དེ་ཡང་གདོད་མའི་སྤྱི་ཚོགས་ཀྱི་ཡར་སྔོན་སྤྲ་དང་སྤྲེའུ་མི་རུ་གྱུར་བའི་དུས་མཚམས་ནི་སྨྲ་ཤེས་དོན་གོ་བ་ནས་འཇོལ་པ་རེད། དེར་བརྟེན་སྨྲ་ཤེས་ཤིང་དོན་གོ་བ་འདུ་ཤེས་གསལ་བ་དགའ་སྐྱོ་ཡིས་སེམས་པ་ལྡེམ་ལྷུང་བྱས་པས་ལུས་ཀྱི་རྣམ་འགྱུར་ཁྱད་པར་ཐོན་པ་ལ་བྲོ་དང་། ངག་གི་རྣམ་འགྱུར་ཁྱད་པར་བ་ཐོན་པ་ལ་གླུ་ཞེས་པ་དེ་ཆགས།
         དེ་ལྟར་གླུ་བྲོ་ཞེས་དེ་ནི་མཐོ་རིས་སྲོག་ཆགས་ཀྱི་བསམ་སྤྱོད་འཕོ་འགྱུར་སོང་མིན་བརྟག་བྱེད་ཀྱི་ཐིག་ཤིང་ལྟ་བུ་ཡིན་པ་རེད།
         ད་ལམ་ངས་བཤད་རྒྱུའི་དཀར་མཛེས་ཐིག་ཐ་ཞབས་བྲོ་འདི་ཡང་རྒྱུ་མེད་རྐྱེན་མེད་ལས་མ་བྱུང་ཞིང་། རྒྱུ་སེམས་ཀྱི་སྤྲོ་བ་མཐོ་ལ། རྐྱེན་ལུས་ངག་གིས་གྲོགས་བྱས་ཏེ་གྲུབ་པ་རེད།  སྤྱིར་ཐིག་ཞབས་བྲོ་འདི་བོད་གཅིག་པུ་མ་ཟད་འཛམ་གླིང་ན་ཁྱབ་ཆེ་བའི་ཞབས་བྲོ་ཞིག་རེད། དཔེར་ན་དབྱིན་ཇི་སོགས་རྒྱལ་ཁབ་སོ་སོར་དར་ཁྱབ་ཆེ། ཐིག་ཐ་ཞབས་བྲོ་འདི་འཁྲབ་མཁན་ལ་བཤད་ན།  ལུས་ཟོལ་བདེ་བ། ཁམས་དྭངས་བ། གཟུགས་གཞི་ཐང་བ། ཁྱད་པར་རྐང་རྩལ་བདེ་བ་ཞིག་དགོས་པ་ལས་བྲོ་འཁྲབ་མཁན་ཡིན་པ་ཙམ་གྱིས་མི་ཆོག་པ་རེད།
ཐིག་ཐ་ཞེས་པ་འདིའི་མིང་ནི་བྲོ་འཁྲབ་དུས་ཐིག་སྒྲའམ་ཐིག་སྒྲ་མང་ཞིང་མྱུར་བ། ཐིག་སྒྲའི་འགྱུར་བ་འདྲ་མིན་གྱིས་མི་སེམས་འགུལ་པའི་ནུས་པ་ལྡན་ལ། རྡོག་པའི་ཐིག་སྒྲ་ཆེས་ཐོན་དཀའ་བ་མང་པོ་ཕྱོགས་བསྡུས་བྱས་པའི་བྲོ་རིགས་ཤིག་ཡིན། འདི་ནི་གཙོ་བོ་རྐང་བའི་རྡོག་སྒྲ་སྟེ་ཐིག་ཐ་སྒྲ་མང་བ། རྡོག་སྒྲའི་བྱེད་ལས་གཙོ་བོ་ཡིན་པས་ཐིག་ཐ་ཟེར། ཐིག་ཐ་ཞབས་བྲོ་རྡུང་ཤེས་ན་བྲོ་ཆེན་དང་གཞས་སོགས་རང་བཞིན་གྱིས་བརྡུང་ཤེས་ཀྱི་ཡོད། ཐིག་ཐ་འདི་རྡུང་ན་ཞབས་བྲོའི་གོ་ཆོད་པར་མ་ཟད་ལུས་རྩལ་སྦྱོང་བརྡར་བྱེད་པའི་གོ་ཡང་ཆོད།
    དཀར་མཛེས་ཐིག་ཐ་ནི་ཐོག་མར་དབུས་ལྷ་ལྡན་ཞིང་གི་གདན་ས་ཁག་ཏུ་དར་བ་དང་། ཕྱིས་སུ་རྫ་ཆོས་རྗེ་ངག་དབང་ཕུན་ཚོགས་ཀྱིས་དཀར་མཛེས་དགོན་པ་རྒྱ་ཆེར་བསྐྱེད་རྗེས་གྲྭ་པ་རྣམས་གྲྭ་སར་སོང་ནས་ཐིག་ཐ་ཞབས་བྲོ་འདི་སྦྱངས་ནས་དར་སྤེལ་བྱུང་བ་ཞིག་རེད་འདུག 
  ཐིག་ཐ་ཞབས་བྲོ་ནི་ཐོག་མར་དབུས་ལྷ་ལྡན་གྲྭ་ས་ན་དར། དེ་ནས་དབུས་ལྷ་ལྡན་གྲྭ་སར་ཕེབས་པའི་དཀར་མཛེས་དགོན་པའི་གྲྭ་པ་རྣམ་པས་སྦྱངས་ནས་འཁྲབ་པས་འདི་ལ་གྲྭ་གཞས་ཀྱང་ཟེར། སྐབས་དེའི་བྲོ་ཚིག་རྣམས་ནི་དང་པོ་བླ་གྲྭ་རྣམས་ལ་བསྟོད་པ། གཉིས་པ་དྲིན་ཆེན་ཕ་མ་ལ་བསྟོད་པ། གསུམ་པ། དཔོན་དང་སྡེ་ལ་བསྟོད་པ་བྱས་པའི་ཚིག་ཀོ་ན་ཡིན། དེ་དུས་ཞབས་བྲོ་འཁྲབ་ཚུལ་ཡང་རྐང་པའི་རྡོག་རྩལ་གྱི་རྣམ་འགྱུར་གཙོ་བོ་ཡིན་པ་ལས་ལུས་སྟོད་ཀྱི་གཡོ་འགུལ་དང་ལག་པའི་རྣམ་འགྱུར་ད་ལྟ་འདྲ་བ་གཏན་ནས་མེད། དེ་ལྟར་ན་ཐིག་ཐ་མཚན་ཉིད་པ་དེ་གྲྭ་པ་རྣམ་པས་འཁྲབ་པ་དེ་ལ་ངོས་འཛིན་བྱེད་དགོས། དེང་སང་དཀར་མཛེས་ཐིག་ཐ་ཞེས་འཁྲབ་པ་འདི་དཀར་མཛེས་དགོན་གྱི་གྲྭ་པའི་ཐིག་ཐ་ཞབས་བྲོ་ལ། ལག་པའི་རྣམ་འགྱུར་དང་། ལུས་སྟོད་ཀྱི་གཡོ་འགུལ། གླུའི་གདངས་སོགས་འགྱུར་བཅོས་དང་ཁ་སྣོན་མང་པོ་བྱས་ཏེ་གྲུབ་པ་རེད། བྲོ་ཚིག་ཀྱང་ཐིག་ཐ་ཉིད་ལ་བསྟོད་པ་བྱེད་པ་གཙོ་བོ་ཡིན། འཁྲབ་མཁན་ཡང་མི་དཀྱུས་མ་ཡིན་པས་ད་ལྟ་དམངས་ཁྲོད་ཀྱི་བྲོ་ཡི་རིགས་གནས་སུ་གྱུར་ཏེ་སྐད་གྲགས་ཆེན་པོ་ཡོད།