གང་ཞིག་འཇིག་རྟེན་ཁམས་འདིར་ཕན་བདེའི་དཔལ། 
།  རྒྱལ་ཁྲིམས་གསེར་གྱི་འཁོར་ལོ་རྩིབས་སྟོང་གི། 
མཐའ་བཞི་རྣམ་གནོན་ཆོས་ཀྱི་རྒྱལ་པོའི་སྡེ། 
སྙན་པ་འབྲུག་ལྟར་ཆེ་བ་དེ་ལ་འདུད།   
ཨེ་མ་ས་དབང་རྒྱལ་པོའི་སྲས། 
ཕུན་ཚོགས་དགེ་ལེགས་ཀུན་གྱི་གཞི།   ། 
གྲངས་མེད་བསྐལ་པར་ཚོགས་གཉིས་བསྐྲུན། 
མགོ་ནག་མི་ལ་སྒམ་བུ་ཕྱ། 
གཉའ་རེངས་དགྲ་ལ་གཤིན་རྗེ་འདྲ།   ། 
ཆོས་སྲིད་སྐྱོང་ལ་འཇམ་དཔལ་དབྱངས། 
མངའ་འབངས་རྣམས་ལ་ཡིད་བཞིན་ནོར།   ། 
མཚན་སྨོས་གཙང་སྟོད་རྒྱལ་པོ་ཡིན།   ། 
དེ་ཡི་གདུང་རབས་རིན་ཆེན་ཕྲེང་བའི་རྒྱན། 
མཛེས་པར་ཐོད་དུ་བཅིངས་པའི་ངོ་མཚར་གྱིས། 
འདོད་དགུ་ཡིད་བཞིན་འབྱུང་བའི་བཀའ་དྲིན་གཏེར།   ། 
ཁས་དྲག་གནམ་གྱི་ཤེ་མོང་ཐོབ་པར་ཤོག
ཅེས་མཆོད་པར་བརྗོད་དེ།   སྤེལ་སེར་གཏམ་རྒྱུད་ལས་གཙང་སྟོད་རྒྱལ་པོའི་གདུང་རབས་ཀྱི་རྣམ་ཐར།  དེའི་ཕོ་བྲང་དང་མངའ་ཁུལ་གྱི་ཆེ་བ།   དེའི་བཀའ་ཁྲིམས་ཀྱི་ལུགས་དང་བཀའ་ཆེམས།  དེའི་སྤང་བླང་དོན་གོ་བའི་ཞལ་ལྕེ།  དེ་རྣམས་ཀྱི་ལུང་རྒྱབ་ཏུ་ཞར་བྱུང་གི་སྔོན་གྱི་ཁྲིམས་ཡིག་དང་གཏམ་རྒྱུད་ཁུངས་བཙུན་པ།  ཡིག་རྙིང་དང༌།   རྣ་གཏམ་ཐོས་པ་རྣམས་ཀྱང་བསྒྲིགས་པ་ལས།  ཐོག་མར་གདུང་རབས་ཀྱི་ལོ་རྒྱུས་ནི།  སྤྱིར་སྐྱེས་བུ་དམ་པ་རྣམས་ཀྱི་མཛད་པ་ཞི་རྒྱས་དབང་དྲག་གི་རྣམ་པར་ཐར་པ་སོ་སྐྱེའི་བློ་ཡི་སྤྱོད་ཡུལ་ལས་འདས་ཤིང༌།  ཟབ་པ་དང༌།   རྒྱ་ཆེ་བ།   བློ་ཆུང་གིས་རྟོགས་པར་དཀའ་མོད།   དེ་རྟོགས་ཀྱང་རྨོངས་པའི་བློས་སྙན་ངག་དང་སྡེབ་སྦྱོར་ཚིགས་བཅད་ཀྱི་རྐང་པ་ལྷུག་པའི་བསྒྲིགས་བརྩམས་རྣམས་མེད་པའི་ལྷ་དགའི་གཏམ་བཞིན་བབ་ཅོལ་དུ་བྲིས་པ་འདི་ཉིད་རྣམ་དཔྱོད་ཅན་གྱིས་གཟིགས་ན་སེང་གེའི་གཡུ་རལ་ལ་སྤྲེས་ལག་རྩེད་བྱས་པ་ལྟར་བཞད་མོའི་གནས་སུ་འདུག་ཀྱང་རང་རང་གི་མོས་བློར་ཤར་པ་ཅུང་ཟད་བྲི་བར་བྱ་སྟེ།  དེ་ཡང་སྤྱིར་བོད་ཁ་བ་ཅན་གྱི་རྒྱལ་ཁམས་འདི་ཉིད།  འཕགས་པ་སྤྱན་རས་གཟིགས་ཀྱི་གདུལ་བྱའི་ཞིང་ཁམས་གང་ལ་གང་འདུལ་གྱི་སྤྲུལ་པ་བསམ་གྱིས་མི་ཁྱབ་ཅིང༌།   ལྷག་པར་དུ་ཆོས་རྒྱལ་མེས་དབོན་རྣམ་གསུམ་གྱི་བཀའ་དྲིན་ལ་བརྟེན་ནས།  སངས་རྒྱས་བསྟན་པའི་དབུ་བརྙེས་པ་དང༌།   བསྒྱུར་པ་དང༌།  དར་བར་མཛད།   ལུགས་གཉིས་ཀྱི་བཀའ་ཁྲིམས་བཟང་པོས་སེམས་ཅན་ཐམས་ཅད་བདེ་སྐྱིད་ལ་བཀོད། 
མངའ་འབངས་དར་རྒྱས་སུ་མཛད་ཅིང༌།  བོད་ལ་སྔ་དར་བར་དར་ཕྱི་དར་གསུམ་བྱས་ན་འདི་ཡན་སྔ་དར་རོ།  བར་དར་ནི་དཔལ་ལྡན་ས་སྐྱ་པས་བོད་ཤིང་སྒོ་བཙུགས་པའི་རྒྱལ་པོ་མཛད་པ་དང༌།  སྡེ་སྲིད་སྣེ་གདོང་པའི་མཚན་དོན་རྡོ་དར་སྒང་བཞག་ཡན་དུ་འདུག་ཅིང༌།  དེ་ནས་བར་གྱི་མཇུག་ཕྱི་མའི་མགོའི་བར་དེར་བོད་དབུས་གཙང་ཕྱོགས་འདིར་གློ་བུར་གྱི་མི་རྒོད་འགའ་ཞིག་གིས་ཡུལ་གྱི་ས་སྣེ་རྣམས་སུ་རྫོང་བརྩིགས།   ཡུལ་སོ་སོ་བདག་ཏུ་བཟུང་སྟེ་རང་རང་འདོད་པའི་འཕྲུལ་གྱིས་བསམ་སྦྱོར་མི་བསྲུན་པའི་དམག་མཚོན་གྱི་བསྐལ་པ་དར།  ཧོར་སོག་ཀླ་ཀློའི་དཔུང་ར་མདར་སྦྲན་ནས་ཡུལ་ཁམས་ཐམས་ཅད་བཅོམ་ཞིང༌།