མདོ་ཁམས་ཟེར་བ་ནི་བོད་ཆོལ་ཁ་གསུམ་གྱི་ནང་ཚན་ཕྱི་མ་གཉིས་ལ་མདོ་ཁམས་ཟེར་ཞིང་།མདོ་སྟོད་དེ་ལ་ནང་གསེས་ཀྱིས་ཕྱེས་ན།ཆུ་བཞི་དང་།སྒང་དྲུག་ཏུ་ཕྱེ་བ་ཡིན་ལ།མདོ་སྨད་ནི་རྨ་ཆུ་ལྷོ་བྱང་བརྒྱུད་དེང་སང་མཚོ་སྔོན་དང་།ཀན་སུའུ་ཞིང་ཆེན་གྱི་མངའ་ཁོངས་རྣམས་ལ་ཟེར།མདོ་སྟོད་མདོ་སྨད་གཉིས་བསྡོམས་པར་མདོ་ཁམས་ཞེས་བཤད་སྲོལ་ཡོད་ཅེས་དུང་དཀར་ཚིག་མཛོད་ཆེན་མོ་ལས་གསལ།ཁམས་ཞེས་པའི་ཐ་སྙད་འདི་ལ་གོ་དོན་མང་ཙམ་ཡོད་པ་ཡིན་ལ།
  འདིར་གླེང་བའི་ཁམས་ཞེས་པ་ནི།ཡུལ་མཐའི་དོན་ཏེ་མཐའི་རྒྱལ་ཕྲན་ལ་ཁམས་ཀྱི་རྒྱལ་ཕྲན་ཞེས་པ་ལྟ་བུ་སྟེ་རྒྱལ་པོ་གཅིག་གིས་དབང་བསྒྱུར་བྱེད་པའི་མཐའ་དབུས་ཀྱི་ཡུལ་གྲུ་སྤྱིའི་མིང་ལ་རྒྱལ་ཁམས་དང་།ནང་གསེས་ཀྱི་ས་ཁུལ་སོ་སོའམ་བློན་པོ་གཅིག་གིས་འཛིན་སྐྱོང་བྱེད་པའི་ས་ཁུལ་གཅིག་ལ་བློན་ཁམས་གཅིག ཅེས་ཏུན་ཧོང་ཡིག་རྙིང་ལས་གསལ།བོད་ཡུལ་དབུས་ཀྱི་ལྟོས་འཇོག་གི་ཆ་ནས་མིང་དེ་ལྟར་ཐོགས་པ་ཡིན།ཁམས་བྱ་བའི་མངི་འདི་ཡུལ་མིང་གི་ཆ་ནས་འབོད་པ་བོད་བཙན་པོའི་དུས་སྐབས་ནས་བྱུང་ཡོད་ནའང་།སྐབས་དེའི་ངོའ་འཛིན་ནི་ད་ལྟའི་ཁམས་ཕྱོགས་ཙམ་ལ་གོ་བ་ཁོ་ན་མིན་ཏེ།མདོ་སྨད་མཚོ་སྔོན་ཕྱོགས་ལའང་ཁམས་ཀྱི་གཡེར་མོ་ཐང་ཞེས་འབོད་པ་ལྟ་བུས་མཚོན།མདོ་སྟོད་སྨད་གཉིས་ཀྱི་ཡུལ་གྲུ་ལ་གོ་འདུག་སྙམ།ཁམས་ཕྱོགས་ཀྱི་གནའ་བོའི་ཡུལ་མིང་འགའ་རེ་དཔེར་ན་འདན་དང་རྟའུ་དཀྱུས་ལྟ་བུའང་ཏུན་ཧོང་གཏེར་ཡིག་ཏུ་མཐོང་རྒྱུ་ཡོད་ལ།ཡུལ་སྤྱི་ལ་ཁམས་ཞེས་འབོད་པ་ནི་དུས་ཕྱིས་བྱུང་བ་ཡིན་འདུག ཕྱིས་སུ་ས་སྐྱ་པའི་རིང་ས་པཎ་ཁུ་དབོན་མདོ་སྨད་དུ་ཕེབས་པའི་སྐབས་སུའང་དེང་གི་ཁམས་ཕྱོགས་བརྒྱུད་དེ་ཕེབས་པ་ཡིན་ལ།དེ་དུས་དཀར་མཛེས་ཕྱོགས་ལ་མདོ་སྟོད་ཅེས་འབོད་པ་དང་།དུས་ཕྱིས་རིམ་གྱིས་མདོ་སྟོད་སྨད་གཉིས་ལ་མདོ་ཁམས་ཞེས་འབོད་ལ་དེ་ནས་རིམ་གྱིས་མདོ་སྨད་ལ་མདོ་དང་མདོ་སྟོད་ལ་ཁམས་ཞེས་པའི་མིང་ཆགས་ཤིང་།བོད་ཡུལ་ཡོངས་སྟོད་སྨད་བར་གསུམ་དུ་བགོ་སྐབས་སྨད་མདོ་ཁམས་སྒང་དྲུག་ཅེས་ཁམས་ཕྱོགས་ཀྱི་སྤྱི་མིང་ལྟ་བུའང་ཆགས་འདུག ཡང་ཕྱིས་སུ་ཡུལ་འདི་ཕྱོགས་སུ་མཁས་མང་པོ་འཁྲུངས་ཏེ་མདོ་དབུས་གཙང་གསུམ་བྱ་བའི་དོད་ལ་མདོ་དབུས་ཁམས་གསུམ་ཞེས་ཁམས་རྐྱང་པ་ས་མིང་དུ་བཟུང་སྟེ་ལོ་རྒྱུས་ཡིག་ཆ་དང་མཁས་པའི་རྣམ་ཐར་སོགས་ཡིག་རིགས་མང་དག་ཏུ་བཀོད་པར་བརྟེན།རིམ་གྱིས་ཁམས་ཞེས་ཡུལ་མིང་དུ་ཆགས་ཤིང་ཡུལ་འདིར་གནས་པའི་སྐྱེ་བོད་དག་ལའང་ཁམས་པ་ཞེས་འབོད་སྲོལ་བྱུང་།ཡུལ་བྱེ་བྲག་པའི་མིང་གི་འགོ་ལ་ཡང་ཁམས་བྱ་བ་སྦྱར་ཏེ་ཁམས་ཆབ་མདོ་དང་ཁམས་སྡེ་དགེ་ཞེས་ཡོངས་སུ་གྲགས་པ་བྱུང་།ཡང་ཐོག་མར་ཁམས་ཞེས་པ་ཆབ་མདོ་གཙོས་པའི་ཉེ་འཁོར་ཡུལ་གྲུ་དག་ལ་ངོས་འཛིན་སྲོལ་འདུག་ནའང་།
  ཕྱིས་སུ་སྐད་བརྡའི་ཁྱད་ཆོས་གཙོ་བོ་བཟུང་སྟེ་ཁམས་ཕྱོགས་ཀྱི་ཡུལ་སྐད་སྨྲ་བའི་ཡུལ་ཐམས་ཅད་ལ་ཁམས་པ་ཞེས་བརྗོད་ལ།སྔོན་ཆད་རྒྱ་སྐད་དུ་ཞི་ཁང་（西）ནུབ་ཀྱི་ཁམས་པ་ཞིང་ཆེན་བྱ་བ་གཙུགས་མྱོང་བ་ལྟར་ཡུལ་གྲུ་རྒྱ་ཆེན་པོ་ཡོད་པ་ཡིན།དེ་ནས་དེང་སང་ཁམས་པའི་གཞི་རྒྱ་ནི་བོད་ལྗོངས་ཆབ་མདོ་ཁུལ་ཡོངས་དང་སི་ཁྲོན་ཞིང་ཆེན་གྱི་དཀར་མཛེས་ཁུལ་ཕལ་ཆེར་དང་ད་དུང་མུ་ལི་རྫོང་།ཡུན་ནན་ཞིང་ཆེན་གྱི་བདེ་ཆེན་ཁུལ་ཡོངས་དང་ལིས་ཅིང་སྟེ།སྔོན་གྱི་འཇང་ས་ཐམ་གྱི་ས་ཆའི་བོད་རིགས་འདུས་སྡོད་ཡུལ་གྲུ་ཁག་དང་།མཚོ་སྔོན་ཞིང་ཆེན་གྱི་ཡུལ་ཤུལ་ཁུལ་ཡང་སྐད་ལུགས་དང་ལོ་རྒྱུས་འཕེལ་རིམ་གྱི་དབང་གིས་ཁམས་ཕྱོགས་སུ་གཏོགས་ཤིང་།ཡུལ་མི་དག་གིས་ཀྱང་རང་ཉིད་ཁམས་པའི་ཁོངས་སུ་འཇོག་པས་འདིར་ཡང་ཁམས་ཀྱི་གྲས་སུ་བཞག་ཅེས་རྒྱ་མོ་འབྲུག་པས་མཛད་པའི་བོད་ཀྱི་ལོ་རྒྱུས་གླེང་བའི་གཏམ་ཞེས་པ་ལས་གསལ།དེའང་སྐད་རིགས་བདེ་སྤྱོད་བྱ་སའི་ཡུལ་གྲུའི་སྒོ་ནས་དབྱེར་ན་གོང་ཞུས་ཀྱི་ས་ཆ་དེ་དག་ཐོག་བོད་རང་སྐྱོང་ལྗོངས་ཀྱི་ཁོངས་གཏོགས་ཉི་ཁྲི་དང་ནག་ཆུ་ས་ཁུལ་གཉིས་ཀྱང་ཁམས་སྐད་ཡིན་ཞེས་དེང་དུས་ཀྱི་སྐད་གདངས་རིགས་པའི་མཁས་ཅན་སྐལ་བཟང་འགྱུར་མེད་ལགས་ཀྱིས་མཛད་པའི་བོད་ཀྱི་ཡུལ་སྐད་རྣམ་བཤད་ཅེས་པར་གསལ།
  དེས་ན་ཁམས་ཕྱོགས་ཀྱི་ཡུལ་འདི་དག་ཀྱང་གནའ་དུས་ནས་བོད་མི་རིགས་བྱུང་འཕེལ་དང་།འཚོ་བཞུགས་དར་སྐྱེད་ཡོང་སའི་གནས་གཞི་གཙོ་བོ་ཞིག་ཡིན་པར་མ་ཟད།བོད་རྒྱའི་ལོ་རྒྱུས་སྟེང་གོ་གནས་ཆེན་པོ་བཟུང་ཡོད་པ་ཞིག་ཡིན་ཏེ།མདོ་སྨད་ཆོས་འབྱུང་ཞེས་པ་ལས།
  དེ་ཡང་བྱང་ཕྱོགས་ཁ་བ་ཅན་གྱི་ལྗོངས་འདིར་གཉིས་སུ་བྱ་བའི་བོད་ཡུལ་དབུས་གཙང་ནི་ཆོས་སྲིད་གང་གི་ཆ་ནས་འགྲན་ཟླ་དང་བྲལ་ཞིང་བསྟན་པའི་འབྱུང་ཁུངས་ཟླ་མེད་པ་ཡིན།
  བར་ཁམས་ཡང་གྲུབ་མཐའ་སྣ་ཚོགས་ཀྱི་ཆོས་ལུགས།སྟོབས་དང་ལོངས་སྤྱོད་གང་ངོས་ནས་དར་རྒྱས་ཆེ་བ་བལྟས་ན།ཞེས་བཀོད་པ་ལྟར་ཁམས་ཀྱི་ཡུལ་གྲུ་འདི་དག་ཏུ་ཆོས་ལུགས་གྲུབ་མཐའ་སྣ་ཚོགས་ཀྱི་དགོན་སྡེ་མང་པོ་ཡོད་པ་མ་ཟད་ཡུལ་སྡེ་བྱམས་ཀྱི་ས་སྐྱོང་བའི་དཔོན་རིགས་དྲག་ཞན་དང་ཆེ་ཕྲ་མང་པོ་ཡོད་ས་ཞིག་ཡིན།དེ་ལྟར་འདི་ཁོ་བོས་འཛམ་གླིང་ཆེན་པོའི་རྒྱས་བཤད་སྣོད་བཅུག་ཀུན་གསལ་མེ་ལོང་ཞེས་བྱ་བ་ལས་སྨད་མདོ་ཁམས་སྒང་དྲུག་གི་སྐོར་ཟུར་དུ་བཀར་ཏེ་འཕྲི་སྣོན་ཆེ་མ་བྱས་ལ།ས་མིང་དག་དེབ་ཉིད་ཀྱི་ནང་ལྟར་སོར་བཞག་བྱས་ཏེ་བསྒྲིགས་པ་ནི།
  དེའང་མདོ་དབུས་གཙང་གི་ཡུལ་ནས་རགས་རིམ་གཞལ་བའི་ཤར་དང་བྱང་ཤར་གྱི་ཕྱོགས་སུ་མདོ་ཁམས་ཀྱི་ས་ཆ་ཡོད་པ་དེ་ལ་ནང་གསེས་ཀྱིས་དབྱེར་ན།ཟབ་མོ་སྒང་།ཚ་བ་སྒང་།སྤོ་འབོར་སྒང་སྟེ་སྒང་གསུམ་མམ་ཡང་ན་གོང་སྨོས་སྒང་གསུམ་གྱི་ཐོག་ཏུ་སྨར་ཁམས་སྒང་།མི་ཉག་རབ་སྒང་།དམར་རྫ་སྒང་བཅས་བསྣན་པས་སྒང་དྲུག་དང་།ཚ་བ་རོང་དང་།ས་ངན་རོང་།རྒྱལ་མོ་རོང་སྟེ་རོང་ཆེན་བཞི་དང་།མི་ཉག་རོང་སོགས་རོང་ཆུང་མང་པོ་ཡོད།འདིར་ཡུལ་ཕལ་ཆེར་བ་ཕྱོགས་གཅིག་ཏུ་བཤད་ན་བདེ་བས།ཀོང་པོ་ཡུལ་ནས་ཤར་དུ་ལ་ཆེན་པོ་ཞིག་བརྒྱབ་སྟེ་སོང་བ་ན་ཁམས་སྟོད་ལྷོ་བརྒྱུད་ཀྱི་ཆར་གཏོགས་པར་སྤོ་བོའི་ཡུལ་ཟེར་བ་ཡོད།ཡུལ་དེ་ནི་གླིང་གེ་སར་རྒྱལ་པོའི་སྒྲུང་ལས།བར་ཟུག་ཨ་སྟའི་རོང་ལ་ཟུག་ཅེས་པའི་ཨ་སྟའི་རོང་ཡིན་པ་འདྲ།དེར་ཨོ་རྒྱན་པདྨའི་སྦས་ལུང་གནས་པདྨ་བཀོད་ཆེན་ཡིན་ཟེར་བ་སོགས་གནས་ཡ་མཚན་ཅན་འགའ་རེ་དང་།སྤོ་བོ་ཆུ་མདའ་དགོན་སོགས་བོད་བརྒྱུད་སངས་རྒྱས་ཆོས་ལུགས་ཀྱི་གྲུབ་མཐའ་ལས་དགེ་ལུགས་པ་དང་།རྙིང་མ་བའི་དགོན་སྡེ་མང་པོ་དང་།སྡེ་པ་ཀ་ནམ་ཟེར་བའི་རྒྱལ་ཕྲན་རང་མགོ་ཐོན་ཙམ་ཞིག་ཀྱང་འདུག སྤོ་བོའི་ཡུལ་གྱི་ནུབ་དང་ལྷོ་མཐའ་ཀློ་པའི་ཡུལ་དང་།ཤར་དུ་སོང་བ་ན་ཚ་བ་རོང་ཟེར་བ་ཡོད་།དེར་ཚ་བ་མཚོ་སྒང་རྫོང་ཟེར་བ་དང་།གསང་སྔགས་ཆོས་རྫོང་ཟེར་བའི་དགོན་ཁག་འགའ་རེ་ཡོད་ལ་མི་སྡེའང་མང་པོ་ཡོད་པར་གྲགས།དེ་ནས་ཤར་དུ་སེང་རྫི་ར་དང་།འཇུས་དང་འཇང་སོགས་དང་།དེའི་བྱང་ཤར་དུ་རྒྱལ་ཐང་དང་།དེའི་ཤར་དུ་མི་ལི（མུ་ལི）ཟེར་བ་དང་།དེའི་ལྷོ་ནུབ་དང་རྒྱལ་ཐང་གི་ལྷོར་ལོ་ལོ་ཟེར་བ་གྷ་ཊའི་རིགས་སུ་གཏོགས་པ་སྡེ་ཆེན་པོ་བཅས་ཡོད་པ་ལས།རྒྱལ་ཐང་གི་ནུབ་དང་འཇང་གི་བྱང་དུ་གོང་བཤད་ལྟར་སམ་པོའི་ཡུལ་དང་ཉེ་བར་གནས་ཁ་བ་དཀར་པོ་ཟེར་བ་རྒྱ་བོད་ཡོངས་ལ་གྲགས་པའི་གནས་ཤིག་ཡོད།འཇང་དང་རྒྱའི་མཚམས་སུ་རི་བོ་བྱ་རྐང་དུ་གྲགས་པའི་གནས་དང་།རྒྱལ་ཐང་དུ་རྒྱལ་བ་རིགས་ལྔར་གྲགས་པའི་སྐུ་བྱིན་རླབས་ཅན་སོགས་དང་།རྒྱལ་ཐང་ཟེར་དུ་དགོན་བྱ་བ་དགེ་ལུགས་པའི་དགོན་ཁག་མང་པོ་ཡོད་པ་དང་།མི་ལི་ལའང་དགེ་ལྡན་པའི་དགོན་ཁག་མང་པོ་ཡོད་ཅིང་།
དེ་དག་ལ་ཀུན་སྤྱོད་གཙང་བའི་དགེ་འདུན་པ་མང་པོ་བཞུགས་ཡོད་པའང་ཐོས།གོང་བཤད་ཡུལ་དེ་དག་གི་ལྷོར་ཡུན་ནན་དང་།ཤར་དུ་སི་ཁྲོན་གྱི་ཆར་གཏོགས་གྱན་ཁྲང་ཟེར་བ་ཡོད།ཡང་ཉང་པོའི་ཡུལ་ནས་ཤར་དུ་ལ་གཅིག་བརྒྱབ་སྟེ་སོང་བ་ན་ཁམས་ལྷ་རི་མགོ་ཟེར་བ་ཡོད།དེ་ནས་ཤར་དང་བྱང་དུ་ལྕགས་རི།དཔལ་འབར།རྒྱལ་སྟོན་ཁྱུང་པོ་དཀར་ནག་སེར་གསུམ་སོགས་ཡུལ་གྲོང་འབྲོག་སྡེ་མང་ཙམ་ཡོད་པ་ཕལ་ཆེར་གཞུང་སྡེ་ཡིན་ལ།ཁྱུང་པོར་དགེ་ལུགས་པའི་དགོན་ཁག་བརྒྱད་དང་ཁྱུང་པོ་གཏིང་ཆེན་ཟེར་བ་སོགས་བོན་པོའི་དགོན་ཁག་མང་པོ་ཡོད།ཡང་ཁམས་ལྷ་རི་མགོ་སོགས་ནས་ཤར་གྱི་ཕྱོགས་སུ་ཤར་གངས་ལ་ཟེར་བའི་ལ་ཆེན་པོ་ཞིག་ཡོད།དེ་ནས་ཤར་དུ་ཚ་བ་སྒང་ཟེར་བའི་ལ་ཆེན་ཞིག་དང་དངུལ་ཆུ་བརྒལ་བ་ན་རི་བོ་ཆེ་ཟེར་བས་སྟག་ལུང་པའི་དགོན་གནས་ཆེན་པོ་ཡོད་པ་དེར་གཙུག་ལག་ཁང་ནང་རྟེན་དང་གསུང་རབ་པུ་སྟི་ཚད་མེད་ཡོད།དེར་སྔོན་དུས་སུ་བཀའ་བརྒྱུད་པའི་བླ་མ་མཚན་སྙན་ལྡན་པ་སངས་རྒྱས་ཞེས་བྱ་བ་བྱོན་མྱོང་བའི་གདན་ས་ཡིན་ལ།དེར་བཀའ་བརྒྱུད་པའི་སྤྲུལ་སྐུ་གཉིས་དང་གདུང་རྒྱུད་ཡོད་པའི་བླ་ཆེན་གཅིག་བཅས་གསུམ་ཡོད་པར་གྲགས།དེ་ནས་ཆབ་མདོ་ཆུ་གཉིས་བར་ལ་ཆགས་ཞེས་པ་ལྟར་རྫ་ཆུ་དང་ངམ་ཆུ་གཉིས་འདུས་པར་ཆབ་མདོ་དགོན་ཆེན་ཡོད།དེར་འཕགས་པ་ལྷ་དང་ཞི་བ་ལྷའི་གདན་ས་ཡིན་ལ་འདུས་པའི་སྡེའི་ཚོགས་ཀྱང་ཉིས་སྟོང་ཙམ་བཞུགས་ཡོད་པ་དང་།རྟེན་གསུམ་མང་ལ་རྒྱུ་སྟོབས་ཀྱང་ཆེ་བའང་སློབ་གཉེར་ནི་དེ་ཙམ་དར་རྒྱས་བྱུང་མེད་ཟེར།དེའི་སྐོར་བཀའ་འགྱུར་རིན་པོ་ཆེའི་སྤར་གསར་པ་ཞིག་ཀྱང་བཞེངས་མྱོང་བར་གྲགས།
  དེའང་བླ་མ་སྐུ་དབང་བཙན་པ་དང་ཆོས་སྲུང་གི་དྲིན།རྒྱ་མི་ཚོའི་ས་དཔྱད་བཟང་སྟབས་ཡིན་ཟེར་ཞིང་དགོན་པའི་ཆགས་གནས་ཀྱང་ཡ་མཚན་ཅན་ཞིག་ཡོད།དེ་ནས་བྲག་གཡབ་ཟེར་བའི་སྡེ་ཡོད་པ་དེར་བྲག་གཡབ་མ་དགོན་ཟེར་བ་སོགས་དགོན་ཁག་འགའ་རེ་དང་།ལེགས་པའི་ཤེས་རབ་དང་བློ་ལྡན་ཡབ་སྲས་ཀྱི་སྐུའི་སྐྱེ་བར་གྲགས་པའི་སྤྲུལ་སྐུ་ཆེ་ཚང་ཆུང་ཚང་གིས་གཙོ་བའི་དགེ་འདུན་པ་མང་ཙམ་དང་སྡེའང་ཆེ་ཙམ་ཡོད།དེ་དག་སྔོན་མཚན་ཉིད་པ་ཡིན་པ་དང་ད་ལྟར་དགེ་འདུན་པར་གྱུར་ཡོད་ཅིང་།དགེ་ལུགས་པའི་ལ་རྒྱ་འཛིན་པ་ལའང་སྤྲོ་བ་ཡོད།དེ་ནས་ཤར་དུ་དམར་（སྨར）ཁམས་ཟེར་བའི་ས་ཆ་དེར་ས་དགེའི་དགོན་འགའ་རེ་དང་།ཆོས་རྒྱལ་སྲོང་བཙན་གྱི་དུས་སུ་བཞེངས་པའི་སྒྲོལ་མའི་ལྷ་ཁང་དང་སྣང་བརྙན་སོགས་ཡོད།
 ཡུལ་དེའི་མི་དག་གདུག་རྩུབ་ཆེ་ཞིང་མི་ཉག་གི་སྐད་ལྟར་སྨྲ་བར་བྱེད།དེ་ནད་ཀོང་ཙེ་ཁ་ཟེར་བ་ཡོད་པ་དེ་ཡན་ཆད་བོད་ཀྱི་མངའ་ཞབས་ཀྱི་ཁོངས་སུ་གཏོགས་པ་ཡིན།དེ་ནས་ཤར་དུ་འབར་ཟེར་བའི་ས་ཆ་དེར་འབའ་ཆོས་སྡེ་དགོན་དང་གོའི་ཛེ་ཛེ་དགོན་སོགས་རི་བོ་དགེ་ལྡན་པའི་དགོན་ཁག་མང་པོ་དང་ཉེ་སར་ཀ་འབུར（ཀམ་པོ）གནས་ནང་ཟེར་བའི་གནས་བྱིན་རླབས་ཅན་ཞིག་ཡོད་པ་དེར་སྔོན་དུས་སུ་ཀརྨ་པ་དུས་གསུམ་མཁྱེན་པས་ཕྱག་བཏབ་པའི་དགོན་གནས་ཆེན་པོ་ཡོད་མྱོང་ཀྱང་དེང་སང་ཉམས་ནས་མེད་ཀྱང་གེ་སར་གྱི་མགོན་ཁང་ཡིན་ཟེར་བ་སོགས་ཡ་མཚན་ཅན་འགའ་རེ་ད་དུང་ཡོད།དེ་ནས་ཤར་དུ་ལི་ཐང་ཐུབ་ཆེན་བྱམས་པ་གླིང་ཟེར་བ་ཡོད་པ་དེར་དགེ་འདུན་པ་ཉིས་སྟོང་བརྒྱད་བརྒྱ་ཙམ་དང་།དགེ་བའི་བཤེས་གཉེན་ཡང་མང་པོ་ཡོད།གཞན་ཡང་ལི་ཐང་གི་སའི་ཆར་ལི་ཐང་བསམ་འཕེལ་གླིང་སོགས་དགེ་ལུགས་པའི་དགོན་ཁག་ཆེ་ཆུང་ཤིན་ཏུ་མང་ཞིང་།ས་རྙིང་སོགས་སྲིད་མཐའ་ཙམ་ཡོད་པའང་ཉམས་དམའ་བ་ཡོད།དེ་ནས་བྱང་དང་བྱང་ཤར་དུ་ཉག་རོང་ཟེར་བའི་ལུང་པ་ཡོད།དེའི་སྟོད་ཀྱི་ཆར་ཇག་རྐུན་འབའ་ཞིག་གི་སྡེ་དང་།སྨད་དུ་ལི་ཐང་དང་མི་ཉག་གི་སྡེ་འདྲེས་མར་ཡོད་པ་ལས་ཉག་ཆུའི་གཡས་འགྲམ་ལི་ཐང་གི་ཆར་གཏོགས་པ་ཞིག་ཏུ་ཕོ་བྲང་ལྔ་རྩེ་ཟེར་བའི་གནས་ཡོད་པ་དེར་ཕ་དམ་པའི་སྒྲུབ་ཕུག་ཡིན་ལ།རྗེ་ཉིད་ཀྱི་སྐུ་རྒྱབ་ཀྱི་རྗེས་བྲག་ངོས་ལ་གསལ་པོར་མཐོང་རྒྱུ་ཡོད་པར་གྲགས།ལི་ཐང་ནས་མི་ཉག་བརྒལ་བའི་ཤར་ན་མི་ཉག་གི་ཡུལ་ཡོད་པ་དེར་མི་ཉག་དགའ་བཞི་（བཀའ་བཞི）དགོན་སོགས་དཔལ་ལྡན་ས་སྐྱ་པའི་དགོན་སྡེ་མང་པོ་ཡོད་པ་དང་།སྤྱི་ལི་དགོན་སོགས་རི་བོ་དགའ་ལྡན་པའི་དགོན་སྡེའང་མང་པོ་ཡོད།མི་ཉག་གི་བྱང་མཐར་ཧོར་ཁོག་དང་ཉེ་སར་རྒྱལ་བ་རིན་པོ་ཆེའི་（རྒྱལ་བ་བདུན་པ་）གདན་ས་མགར་ཐར་དུ་གྲགས་པ་སོགས་ཡོད།
 དེ་དག་ནི་ཤར་དུ་རྒྱལ་མོ་རོང་ཡོད་པ་དེ་ལ་ནང་གསེས་ཀྱི་དབྱེར་ན།ལྕགས་ལ་དང་།ཝ་སི།ཁྲོ་སྐྱབས།སོ་མང་།རྫོང་འགག ལྕོག་རྩེ།དམ་པ།འོག་ཞི།མདོ་ལི།པྲསྟི།པ་བམ།དགེ་ཤིས་ཚ།ཧྭ་ཧྭ།ལེན་ཙ།རབ་བརྟེན།བཙན་ལ།རྒྱ་ཁ།མགྲོན་དུ་བཅས་རྒྱལ་ཁག་བཅོ་བརྒྱད་ཡོད་ཅིང་།དེང་སང་བཅུ་གསུམ་ཙམ་ལས་མེད།ཡུལ་དེ་དག་གི་མི་རྣམས་དཔའ་རྩལ་ཆེ་བའོ།རྒྱལ་རོང་དུ་རྒྱལ་མོ་མུར་རྡོ་ཟེར་བའི་རི་གཉན་པོ་དང་།ལོ་ཆེན་བཻ་རོ་ཙ་ནའི་སྒྲུབ་ཕུག་དང་ཕྱག་ཞབས་སོགས་ཀྱི་རྗེས་ཤུལ་ངོ་མཚར་ཅན་མང་པོ་ཡོད།མི་ཉག་དང་རྒྱལ་རོང་མི་ལི་སོགས་ནི་བོད་མི་འཁྲུལ་མེད་ཡིན།གོང་བཤད་བོད་ཀྱི་སྡེ་ནག་ཆུ་སོགས་ནས་ཤར་ལྷོ་ནག་ཤོད་ཟེར་བའི་སྡེ་དང་།ནག་ཆུའི་ཤར་དུ་ཨ་གྲགས་དང་།རྫ་དམར།སོག་སྡེ་སོགས་འབྲོག་སྡེ་མང་པོ་དང་།དེ་དག་གི་ཤར་དུ་འབྲོག་ལ་དང་།དགེ་རྒྱས།རྡོ་ཤུས།གླིང་སྟོད་མ།པི་རི་ཁ་འགའ་དང་།ཡོས་ཤུས།རོག་ཤུས།སྟག་རོང་།འོ་ཐོག གོའུ་ཚ།མོན་གུལ་ཅིན་ཉ་མཚོ།དགེ་རྩེ་སོགས་འབྲོག་སྡེ་མང་པོ་ཡོད།དེ་དག་གི་ལྷོར་ཁྱབ（ཆབ）མདོ་དང་བྲག་གཡབ་འབབ་སོགས་ནས་བྱང་དུ་སྡེ་དགེ་ཟེར་བའི་དཔོན་ཁག་གཅིག་ཡོད་པ་ཁམས་ཀྱི་དཔོན་ཁག་གི་ནང་ནས་ཆེ་ཤོས་ཡིན།ཁམས་པ་དག་གི་བོད་ཁྲི་སྐོར་བཅུ་གསུམ།སྡེ་དགེ་ཕོ་བྲང་བཅུ་གསུམ།
  རྒྱ་ནག་ཞིང་ཆེན་བཅུ་གསུམ་སོགས་ཟེར་སྲོལ་ཡོད་པ་ལྟར་ན་ཁམས་སྡེ་དགེ་ནི་ས་ཁྱོན་ཤིན་ཏུ་ཆེ་བ་འདྲའོ།དེའང་སྡེ་དགེའི་མངའ་ཁོངས་སུ་རྫ་རྫོགས་ཆེན་དགོན་དང་།ཞེ་ཆེན་དགོན།
སྦ（དཔལ）ཡུལ་དགོན།ཀ་ཐོག་དགོན།སི་དུའི（དཔལ་སྤུངས）དགོན་དང་སྡེ་དགེ་རྒྱལ་པོ་ཁོ་རང་གི（དགོན་ཆེན）དགོན་པ་དཀར་རྙིང་གསུམ་གྱི་དགོན་ཁག་མང་པོ་ཡོད་ལ།སྡེ་དགེ་ཚང་ལ་དགོན་ས་ཉེར་ལྔའི་བདག་པོར་ཞེས་ཀྱང་ཟེར་སྲོལ་ཡོད།སྡེ་དགེ་ནས་ཤར་དུ་ཧོར་ཁོག་ཟེར་བའི་ལུང་པ་ཡོད་པ་དེར་ཁང་གསར་དང་།མ་ཟི།བྲག་འགོ་དཔེ（བེ）རི།དྲིའོ（ཏྲེ་ཧོར）ཟེར་བ་སོགས་དཔོན་ཁག་ལྔ་དང་།ཧོར་གམ་རྩེ（དཀར་མཛེས）དགོན་པ་དང་།བྲག་འགོ་དགོན།རྟ་བོ（རྟའུ）ཉི་མཚོ་དགོན་དང་རྫ་དགོན་གསར་དགོན་སོགས་དགེ་ལུགས་པའི་དགོན་པའི་དགོན་སྡེ་དང་གྲྭ་ཚང་མང་པོ་ཡོད།དེ་དག་ནས་ཤར་དུ་སྟོང་སྐོར་ཟེར་བའི་སྡེ་ཡོད་པ་དེ་འདས་པ་ན།མདོ་སྨད་ཨ་མདོའི་ས་ཆར་སླེབས་ཡོད།ཁམས་ཀྱི་མི་རང་བཞིན་དྲང་ལ།བོད་བཞན་ལས་ཆོས་ལ་དད་པ་དང་ཡིད་ཆེས་ཆེ་ཞིང་གྲུབ་མཐའི་ཆགས་སྡང་ཡང་ལྷག་པར་ཆེ།མ་འདྲིས་པ་རྣམས་ལ་རྩུབ་པོར་སྤྱོད་ཅིང་འདྲེས་ཆ་ཆེ་བ་ལ་ཁ་སེམས་མེད་པར་ཕན་འདོགས་བྱེད་པ་དང་དག་སྣང་ཆེན་པོར་བྱེད་མཁན་ཡིན།སྟོང་སྐོར་གྱི་ཤར་དུ་རྡོ་ཁོག་དང་།འཛི་ཁོག་སྨར་ཁོག་ཟེར་བའི་ལུང་པ་གསུམ་ཡོད་པ་དེའི་མི་རྣམས་ཨ་མདོའི་ཁོངས་སུ་གཏོགས་སོ།