༄༅།།ན་མོ་གུ་རུ་མཉྫུ་ཤྲི་ཡེ་ཟ།ཟབ་ཟབ་རང་གཞན་གྲུབ་མཐའི་སྲོལ།།
　　　　གསལ་གསལ་སྤྱན་གྱིས་ལེགས་གཟིགས་ནས།།ལྷུག་ལྷུག་གསུང་གིས་འདོམས་མཛད་པ།།
　　　　མཁས་མཁས་དཔལ་ལྡན་བླ་མར་འདུད།།ཕྱག་ན་པད་མའི་འདུལ་གང་བོད་ཡུལ་འདིར།།
　　　　ཆོས་རྒྱལ་སྲོང་བཙན་སྒམ་པོ་ནས་བཟུང་སྟེ།།རྒྱལ་བསྟན་ཉི་མ་ཤར་ལ་སྔ་དར་ཟེར།།
　　　　གང་ཚེ་གླང་དར་བསྟན་པ་བསྣུབས་པ་ན།།མདོ་ཁམས་སྨན་ནས་བླ་ཆེན་དགོངས་གསལ་དང་།།
　　　　སྟོད་ནས་ལོ་ཆེན་རིན་ཆེན་བཟང་བོ་ཡིས།།རྒྱལ་བསྟན་རྩ་བ་འདུལ་བའི་སྡོམ་རྒྱུན་སྤེལ།།
　　　　བསྟན་པའི་མེ་རོ་བསོས་པ་ཕྱི་དར་རོ།།སྨྲི་ཏི་ཡན་ཆད་བསྒྱུར་བ་རྙིང་རྒྱུད་དང་།།
　　　　གསར་མ་ལོ་ཆེན་རིན་བཟང་སོགས་ནས་བཟུང་།།མདོ་ལ་གསར་རྙིང་ཁྱད་པར་མི་འབྱུང་བས།།
　　　　གསང་སྔགས་དར་ཚུལ་སྒོ་ནས་གཉིས་སུ་དབྱེ།།གསང་སྔགས་དར་ཚུལ་སྒོ་ནས་གཉིས་སུ་དབྱེ།།
　　　　རྙིང་མའི་ཆོས་འདི་རྣམ་དག་ཡིན་མིན་ལ།།མཁས་པའི་བཞེད་ཚུལ་མང་དུ་བྱུང་མོད་ཀྱང་།།
　　　　ཕྱིས་འབྱུང་དག་གིས་བསྲེ་བསླད་ཞུགས་པ་ལས།།ཆོས་དེ་རང་ལྡོག་རྣམ་དག་ཡིན་པར་འདོད།།
　　　　རྒྱལ་བའི་གསུང་རབ་ཐམས་ཅད་གདམས་ངག་ཏུ།།ཤར་ལ་བཀའ་གདམས་པ་ཞེས་གྲགས་པ་སྟེ།།
　　　　དཔལ་ལྡན་ཨ་ཏི་ཤ་ཡི་ལུགས་སྲོལ་མཆོག།སྟོན་པས་སྲོལ་ཕྱེ་སྐུ་མཆེད་གསུམ་གྱིས་སྤེལ།།
　　　　བཀའ་བརྒྱུད་ས་སྐྱ་དགེ་ལྡན་ལུགས་སྲོལ་ཡང་།།ཇོ་བོ་ཆེན་པོའི་འཕྲིན་ལས་འདི་ལ་བརྟེན།།
　　　　བཀའ་བབས་གདམས་པའི་བརྒྱུད་པ་འཛིན་པ་ལ།།བཀའ་བརྒྱུད་ཅེས་གྲགས་དེ་ལ་ཤངས་དྭགས་གཉིས།།
　　　　མཁས་གྲུབ་ཆེན་པོ་ཁྱུང་བོ་རྣལ་འབྱོར་གྱིས།།གཡས་རུ་ཤངས་སུ་དགོན་པ་བརྒྱ་རྩ་བཏབ།།
　　　　ཚོགས་པ་བསྐྱངས་པར་དེ་ཡི་བརྒྱུད་འཛིན་ལ།།ཤངས་པ་བཀའ་བརྒྱུད་ཅེས་སུ་གྲགས་པ་ཡིན།།
　　　　རྣལ་འབྱོར་དབང་ཕྱུག་རྗེ་བཙུན་མི་ལ་ཡི།།ཐུགས་སྲས་མཉམ་མེད་དྭགས་པོ་རིན་པོ་ཆེས།།
　　　　དྭགས་ལྷ་སྒམ་པོ་བཏབ་ནས་ཆོས་བརྒྱུད་སྤེལ།།རྗེས་འབྲངས་དག་ལ་དྭགས་པོ་བཀའ་བརྒྱུད་ཟེར།།
　　　　དེ་ལ་ཀརྨ་བ་དང་ཕག་གྲུ་དང་།།ཚལ་བ་འབྲི་གུང་འབྲུག་པ་སྟག་ལུང་དང་།།
　　　　འབབ་རོམ་གཡའ་བཟང་ཁྲོ་ཕུའི་བཀའ་བརྒྱུད་སོགས།།ནང་གསེས་སྒོ་ནས་དབྱེ་བ་མང་ཙམ་བྱུང་།།
　　　　དྭགས་པོའི་དངོས་སློབ་ཁམས་པ་དབུ་སེའམ།།དུས་གསུམ་མཁྱེན་པས་ཀརྨ་ལྷ་སྡིང་གི།།
　　　　དགོན་པ་བཏབ་པར་ཀརྨ་བ་ཞེས་གྲགས།།དེ་ཡི་སྐྱེ་བརྒྱུད་ཀརྨ་པཀྴི་ལ།།
　　　　ཧོར་རྒྱལ་ལས་ཀའི་ཞྭ་ནག་ཕུལ་བ་ལས།།དེ་ཕྱིར་ཞྭ་ནག་ཅན་དུ་གྲགས་པ་དང་།།
　　　　དེ་བཞིན་བརྒྱུད་འཛིན་རྟོགས་ལྡན་གྲགས་སེང་ལ།།ཞྭ་དམར་བྱུང་བས་ཞྭ་དམར་པ་ཞེས་བཏགས།།
　　　　ཕག་མོ་གྲུ་བའི་བཀའ་བརྒྱུད་ཅེས་པ་ནི།།དྭགས་པོའི་སྲས་མཆོག་རྡོ་རྗེ་རྒྱལ་བོ་ཡིས།།
　　　　ཕག་མོ་གྲུ་རུ་གདན་ས་མཛད་པ་ལ།།ཕག་མོ་གྲུ་བར་གྲགས་པ་དེ་ཡི་སྲོལ།།
　　　　དྭགས་པོའི་སློབ་མ་ཚུལ་ཁྲིམས་སྙིང་པོའི་སྲས།།བླ་མ་ཞང་ངམ་འགྲོ་མགོན་གཡུ་བྲག་པས།།
　　　　སྐྱིད་ཤོད་ཚལ་གུང་གཙུག་ལག་ཁང་སོགས་བཞེངས།།བརྒྱུད་འཛིན་རྣམས་ལ་ཞང་ཚལ་བ་ཞེས་གྲགས།།
　　　　འགྲོ་མགོན་ཕག་མོ་གྲུ་བས་རྗེས་བཟུང་བ།།སྐྱུ་ར་སྐྱོབ་པ་འཇིག་རྟེན་མགོན་པོ་ཡིས།།
　　　　འབྲི་གུང་དགོན་པ་བཏབ་ནས་རྗེས་འབྲང་ལ།།གདན་སའི་མིང་གིས་འབྲི་གུང་བ་ཞེས་བཏགས།།
　　　　དེ་བཞིན་ཕག་གྲུའི་སློབ་མ་གླིང་རས་པའི།།ཐུགས་སྲས་ཆོས་རྗེ་གཙང་བ་རྒྱ་རས་ཀྱིས།།
　　　　དགོན་པ་བཏབ་དུས་འབྲུག་སྒྲ་སྒྲགས་པ་ལས།།འབྲུག་ཅེས་བཏགས་པས་འབྲུག་པའི་ཆོས་ལུགས་བྱུང་།།
　　　　སྟག་ལུང་བཀའ་བརྒྱུད་ཅེས་པའི་ལུགས་སྲོལ་ཡང་།།ཕག་མོ་གྲུ་བའི་ཉེ་གནས་བཀྲ་ཤིས་དཔལ།།
　　　　སྟག་ལུང་ཞེས་བྱར་དགོན་པ་བཏབ་པ་ལས།།སྟག་ལུང་ཐང་པར་གྲགས་པ་དེ་ལས་མཆེད།།
　　　　བཀའ་བརྒྱུད་སྲོལ་འབྱེད་མཉམ་མེད་སྒམ་པོ་པས།།རྗེས་བཟུང་རྟོགས་ལྡན་དར་མ་དབང་ཕྱུག་གིས།།
　　　　འབབ་རོམ་དགོན་པ་བཏབ་སྟེ་སློབ་མ་བསྐྱངས།།བརྒྱུད་འཛིན་དག་ལ་འབབ་རོམ་བཀའ་བརྒྱུད་ཟེར།།
　　　　དེ་བཞིན་གཡའ་བཟང་བཀའ་བརྒྱུད་ཅེས་པ་ཡང་།།གཡའ་བཟང་ཆོས་རྗེར་གྲགས་པའི་བརྒྱུད་འཛིན་རྣམས།།
　　　　རིམ་པར་བྱོན་ལ་དེ་ལྟར་བཏགས་པའོ།།གཞན་ཡང་ཕག་གྲུའི་སློབ་མ་རྒྱལ་ཚ་དང་།།
　　　　ཀུན་ལྡན་རས་པ་སྐུ་མཆེད་རྣམ་གཉིས་ཀྱི།།དབོན་པོ་ཁྲོ་ལོ་བྱམས་པ་དཔལ་བ་ལས།།
　　　　རིམ་པར་བརྒྱུད་པ་ཁྲོ་ཕུ་བཀའ་བརྒྱུད་དོ།།ཤེར་ཕྱིན་ཉམས་སུ་ལེན་པའི་སྲིད་ཞི་ཡི།།
　　　　སྡུག་བསྔལ་ཐམས་ཅད་ཞི་བར་བྱེད་པས་ན།།ཞི་བྱེད་ཅེས་གྲགས་དམ་པ་སངས་རྒྱས་སྲོལ།།
　　　　སྔ་ཕྱི་བར་གྱི་བརྒྱུད་པ་རྣམ་གསུམ་བྱུང་།།ཤེར་ཕྱིན་སྔགས་དང་འབྲེལ་བའི་ཐབས་ཤེས་ཀྱིས།།
　　　　གཅེས་འཛིན་འཁོར་བའི་རྩ་བ་གཅོད་པའམ།།ཐབས་ཤེས་ལས་ལ་སྤྱོད་པས་སྤྱོད་ཅེས་པའང་།།
　　　　ཞི་བྱེད་ཡ་གྱལ་ལབ་ཀྱི་སྒྲོན་མེའི་སྲོལ།།འཁོན་རིགས་དཀོན་མཆོག་རྒྱལ་པོས་འབྲོག་མིའི་དྲུང་།།
　　　　གསང་སྔགས་གསར་འགྱུར་རྣམས་ལ་མཁས་པར་སྦྱངས།།ས་དཀར་དབུས་ཀྱི་ལོགས་སུ་དགོན་པར་བཏབ།།
　　　　དེ་ཕྱིན་ས་སྐྱ་བ་ཞེས་སྙན་པར་གྲགས།།ཡུ་མོ་མི་བསྐྱོད་རྡོ་རྗེའི་གཞན་སྟོང་སྲོལ།།
　　　　ཀུན་མཁྱེན་དོལ་བུ་ཤེས་རབ་རྒྱལ་མཚན་གྱིས།།ཇོ་མོ་ནང་ཞེས་གྲགས་པའི་དགོན་གནས་སུ།།
　　　　རྒྱ་ཆེར་སྤེལ་ལ་ཇོ་ནང་ལྟ་བར་གྲགས།།འཇམ་མགོན་མི་ཡི་གར་མཛད་ཙོང་ཁ་བས།།
　　　　དགའ་ལྡན་རྣམ་པར་རྒྱལ་བའི་གླིང་བཏབ་སྟེ།།འཁྲུལ་བྲལ་བསྟན་པའི་ཉིན་བྱེད་ཤར་བ་ལ།།
　　　　དགེ་ལུགས་པ་ཞེས་གྲགས་པའི་སྲོལ་བཟང་བྱོན།།རྨད་བྱུང་རྣམ་ཐར་གཙང་མའི་ཁྲིམས་དང་ལྡན།།
　　　　རླབས་ཆེན་རྒྱལ་སྲས་སྤྱོད་པའི་སྙིང་སྟོབས་ཆེ།།བདེ་སྟོང་མཆོག་གི་རིམ་གཉིས་རྣལ་འབྱོར་སྤྱོད།།
　　　　བློ་བཟང་རྒྱལ་བའི་བསྟན་དང་མཇལ་བར་ཤོག།ཅེས་དབྱངས་ཅན་དགའ་བའི་བློ་གྲོས་ཀྱིས་དམ་པའི་གསུང་བཞིན་བྲིས་པའོ།།མངྒ་ལཾ།།།།