ཁོར་ཡུག་གི་གནད་དོན་ཟེར་བ་ནི་མིའི་རིགས་ཀྱིས་ལུགས་དང་མི་མཐུན་པའི་སྒོ་ནས་རང་བྱུང་ཐོན་ཁུངས་བེད་སྤྱོད་དང་བཀོལ་སྤྱོད་བྱས་ནས་ཁོར་ཡུག་འབགས་བཙོག་དང་གཏོར་བཤིག་བཟོས་པའི་ཁོར་ཡུག་གནད་དོན་ཞིག་ཡིན་ཞིང་།མིས་བཟོས་པའི་ཁོར་ཡུག་གནད་དོན་འདི་ནི་མིའི་རིགས་ཀྱི་སྤྱི་ཚོགས་འཕེལ་རྒྱས་དང་ཁོར་ཡུག་བར་གྱི་འབྲེལ་བ་མཐུན་སྦྱོར་མིན་པའི་རྐྱེན་གྱིས་ཐོན་པ་རེད།སྤྱིར་བཏང་དུ་རིགས་གཉིས་བགོད་ཡོད་པ་སྟེ།བཟོ་ལས་དང་ཞིང་ལས་མགྱོགས་མྱུར་དུ་འཕེལ་རྒྱས་འགྲོ་བ་དང་གྲོང་ཁྱེར་ཅན་དུ་འགྱུར་བ་ལས་ཐོན་པའི་ཁོར་ཡུག་ལ་འབགས་བཙོག་བཏང་བའི་གནད་དོན་དང་ལུགས་དང་མི་མཐུན་པའི་སྒོས་རང་བྱུང་ཐོན་ཁུངས་གསར་སྦོལ་བྱེད་རྒྱུ་ལས་ཐོན་པའི་སྐྱེ་ཁམས་ཁོར་ཡུག་ལ་གཏོར་བཤིག་བཏང་བའི་གནད་དོན་དང་གཉིས།ཁོར་ཡུག་གི་གནད་དོན་གཉིས་ཕན་ཚུན་འབྲེལ་བ་དང་ཤུགས་སྐྱིལ་བྱས་པར་བརྟེན།གཞི་ཁྱོན་གྱི་ཐོག་ནས་བཤད་ན།སའི་གོ་ལ་ཧྲིལ་པོའི་རང་བཞིན་ཅན་དང་།ངོ་བོའི་ཐོག་ནས་བཤད་ན་མིའི་རིགས་ཡོངས་ཀྱི་ཁེ་ཕན་དང་འབྲེལ་བ་ཡོད་པ་རེད།
ཁོར་ཡུག་གི་གནད་དོན་ཐོན་པ་ནི་རང་བྱུང་གི་རྒྱུ་རྐྱེན་དང་མི་བཟོས་པའི་རྒྱུ་རྐྱེན་ཡོད།རང་བྱུང་ཁམས་རང་ཉིད་འགྱུར་ལྡོག་བྱུང་བ་ལས་ཐོན་པའི་ཁོར་ཡུག་གནད་དོན་ནི་དཔེར་ན།ས་འགུལ་དང་མཚོ་རླབས་དྲག་པོ་འཕྱུར་བ།མེ་རི་གས་འབར་བྱུང་བ།རྒྱ་མཚོའི་རླུང་འཚུབ།རྡོ་རུད།གྲང་རྒྱུན་སོགས་ཀྱི་རང་བྱུང་གི་ཕྱི་ཚུལ་ཡོད་པ།མིག་སྔར་ང་ཚོས་སྔོན་འགོག་དང་སྔོན་བརྡ།ལྟ་ཞིབ་ཚད་ལེན་བཅས་བྱས་ནས་གྱོང་གུན་དེ་ཇེ་ཉུང་དུ་གཏོང་གང་ཐུབ་བྱེད་དགོས་པ་དང་འབྲེལ།མིས་བཟོས་པའི་གནད་དོན་ནི་དཔལ་འབྱོར་དང་སྤྱི་ཚོགས་འཕེལ་རྒྱས་གཏོང་བ་ལས་ཐོན་པ་རེད།དཔེར་ན།ཞིང་ལས་དང་བཟོ་ལས་འཕེལ་རྒྱས་གཏོང་བ་དང་གྲོང་ཁྱེར་ཅན་དུ་འགྱུར་བ་ལས་ཐོན་པའི་ཁོར་ཡུག་འབགས་བཙོག་དང་གཏོར་བཤིག་བཏང་བའི་གནད་དོན་ཡིན་པ་རེད།  འཛམ་གླིང་ཡོངས་ཀྱི་ཁོར་ཡུག་གི་གནད་དོན་གཙོ་བོ་ནི་གཤམ་གསལ་ཏེ།འཛམ་གླིང་ཡོངས་ཀྱི་གནམ་གཤིས་འགྱུར་ལྡོག་བྱུང་བ་དང་གཅིག དྲི་ངན་དབྱང་རླུང་བང་རིམ་གཏོར་བཤིག་བཏང་བ་དང་གཉིས།སྐྱུར་ཆར་གྱི་སྣང་ཚུལ་ཐོན་པ་དང་གསུམ།དུག་དང་གནོད་སྐྱོན་ཡོད་པའི་རྫས་འགྱུར་དངོས་པོས་འབགས་བཙོག་བཟོས་པ་དང་ས་མཚམས་བརྒལ་ནས་སྤོ་རྒྱུར་བྱས་པ་དང་བཞི།སྐྱེ་ཁམས་དང་ཁོར་ཡུག་འབགས་བཙོག་བཟོས་པ་དང་སྐྱེ་ཁམས་ཁོངས་གཏོགས་དོ་མཉམ་ཤོར་བ་དང་ལྔ།སྐྱེ་དངོས་ཀྱི་སྣ་མང་རང་བཞིན་ཇེ་ཉུང་དུ་འགྲོ་བ་དང་དྲུག་བཅས་རེད།（རྩོམ་སྒྲིག་པ་བདེ་ཆེན་དབང་མོ།）