འབའ་གཞས་ནི་བོད་མི་རིགས་ཡོངས་ཀྱིས་དགའ་པོ་བྱས་པའི་སྒྱུ་རྩལ་ཁྱད་དུ་འཕགས་པ་ཞིག་ཡིན།སྒྱུ་རྩལ་དེ་ནི་འཛམ་གླིང་ཡང་རྩེར་གནས་པའི་བོད་ཁ་བའི་ལྗོངས་ཀྱི་ནང་གསེས་མདོ་ཁམས་སྤོ་འབོར་སྒང་དུ་དར་ནས་ལོ་ཆིག་སྟོང་ལྷག་འགོར།འབྲེལ་ཡོད་དཔྱད་གཞིའི་ཡིག་རིགས་ནང་ངོ་སྤྲོད་བྱས་པར་གཞིགས་ན།འབའ་གཞས་ཀྱི་འབྱུང་ཁུངས་ནི་འབའ་ཡིན་ལ།དེང་སང་གི་བར་དུ་མ་ཉམས་གོང་འཕེལ་འབྱུང་སའང་འབའ་ཐང་ཡིན་ཞིང་།སྒོར་གཞས་དེ་ལ་དམིགས་བསལ་གྱི་ཁྱད་ཆོས་ལྡན་པ་དང་ཡུལ་སྲོལ་གོམས་གཤིས་ཀྱི་རང་བཞིན་ལྡན་ཐོག་སྒྱུ་རྩལ་གྱི་ཐད་ལ་གཞན་དང་ཐུན་མོང་མ་ཡིན་པའི་ཁྱད་ཆོས་དུ་མ་ཡོད་པ་རེད།
དང་པོ། འབའ་གཞས་དང་བདེ་ཆེན་གཞས་ཀྱི་འབྲེལ་བ།
གཞས་ཞེས་པ་ནི་གནའ་སྔ་མོ་ནས་བོད་མི་རིགས་ཀྱི་དམངས་ཁྲོད་དུ་དར་ཁྱབ་ཆེ་བའི་རིག་རྩོམ་གྱི་སྒྱུ་རྩལ་ཞིག་ཡིན།གཞས་དེའི་ཐོག་མར་དར་ཡུལ་དང་འབྱུང་ཁུངས་ལ་བཤད་སྲོལ་མང་པོ་མཆིས།དམངས་ཁྲོད་དུ་བཤད་སྲོལ་དང་འབྲེལ་ཡོད་ཁུངས་ལུང་ལ་གཞི་བཅོལ་ན་འབའ་ཐང་ནི་གཞས་ཀྱི་འབྱུང་གནས་དང་དར་ཁྱབ་ཤིན་ཏུ་ཆེ་བའི་ས་གནས་ཞིག་ཡིན་པ་ཤེས་ཐུབ་པ་མ་ཚད།འབའ་ཐང་རྫོང་གི་ལོ་རྒྱུས་སུའང་གསལ་པོ་འཁོད་འདུགགནའ་དུས་སུ་འབའ་ཐང་ནི་བོད་ལྗོངས་དང་ཡུན་ནན་སོགས་ཀྱི་མི་ཐམས་ཅད་འཛོམས་སའི་ས་གནས་གལ་ཆེན་ཞིག་ཡིན་པས།འབའ་གཞས་དེ་ས་གནས་གཞན་དུའང་དར་ཁྱབ་འགྲོ་བ་ཞིག་རེད་འདུག
འཇང་ས་དམ་རྒྱལ་པོའི་དུས་སུ་འཇང་མི་མང་པོ་ཞིག་འབའ་ཐང་དུ་ཞིང་བཟོ་ས་ཡོང་ནས་འབའ་མི་དང་ཕན་ཚུན་འགྲོགས་བྱས་ཏེ་འཚོ་བ་ཡུན་རིང་པོ་རོལ་མྱོང་བ་ཞིག་རེད་འདུགབཟོ་བའི་ས་ཞིང་ཞེས་པའི་ཞིང་མིང་དེ་དེང་སང་ཡང་འབའ་ཐང་རྫོང་དུ་མཆིས།དེའི་དུས་སུ་ཁོ་ཚོས་བག་སྟོན་ལ་སོགས་པའི་དགའ་སྤྲོའི་དུས་ཆེན་ནང་དུ་གཞས་དེའི་འཆམ་སྟངས་དང་ཚིག་གདངས་བཅས་སྦྱངས་པ་རེད།ཕྱིར་རང་ཡུལ་དུ་ལོག་སྟེ་འབའ་གཞས་དེ་འཁྲབ་སྟོན་གྱི་ནང་དོན་གལ་ཆེན་ཞིག་ཏུ་བརྩིས་ནས་ལོ་གསར་དང་དུས་ཆེན་སྐབས་སུ་འཆམ་སྟེ་རིམ་བཞིན་གྱིས་དར་ཁྱབ་བྱུང་བ་རེད་ཅེས་བཤད་སྲོལ་འདུགདེའི་རྐྱེན་གྱིས་འབའ་གཞས་དང་གཞས་གཉིས་ལ་འདྲ་ས་མཚུངས་ས་མང་པོ་ཡོད་པ་རེད།གར་སྟབས་དང་དབྱངས་རྟ་སོགས་ཀྱང་ཕལ་ཆེར་གཅིག་པ་གཅིག་རྐྱང་ཡིན།ཡིན་ནའང་བདེ་ཆེན་ཡུལ་དུ་དར་སྲོལ་ཆེ་བའི་གཞས་ཚིག་མང་པོར་བལྟས་ན།འབའ་ཐང་གི་ཡུལ་སྲོལ་དང་མཐུན་པ་མི་ཉུང་བ་ཞིག་ཡོད་པ་ལས་ཤེས་སོ།།
གཉིས་པ། འབའ་གཞས་ཀྱི་འཕེལ་རིམ།
འབའ་གཞས་ནི་འབའ་ཐང་རྫོང་དུ་དར་ཁྱབ་ཆེ་བའི་གླུ་གཞས་མཐའ་དག་གི་བསྡུ་མིང་ཡིན་ཞིང་།འབའ་གཞས་དར་སྲོལ་བྱུང་བའི་ལོ་རྒྱུས་ནི་གོང་སྨོས་ལྟར་ཡིན།འབའ་ཐང་གི་ཡུལ་གྲུ་གང་དུ་ཆས་ན་རྒན་མགོ་དཀར་ནས་གཞོན་སོ་དཀར་གྱི་བར་གཞས་འཆམ་མི་ཤེས་མཁན་ནི་གཅིག་ཀྱང་མེད་སྟབས།འབའ་ཐང་ལ་ད་གཟོད་གཞས་ཀྱི་ཕ་ཡུལ་ཞེས་མཚན་སྙན་ཐོབ་པ་རེད།འཆམ་པའི་དུས་སུ་མི་གཅིག་གམ་གཉིས་གསུམ་གྱིས་པི་ཝང་བཟུང་ནས་གཞས་འགོ་ཁྲིད་རྗེས་གཞས་རའི་རྣམ་པ་སྒོར་སྒོར་བཟོས་ནས་འཆམ་པར་བརྟེན་སྒོར་གཞས་ཞེས་འབོད།འཁྲབ་མཁན་གྱིས་གར་སྟབས་དང་གླུ་ལེན་མཉམ་གཅིག་བྱེད་ཅིང་།གཞས་ཇེ་མགྱོགས་སུ་གཞས་ཚིག་ལེན་པའང་གོམ་པའི་སྟངས་སྟབས་ཀྱང་དེ་ལྟར་མགྱོགས་དགོས།དེང་སང་གི་འཆམ་གྲོལ་བང་རིམ་བསྒྲིགས་ནས་འཆམ་པ་ལ་སོགས་མང་པོ་ཡོད།གཞས་ཚིག་གི་ཐད་ཀྱང་ཕུན་སུམ་ཇེ་ཚོགས་སུ་སོང་འདུག
གསུམ་པ། གཞས་འཆམ་སྟངས་དང་དབྱངས་རྟའི་སྐོར།
སྔར་དུས་ཀྱི་གོམས་སྲོལ་ལྟར་ན།འབའ་གཞས་འཁྲབ་དུས་རྐང་ལག་གི་སྟངས་སྟབས་ལ་ངེས་པར་དུ་ཆོས་ཉིད་ངེས་ཅན་ཞིག་ཡོད་པ་དང་།དམིགས་བསལ་དུ་སྐྱེས་པ་དང་བུད་མེད་གཉིས་ལ་ཁྱད་པ་ཡོད་ཅིང་།སྐྱེས་པ་དག་གིས་ལག་པ་མཐོན་པོར་བཀྱག་དགོས།བུད་མེད་རྣམས་ཀྱིས་གོམ་པ་ཆུང་ཆུང་དང་ལུས་པོ་ཅུང་སྒུར་དགོས།དེར་བལྟས་ན་སྤྱི་ཚོགས་རྙིང་པའི་དུས་སུ་ཕོ་མཆོག་མི་དམན་གྱི་བསམ་པ་མཆིས་པ་ཡང་གར་སྟབས་ཀྱི་ཁྱད་པ་དེ་ལས་ར་སྤྲོད་བྱེད་པ་རེད་ཅེས་མི་རྒན་རྣམས་ཀྱི་ངག་རྒྱུན་དུ་བཤད་རྒྱུ་མཆིས།གླུ་ལེན་དུས་ཀྱང་དལ་ཞིང་རིང་བ་ལས་ངག་བཀུག་ན་རྒྱ་མཚོའི་མཐའ་ནས་བཀུགགླུ་ལེན་ན་རི་འགོའི་རྩེ་ནས་ལེན་ཞེས་འབའ་གཞས་ཚིག་ལ་གསལ།མདོར་བསྡུས་ནས་བཤད་ན་དེའི་དུས་ཀྱི་འབའ་གཞས་ཀྱང་དབང་སྒྱུར་གྲལ་རིམ་དང་ས་བདག་སོགས་ལ་ཞབས་འདེགས་ཞུ་བའི་སྒྱུ་རྩལ་ཞིག་ཡིན་ཞིང་།དཔེར་ན་ལྕང་མ་འཛུགས་མཁན་ང་ཡིན།ལྕང་ཆུ་བླུག་མཁན་ང་ཡིན།ལྕང་མའི་ལོ་འདབ་རྒྱས་དུས།བདག་པོ་མང་པོ་སླེབས་བྱུང་ཞེས་པ་ལས་དེའི་དུས་ཀྱི་མི་སེར་ཚོའི་སྤྱི་ཚོགས་ཀྱི་གོ་གནས་དང་འཚོ་བའི་ཆོས་ཉིད་མཚོན་ཐུབ་པ་ཞིག་རེད།
བཞི་པ། གཞས་ཚིག་གི་མངོན་གསལ་ཁྱད་ཆོས།
སྔར་དུས་སུ་འབའ་གཞས་ཀྱི་གཞས་ཚིག་གི་ནང་དོན་གཙོ་བོ་མི་དམངས་ཀྱི་སྐྱིད་སྡུག་དང་དེའི་དུས་ཀྱི་སྤྱི་ཚིགས་ཀྱི་རྣམ་པ་ཡིན་ཞིང་།དེང་སང་གུང་ཁྲན་ཏང་གི་བཀའ་དྲིན་འོག་ཏུ་བོད་མི་དམངས་ཀྱི་འཚོ་བ་དབྱར་མཚོ་རྒྱས་པ་ལྟར་ཉིན་རེ་བཞིན་འཕེལ་ཁ་དར་བའི་རྣམ་པ་དང་།མེས་རྒྱལ་ལ་བསྟོད་པ།གུང་ཁྲན་ཏང་ལ་བསྟོད་པ།མི་རིགས་མཐུན་སྒྲིལ་ལ་བསྟོད་པ་བཅས་གཞས་ཚིག་རྣམས་ཕུན་སུམ་ཇེ་ཚོགས་སུ་གྱུར་ཡོད།གཞས་ཚིག་ཐོག་ནས་འབའ་ཐང་གི་གནའ་དེང་གི་ཁྱད་པར་གསལ་པོ་མཚོན་ཐུབ་ངེས་རེད།
ལྔ་པ། གཞས་པའི་གྱོན་གོས་ཀྱི་ཁྱད་ཆོས།
འཆམ་པའི་དུས་བཀླུབས་པའི་རྒྱན་ཆས་ཀྱིས་སྤྱི་ཚོགས་ཀྱི་འཕེལ་རིམ་དང་མི་དམངས་ཀྱི་འཚོ་བ་གསལ་རྗེན་མཚོན་ཐུབ།རྒན་རབས་པ་རྣམས་ཀྱིས་བཤད་པར་གཞིགས་ན།གནའ་དུས་སུ་མི་རྣམས་ཀྱི་ཆ་རྐྱེན་ཧ་ཅང་ཞན་པའི་དབང་གིས་བག་སྟོན་དང་དུས་ཆེན་སྐབས་གོས་ཧྲུལ་བཀླུབས་ཤིང་རྐང་རྗེན་གྱིས་གཞས་འཆམ་སྲོལ་ཡོད་པར་གྲགས།
དེང་སང་ལ་མཚོན་ན་རྒྱལ་ཁབ་ཀྱི་ཐུགས་ཁུར་འོགགཞས་པའི་གྱོན་གོས་ལའང་གནམ་ས་བླ་འོག་བསྒྱུར་བའི་འགྱུར་ལྡོག་བྱུང་ཡོད།ད་ཆའི་གཞས་པའི་ལུས་སུ་གཟིག་སྟག་སྲམ་གྱི་པགས་པས་ཤན་པའི་ཚར་གོས་གྱོན།མགོ་ལ་གྲ་ཁ་ལེགས་པའི་ཝ་ཞྭ་བསྐོན་པ་སོགས་ནི་དེང་གི་སྤྱི་ཚོགས་འཕེལ་ཁ་དར་བའི་མཚོན་བྱེད་ཁོ་ན་ལགས།