ཇི་སྐད་དུ། གེ་ཞེས་བྱ་བ་མདོ་སྨད་ས་ཡི་ཆ༔ གེ་སར་རྒྱལ་པོས་མགོན་སྐྱབས་བྱེད་པའི་ཡུལ༔ ཞེས་པ་སྟེ། དེ་ཡང་སྨད་མདོ་ཁམས་སྒང་དྲུག་གི་ཡ་གྱལ་སྤོ་འབོར་སྒང་གི་ཁོངས་གཏོགས། སྡེ་བཞི་དང་དགེ་བཅུ་ལེགས་པར་ཚང་ཞིང་། རྒྱལ་སྲིད་དང་ཆོས་སྲིད་གཉིས་ཀ་ཡར་ལྡན་དུ་འཕེལ་བ། གེ་སར་གྱི་རྒྱལ་རྒྱུད་དུ་གྲགས་པའི་ཡ་རབས་ཀྱི་འབྲོག་སྡེ་དེ་ལ། སྔོན་བསགས་བསོད་ནམས་ཀྱི་དུས་ལས་མི་ཡོལ་བར། ནུབ་ཕྱོགས་རྟ་ཤོད་ཀྱི་ཡུལ་དུ་ཆོས་ལུགས་ཀྱི་རྩོད་པ་ཆེས་ཆེར་བྱུང་ནས་གེ་མང་སྟོད་སྨད་དུ་འཐོར་ཏེ་གསང་ཆེན་སྔ་འགྱུར་བའི་བསྟན་པ་ལ་ལྷག་པར་གུས་པའི་གེ་སྨད་དུད་ཚང་དགུ་བོ་ཡུལ་གྲུ་དེ་འཁྱམས། ཡུལ་དེ་ལ་ཡང་གེ་སྨད་ཅེས་པའི་མིང་ཐོགས། ཤཱཀྱའི་རྒྱལ་པོའི་ཐུབ་བསྟན་སྤེལ་བ་ལ་གུར་དཀར་གྱི་སྐབས་འཕྲལ་དགོན་པ་ཞིག་ཀྱང་ཞོར་དུ་གྲུབ། གུར་དགོན་དེ་ལ་གེ་སྨད་བསྟན་སྲུང་ཁང་ཚན་ཞེས་པ་དང་། འབའ་གྲུབ་པ་དགོན་པའི་ཁང་ཚན་ཞིག་ཏུ་གྱུར། དེ་དག་ནི་གེ་སྨད་ཀྱི་མེས་པོ་དང་དགོན་པའི་ཐོག་མ་ཡིན་པར་གྲགས། དེ་ནས་བོད་རབ་བྱུང་བཅུ་དྲུག་པའི་ཆུ་སྤྲེལ་ལོ(༡༩༣༢ལོ)ལ། པད་མ་རྣམ་གྲོལ་གླིང་པའི་གཏེར་ལུང་ལས། ཤར་རི་ལ་གནས་རྒྱལ་འགོང་གིས༔ སྐྱེ་འགྲོའི་བླ་ཚེ་སྲོག་དབུགས་སྡུད༔ དེ་ལ་ཕག་མོའི་སྤྲུལ་པ་ནི༔ ཨ་ཡིག་མིང་གིས་བརྟུལ་བ་བྱེད༔ ཅེས་རྡོ་རྗེ་འགག་མེད་མ་དང་པཎ་ཆེན་སྨོན་ལམ་གྲུབ་པ་སོགས་དམ་པ་དུས་མས་བསྟན་འགྲོའི་དཔུང་མཉེན་དུ་སྲིད་བཟུང་བའི་རྫོགས་ཆེན་པ། ཀརྨ་བྱང་ཆུབ་རྒྱལ་མཚན་ཞེས་པ་དེ། གཡོན་རུ་དཔོན་པོ་ཆོས་རྒྱལ་བསོད་ནམས་རྒྱ་མཚོས་ཞབས་བཏེགས་ནས་ཡུལ་དེར་ཕེབས་པ་དང་། ཆོས་རྒྱལ་དང་འབྲོག་མིའི་རྣམ་སྤྲུལ་གཅིག་བསྡུས། ཟབ་མོའི་གཏེར་སྒོ་འབྱེད་པ། རྡོ་ལ་ཕྱག་ཞབས་ཀྱི་རྗེས་གསལ་བ། གྲུབ་པའི་རྟགས་མཚན་མངོན་དུ་གྱུར་བའི་བླ་མ་ཐུབ་བསྟན་དགེ་འདུན་ནམ་རིག་འཛིན་འགག་མེད་རྡོ་རྗེ་རྣམ་གཉིས་ཀྱིས། གཡོན་རུའི་གཏེར་ལུང་ལས། ལྷོ་སྤྲིན་གསེབ་ནས་གཡུ་འབྲུག་ངར་སྐད་སྒྲོག༔ བརྡ་དེ་འཁྲོལ་བས་གཡུ་འབྲུག་གྱེན་འགྲོའི་སར༔ ཟེར་བའི་རྩེ་ལ་འཁོད་པའི་སྒྲུབ་སྡེ་ནི༔ སྔ་འགྱུར་རྡོ་རྗེའི་ཆོས་གླིང་ཞེས་སུ་གྲགས༔ ཞེས་དང་། རྫོགས་སྤྲུལ་ཐུབ་བསྟན་ཆོས་ཀྱི་རྡོ་རྗེས་ཀྱང་སྔ་འགྱུར་ནོར་བུའི་ཆོས་མཛོད་ཨོ་རྒྱན་བསམ་འཕེལ་ཆོས་གླིང་ཞེས་མཚན་གསོལ་བའི་དགོན་པ་འདི་ཉིད་ཆགས། གྲུབ་མཐའ་ནི་སྔར་འགྱུར་རྙིང་མ་བའི་ལུགས་ཡིན། བླ་མ་དེ་དག་ནས་རྒྱལ་བའི་བསྟན་པ་རིན་པོ་ཆེ་རིང་དུ་གནས་པ་དང་བསྟན་འཛིན་གྱི་སྐྱེ་བུ་དམ་པ་རྣམས་ཀྱི་སྐུའི་རིམ་གྲོ་ལ་དམིགས་ཏེ་གེ་དགོན་གྱི་ཕྱིའི་བཀོད་པ་དང་ནང་གི་རྟེན་གསུམ། ལོ་ལྟའི་དུས་མཆོད་སོགས་མཐར་ཕྱིན་དང་དགོན་པའི་སྒྲུབ་ཁག་ཆེན་པོ་ཧོར་ཟླ་དང་པོའི་ཚེས་གསུམ་ནས་བཅོ་ལྔའི་བར་གྱི་དགོན་གཞིས་གཉིས་ཀྱི་སིདྡྷིའི་བུམ་སྒྲུབ་དང་དབྱར་ཟླ་དྲུག་པའི་དབྱར་སྒྲུབ། ཧོར་ཟླ་བདུན་པའི་དབྱར་གནས་ཆོ་ག།  བོད་ཟླ་བཅུ་པའི་ཐོས་སྒྲོལ་གྱི་ཆོ་ག་སྟོང་མཆོད། བོད་ཟླ་བཅུ་གཉིས་པའི་ཟླ་མཇུག་གི་དགུན་སྒྲུབ་སོགས་ཀྱང་དར་སྤེལ་བཏང་བ་རེད། ཁྱད་པར་དུ་མཁན་རབས་དང་པོ་རིན་པོ་ཆེ་བསོད་ནམས་རྒྱལ་མཚན་གྲྭ་ས་གོང་མ་རྫོགས་ཆེན་ཤྲཱི་སེང་ནས་བྱོན་ཏེ་ཡུལ་དེར་འདུལ་བ་གཞི་གསུམ་གྱི་ཕྱག་བཞེས་དང་སྤྱོད་འཇུག་དང་སྡོམ་གསུམ་སོགས་ཀྱི་ཁྲིད་རྒྱུན་བཙུགས་པས་བོད་ལ་ལོ་ཙཱ་བ་བཻ་རོ་བཞིན་བཀའ་དྲིན་བརྗོད་དུ་མ་མཆིས་སོ།། དེ་ལྟར་དགོན་སྡེ་དེ་རྒྱལ་བའི་བསྟན་པ་དར་ཞིང་རྒྱས་པའི་དུས་ཡུན་ཅུང་རིང་བ་ཞིག་ཡོད་ཀྱང་དུས་འགྱུར་གྱི་དབང་གིས་སྐབས་ཤིག་ལ་ཉམས་རྒུད་ཚབས་ཆེན་བྱུང་བ་རེད། ཡིན་ན་ཡང་རྗེས་སུ་ཏང་ཀྲུང་དབྱང་གི་སྐབས་བཅུ་གཅིག་པའི་ཀྲུང་ཨུ་ཚང་འཛོམས་གྲོས་ཚོགས་ཐེངས་གསུམ་པ་འཚོགས་ཏེ་ཆོས་ཕྱོགས་ཀྱི་བཀའ་སློབ་དང་སྲིད་ཇུས་བཟང་པོ་ཞིག་གཏན་ལ་འབེབས་པའི་འོག་ཏུ། སླར་ཡང་རྒྱལ་བ་སྲས་བཅས་ཀྱི་ཐུགས་བསྐྱེད་དང་བྱིན་རླབས་ཀྱིས་འཛམ་གླིང་དུ་བསྟན་པའི་ཉིན་བྱེད་གསར་དུ་འཆར་བའི་ཚེ། རབ་འབྱམས་རྒྱལ་བའི་སྙིང་རྗེའི་རང་གཟུགས་བླ་མ་རྡོ་རྗེ་རིག་འཛིན་མཆོག་དང་སྤྲུལ་སྐུ་འཕྲིན་ལས་རྣམ་རྒྱལ་གཉིས་ཀྱིས་གཙོས་བགྲང་བྱ་ལྔ་བཅུ་ལས་མ་འདས་པའི་བླ་གྲྭ་དང་རྒྱ་ཆེའི་འབངས་སྡེས་སྦྱིན་བདག་མཛད་ནས་ཤིང་བྱི་ལོར་མགོ་བཙུགས་མེ་སྟག་ལོ་ལ་འདུ་ཁང་དང་གེ་སར་ལྷ་ཁང་། སྐུ་འབུམ་མཆོད་རྟེན་སོགས་རིམ་བཞིན་ལེགས་པར་གྲུབ་སྟེ་མདོ་སྔགས་ཀྱི་བསྟན་པ་རིན་པོ་ཆེར་འཛིན་སྐྱོང་སྤེལ་གསུམ་གནང་ཞིང་། བླ་མ་རྡོ་རྗེ་རིག་འཛིན་དང་སྤྲུལ་སྐུ་འཕྲིན་ལས་རྣམ་རྒྱལ་གཉིས་ཀྱིས་ཀྱང་དགོས་པའི་དབང་དུ་སྒེར་གཉེར་པར་ཁང་ཞིག་ཀྱང་བསྐྲུན་ཡོད་དེ་པར་ཁང་དེའི་ནང་ལ་ཐོས་སྒྲོལ་དང་གླང་ཆེན་མཛོད་བདུན། ཀུན་བཟང་བླ་མ། ཡེ་ཤེས་བླ་མ། དྲི་མེད་བཤག་རྒྱུད།ཐར་མདོ་འཁོར་ལོ་སོགས་ཀྱི་ཤིང་པར་དུ་མ་ཡོད། ཁོང་ཅག་གི་བཀའ་དྲིན་རབ་ཏུ་ཆེ་བས་བསྟན་འགྲོའི་དཔལ་མགོན་དུ་མཚན་དཔེའི་ཉིན་བྱེད་ཀྱི་དཀྱིལ་འཁོར་ནུབ་མེད་བསྐལ་བརྒྱའི་དཔལ་དུ་འཆར་བའི་གསོལ་བ་སྙིང་ནས་གདབས་སོ།། གེ་དགོན་དུ་འདུལ་བ་གཞི་གསུམ་གྱི་ཕྱག་བཞེས་མཛད་པའི་མཁན་པོ་རིམ་བྱོན་ནི། ༡༽ ཐོག་མར་སྤེལ་བ་པོ་ནི་གོང་འཁོད་ལྟར་མཁན་རིན་པོ་ཆེ་བསོད་ནམས་རྒྱལ་མཚན་ཉིད་ཡིན། ༢༽ སྤྲུལ་སྐུ་འཕྲིན་ལས་རྣམ་རྒྱལ་ཀྱིས་ཀྱང་ཞབས་པད་གདོང་ལྔས་བཏེགས་པའི་ཁྲི་ལ་བཀོད་ཅིང་བསྟན་དང་འགྲོ་བའི་དོན་དཔག་ཏུ་མེད་པར་མཛད་དོ། ༣༽ མཁས་པ་ཆེན་པོ་ཐུབ་བསྟན་པད་མ་བཀྲ་ཤིས་སམ་ཨ་ཆོས་ཀྱིས་དེ་ལྟའི་སྲོལ་བཟང་པོ་ལ་བག་ཆག་འཇོག་གོ། ༤༽ མཁྱེན་བརྩེ་ཆོས་ཀྱི་བློ་གྲོས་ཀྱིས་བླ་མ་ཐུབ་བསྟན་དགེ་འདུན་གྱི་སྐྱེ་སྲིད་འཁྲུལ་བྲལ་དུ་ངོས་འཛིན་པའི་མཆོག་སྤྲུལ་རིག་འཛིན་རྡོ་རྗེ་ཡིན། ༥༽ ཟླ་བ་རྒྱལ་མཚན། ༦༽ བསོད་ནམས་འོད་འབུམ། ༧༽ ཡ་མ་ཚེ་རིང་། ༨༽ ཐུབ་བསྟན་བསོད་ནམས། ༩༽ བསོད་ནམས་ལྷུན་འགྲུབ། ༡༠༽ འབྱུང་གནས། ༡༡༽ བསོད་ནམས་རྒྱ་མཚོ། ༡༢༽ ཉི་མ། ༡༣༽ བསོད་ནམས་དབང་ལྡན། ༡༤༽ ཡེ་ཤེས་ཆོས་འགྲུབ་བཅས་ཡིན། དེ་ལྟར་ཆོས་སྡེ་འདི་ཡི་སྤྱོད་ལམ་གྱི་རྣམ་བཞག་ཅུང་ཟད་བརྗོད་པར་བྱ་ན། དང་པོ་བསྟན་པའི་སྒོར་ཞུགས་པའི་བསམ་པ་ངེས་འབྱུང་གིས་ཀུན་ནས་བསླངས་པའི་བློ་མཁྲིས་ནད་ཅན་གྱི་མདུན་སར་གཙོ་ཟན་བྲིམས་པ་ལྟ་བུ་ཞིག་ཡོང་ནས་འཇིགས་སྐྱོབ་དང་ལེགས་སྨོན་གྱི་ཆ་ལྡོག་པས་ལྟར་སྣང་གི་བཙུན་གཟུགས་ལས་ཆེས་ལྷག་ལ་རྒྱུད་དུལ་ཁོང་འཇམ་པ། རང་གཞན་སུ་འདྲའི་ཐད་དུའང་དག་སྣང་སྐྱོང་བ་ལ་བསླབ་མེད་གལ་སྲིད་རྩ་བ་བཞི་དང་འགལ་བའི་ལས་བྱེད་ན་བསྟན་པའི་ཆོམ་པོར་འགྱུར་བས་ན་སྒོར་ལྔ་བརྒྱ་སྤྲད་ནས་ཕྱིར་དེངས་ཤིང་། དུས་དང་རྣམ་པར་ཀུན་ཏུ་མཚམས་དང་སློབ་གཉེར་ཆོས་སྤྱོད་བཅུས་དུས་འདའ་བར་བྱེད་པ་ལས། བསྟན་པའི་མིག་རྒྱན་ལ་གནོད་པའི་ཆས་དང་སྤྱོད་ལམ་ཡ་མ་ཟུང་། འཇིག་རྟེན་གྱི་འཕེལ་རྒྱས་ཚོང་དང་སོ་ནམ། ཐགས་དང་བལ་ལས་སོགས་བག་མེད་ཀྱི་གནས་རྣམས་ལ་གཟབ་པ་ལྷུར་ལེན་ནོ།།