིང་། །བྱང་ཆུབ་སྤྱོད་པ་ཀུན་ཏུ་སྣང་བར་བྱེད། བཟང་སྤྱོད་པ་རྣམ་པར་སྦྱང་ཡང་། མ་འོངས་བསྐལ་བ་ཀུན་ཏུ་སྤྱད་པར་བགྱི། ཞེས་འཁོད་ཡོད་པ་མ་ཟད། སྣེ་པད་འདབས་ཀྱི་དབྱིབས་ལ་འདབ་མ་རེ་རེའི་ཐོག་བརྡུངས་ན་སྐད་མི་འདྲ་བ་རེ་ཐོན་རྒྱུ་ཡོད་པའི་ངོ་མཚར་ཅན་ཞིག་ཡིན་པའི་ལོ་རྒྱུས་ཟུར་དུ་ཡོད། ཕལ་ཆེར་བཙན་པོ་ཁྲི་སྲོང་ལྡེ་བཙན་གྱིས་སངས་རྒྱས་ཀྱི་བསྟན་པ་རྒྱ་ཆེར་སྤེལ་རིང་དྲིལ་བུ་འདི་ལུགས་སུ་བླུགས་པ་ཞིག་ཡིན་པར་མངོན། གནས་བཅུ་ལྷ་ཁང་གི་ནང་དུ་ཡོད་པའི་གནས་བརྟན་བཅུ་དྲུག་ནི། དུས་རབས་བཅུ་པའི་མཇུག་ཏུ་བླ་ཆེན་དགོངས་པ་རབ་གསལ་གྱི་སློབ་མ་ཀླུ་མེས་འབྲོམ་ཆུང་གིས་ཁྲང་ཨན་རྒྱལ་སར་ཕེབས་ནས་གོང་མ་ཐང་ཐའི་ཙུང་གིས་གནས་བརྟན་དངོས་སུ་སྤྱན་དྲངས་སྐབས་བཞེངས་པའི་འདྲ་འབག་ལ་དཔེ་བཤུས་མཛད་དེ་ལྷ་སར་ཕེབས། དེ་ལ་དཔེ་བྱས་རེ་བྲག་ཡེར་པའི་གནས་བརྟན་བཅུ་དྲུག་གི་འདྲ་འབག་བཞེངས་པ་དེས་བོད་ཀྱི་གཙུག་ལག་ཁང་མང་པོར་འཕེལ་རྒྱས་བྱུང་། རྟེན་འབྲེལ་ཕུག་ནི་ཇོ་བོ་རྗེ་དཔལ་ལྡན་ཨ་ཏི་ཤ་བོད་དུ་མ་ཕེབས་གོང་བསྟན་པ་སྔ་དར་གྱི་དུས་འགོར་ཁམས་ནས་ཕེབས་པའི་དམར་སྟོད་ཆོས་ཀྱི་འབྱུང་གནས་ཀྱིས་བཞེངས། ནང་དུ་གཙོ་བོ་བྱམས་པ་དང་འཁོར་སེམས་དཔའ་དྲུག་དང་། སེམས་མ་དྲུག  སྒོ་སྲུང་རྟ་མགྲིན་བཅས་ཡོད་པ་ཤིན་ཏུ་བྱིན་ཅན་བརྩིས། བྲག་ཡེར་པའི་རྟེན་གཙོ་བོ་ནི་ཡེར་པའི་དཀར་ཆག་ཏུ་འཁོད་པ་ལྟར་ན། སྐུའི་རྟེན་སྤེའུ་དམར་སེར་གཉིས་དང་། གསུང་གི་རྟེན་ཡིག་དྲུག་འབུམ། ཐུགས་ཀྱི་རྟེན་མཆོད་རྟེན་གསུམ། ཆོས་སྐྱོང་རྟེན་ཤུག་པའི་ནགས་ཚལ། ཏིང་ངེ་འཛིན་སྒོམ་པ་ལ་འོད་ཀྱི་བྲག་ཕུག་བརྒྱ་རྩ་བརྒྱད་སྤྲུལ། འཕྲིན་ལས་ཀྱི་རྟེན་དུ་རི་བོ་སྒྲོལ་མའི་སྐུར་སྤྲུལ་ཡོད། ཡེར་པ་གྲྭ་ཚང་ནི། རབ་བྱུང་བཅུ་གཅིག་པའི་མེ་ཕག（）༡༦༤༧ལོར་ཏཱ་ལའི་བླ་མ་སྐུ་ཕྲེང་ལྔ་པས་དགའ་ལྡན་གསང་སྔགས་ཡང་རྩེ་ཞེས་པའི་དགེ་ལུགས་དགོན་པ་ཕྱག་བཏབ། ཕྱིས་ཡེར་པ་གྲྭ་ཚང་ཟེར། རབ་བྱུང་བཅུ་དྲུག་པའི་ས་ཕག་ལོའི་གོང་གྲྭ་གྲངས་༡༠༨ཙམ་ཡོད་པ་དང་། ད་དུང་དུས་རབས་བཅོ་བརྒྱད་པར་དགའ་ལྡན་ཁྲི་ཐོག་ང་གཅིག་པ་རྟ་འོན་དཔལ་ལྡན་གྲགས་པས་བཞེངས་པའི་རྒྱུད་སྟོད་ཀྱི་ཚོགས་ཁང་ཡང་ཡོད། ལོ་རེའི་བོད་ཟླ་བདུན་པའི་ཚེས་བཅུའི་ཉིན་ཡེར་པ་གྲྭ་ཚང་ནས་ཡེར་པ་ཚེས་བཅུ་ཞེས་གནས་དེར་དམིགས་བསལ་གྱི་དུས་ཆེན་ཞིག་བྱེད་སྲོལ་ཡོད་ལ་དེ་སྐབས་ལྷ་ས་ཁུལ་དང་། ཉེ་འཁོར་གྱི་ཞིང་འབྲོག་མང་ཚོགས་བཅའ་འདུ་འཛོམས་ཀྱིས་དེ་ཉིན་ཇོ་བོ་རྗེ་ཨ་ཏི་ཤའི་འདྲ་སྐུ་གཙོ་བཞུགས་ཀྱི་ཐང་ཀ་འགྲེམས་པ་དང་། ཨ་ཏི་ཤའི་གསོལ་སྡེར་ཀོ་སྡེར་ནང་ཨ་ཏི་ཤའི་འདྲ་སྐུ་གསེར་བྲིས་ཡོད་པ་སོགས་ལ་དད་འཇལ་ཞུ་བ་དང་། ལྷ་རིར་བསང་གསོལ། དགོན་པའི་གར་འཆམ་ལ་བལྟ་བ་བཅས་བྱེད་སྲོལ་ཡོད་ལ་སྐབས་དེར་ལོ་རེས་མོས་ཀྱིས་ལྷ་སའི་ལྕགས་པོ་རི་དང་སྨན་རྩིས་ཁང་གི་སྨན་སློབ་དགེ་སློབ་རྣམས་སྨན་འཐོག་ཏུ་ཕེབས་པ་སོགས་གནང་སྲོལ་འདུག   དེ་ཡང་རིག་གནས་གསར་བརྗེའི་སྐབས་གཏོར་སྐྱོན་ཚབ་ཆེ་ཕོག་སྟེ་གྱང་ཧྲུལ་དུ་སོང་ཡང་གནས་མཆོག་འདི་ཉིད་ཀྱི་བསྟན་པ་སྔ་དར་དང་ཕྱི་དར་ཚང་མའི་ནང་གལ་ཆེའི་གནས་བབ་བཟུང་ཡོད་པ་དང་། བོད་རྒྱུད་ནང་བསྟན་གྱི་གནས་མཆོག་རྙིང་པའི་གྲས་ཤིག་ཡིན་པས་ད་བར་རིམ་གྱིས་ཉམས་གསོ་བྱས་ཏེ་ཡུལ་སྐོར་བ་དང་གནས་མཇལ་བ་དུ་མ་མཐའ་བཞིའི་ཡུལ་གྲུ་ཁག་ནས་གནས་འདིར་ཡོང་བཞིན་ཡོད་པ་བཅས་སོ། །