སློབ་གསོ་ནི་སྒྱུ་རྩལ་ཞིག་ཡིན་པས་གང་སྒྱུ་རྩལ་གྱི་མཚོན་ཐབས་ལ་མཁས་ན་དེར་གཡུར་དུ་ཟ་བའི་འབྲས་བུ་ཐོབ་མི་སྲིད་པ་ནི་ལྡོག་མེད་ཀྱི་ཆོས་ཉིད་ལགས་པས་ང་ཚོས་སློབ་གསོ་དང་སློབ་ཁྲིད་ཀྱི་ཐབས་ལམ་ལ་འཚོལ་སྙེག་དང་གསར་བཏོད་བྱ་དགོས་པ་ཧ་ཅང་གལ་ཆེ།ཐབས་ལ་མཁས་པའི་སྤྱོད་པ་དེ། །གཡོ་སྒྱུར་ཐུབ་པས་མ་གསུངས་སོ། །ཞེས་པ་ལྟར་བྱ་བ་གང་དང་ཅི་བསྒྲུབས་ཀྱང་ཐབས་ལ་མཁས་དགོས་པས་ཐབས་ཤེས་ཟུང་འཇུག་ཅེས་ཐབས་སྔོན་མ་དང་ཤེས་རབ་རྗེས་སུ་བཞག་པའང་རྒྱུ་མཚན་དེ་ལ་ཐུག་པ་ཡིན།སྤྱིར་མི་རིགས་སོ་སོའི་སློབ་མ་རྣམས་ཀྱི་སེམས་ཁམས་དང་།རིག་གནས་ཀྱི་ངོ་བོ་དང་ཁྱད་ཆོས་མི་འདྲ་བས་སློབ་གསོ་དང་སློབ་ཁྲིད་བྱེད་ཐབས་ཀྱང་མཐའ་གཅིག་ཏུ་མི་འདྲ།བོད་རིགས་སློབ་མ་རྣམས་ལ་མཚོན་ན་ཆུང་དུས་ནས་མཐོ་ཞིང་བརྗིན་པའི་གངས་རི་དང་ཡངས་ཤིང་ཆེ་བའི་སྤང་ཐང་བཅས་འགྲོ་བ་མིའི་རིགས་ཀྱི་རྒྱུ་བ་ཉུང་ཞིང་རྒྱ་ཆེ་བའི་ཁོར་ཡུག་ཏུ་འཚར་ལོངས་བྱུང་བས་གཤིས་རྒྱུད་དང་འདོད་མོས།དགའ་ཕྱོགས་བཅས་ལ་ཐུན་མོང་མ་ཡིན་པའི་ཁྱད་ཆོས་ལྡན་པས་ང་ཚོས་གང་ལ་གང་མཁོ་དང་སུ་ལ་ཅི་མཐུན་གྱིས་བོད་རིགས་སློབ་མ་རྣམས་ཀྱི་མི་ཚེའི་ལྟ་བ་དང་།རིན་ཐང་འཛིན་ཚུལ།མཛེས་དཔྱོད་ལྟ་བ་བཅས་ལ་ཡོ་བསྲང་དང་མཛུབ་ཁྲིད་བྱ་དགོས།རིག་ཚན་སོ་སོ་སློབ་ཁྲིད་བྱེད་དུས་རང་རིགས་ཀྱི་སྲོལ་རྒྱུན་འཆད་ཉན་གྱི་སྲོལ་དང་གཞན་རིགས་ཀྱི་ཐབས་ལམ་ཟུང་སྦྲེལ་བྱས་ཏེ་འཆད་ཁྲིད་བྱེད་ཐབས་ཕུང་གསུམ་པ་ཞིག་ལ་ཧུར་བརྩོན་བྱ་དགོས་སོ།།