དམངས་ཁྲོད་གནམ་གཤིས་བརྟག་ཐབས་འགའ།

གཅན་མེ་སྟག མཚོ་སྔོན་པོའི་དྲྭ་བ་ 2011-05-04

མགོ་ལོག་གི་དམངས་ཁྲོད་དུ་ལོ་གཅིག་གི་ནམ་ཟླའི་འགྱུར་ལྡོག་མཚོན་པའི་ངག་ཚིག་སྐོར་ཅིག་ཡོད་དེ། དེ་ནི་བྱ་ཆུ་ནག་ལམ་ནག ཁྱི་སྤོ་ཐོ་ཁ་སེར། ཕག་རི་སྐྱ་ཐང་སྔོན། བྱི་བ་རི་སྔོན་ཐང་སྔོན། གླང་རྩྭ་སྨྱོ་ཆུ་སྨྱོ། སྟག་ཁྲ་མེར་ཙིག་ཙིག ཡོས་ཁྲ་མོ་ནས་ཟན། འབྲུག་ཤིང་ལོ་རླུང་ཁྱེར། སྦྲུལ་རྔ་མ་འཁྱག་འབྱར། རྟ་ཆུ་ཁ་དར་ཆགས། ལུག་ཁ་བཤུད་སྣ་ཆད། སྤྲེལ་ས་འགས་རྡོ་འགས་ཞེས་པ་དེ་རེད། ངག་ཚིག་དེ་དག་ནི་དམངས་ཁྲོད་ཀྱི་བྱིས་གླུ་ལྟ་བུའི་ངང་དུ་དར་ཁྱབ་ཡུན་རིང་བྱུང་ཞིང་། ཚིག་དེ་དག་ལ་བརྟེན་ནས་ལོ་འཁོར་ཟླ་བ་བཅུ་གཉིས་ཀྱི་ནམ་ཟླའི་འགྱུར་ལྡོག་ལ་བརྟག་པའི་དམངས་སྲོལ་ཀྱང་ད་ལྟའི་བར་དུ་མ་ཉམས་པར་གནས་སོ། །
དམངས་ཁྲོད་དུ་ཡོངས་གྲགས་སུ་ཧོར་ཟླ་དང་པོ་བྱ་ཡིན་པས་བྱ་ཟླ་ཟེར་ལ། ཟླ་དེའི་ནང་དུ་བྱ་ཁྲུང་ཁྲུང་བོད་ཡུལ་གྱི་ཁམས་དང་མདོ་སྨད་ས་ཆར་སླེབས་ཤིང་། རླུང་དང་ལྷགས་པ་ཆེ་ལ་ཁ་བ་འབབ་པའི་དུས་ཡིན་ནའང་ཆུ་ལ་དར་མི་ཆག་ཅིང་ལམ་དུ་ཁངས་མི་ཆགས་པ་ཞིག་ཡིན་པས་ཆུ་ནག་ལམ་ནག་གི་ཤོད་སྲོལ་བྱུང་བར་འདོད་དེ། དཔེར་ན་ཧོར་ཟླ་གཉིས་པ་ནས་བྱ་རངས་བྱེའུ་རངས་བཅོ་བརྒྱད་ཡོད་ཅེས་པའི་ཤོད་སྲོལ་ལྟར། བྱ་དང་པོ་འོལ་བ་སླེབས་དུས་ལྷགས་པ་དང་རླུང་ཆེ་ཟེར་ཞིང་། བྱ་གཉིས་པ་ཁུ་བྱུག་ཐོན་སྐབས་བྱའི་གཤོག་རླུང་ཤུགས་ཆེ་ཟེར་དེ། དེ་ལ་ཁུ་བྱུག་ཤིང་གཅོག་ཟེར་བ་ཤིང་གི་སྟེང་དུ་ཁ་བ་བབས་ནའང་དྲོད་ཅུང་ཟད་ཡོད་པས་ཤིང་གིས་ཁ་བ་མ་ཐེག་པར་ཡལ་ག་ཆག་འགྲོ་བའི་ཤོད་སྲོལ་ཡོད་པ་ལྟར་རེད།
དེ་ནས་ཧོར་ཟླ་གཉིས་པ་ཁྱི་ཟླ་ཡིན་ཞིང་དྲོད་ཅུང་ཟད་ཁུགས་པ་ཁ་བ་ཞུས་ཏེ་སྤོ་ཐོ་སྟེང་བརླན་ཅུང་ཟད་བབས་པས་སྤོ་ཐོ་ཁ་སེར་ཞེས་འབོད་ལ། ཧོར་ཟླ་གསུམ་པར་སྐར་མ་སྨིན་དྲུག་ནུབ་རིར་ཡིབ་སྐབས་ཁ་བ་བུ་ཡུག་ཆེ་བས་སྨིན་དྲུག་རྔ་འཚུབ་ཅེས་འབོད་ནའང་ཐང་དམའ་སར་དྲོད་ཤུགས་ཆེ་རུ་སོང་སྟེ་རྩྭ་ཕྲན་མྱུ་གུ་འབུས་མགོ་བརྩམས་ཤིང་སྒང་མཐོ་སར་ད་དུང་མྱུ་གུ་མ་རྒྱས་པས་ཕག་རི་སྐྱ་ཐང་སྔོན་ཟེར། ཧོར་ཟླ་བཞི་བ་ནི་བྱེའུ་མཐིང་རིལ་སླེབས་སྐབས་ཡིན་པས་ཆར་རླུང་ཆེ་ཞེས་བཤད་ལ། དེ་ཡང་བྱ་སྣ་འོལ་བས་ཁྲིད། བྱ་གཞུག་མཐིང་གིས་རྫོགས་ཞེས་པའི་ཤོད་སྲོལ་ཡོད་ཅིང་། ཟླ་དེར་དྲོས་རྒྱས་ཏེ་རི་ཐང་མེད་པར་རྩྭ་མྱུག་གིས་གང་བས་རི་སྔོན་ཐང་སྔོན་གྱི་དུས་ཡིན་པར་ངོས་འཛིན་བྱས།
དེ་བཞིན་དུ་གླང་གི་ར་བ་སྟེ་དབྱར་ཟླ་འབྲིང་བོ་ལ་གླང་ཟླའི་ཞོད་རེངས་ཞེས་ཆར་ཞོད་ཆེན་པོ་ཡོད་ཅིང་དོན་ལ་སྐར་མ་སྨིན་དྲུག་ཤར་རིར་ཐོན་པའི་རྟགས་ཡིན་ཟེར་ལ། ཆར་ཞོད་ཆེ་བས་རྩྭ་སྨྱོ་ཆུ་སྨྱོ་ཞེས་འབོད། དྲུག་པ་སྟག་གི་ཟླ་བ་ནི་དབྱར་ཐ་མ་ཡིན་ཞིང་། མཚན་མོར་སྐར་མ་ཐར་ཐོར་ཁྲ་རིག་གེར་མཐོང་ཐུབ་ལ་ཆར་མི་འབབ་པའི་དུས་ཡིན་ཟེར་ལ། དྲུག་པའི་ཤེའུ་སྐར་མཚན་ཐུབ་ཅེས་དང་ཁྲ་མེར་ཙིག་ཙིག་ཅེས་པའི་མིང་གིས་འབོད། བདུན་པ་ཡོས་བུའི་ཟླ་བ་ནི་སྟོན་ཟླ་ར་བ་སྟེ། གྲོ་ནས་ཀྱི་ལོ་ཏོག་སྨིན་ཞིང་ནས་འབྲུ་ཁྲ་རིག་གེར་མངོན་པའི་དུས་ཡིན་པས་ཡོས་ཁྲ་མོ་ནས་ཟན་ཞེས་ཟེར་ལ། མཚན་མོར་སྐར་ཚོམ་ཁྲ་ཆིལ་ལེར་མཐོང་ནའང་ཆར་འབབ་པའི་ཉེན་ཡོད་པས་ཟླ་བདུན་པའི་སོག་དཀར་ཆུ་འཐུང་ཀྱང་ཟེར།
བརྒྱད་པ་འབྲུག་ཟླ་ནི་སྟོན་ཟླ་འབྲིང་བོ་ཡིན་ཞིང་འདིའི་དུས་སྟོན་ཞོད་ཡོད་ཅེས་ཟེར་ལ། བྱང་རླུང་ལྡངས་མགོ་བརྩམས་པས་ཤིང་ལོ་རླུང་ཁྱེར་གྱི་མིང་གིས་འབོད་ཅིང་། ཆར་བ་ཁ་བར་འགྱུར་བའི་དུས་ཀྱང་ཡིན་པས་འབྲོག་པ་རྣམས་ཀྱིས་ཕྱུགས་ལྷས་ནས་དཀའ་ངལ་མྱོང་བའི་དུས་ཡིན་ཟེར། དགུ་བ་སྦྲུལ་ཟླའི་ནང་གནམ་གཤིས་ཅུང་དྭངས་པའི་དུས་ཡིན་ལ་སྟོན་ཟླ་ཐ་མར་བབས་པས་དགུ་བའི་ཙད་སྡེ་ཞག་བདུན་ཞེས་འབོད་ཅིང་ཉིན་ཞག་བདུན་ཙམ་ལ་ཉི་མ་ཚ་བོ་ཤར་ནའང་ས་ཁམས་གཏིང་རིམ་ནས་འཁྱག་འགོ་ཚུགས་པས་སྦྲུལ་རྔ་མ་འཁྱག་འབྱར་ཞེས་ཟེར། བཅུ་བ་རྟ་ཟླ་ནི་དགུན་ཟླ་ཐོག་མ་ཡིན་པས་ལྷགས་པ་ཆེ་ཞིང་ཆུ་ལ་དར་ཆགས་པའི་དུས་ཡིན་པས་རྟ་ཆུ་ཁ་དར་ཆགས་ཞེས་འབོད།
བཅུ་གཅིག་པ་ལུག་ཟླའི་ནང་ཉི་མ་བྱང་བགྲོད་ཀྱི་དུས་ཡིན་ཞིང་ཉི་ལྡོག་གི་དགུ་ཟུག་པའི་སྐབས་ཡིན་པས། དགུ་དང་པོར་ས་འགད། དགུ་གཉིས་པར་རྡོ་འགད། དགུ་གསུམ་པར་ལྕགས་ཀྱི་ཐོ་ལུམ་འགད། དགུ་བཞི་བར་ཕོ་སྤྱང་གི་གདོང་རྩ་འགད། དགུ་ལྔ་བར་མོ་སྤྱང་གི་ནུ་རྩ་འགད། དགུ་དྲུག་པར་མཐའི་རྒྱ་མཚོའི་ནང་ལ་དྲོད་མེ་སྟག་ཙམ་ལྷུང་ཞེས་སྐབས་དེ་དུས་དྲོད་ཁུག་འགོ་བརྩམས་ཏེ། དགུ་བདུན་པར་རྐང་ཐང་གིས་ཞྭ་ཕུད། དགུ་བརྒྱད་པར་སྐྱ་མིས་ཞྭ་ཕུད། དགུ་དགུ་བར་ཐོང་གཤོལ་རི་ལ་འདེད་ཞེས་པའི་ཤོད་སྲོལ་ཡོད་པ་ཡིན་ལ། ལུག་ཟླ་སྤྱིའི་ངོས་ནས་ཙག་ཤིན་ཏུ་ཆེ་བས་ལུག་ཁ་བཤུད་སྣ་ཆད་ཞེས་ཤོད་སྲོལ་ཡོད།
ཟླ་བཅུ་གཉིས་པར་བོད་ལོ་ངོ་ནག་ཅེས་རྡུལ་འཚུབ་དང་རླུང་དམར་ཆེ་ཞིང་དྲོད་ཁུག་འགོ་བརྩམས་པས་ས་འགས་རྡོ་འགས་ཞེས་པའི་ཤོད་སྲོལ་ཡོད་འདུག དེ་ལས་གཞན་ཡང་བོད་ཀྱི་དམངས་ཁྲོད་དུ་ནམ་ཟླའི་འགྲོས་རིམ་ལ་བརྟག་པའི་གཏམ་དཔེ་མང་དུ་ཡོད་ཅིང་། དབྱར་སྟོན་གྱི་ཆར་ཞོད་ཆེ་སྐབས་སུ་ནུབ་ཕྱོགས་སྤྲིན་བར་ནས་ཉི་མ་ཤར་ན་ཆར་མི་འབབ་པའི་ངེས་པ་མེད་ཟེར་ཞིང་ལྷོ་ཕྱོགས་སྤྲིན་བར་ནས་ཉི་མ་ཤར་ན་ཆར་མི་འབབ་ཟེར་ཏེ། དེ་ལ་ནུབ་ཕྱར་བ་ཙམ་ཞིག་ཕྱེ་བ་ལས། ལྷོ་ར་འགྲམ་ཙམ་ཞིག་ཕྱེས་ན་བཟང་ཟེར་ལ། དེ་བཞིན་ཉིན་གུང་གློ་བུར་དུ་ཆར་བབས་ན་ཆར་མི་འབབ་པའི་རྟགས་ཡིན་ཞེས་ཞོད་རིང་གི་དགུང་བཀྱག ཐང་ཆེན་གྱི་གོང་རྒྱུགས་ཞེས་པའི་གཏམ་དཔེ་ཡོད།
ཁུ་འཕང་འབབ་པའི་དུས་སུ་དཔྱིད་ཁུ་འཕང་གིས་ཡུ་མོའི་མཚེས་མི་ནུབ། སྟོན་ཁུ་འཕང་གིས་ཤྭ་བོའི་རྭ་མི་རིག་ཅེས་པའི་གཏམ་དཔེ་ཡོད་པ་དང་། འབྲོག་པས་ནོར་འདོགས་སྐབས་ཁ་བ་བབས་པ་ཆུང་ཞིང་རྟ་འདོགས་སྐབས་ཁ་བ་བབས་པ་ཆེ་ཞེས་པར་ནོར་བཏགས་ཁངས་ཀྱིས་ནོར་རྒྱབ་མི་དཀར། རྟ་བཏགས་ཁངས་ཀྱིས་རྟ་ཕུར་མི་རིག་ཅེས་ཟེར། དེ་བཞིན་དུ་ནངས་སྔ་དྲོའི་སྤྲིན་དམར་ཆུ་ཡིན། དགུང་ཕྱི་དྲོའི་སྤྲིན་དམར་མེ་ཡིན་བྱ་བ་དང་། ནམ་ལངས་ཁ་བ་མུན་ལ་ཐུག་བྱ་བ། སྤྲིན་པ་ཁ་སེར་གཏིང་ནག། སད་དང་སེར་བའི་གཞི་མ་ལྟ་བུ་སོགས་ཤིན་ཏུ་མང་བོར་ཡོད་ཀྱང་འདིར་ངོ་སྤྲོད་བསྡུས་པ་འདི་ཙམ་གྱིས་ཆོག་པར་བྱས་སོ།

དམངས་ཁྲོད་གནམ་གཤིས་བརྟག་ཐབས་འགའ།

དོ་སྣང་ཆེ་བའི་རྩོམ།

རྩོམ་གསར། 10

དོ་སྣང་ཆེ་བའི་རྩོམ། 10