མདོ་ཁམས་གཡུ་ཁོག་གི་མཛེས་ལྗོངས་སྤྱིའི་ངོ་སྤྲོད།

གཡུ་ཁོག་ཡི་དམ་རྡོ་རྗེ།        2020-06-24

མདོ་ཁམས་གཡུ་ཁོག་གི་མཛེས་ལྗོངས་སྤྱིའི་ངོ་སྤྲོད།

   ལྷ་མོ་དྲི་མ་མེད་པའི་འོད་ལུང་བསྟན་པའི་མདོ་ལས་གདོང་དམར་ཅན་གྱི་ཡུལ་ཞེས་གསུངས་པ་འདི་ལ་ཤར་རྒྱལ་མོ་ཚ་བ་རོང་། ལྷོ་མོན་ཁ་གྲོ་མ་ནགས་ཀྱི་རོང་། ནུབ་མི་ཡུལ་རྫ་ཡི་རོང་། བྱང་སྐྱིད་ཡུལ་གངས་ཀྱི་རོང་སྟེ་བོད་ཀྱི་རོང་ཆེན་རྣམ་བཞིར་གྲགས་པའི་ཡ་གྱལ་ཤར་རྒྱལ་མོ་ཚ་བ་རོང་གི་སྟོད་ཕྱོགས་ན། གཡུ་སྟག་མོ་འཕྲེད་ཉལ་སྨར་གྱི་ལག །བུ་དཔའ་བོ་མི་སྐྱེས་ཀ་མེད་རེད། །ཅེས་གནའ་བོའི་ངག་སྒྲོས་སུ་གྲགས་པའི་ཡུལ་གྲུ། ས་དབྱིབས་གཅན་གཟན་དབྱི་དཀར་གྱི་པགས་པ་བརྐྱངས་པ་དང་འདྲ་བས་དབྱི་ཁོག་གམ་གཡི་ཁོག གླིང་གེ་སར་རྒྱལ་པོས་ས་བཅུད་གཡང་རྟེན་དུ་གཡུ་ཕུག་རོན་ཙམ་པདྨ་རྣམ་པར་བཀྲ་བའི་གནས་སུ་གཏེར་དུ་སྦས་པས་སམ། ཡང་ན། རིན་ཆེན་གཡུའི་ཕོ་བྲང་ལ་མངའ་དབང་མཛད་པའི་བོད་ཁམས་སྐྱོང་བའི་བརྟན་མ་ཆེན་མོ་ལྷ་སྨན་རྡོ་རྗེ་གཡུ་ཡི་སྒྲོན་མས་ཀུན་ནས་སྐྱོང་བའི་ས་ཕྱོགས་ཡིན་ཕྱིར་གཡུ་ཁོག་ཞེས་བཤད་རྒྱུན་དང་འབྲི་ཚུལ་གསུམ་དུ་བྱུང་བའི་ཡུལ་གྲུ་འདི་ནི། གངས་ལྗོངས་མདོ་དབུས་ཁམས་གསུམ་དུ་ཕྱེ་བ་ལས་ཁམས་ཀྱི་ཕྱོགས་སུ་གཏོགས་ཏེ། གྱི་ལུང་མཁས་གྲུབ་རྣམ་གཉིས་ཀྱིས་མཛད་པའི་བོད་མི་བུ་གདོང་དྲུག་གི་རུས་མཛོད་མེ་ཏོག་སྐྱེད་ཚལ་དུ། ཁམས་ཕྱོགས་ཀྱི་གེ་འཕན་གཡུ་རྩང་སྒེགས་གསུམ། ཞེས་སོགས་འབྱུང་བས་སོ། །

མདོ་ཁམས་གཡུ་ཁོག་གི་མཛེས་ལྗོངས་སྤྱིའི་ངོ་སྤྲོད།

  དེ་ཡང་ཤར་ན་མདོ་མུར་ཤོག་གསུམ། ལྷོ་ན་མི་ཉག་དང་ཏྲེ་ཧོར། ནུབ་ན་ལི་གཙང་སྟོད་སྨད། བྱང་ན་རྒྱལ་རོང་ཁྲོ་སྐྱབས་བཅས་ཀྱིས་བསྐོར་བའི་ཡུལ་དབུས་ན་མངོན་པར་མཛེས་པའི་མ་བཅོས་རང་བྱུང་ལྷུན་གྱིས་གྲུབ་པའི་མཛེས་ལྗོངས་འདིའི་ཆགས་ཚུལ་ནི། གཡུ་ལུང་རིང་མོའི་སྟོད་ན་སྨུག་སྤྲིན་གྱིས་མགུལ་བ་དཀྲིས་པའི་གངས་ཀྱི་རི་བོའི་དབུ་རྩེ་མཐིང་སྔོན་ནམ་མཁའི་དབྱིངས་སུ་སྙེགས་པའི་མཐའ་སྐོར་དུ་རི་ཕྲན་མང་པོས་བསྐོར་བ། གཡུ་སྨད་དུ་རྒྱ་ཤོད་ཞིང་གི་རེའུ་མིག་རྣམ་པར་བཀྲ་བ་ལས་འབྲུ་རིགས་སྣ་ཚོགས་ཀྱི་འབྲས་བུ་གཡུར་དུ་ཟ་བ། ཕྱོགས་མཚམས་རྣམས་སུ་རྔམ་ཞིང་བརྗིད་པའི་ནགས་རི། མཐོ་ལ་གཟར་བའི་རྫ་རི་དང་བྲག་རི། འཇམ་ལ་ཟླུམ་པའི་སྤང་རི་དང་དེའུ་དུ་མ་སྤེལ་མར་གནས་པའི་བར་མཚམས་རྣམས་སུ། གཡུའི་དགའ་སྤྲོའི་ཐང་། གཡུ་མཁར་རལ་གྲིའི་ཐང་། ཆུ་ལུང་ཐང་། རྒྱུ་ཡངས་ཐང་། ཆོས་དུང་ཐང་། ཆོས་ཁྲིའི་ཐང་། བྲག་དམར་བོལ་གོང་ཐང་། སྒེགས་ཀྱི་ཆུ་ཐག་ཐང་། བརྡར་རྡོའི་ཐང་། འཁྱིལ་ཆེན་ཤོ་རྡེའུ་ཐང་། ཨུག་ཚང་དཀྱིལ་རུའི་ཐང་། ཏཱ་རེའི་རྒྱལ་ཐང་སོགས་ཐང་ཆེན་དང་ཐང་ཆུང་དུ་མས་མཛེས་པ། གཡུ་ལུང་རིང་མོའི་གཡས་ཕྱོགས་ཀྱི་མཐའ་སྐོར་དུ་ཆུ་དཀར་ཁོག་དང་ཆུ་དབར་ཁོག ས་དམར་ཁོག འཁྱིལ་ཆེན་སྟོད་སྨད། ཤ་འབྲུག་རྒྱས་གསུམ། ནེའུ་ཆེ་ཆུང་། གསེས་དང་ཙི་རུ། ཀི་ལོ་དང་རྨ་ལུང་། ཉིན་ཡག་དང་ཁོ་ཁོ། གཡུ་འབྲུག་ཆེ་ཆུང་སོགས་དང་། གཡོན་ཕྱོགས་ཀྱི་མཐའ་སྐོར་དུ་ཆུ་དམར་ཁོག་དང་ཆུ་ལུང་ཁོག ཨ་སེན་ཁོག་དང་བེའུ་ཁོག སྒེགས་ཁོག་དང་ཇུ་ནུ་རི་གསུམ། དབྱི་འ་དང་རྒྱ་འུ། སྤ་ལུང་དང་སྒ་ནུབ། རྒྱབ་ཕྱོགས་སུ་ཨུག་ཚང་དང་རྟའུ་ཁ་ལུང་། ངར་དང་རི་ཟིབ། རྡོ་རིང་དང་རྫེས། རྒ་ནུབ་སོགས་གཡུ་ལུང་རིང་མོར་མདོ་འབྲེལ་བ་དང་མགོ་འབྲེལ་བའི་རི་ལུང་ཤིན་ཏུ་མང་བ། སྔོ་ལྗང་གཡུ་ལོས་སྤྲས་པའི་ཐང་ཤིང་དང་ཤུག་པ། བེ་ཤིང་དང་སྲ་ཤིང་། སྟག་པ་དང་སྟག་མ། ཉ་བྲུག་དང་བ་ལུ། སུར་ཤིང་དང་གླང་མ། ལྕང་དཀར་སོགས་དྲོ་འཇམ་ཉི་མའི་ཟེར་སྣང་སྤྱི་བོས་ལེན་ཅིང་། དྭངས་བསིལ་བདུད་རྩིའི་རྒྱུན་བཟང་རྐང་པས་འཐུང་བའི་སྣ་བརྒྱའི་ལྗོན་ཤིང་གི་ཚང་ཚིང་འཁྲིགས་པའི་གསེབ་རྣམས་སུ།མི་རྒོད་དང་། སྟག གཟིག དོམ། དྲེད། འཕར་བ། སྤྱང་ཀི གཡི་དཀར། གཡི་དམར། གཡི་སྔོན།  གུང་། ཝ། གསའ་སོགས་སྡེར་ཆགས་གཅན་གཟན་རྣམས་ཀྱིས་རྔམ་པའི་ང་རོ་སྒྲོག་པ། དེ་བཞིན་དུ་ཤ་སྐྱ་དང་ཤ་ནག གླ་སྐྱ་དང་གླ་ནག གནའ་བ་དང་དགོ་བ། ཁ་ཤ་དང་ཤ་རྒྱ།   ར་རྒོད་དང་ཕག་རྒོད།  རི་བོང་དང་སྤྲེའུ་ལ་སོགས་པ་ཡང་དལ་གྱིས་རྒྱུ་ཞིང་རང་བྱུང་རྩྭ་ཆུའི་བཅུད་ལ་རོལ་བ། རྒོད་ཐང་དཀར་དང་ཐང་ནག གླག་ནག་རོག་ཆུང་དང་གླག་ཁྲ། ཁྲ་དང་ཕོ་རོག བྱ་ཆེན་གོ་བོ་དང་འོལ་བ། ཕུག་རོན་དང་སྐྱ་ག་ཁྲ་མོ་སོགས་འཕུར་རྩལ་ཆེ་བའི་བྱ་རིགས་རྣམས་མཁའ་ལ་རྩེན་པ། ཁུ་བྱུག་དང་མཐིང་རིལ། བྱ་དཀར་དང་གོང་མོ། འཇོལ་མོ་དང་ཅོ་ཀ་སོགས་རིགས་མི་གཅིག་པའི་འདབ་ཆགས་དུ་མ་ཞིག་གིས་མེ་འབྲས་ལོ་མས་དུད་པའི་ལྗོན་ཚལ་ན་དྲུག་འགྱུར་མགྲིན་པའི་དབྱངས་སྙན་འཁྲོལ་བ། ནེའུ་གསིང་དང་སྤང་ལྗོངས་རྣམས་སུ་དཀར་དམར་མེ་ཏོག་གི་ཕྲ་ཚོམ་རྣམ་པར་བཀྲ་ཞིང་སྣ་ཚོགས་རྩི་སྨན་གྱི་དྲི་བསུང་ཕྱོགས་སུ་འཕྲོ་བ། མཁའ་དབྱིངས་ཆུ་འཛིན་གྱི་གུར་ཁང་ནས། སྦྲང་ཆར་སིལ་མའི་མེ་ཏོག་འཇོ་ཞིང་། ཁ་ཏོག་ལྔ་ལྡན་གྱི་འཇའ་ཟེར་འཁྱིལ་བ། གཡུ་ཁྲོམ་གངས་ཀྱི་རི་བོའི་གཡས་དང་གཡོན་ལས་འབབ་པའི་དྭངས་བསིལ་གཡུ་ཆུ་སྔོན་མོ་ཆུ་ཕྲན་དུ་མའི་རམ་འདེགས་དང་བཅས་ཏེ་ལྷོ་ནས་བྱང་དུ་འབབ་བཞིན་སྒེགས་ཆུ་དང་འབྲེལ་ཞིང་གཡུ་ལུང་རིང་མོའི་གཞུང་བརྒྱུད་ནས་རྡོ་གསེར་གྱི་ཆུ་དང་འདྲེས། དེ་ནས་ཤར་ཕྱོགས་རྒྱལ་མོ་རྔུལ་ཆུའི་ཀླུང་ཆེན་པོ་དང་བསྡོངས་ནས་དལ་གྱིས་བཞུར་ཏེ་སི་ཁྲོན་ཡེས་པེན་(宜宾)ཞེས་པའི་ས་ནས་འབྲི་ཆུ་དང་གཅིག་ཏུ་འདྲེས་ཤིང་རྒྱ་ནག་གི་ཞིང་ཆེན་འགའ་བརྒྱུད་ནས་མཐའི་རྒྱ་མཚོར་འབབ་པ། གཡུ་མཚོ་དང་གསེར་མཚོ་སོགས་གཏན་འཁྱིལ་གྱི་མཚོ་དང་མཚེའུ།  ཆུ་བོ་རྣམས་སུ་མཚོ་གླང་དང་མཚོ་ལུག ཉ་ཁྱེའུ་དང་གསེར་ཉ། ཆུ་སྲམ་སོགས་ཆུ་གནས་སྣ་ཚོགས་བག་ཡངས་སུ་གནས་པ། ངང་པ་དང་ངུར་བ། ཆུ་བྱ་དང་ཆུ་བྱེའུ་སོགས་ཀྱིས་མགྲིན་གླུ་དར་དིར་སྒྲོག་བཞིན་རྐྱལ་དུ་རྩེན་པ། གཞན་ཡང་འབྱུང་འཁྲུགས་ནད་ཀྱི་ཟུག་རྔུ་འཇོམ་ཞིང་ལུས་སེམས་ལ་བདེ་དགའ་སྟེར་བའི་རང་བྱུང་ཆུ་ཚན་གྱི་ཁྲུས་རྫིང་དྲོ་གྲང་སྙོམ་པ་དུ་མ་ཕྱོགས་ཀུན་ན་འཁྱིལ་བ། རུ་རྟ་དང་མ་ནུ། ཏང་ཀུན་དང་ལྕུམ་རྩ། རྫ་ཡུང་དང་ཧོང་ལེན། ཤང་དྲིལ་དང་ཅོང་ཞི་སོགས་ས་སྟེང་དང་ས་འོག་ན་གནས་པའི་སྨན་གྱི་རིགས་ནི་ཚད་གཟུང་དུ་མེད་པ་དང་། ཁྱད་པར་གསེར། དངུལ། ཟངས། ལྕགས་ལ་སོགས་པའི་གཏེར་རྫས་སྣ་ཚོགས་ཀྱང་ཡུལ་གཞན་ལས་མང་བར་མཆིས་སོ།།

མདོ་ཁམས་གཡུ་ཁོག་གི་མཛེས་ལྗོངས་སྤྱིའི་ངོ་སྤྲོད།

    དེ་ལྟར་འགྲོ་བའི་ཡིད་སྣང་དབང་མེད་དུ་འཕྲོག་པར་བྱེད་པའི་མ་བཅོས་རང་བྱུང་གི་མཛེས་ལྗོངས་ཆེན་པོ་དེ་ནི་དཔྱིད་གསུམ་སྔོ་ལྗང་གི་ལོ་མ་རྒྱས་པས་གཡུ་ཡི་མདོག་ལྟར་ལྗང་ལྟེམ་མེ། དབྱར་གསུམ་མེ་ཏོག་སྣ་ཚོགས་ཀྱི་འདབ་མ་བཞད་པས་ཟ་འོག་གི་ཁ་ཕྱེ་བ་ལྟར་ཁྲ་ལམ་མེ། སྟོན་གསུམ་སྐྱེ་དངོས་རྣམས་གསེར་མདོག་གི་རང་བཞིན་དུ་འགྱུར་བས་སེར་ཤིགས་སེ། དགུན་གསུམ་ཁ་བའི་མེ་ཏོག་གིས་མཛེས་པར་བཀླུབས་པས་དཀར་ལམ་མེར་འགྱུར་བ་སོགས་དུས་བཞིའི་རྣམ་འགྱུར་གསལ་བ། དྲོ་གྲང་དང་ཐན་ཞོད་སྙོམ་པ། ས་ཆུའི་བཅུད་བཟང་ཞིང་འབྲུ་རིགས་སྣ་ཚོགས་སྨིན་པ། གདུག་པའི་གཅན་གཟན་དང་འབུ་སྲིན་སོགས་ཉུང་བ། མི་རྣམས་རང་བཞིན་གྱིས་གཤིས་རྒྱུད་འཇམ་ཞིང་དྲང་བ། ལས་འབྲས་ཀྱི་བླང་དོར་མ་མཐར་ཡང་ཕྱོགས་ཙམ་རེ་ཤེས་པ་སྟེ། སྒྲུབ་རྒྱུད་བསྟན་པའི་མངའ་བདག་ཀརྨ་སྐུ་ཕྲེང་བཅུ་པ་ཆོས་དབྱིངས་རྡོ་རྗེས་མཛད་པའི་རྟོགས་བརྗོད་ཀ་ལ་པིང་ཀའི་ལམ་གླུ་རུ། རྡོ་རྗེ་གཡུ་སྒྲོན་གྱི་གངས་རིའི་ཆུ་རྒྱུན་བསིལ་མ་གྱ་གྱུར་འབབ་པ། རྩྭ་སྔོན་གསར་པ་དང་། མེ་ཏོག་བསིལ་མས་ས་གཞི་ཀུན་མཛེས་པར་བྱས་པ། གཙང་ཞིང་ཡིད་དུ་འོང་བའི་ས་ཕྱོགས་ན། རེ་བའི་ཁྱིམ་པ་དད་པའི་སེམས་ཀྱི་རང་བཞིན་གསེར་ལྟར་བཟང་བ་བརྒྱ་ཕྲག་དུ་མ་ཞེས་ཆེད་དུ་བསྔགས་པ་བརྗོད་པའི་ཡུལ་གླིང་དེ་ན་རྟ་ནོར་ལུག་གསུམ་འཚོ་སྐྱོང་བྱེད་ཅིང་མར་ཆུར་འོ་ཞོའི་གཏེར་ཁ་འབྱེད་པའི་འབྲོག་སྡེ་དང་། རྨོ་རྐོ་སོ་ནམ་གྱི་ལས་ལ་གཞོལ་ཞིང་འབྲུ་རིགས་སྣ་ལྔའི་གཏེར་མཛོད་སྤུང་བའི་རོང་སྡེ་སྟེ་ལས་ལ་བརྩོན་ཞིང་དཔའ་ངར་ལྡན་པ། མི་གཞི་བཟང་ཞིང་ཆོས་ལ་དད་པའི་ལྷ་སྡེ་དཀར་པོ་ཞིག་ཕྱོགས་དང་ཕྱོགས་སུ་འབྲས་དཀར་གྱི་ཚོམ་བུ་བཀོད་པ་བཞིན་དུ་གནས་སོ།།

མདོ་ཁམས་གཡུ་ཁོག་གི་མཛེས་ལྗོངས་སྤྱིའི་ངོ་སྤྲོད།

    དེ་ཡང་གཡུ་ལུང་རིང་མོའི་ཆགས་དབྱིབས་གཅན་གཟན་གཡི་དཀར་གྱི་པགས་པ་བརྐྱངས་པ་དང་ཇི་ལྟར་མཚུངས་ཞེ་ན། དབྱི་སྙིང་ལ་ཁ་ནི་གཡིའི་སྙིང་ཀ་དང་། དགྲ་བླའི་རི་རྒྱུད་གཡིའི་མགོ། ཆུ་དཀར་ཁོག་དང་། ཆུ་དམར་ཁོག་གཉིས་གཡིའི་ལག་པ་གཉིས། རལ་གྲིའི་ཐང་དང་ཆོས་ཁྲི་ཐང་གཡིའི་ཁོག་པ། སྒེགས་ཁོག་དང་། འཁྱིལ་ཆེན་ཁོག་གཉིས་གཡིའི་རྐང་པ་གཉིས། ཁྲོ་མདའ་མན་ཆད་ནི་གཡིའི་མཇུག་མའི་ཚུལ་དུ་གནས་པར་གྲགས་སོ།།


  • ལེ་ཚན་སྔོན་མ།:བོད་ཀྱི་ནང་འབབ་ཆུ་བོ་ཁག
  • ལེ་ཚན་རྗེས་མ།:བོད་ཀྱི་ནང་འབབ་ཆུ་བོ་ཁག
  • དོ་སྣང་ཆེ་བའི་རྩོམ།