གཙང་པ་རྒྱལ་པོའི་དུས་རབས།(1)

ཐུན་བསྟན་ཕུན་ཚོགས།    ཁམས་པའི་ཉིན་རེའི་ཚགས་པར་ལས་དྲངས།    2010-10-14

ས་བཅད་དང་པོ།  གཙང་པ་རྒྱལ་པོའི་སྲིད་དབང་དངོས་སུ་བཙུགས་པ། 
སྤྱིར་ལོ་རྒྱུས་ལ་ཞིབ་འཇུག་བྱེད་པའི་སྐབས་སུ་ཕྱོགས་ཞེན་གྱི་ལྟ་བ་དང༌།  གཅམ་བུ་ངོ་དགའི་ཚིག་གིས་མ་བསླད་པ་དོན་རྐྱེན་ཇི་བཞིན་ཡི་གེར་བཀོད་ནས།  དེ་ལ་ལོ་རྒྱུས་དངོས་གཙོ་སྨྲ་བའི་ལྟ་བས་དྲང་བདེན་གྱིས་ཕྱོགས་སྡོམ་བྱེད་དགོས་པ་ནི་ཧ་ཅང་གལ་ཆེ།  གྲུབ་མཐའི་ཕྱོགས་ཞེན་གྱིས་བོད་ཀྱི་ལོ་རྒྱུས་དངོས་ཀྱི་རྣམ་པ་ལ་ངན་ཤན་ཆེན་པོར་ཞུགས་ཡོད་པ་དཔེར་ན་བན་བོན་ཕྱོགས་རིས་ཀྱིས།  བོན་གྱི་ལོ་རྒྱུས་ཡིག་ཆ་དག་ཁུངས་མེད་ཀྱི་གྲལ་དུ་འཇོག་རྐྱང་བྱས་སྟབས།  སྲོང་བཙན་གོང་གི་ལོ་རྒྱུས་སྨྲ་བ་ལ་ཁུངས་གཏུགས་ས་མེད་པ་ལྟ་བུ་ཞིག་ཆགས་ཡོད།  དེ་བཞིན་དུ་དགའ་ལྡན་ཕོ་བྲང་བཙུགས་རྗེས་མཁས་པ་རྣམས་ཀྱིས་བྲིས་པའི་ལོ་རྒྱུས་ནང་དུ་གཙང་པ་རྒྱལ་པོ་ལ།   ཕྱི་ནང་གི་རིག་པའི་གནས་ལ་སྦྱངས་པ་དམན་པ་དང༌།   ལྷག་པར་དུ་ཆབ་སྲིད་ཀྱི་མྱོང་བ་ཤིན་ཏུ་ཞན་པ་ཡིན་པའི་ཚུལ་སོགས་ངན་སྨྲས་སྣ་ཚོགས་བྱས་ཡོད་པ་འདི་ནི་ཆབ་སྲིད་ཀྱི་ལྟ་བས་བསླད་པའི་ས་ཕྱོགས་སམ།  གྲུབ་མཐའི་ཕྱོགས་རིས་ཀྱི་གཏམ་ཙམ་དུ་མཐོང༌།  བོད་ཀྱི་ལོ་རྒྱུས་ལ་ཞིབ་འཇུག་བྱེད་པའི་རང་རིགས་གཞོན་ནུ་རྣམས་ཀྱིས་ལོ་ངོ་བརྒྱ་ཕྲག་མང་པོ་འདས་པའི་གོང་དུ་བྱུང་བའི་ས་ཆའི་ཕྱོགས་རིས་དང༌།  གྲུབ་མཐའི་སྡང་ཞེན་གྱི་ལྟ་བའི་རྗེས་སུ་མི་འབྲང་བར།  བློ་གཟུ་བོར་གནས་པའི་སྒོ་ནས་ཕྱོགས་མི་འདྲ་བའི་ཡིག་ཆ་ཁག་གཉིས་ཀ་ལ་ཞིབ་ཏུ་བརྟགས་ནས།  དུས་རབས་རིམ་བྱུང་གི་སྲིད་འཛིན་དཔོན་རིགས་རྣམས་ཀྱིས་བོད་སྤྱིའི་ཆབ་སྲིད།   དཔལ་འབྱོར།   དམག་དོན།   རིག་གནས་སློབ་གསོ།   འཕྲོད་བསྟེན།  སྤྱི་ཚོགས་བདེ་འཇགས་བཅས་ཀྱི་ཐད་ལ་ཕན་པའི་མཛད་རྗེས་གང་བཞག་ཡོད་པ་དང༌།  གནོད་པའི་ནོར་འཁྲུལ་གང་བྱུང་ཡོད་པ་བཅས་ཕྱོགས་སྡོམ་ལེགས་པོ་ཞིག་བྱ་བར་འོས་ཏེ།   དེང་རབས་ཅན་གྱི་བོད་ལྗོངས་གསར་པ་འཛུགས་སྐྲུན་བྱེད་པའི་ལས་ཀའི་ནང་དུ་ཉམས་མྱོང་དེ་དག་གིས་ཀྱང་བསམ་བློའི་སློབ་གསོ་བྱེད་ཆོག་པ་ཞིག་རེད། 
 གཅིགགཙང་པ་རྒྱལ་པོའི་གདུང་རབས་མདོར་བསྡུས། 
དེང་དུས་བོད་ཀྱི་ལོ་རྒྱུས་བཤད་པའི་སྐབས་སུ་གཙང་པ་རྒྱལ་པོའི་སྐོར་ལ་ཕྱོགས་རེ་བའི་ཡིག་ཆ་དང་ལྟ་བ་དག་ལ་བརྟེན་ནས་བྲིས་ཡོད་པ་ཤ་སྟག་མཐོང༌།  སླད་ནས་ཕྱོགས་གཉིས་ཀའི་ཡིག་ཆ་ལ་ཞིབ་ཏུ་དཔྱད་ནས་གཙང་པ་རྒྱལ་པོའི་ལོ་རྒྱུས་དངོས་ཀྱི་རྣམ་པ་གསལ་པོར་མཐོང་བར་བྱེད་ཆེད་འདིར་གཙང་པ་རང་ཕྱོགས་ཀྱི་ཁྲིམས་ཡིག་ཞལ་ལྕེ་བཅུ་དྲུག་གི་དབུ་ན་འཁོད་པའི་གཙང་པ་རྒྱལ་པོའི་གདུང་རབས་མདོར་བསྡུས་ཤིག་ཡོད་པ་དེ་ཇི་བཞིན་དུ་འགོད་པ་ལ། 
  • ལེ་ཚན་སྔོན་མ།:གནས་སྐབས་མེད།
  • ལེ་ཚན་རྗེས་མ།:གཙང་པ་རྒྱལ་པོའི་དུས་རབས།