གངས་རི་དེར་ཇོ་མོ་གླང་མ་ཞེས་པའི་མིང་དེ་ལྟར་ཐོགས་དོན་ནི་འདི་ལྟར། དེའང་མི་ལོ་སྟོང་ཕྲག་མང་པོའི་སྔ་རོལ་དུ་གནས་དེར་ནགས་ཚལ་སྟུག་ཅིང་གཅན་གཟན་སྟག་གཟིག་དོམ་དྲེད་ཀྱི་གནས་བཅའ་ཞིང་། འདྲེ་སྲིན་དུག་པ་ཅན་སྒྱུ་མའི་ཡུལ་ཞིག་ཡིན་བ་ལ་དེ་རྗེས་གུ་རུ་རིན་པོ་ཆེ་གནས་དེར་ཞབས་བཅག   འདྲེ་སྲིན་དུག་པ་ཅན་རྣམས་དམ་ལ་བཏགས། ཚེ་རིང་མཆེད་ལྔའི་ནང་ཚན་མི་གཡོ་གླང་བཟང་མ་གངས་རིའི་གཟུགས་སུ་བསྒྱུར་བས་ཇོ་མོ་གླང་མ་ཞེས་པ་དེ་ལྟར་ཐོགས་ཞེས་གསུངས། གཞན་ཡང་བོད་སྐྱོབ་པའི་གངས་ཆེན་བརྒྱད་དུ་གྲགས་པའི་《བྱང་གཏེར་བཀའ་བརྒྱད་རང་བྱུང་རང་ཤར་》དུ། གངས་རིའི་རྒྱལ་པོ་གངས་ཅན། གངས་རིའི་བློན་པོ་ཐང་ལྷ། གངས་རིའི་དམག་དཔོན་སྤོམ་ར། ཞེས་དང་། ཡར་ལ་གཤམ་པོ་ལྷ་ཡི་གངས། གང་བ་བཟང་པོ་གནོད་སྦྱིན་གངས། རོང་ཕུ་འཁྱིལ་བ་རྫ་ཡི་གངས། བུ་ལི་དཀར་བ་ཀླུ་ཡི་གངས། རྟ་སོ་བཀྲམ་པ་བཙན་གྱི་གངས་བཅས་ཡིན་གསུངས།
      དེང་སང་ཤོད་སྲོལ་ལྟར་བྱས་ན་ཇོ་མོ་གླང་མ་ནི་རྒྱ་མཚོའི་ངོས་ལས་སྤྱི་ཁྲེ༨༨༤༨ཙམ་གྱིས་མཐོ་བའི་རི་བོ་ཡིན་སྟབས་འཛམ་གླིང་ཐོག་གི་རི་བོ་མཐོ་ཤོས་དང་། ཉི་མ་དང་ཐག་ཉེ་ཤོས་བཅས་མདོར་ན་འཛམ་གླིང་གི་ཏོག་ལྟ་བུ་ཞིག་ཡིན་ཟེར། རྩོམ་སྒྲིག་པ་ཨོ་རྒྱན།