འབའ་གཞས་ཀྱི་བྱུང་འཕེལ་དང་རིགས་དབྱེ།སྒྱུ་རྩལ་བཅས་ལ་རགས་ཙམ་དཔྱད་པ།(3)

ཟི་ལིང་།དབང་ཕྱུག་ཚེ་རིང་།    མང་ཚོགས་སྒྱུ་རྩལ་ལས་དྲངས།    2011-06-07


དཔེར་ན།
ཆུ་ཕར་ཁའི་སྨན་ཆུང་བུ་མོ་དང་།
ཆུ་ཚུར་ཁའི་ལོ་ཆུང་ཕོ་གསར་གཉིས།
མ་གཅིག་གི་བུ་རྒྱུད་མ་ཡིན་ཏེ།
སྐྱིད་བྲོ་ར་གཅིག་ལ་མཉམ་དུ་འཛོམས།
གཞས་ར་ཁྲ་མོ་བུ་ཆུང་བུ་མོའི་ས་ཆ།
བུ་ཚ་བུ་མོ་གཞས་ར་ཁྲ་མོའི་ས་ཆ།
བུ་ཚ་བུ་མོ་ད་ལོ་ལྷན་འཛོམས་མ་བྱུང་།
ད་ལོ་འཛོམས་པ་སྐལ་བཟང་ནས་འཛོམས་བྱུང་།
༧མཐུན་གཞས།དཔེར་ན།
གསེར་སྲང་བརྒྱ་ལས་བརྡུང་བའི།
ཨ་ལོང་སྐལ་བཟང་མེ་ཏོག
ང་ཚོ་གཞོན་ནུ་ཚང་མ།
སུ་ཡིས་སྐོན་ན་ཁྱད་མེད།
མ་མི་གཅིག་ང་རང་མིང་སྲིང་ཚོ།
སྐྱིད་རྒྱ་གྲོང་དཀྱིལ་ལ་མཉམ་འཆམ་བྱེད།
སེམས་སྤྲོ་བའི་གཞི་ལ་མཉམ་བརྡུང་བྱེད།
ཁ་ཞིམ་པའི་ཆང་ལ་མཉམ་འཐུང་བྱེད།
བུ་རྒྱ་ཕྲུག་བོད་ཕྲུག་སོག་ཕྲུག་གསུམ།
བུ་སྐྱེས་ས་མི་གཅིག་ཁ་ཁ་རེད།
སེམས་བསམ་པ་མཐུན་པའི་སྤུན་གྲོགས་ཡིན།
ཚིག་དམ་བཅའ་འགྱུར་མེད་རྡོ་རྗེ་ཡིན།
གོང་གི་གཞས་ཚིག་འདི་དག་ལས་མི་རིགས་ཕན་ཚུན་བར་གྱི་མཐུན་སྒྲིལ་དང་བོད་མི་རིགས་དང་ལྷག་པར་དུ་སྤུན་ཟླ་ནང་ཁུལ་གཡི་མཐུན་སྒྲིལ་ཡག་པོ་ཞིག་མཚོན་ཡོད་པ་བཞིན་ནོ།
གསུམ་པ།འབའ་གཞས་ཀྱི་སྒྱུ་རྩལ་ཁྱད་ཆོས།
༡གཞས་ཚིག་གི་སྒྱུ་རྩལ་ཁྱད་ཆོས།གནའ་ནས་ད་བར་དུ་དམངས་ཁྲོད་ཀྱི་འཚོ་བའི་ནང་དུ་འཚོལ་སྡུད་བྱས་ནས་ཡིག་ཐོག་ཏུ་ཕབ་པའི་གཞས་ཚིག་ཁྲི་གཅིག་ལྷག་ཙམ་མཆིས།གཞས་ཚིག་གི་ལུས་ཀྱི་རྣམ་པ་ཚིགས་བཅད་མ་གཏོགས་སྤེལ་མ་དང་ལྷུག་པ་ལྟ་བུ་མ་མཆིས་མོད།དབྱངས་རྟའི་མཚམས་ཚིག་མི་འདྲ་བའི་དབང་གིས་རྐང་བ་བཞི་ཅན་མང་ལ།རྐང་བ་བཅད་པའི་ལུས་ལ་ཚེག་བར་དོ་མཉམ་པ་སྟེ་ཚེག་བར་དྲུག་ཅན་དང་བརྒྱད་ཅན་སོགས་ཤས་ཆེ་བར་སྣང་།
༢འཁྲབ་སྟངས་ཀྱི་སྒྱུ་རྩལ་ཁྱད་ཆོས།འབའ་གཞས་འཁྲབ་པར་གཞས་ར་ཐོག་མཐའ་བར་གསུམ་ལ་དབྱིབས་སྒོར་སྒོར་ཚུལ་ལས་མི་འགོང་བ་ཞིག་ཡིན་པས་ཀུན་གྱིས་སྒོར་གཞས་ཞེས་འབོད་བཞིན་ཡོད།སྒོར་གཞས་འཁྲབ་པར་ཕོ་མོ་དང་རྒན་གཞོན་གྱི་དབྱེ་བ་མེད་ཀྱང་།ནམ་རྒྱུན་གཞས་འཁྲབ་མི་ལ་བུ་ཚ་བུ་མོ་ཞེས་འབོད་སྲོལ་ཡོད་པ་དེ་ཕལ་ཆེར་གཞོན་ནུ་འཁྲབ་མཁན་གྱི་གྲངས་ཅུང་མང་བའི་ཆ་ནས་ཡིན་སྙམ།འབའ་གཞས་འཁྲབ་མཁན་གྱི་ལུས་ཀྱི་རྣམ་འགྱུར་ནི་བབ་ཆགས་པོ་ཡིན་དགོས་པ་མ་ཟད་མགོ་དང་བྲང་ཁ་སོགས་འདེགས་དགོས།རྐེད་པ་སྒུར་བའི་བྱེད་སྟངས་ཡོད་པའི་སྐབས་སུ་ཁོག་སྟོད་འགྱིང་ངེར་ལངས་པ་ལ་ཕུ་དུང་རིང་བོ་དེ་ཁྱད་ཆོས་ཆེན་པོ་ཞིག་ཡིན།ཕུ་དུང་རིང་བོ་དེ་གཡུག་གཡུག་གཏོང་ཞིང་བདེ་ལྕག་འཁྱུག་པོའི་ཚོར་སྣང་བྱུང་།དཔུང་པ་གཡུག་གཡུག་བྱེད་ན་གཡོ་ཚད་ཀྱང་ཆེ་བས་རང་བཞིན་ཟོལ་མེད་ཀྱི་མཛེས་ཆ་དང་ལྡན།ས་ཆ་འགའ་ཤས་ཀྱི་གཞས་ལ་དཔུང་བ་གཡུག་པ་དེ་རོལ་དབྱངས་ཀྱི་དབྱངས་རྟ་དང་བསྟུན་ནས་བར་མཚམས་ཆད་པའི་བྱ་སྤྱོད་མངོན་གསལ་ཡོད་ཀྱང་འབའ་གཞས་ཕལ་ཆེར་ལ་བར་མཚམས་མེད་པར་མཛེས་པའི་ལུས་ཀྱི་ཉམས་འགྱུར་སྟོང་དང་ལྡན་པར་དོ་སྣང་བྱེད་དགོས།འབའ་གཞས་ཀྱི་རང་གནས་སུ་རྐང་བྲོ་འཁྲབ་པ་དང་རྐང་བྲོ་བརྡར་བ་ལ་སོགས་པའི་གར་འགྲོས་མཛེས་སྡུག་ལྡན་པ་དང་བདེ་ལྕག་འཁྱུག་པ་ཐོགས་ཐུག་མེད་པས་སྤྲོ་སྣང་དང་ལྡན་པ་ཞིག་ཡིན།པི་ཝང་གིས་གཞས་གང་གི་དབྱངས་རྟ་ཐེངས་གཅིག་དཀྲོལ་ནས་སླར་འགོ་ཚུགས་པ་དང་དུས་མཚུངས་སུ་འཁྲབ་མི་རྣམས་ཀྱིས་དབྱངས་རྟའི་རིང་ཐུང་དང་འགྱུར་ཁུགས་མི་འདྲ་བ་སོགས་ལ་གཞིགས་ནས་གཞས་ཚིག་ཀྱང་གང་འཚམ་རེ་སྦྱར་ནས་ལེན་དགོས་ལ།རིམ་བཞིན་པི་ཝང་གི་གདངས་འགྲོས་སྔ་མ་ལས་ཕྱི་མ་ཇེ་མགྱོགས་སུ་དཀྲོལ་གཤིས།རྐང་བའི་རྡོག་བྲོ་དང་ལག་པའི་འདེགས་འཇོག་མཐའ་མ་གདངས་འགྲོས་ཆེས་མྱུར་བར་དཀྲོལ་ནས་དབྱངས་རྟ་མཚམས་སྒྲིལ་བ་དང་མཉམ་དུ་གཞས་སྐོར་གཅིག་ཚར།
མདོར་ན་བུད་མེད་ཀྱི་གར་ལ་སྒེག་ཉམས་གཙོ་ཆེ་ཞིང་ཕོ་གསར་རྣམས་ཀྱི་གར་ལ་དཔའ་ཉམས་གཙོ་ཆེ་ཞིང་ཕོ་གསར་རྣམས་ཀྱི་གར་ལ་དཔའ་ཉམས་ཀྱིས་ཁེངས་པའི་ཁྱད་ཆོས་ལྡན།བོད་ཁུལ་གྱི་ས་ཆ་གཞན་གྱི་གཞས་དང་བསྡུར་ན་འབའ་གཞས་ལ་འབུར་ཐོན་གྱི་ཁྱད་ཆོས་ལྡན་པ་ནི་གཞས་ཚིག་དོན་ཟབ་ལ་ཡིད་འགུགས་ཀྱི་ནུས་པ་ལྡན་པ་དང་།གདངས་དབྱངས་ལ་སྙན་འཇེབས་འགྱུར་ཁུངས་དོད་ཅིང་ལྷག་པར་དུ་གཞས་བྲོ་མཉམ་འདུས་ཀྱི་རོལ་རྩེད་ལ་སྙན་འཇེབས་དབྱངས་ཀྱི་འགྱུར་ཁུགས་དང་བདེ་འཁྱུག་ལ་ཡིད་འོང་གི་རང་བཞིན་ལྡན་པ་གཙོ་ཆེ་བ་ནི་རྒྱུད་བཞི་དཀྲོལ་སྟངས་དང་གར་གྱི་ཉམས་འགྱུར་བཅས་ཀྱི་སྟེང་ནས་མཚོན་ཡོད།
༣.རོལ་དབྱངས་ཀྱི་སྒྱུ་རྩལ་ཁྱད་ཆོས།འབའ་གཞས་ཀྱི་རོལ་ཆ་ནི་པ་ཝང་ཡིན་ལ་འབའ་གཞས་འཁྲབ་པའི་སྐབས་སུ་མེད་དུ་མི་རུང་བའི་རོལ་ཆ་ཞིག་ཡིན།གཞས་ཕྱོགས་ཀྱི་སྒྱུ་རྩལ་མཁན་ཞིག་གི་གཡག་གི་རྭ་ཅོས་པི་ཝང་གི་གདོང་མོ་བཟོ་བ་དང་ལུག་ལྤགས་པིཝང་གི་ངོས་སུ་འགེབས་པ།ལྕུག་ཕྲན་གྱིས་གཞུ་འཐེན་པ་བཟོ་བ།རྟ་རྔའི་གཞུ་རྒྱུད་བཟོས་ནས་པི་ཝང་ཐོག་མ་དེ་བྱུང་བ་རེད།དེའི་རྗེས་སུ་མི་རྣམས་ཀྱིས་རྭ་ཅོས་བཟོས་པའི་གདོང་མོ་དེ་ཟླུམ་ཤིང་གིས་བཟོས་པའི་གདོང་མོ་དེར་བརྗེས་ནས་ད་ལྟའི་བར་དར་ཁྱབ་བྱུང་།པི་ཝང་གི་འགོ་ལ་མཚོན་རྟེན་རྩེ་ཐོག་གི་བརྒྱན་པ་དེས་བཀྲ་ཤིས་པའི་ཤུགས་བསྟན་གྱི་གོ་དོན་མཚོན་ཡོད་པ་རེད།
འབའ་གཞས་ཀྱི་གཞས་ཚིག་ནང་དོན་ལ་སྐབས་བབ་ཀྱི་ཚོགས་ར་མི་གཅིག་པ་དང་བསྟུན་ནས་རྣམ་པ་བདུན་དུ་དབྱེ་ཆོག་སྟེ།མཆོག་གླུ་དང་མཉམ་འཛོམས་གླུ།ཡུལ་སྲོལ་གོམས་འདྲིས་ཀྱི་གླུ།བརྩེ་གླུ།སྐྱོ་གླུ།སྨོན་འདུན་གྱི་གླུ་བཅས་ཡོད།དེ་ལ་ཡིག་འབྲུ་དྲུག་གིས་ཚིག་གང་ཡིན་རུང་འབའ་གཞས་ཀྱི་གདངས་དབྱངས་ནང་དུ་བཞག་ནས་གླུ་ལེན་བྲོ་འཁྲབ་བྱས་ཆོག་པ་ཡིན།འབའ་གཞས་ལ་གདངས་སྙན་ཞིང་ཡིད་དུ་འོང་བ་དང་།ཚིག་ཉུང་ཞིང་དོན་ཟབ་པ།གདངས་དབྱངས་ཀྱི་འགྲོས་མཉམ་པ།ལེན་སླ་ཞིང་འཛིན་བདེ་བ་བཅས་ཀྱི་ཁྱད་ཆོས་ལྡན།རོལ་མོའི་སྒྲ་ནི་གལ་ཆེ་བ་ཞིག་ཡིན་པས།འབའ་གཞས་ལས་ཀྱང་།ཞབས་བྲོ་རྒྱག་དགོས་བསམ་བྱུང་།རྐང་ལ་ལྷམ་ཆུང་མི་འདུག གཞས་གཅིག་གཏོང་དགོས་བསམ་བྱུང་།རོལ་དབྱངས་གཏོང་མཁན་མི་འདུག ཅེས་པའི་གཞས་ཚིག་གི་ཤུགས་སུའང་འབའ་གཞས་ལ་རོལ་མོ་མེད་དུ་མི་རུང་བ་ཞིག་ཡིན་ཚུལ་བསྟན་སྟབས།དཀྲོལ་ནི་འབའ་གཞས་ཀྱི་ཁྱད་ཆོས་གསུམ་གྱི་ཡ་གྱལ་ཞིག་ཡིན་ལ་རོལ་མོའི་ཡོ་བྱད་པི་ཝང་གི་སྒྲ་རྣ་བར་སྙན་ཞིང་ཡིད་ལ་འབབ་སྟངས།རོལ་མོའི་སྒྲ་ཐོས་པ་ཙམ་གྱིས་རྒན་གཞོན་གྱི་ལང་ཚོ་ལ་ཁྱད་པར་མེད་པ།ཕོ་མོའི་དབྱེ་བ་མེད་པ།ཡུལ་དུས་ཀུན་ཏུ་ཡིད་དུང་དུང་ངང་ནས་མ་སྐུལ་རང་སྟོབས་ཀྱིས་མགྲིན་པ་ལས་དབྱངས་རྟ་བླངས་ཤིང་།རྐང་ལག་ཀྱང་པི་ཝང་གི་གདངས་འགྲོས་ཀྱི་མྱུར་ཚད་ལ་བསྟུན་ཏེ་མ་སྒུལ་རང་འགུལ་བྱེད་པས།གཞས་འཁྲབ་པར་ངེས་པར་དུ་རོལ་ཆས་པི་ཝང་གི་རམ་འདེགས་པར་མཚོན།པི་ཝང་གི་བྱེད་ནུས་ནི་རབ་འདེགས་ཙམ་མ་ཡིན་ལ་ཧ་ལམ་བཀོད་འདོམས་པ་ཞིག་དང་མཚུངས་ཏེ།པི་ཝང་གི་གདངས་འགྲོས་ཀྱི་མྱུང་ཚད་དང་གྲིམ་ལྷོད་ལ་གཞིགས་ཏེ་རྐང་བའི་རྡོག་བྲོ་དང་ལག་པས་འདེགས་འཇོག་དབྱངས་སུ་གྱེར་བ་བཅས་གང་ལ་གང་འཚམ་ཞིག་ཐོན་དགོས་སོ།།
མཇུག་བསྡུ་བ།
འབའ་གཞས་ནི་བོད་ཡུལ་གྱི་རྒན་དར་གཞོན་གསུམ་ཚང་མ་དགའ་བའི་གླུ་གཞས་ཤིག་ཏུ་ཆགས་ཤིང་བོད་རིགས་མི་དམངས་ཀྱི་མེད་དུ་མི་རུང་བའི་འཁྲབ་སྟོན་གྱི་རྣམ་པ་ཞིག་ཡིན།འབའ་ཐང་གི་གནའ་དེང་ཟུང་དུ་སྦྲེལ་བའི་གཞས་དེ་ཉིད་ཉམས་པ་སླར་གསོ་དང་མ་ཉམས་པ་གོང་འཕེལ་གྱིས་རྗེས་འཛིན་དར་སྤེལ་དང་མྱུར་སྐྱོབ་ཀྱི་ལས་སུ་ཧུར་ཐག་གིས་ཞུགས་ཏེ་འབའ་གཞས་ནོར་བུ་དགོས་འདོད་ཀུན་འབྱུང་དེ་དབྱར་མཚོ་རྒྱས་པ་བཞིན་དར་སྤེལ་དང་གཞས་ཀྱི་འབྱུང་ཁུངས་ཀྱི་སྒྱུ་རྩལ་ངོ་མཚར་ཅན་དེ་འཛམ་གླིང་ཡོངས་སུ་ཁྱབ་པའི་དྲིལ་བསྒྲགས་ངོ་སྤྲོད་བྱེད་པའི་འདུན་པ་མངོན་དུ་འགྱུར་བའི་ཕྱིར་རྩོམ་འདི་འབྲི་ཁུལ་བགྱིས་ཤིང་།དཔྱད་རྩོམ་འདིར་འབའ་གཞས་ཀྱི་དགེ་མཚན་བརྒྱུད་བསྒྲགས་བྱེད་པའི་དུས་མཚུངས་སུ་དེ་ལས་མང་བའི་སྐྱེ་བོ་རྣམས་ཀྱིས་འབའ་གཞས་ལ་དགའ་བོ་ཡོང་བ་བྱ་རྒྱུ་ནི་དམིགས་ཡུལ་ཡིན་ནོ།(རྩོམ་སྒྲིག་པ་བདེ་ཆེན་དབང་མོ།)
  • ལེ་ཚན་སྔོན་མ།:དཀར་མཛེས་ཐིག་ཐ་ཞབས་བྲོ་ངོ་སྤྲོད་མདོར་བསྡུས། །
  • ལེ་ཚན་རྗེས་མ།:འབའ་གཞས།