དབྱར་རྩྭ་རྐོ་སྒྲུབ་བྱས་ན་ས་བཅུད་ཉམས་པས་ཟོག་ལ་ཤ་ཤེད་མི་རྒྱས་བར་གནོད་ཅིང་། དེ་མཚུངས་ཟོག་ཤ་ཟོས་ན་སྔར་ལྟར་ལུས་ཟུངས་གསོ་བའི་ནུས་པ་མི་འདུག་ཅེས་བོད་མི་རྒད་པོ་ཚོའི་ངག་ན་ཐོས་རྒྱུ་འདུག་ལ། གཞན་ཁོར་ཡུག་སྲུང་སྐྱོབ་ཀྱི་ཆེད་མཁས་པ་ཚོས་གསུངས་ན། དབྱར་རྩྭ་འདི་བརྐོས་ན་རང་བྱུང་གི་ཁུང་བུ་འབུག་པ་དང་ཆུ་རྐ་བཏོད་པ། གད་པ་འབྱུང་བ་དང་། ཆུ་འཁྱུལ་ཆགས་པ་སོགས་འབྱུང་བར་གནོད་པས། མཐར་ཨ་བྲའི་གནས་བཅའ་བར་སྐུལ་འདེད་བྱེད་ཅིང་། སྤང་ཐོག་ཏུ་རྩྭ་མི་སྐྱེ་བར་གནོད་པ། ཆུ་ལོག་རྒྱུག་པ་དང་རྩི་ཤིང་གི་རྩ་བར་གནོད་པས་རྩྭ་ཐང་བྱེ་ཐང་དུ་འགྱུར་བ་སོགས་ཀྱི་ཉེན་ཁའང་ཡོད་པར་བཤད། ཡིན་ནའང་། དབྱར་རྩྭ་འདི་བོད་རིགས་མང་ཚོགས་ཀྱི་འཚོ་བའི་གྲུབ་ཆ་གལ་ཆེན་ཞིག་ཏུ་གྱུར་ཡོད་པས། ༢༠༠༨ཀྱི་ལོར་འབུ་གོང་ཚབས་ཆེན་ལྷུང་སྐབས་ཁམས་ཕྱོགས་ཀྱི་བོད་མི་ཁ་ཤས་ཤིག་ལ་འཁྱགས་ལྟོགས་ཀྱི་སྡུག་བསྔལ་ཀྱང་བྱུང་འདུག་ཅེས་པའི་གནས་ཚུལ་མང་པོ་ཐོས་རྒྱུ་དང་མཐོང་རྒྱུ་ཡོད་ན། ང་ཚོས་འདི་བརྐོ་བསྒྲུབ་བྱ་མི་རུང་ཞེས་ཚ་བཀག་བྱ་ཐབས་མེད་ལ། དེ་ལྟར་བྱེད་དགོས་ན་དེའི་ཚབ་ལ་ཡོང་སྒོ་འདྲ་མཚུངས་བ་ཞིག་སྤྲོད་རྒྱུ་ཡོད་དགོས་རུང་། དེ་ནི་སུ་ལའང་མེད་ན། གནས་སྐབས་རིང་ཅི་ནུས་གང་ནུས་ཀྱིས་དབྱར་རྩྭ་རྐོ་སྐབས་ཁོར་ཡུག་ལ་སྲུང་སྐྱོབ་བྱེད་པའི་ཀུན་སློང་སེམས་ལ་ཉར་དགོས་པ་དང་། འཚོ་བའི་རེ་བ་ཡོད་ཚད་དབྱར་རྩྭ་རྐྱང་བར་བཅོལ་མི་རུང་བའི་འདུ་ཤེས་ཙམ་གསོ་སྐྱོང་བྱ་བ་ལས་འོས་མེད།