བོད་ཀྱི་གསོ་བ་རིག་པའི་རྨི་ལམ་འགྲེལ་བཤད།(1)

        2010-08-26

༤ ཐ་མལ་ནད་མེད་ཀྱི་རྨི་ལམ་དང་དེའི་དབྱེ་ཞིབ།
གང་ཟག་རང་ཉིད་ཀྱི་འབྱུང་ཁམས་དང་བསྟུན་ནས་རྨི་ལམ་རྨི་བ་ནི་ཐ་མལ་ནད་མེད་ཀྱི་རྨི་ལམ་ཡིན་པ་དང་། རྨི་ལམ་སྣང་ཚུལ་ནི་རླུང་སེམས་རྩ་ཁམས་སུ་རང་སོར་རྒྱུ་བའི་ལུས་སེམས་ཀྱི་རང་བྱུང་སྣང་ཚུལ་ཞིག་ཡིན་པ་དང་། རྨི་ལམ་བརྒྱུད་ལུས་སེམས་ཀྱི་འབྱུང་ཁམས་སྙོམ་ཐུབ་པ་ཡིན། མི་ཁ་ཅིག་ལ་ལུས་ཀྱི་རྩ་གནས་དོག་པ་ལ་ཡུལ་དོག་པའི་སྣང་བ་འཆར་བ་དང་། རྩ་གནས་ཡངས་པ་ལ་ཡུལ་ཡངས་ཤིང་རྒྱ་ཆེ་བ་མཐོང་བ་ནི་ཐ་མལ་གྱི་རྨི་ལམ་ཁོ་ནར་ངེས་ཏེ། རྩ་དེ་ལུས་ཆགས་དུས་སུ་དེ་ལྟར་གནས་པས་སོ། ། རྨི་ལམ་གྱིས་མ་འོང་གསང་བ་སྟོན་ཐུབ་པའང་ལུས་རང་ལ་གནས་པའི་རྩ་དང་རླུང་སེམས་ཀྱི་འདུ་སྦྱོར་ཐུན་མོང་མིན་པར་རག་ལས་པས་ཡིན་པ་དང་། རྨི་ལམ་ལ་འབྲས་བུ་འབྱིན་མིན་ཡང་ཐ་མལ་ནད་མེད་ཀྱི་རྨི་ལམ་ལ་བརྟག་དགོས་སྟབས། ཐ་མལ་ནད་མེད་ཀྱི་རྨི་ལམ་ཁོ་ན་ལས་གསང་བ་དེ་མི་འབྱུང་སྟེ། རྩ་རླུང་གི་ཁམས་རང་སོར་མ་རྒྱུ་ཚེ་ནུས་པ་དེ་མངོན་མི་ཐུབ་པ་དང་། མ་འོང་བའི་གསང་དོན་མཐོང་བའི་ནུས་པ་ཡོད་པའི་རྒྱུ་མཚན་ཡང་། ནང་པར་དུས་ལ་རྩ་རླུང་གི་རྒྱུ་བ་རང་སོར་རྒྱུ་འགོ་ཚུགས་པ་དང་རླུང་སེམས་ཀྱི་འདུ་སྦྱོར་ཁྱད་པར་ཅན་གྱིས་ལུས་སེམས་ལ་ལྷོད་ཆ་འབབ་པའམ་རྣལ་མར་རྒྱུ་ཕྱིར་སེམས་ཀྱི་ལྐོག་གྱུར་གྱི་ནུས་པ་མངོན་ནས་འབྱུང་འགྱུར་གྱི་བྱ་དངོས་སྐོར་རྨི་ལམ་འབྱུང་བ་ཡིན་ཕྱིར་རྨི་ལམ་ལ་འབྲས་བུ་འབྱིན་པ་ཡིན། གང་ཟག་ཁ་ཤས་ཀྱིས་བསྒོམ་སྟོབས་ཀྱིས་མ་འོངས་པའི་གསང་བ་སྟོན་ཐུབ་པའི་ནུས་པ་ཡོང་བའང་རླུང་སེམས་ཀྱི་ནུས་པ་ལ་དབང་བསྒྱུར་ནས་དེའི་སྟོབས་ཀྱིས་གསང་བ་མཐོང་ཐུབ་པའོ། ། སྤྱིར་མི་གང་ཞིག་ཉེས་གསུམ་གྱི་ཁམས་གང་དང་མཐུན་པ་དང་། ཉེས་གསུམ་གྱི་ཤས་འཕེལ་ཚུལ་གྱིས་དེ་དང་མཐུན་པའི་རྨི་ལམ་འབྱུང་ཕྱིར་དེ་དག་ལ་དམིགས་བསལ་གྱི་འབྲས་བུ་མི་འབྱིན་པ་དང་། དེ་མིན་ཉིན་གྱི་རྨི་ལམ་དང་། རྨི་ལམ་བརྗེད་པ་དང་མི་གསལ་བ་སོགས་ལ་འབྲས་བུ་མེད་པ་དང་། མཚན་སྟོད་དེ་ནམ་ཕྱེད་ཡན་ལ་རྨིས་པ་ལ་ཉིན་སྣང་གི་བག་ཆགས་མིན་པར་འབྲས་བུ་འབྱུང་བ་རྨིས་ནའང་། འབྲས་བུ་དེ་ཐག་རིང་ཞིང་འབྲས་བུ་དེའང་ཤིན་ཏུ་གསལ་པོར་ངོ་འཕྲོད་དཀའ་བ་དང་། ནམ་བར་དུ་འབྱུང་པོ་དང་ལྷ་སྲིན་རྒྱུ་སྟོབས་ཆེ་བ་དང་ཟླ་བའི་ཁམས་རྒྱུ་བའི་དབང་གིས་རྨི་ལམ་ལ་དེ་དག་གི་ཤུགས་རྐྱེན་ངེས་ཅན་འབྱུང་ཕྱིར་རྨི་ལམ་ལ་འབྲས་བུ་མེད་པ་དང་། ནང་པར་བཏང་བའི་རྨི་ལམ་ལ་འབྲས་བུ་འབྱིན་པ་སྟེ། དུས་ཀྱང་མགྱོགས་པར་ཉིན་དེར་འབྲས་བུ་འབྱུང་བའོ། ། རྨི་ལམ་བཟང་བ་ལ་རྨི་ལམ་གཞན་གྱིས་བར་མ་ཆོད་པ་དང་མ་གཉིད་པ་དང་། ཚིག་ངན་པ་སོགས་ཀྱིས་བར་མ་ཆོད་པ་དགོས་པར་དཔྱད་ན། རྨི་ལམ་ངན་པ་ལ་བཟློག་ཚིག་སོགས་ཀྱི་བར་གྱིས་ཆོད་ན་དེའི་དོན་འབྲས་ཆུང་པར་འདོད།
སྤྱིར་རྨི་སྣང་དུ་བྱ་དངོས་གང་རུང་བྱུང་བ་ལ་མཚོན་རྟགས་མི་འདྲ་བ་ཡོད་སྟབས། ཁམས་དང་རྟེན་འབྲེལ་གྱི་སྒོ་ནས་ལེགས་པར་དཔྱད་ཤེས་ན་ནང་དོན་མི་འདྲ་བ་མང་པོ་ཡོད་པས་རྨི་ལམ་ལ་དབྱེ་ཞིབ་བྱེད་རྒྱུར་ཕན་པ་ཆེན་པོ་ཡོད། རྨི་ལམ་ཞིག་ཏུ་བྱ་དངོས་མང་པོ་འབྱུང་སྲིད་ན་ཡང་དེ་ལས་གནད་གོ་བར་བྱེད་དགོས་ཏེ། དཔེར་ན། རྨི་ལམ་དུ་བྱུང་བའི་དངོས་པོ་གསལ་པོ་ཞིག་གི་ཁ་དོག་དང་དབྱིབས་དང་། ངོ་བོ་སོགས་ལས་གང་ཞིག་ལ་ཆེད་འཛིན་བྱེད་དགོས་པ་ཡིན། དེ་དག་གི་ཞིབ་ཕྲའི་གནད་ནི་འདིར་འགོད་པར་མི་བྱ་སྟེ། རྒྱུ་མཚན་དང་བཅས་ཞིབ་ཚགས་སུ་བརྗོད་ན་ཡིག་ཚོགས་མང་དྲག་པར་མཐོང་ངོ་། ། དེ་ལ་རྒྱུད་བཞིར། བཟང་བའི་རྨི་ལྟས་བསྟན་པ་ནི།

  • ལེ་ཚན་སྔོན་མ།:བོད་ཀྱི་གསོ་བ་རིག་པའི་རྨི་ལམ་འགྲེལ་བཤད།
  • ལེ་ཚན་རྗེས་མ།:བོད་ཀྱི་གསོ་བ་རིག་པའི་རྨི་ལམ་འགྲེལ་བཤད།
  • དོ་སྣང་ཆེ་བའི་རྩོམ།