དེང་སྐབས་དཀོན་མཆོག་བཀྲ་ཤིས་ཞེས་པའི་མིང་དེ་ཐོས་མ་ཐག་རྒྱལ་ཕྱི་ནང་གི་རིག་གནས་བ་དང་ཚོང་པ་ཀུན་གྱིས་ཁོང་དང་གླིང་རྗེ་གེ་སར་རྒྱལ་པོའི་སྟོང་ཐང་འབྲི་བའི་བྱ་གཞག་དང་མི་རིགས་བཟོ་རྩལ་ལས་རིགས་ཀྱི་སྐོར་གླེང་བཞིན་ཡོད།ལྷག་པར་དུ་ཚོང་པ་དཀྱུས་མ་ཞིག་གིས་བོད་ཀྱི་དམངས་ཁྲོད་རིག་གནས་མྱུར་སྐྱོབ་དང་འཕེལ་རྒྱས་གཏོང་རྒྱུའི་ལྷག་བསམ་དང་ཡང་དགོས་སུ་འཛམ་གླིང་ཐོག་ཆེས་རིང་བའི་གླིང་རྗེ་གེ་སར་རྒྱལ་པོའི་སྟོང་ཐང་ཆེན་མོ་འབྲི་བའི་རླབས་ཆེན་གྱི་བྱ་གཞག་ལ་བསྟོད་བསྔགས་མི་བྱེད་མཁན་ཕལ་ཆེར་མེད་པ་རེད།
   དཀོན་མཆོག་བཀྲ་ཤིས་ཀྱིས་ལོ་ངོ་མང་པོའི་རིང་བོད་ཀྱི་བཟོ་རྩལ་ལ་ཞིབ་འཇུག་ཟབ་མོ་བྱས་ཤིང་།བཟོ་རྩལ་གྱི་ཐོན་རྫས་དང་དཔྱད་གཞིའི་ཡིག་ཆ་འབོར་ཆེན་འཚོལ་སྡུད་བྱས་ཏེ།ཀརྨ་བི་ཤྭ་གངས་ལྗོངས་སྒྱུ་རྩལ་རིག་གནས་དར་སྤེལ་མཐུན་གཉེར་ཁང་བཙུགས་པ་དང་།གླིང་གེ་སར་རྒྱལ་པོའི་རྟོགས་བརྗོད་ཞལ་ཐང་མཐོང་བ་ཀུན་སྨོན་ཆེན་མོ་གསར་བཞེངས་བྱ་བའི་ལས་དོན་འདི་གཉིས་ནི་ཁོའི་མི་ཚེ་གཅིག་གི་རིང་ཆེས་རིན་ཐང་ལྡན་ལ་ལོ་རྒྱུས་ཀྱི་དོན་སྙིང་ཟབ་པའི་བྱ་བཞག་རླབས་པོ་ཆེ་ཞིག་རེད།
   དཀོན་མཆོག་བཀྲ་ཤིས་ནི་བོད་རབས་བྱུང་བཅུ་དྲུག་པའི་ཤིང་འབྲུག་ལོ་སྟེ།སྤྱི་ལོ་1964ལོར་ཁམས་སྡེ་དགེའི་ཆར་གཏོགས་འཁོར་ལོ་མདོ་རྡོ་མང་སྟེང་དུ་ཧོར་པ་ཚང་ཞེས་པའི་དུད་ཚང་ཞིག་གི་ཁྱིམ་དུ་སྐྱེས།ཆུང་བའི་དུས་སྐབས་ནས་རྡོ་ལ་རི་མོ་འབྲི་བ་དང་འདམ་གྱིས་འདྲ་གཟུགས་བཟོ་བ་སོགས་ལ་དགའ་སྣང་ཆེན་པོ་བྱེད་བཞིན་ཡོད།དེ་ནས་ཁོང་ལོ་བཅུ་བདུན་ཙམ་སོན་སྐབས་ཞང་པོ་ཐུབ་བསྟན་ཕུན་ཚོགས་ལགས་ཀྱིས་དཔལ་སྤུངས་དགོན་དུ་ཁྲིད་དེ་ལྷ་བཟོ་བ་ཆེན་མོ་ཐང་བླ་ཚེ་དབང་མདུན་དུ་བཟོ་རིག་པའི་ཤེས་བྱ་སྦྱོང་དུ་བཅུག་པ་དང་།ལྷ་རྗེ་ཡོན་ཏན་ཕུན་ཚོགས་ལས་བོད་ཡིག་འབྲི་ཀློག་སྦྱོང་དུ་བཅུག  ལོ་གསུམ་གྱི་རིང་འབད་འབུངས་ལྷོད་མེད་བྱས་པས་རི་མོ་དང་ཚོན་མདངས་བཅས་ལ་བྱང་ཆུབ་པ་བྱུང་བ་དང་།བོད་ཡིག་འབྲི་ཀློག་ཀྱང་ཡག་པོ་ཤེས།དེ་ནས་སྡེ་དགེ་པར་ཁང་གིས་ལྷ་བཟོ་བ་ཉེར་ལྔ་བསྡུས་ཏེ་རྒྱུགས་ལེན་སྐབས་ཁོང་གིས་རི་མོའི་རྒྱུགས་ཨང་དང་པོ་འཕྲོད་ནས་སྡེ་དགེ་པར་ཁང་གི་ལྷ་བཟོ་བའི་དགེ་རྒན་ནས་ཟུར་ཁྲིད་པ་བྱས།སྔོ་རྗེས་སུ་དཔལ་སྤུངས་དགོན་པའི་འདུ་ཁང་ཆེན་མོ་དང་དགོན་ཆེན་གཡུ་འབྲུག་ལྷ་ཁང་།ཨ་ཕྱུག་ཚ་ཙཱ་དགོན་པ་སོགས་བོད་ཀྱི་དགོན་སྡེ་དང་ལས་ཁུངས།གྲོང་ཁྱིམ་མང་པོའི་ཁང་པའི་ལྡེབས་རིས་དང་ཞལ་ཐང་འབྲི་བའི་ལས་སྒོའི་ནང་དངོས་སུ་ཞུགས་པ་དང་།མཆོག་སྤྲུལ་ཐུབ་བསྟན་ཚེ་རིང་མཆོག་ལ་བརྟེན་ནས་དགོན་ཆེན་དགོན་པའི་གཙང་ཁང་སྦུག་གི་ཉེ་སྲས་བརྒྱད་དང་།གུ་རུ་མཚན་བརྒྱད་སོགས་འདམ་སྐུ་བཞེངས་པའི་བྱ་བར་ཞུགས།
དཀོན་མཆོག་བཀྲ་ཤིས་ནི་བོད་ཀྱི་རིག་གནས་བསམ་བློ་ཚོང་ལས་བསམ་བློ་གཉིས་ཀ་ཡོད་པའི་མི་ཞིག་ཡིན་པས་ཁོས་བོད་ཀྱི་བཟོ་རྩལ་ཐོན་རྫས་མང་ཆེ་བ་བལ་ཡུལ་ནས་ཡོང་བ་ལས་བོད་རང་གིས་བཟོ་རྩལ་སྐོར་གྱི་ཐོན་རྫས་བཟོ་མི་ཐུབ་པའི་གནས་ཚུལ་ཤེས་ཏེ་ལོ་མང་རིང་མདོ་དབུས་ཁམས་གསུམ་དང་།རྒྱ་དཀར་ནག  བལ་ཡུལ་སོགས་སུ་ཚོང་པ་དཀྱུས་མ་ཞིག་གི་ཚུལ་དུ་བསྐྱོད་དེ་ཆོས་ལུགས་ཀྱི་བཟོ་རྩལ་རིགས་སྣ་ཚོགས་དང་།བོད་ཀྱི་གནའ་བོའི་ཐུན་མིན་བཟོ་རྩལ་གྱི་རྒྱན་ཆའི་སྐོར།རྒྱལ་ཁབ་ཕྱི་ནང་གི་བྲིས་འབུར་སོགས་ཀྱི་གནའ་བོའི་བཟོ་རྩལ་རིག་པ་ལ་ཞིབ་འཇུག་ནན་ཏན་བྱས་ལ།སྐབས་སྐབས་སུ་ཆེད་ལས་མཁས་ཅན་མང་པོ་དང་མཉམ་དུ་གནའ་རྫས་རྙིང་པ་དང་སྲོལ་རྒྱུན་གྱི་བཟོ་རྩལ་ལ་ཞིབ་འཇུག་ནན་ཏན་བྱས་ཏེ་རང་ཉིད་ཀྱི་བློ་གྲོས་ལ་བརྟེན་ནས་བོད་རང་གི་བཟོ་རྩལ་བཟོ་གྲྭ་ཞིག་འཛུགས་རྒྱུའི་འདུན་པ་ཡུན་རིང་དུ་བཅངས།སྤྱི་ལོ་1995ལོར་པེ་ཅིན་གྱི་ཚོང་ཁང་ཞིག་ཏུ་རྡོ་ཚོན་མང་པོ་ཡོད་པ་མཐོང་བས་ཁོས་གལ་ཏེ་རང་རེ་ཚོས་དེང་སྐབས་རྡོ་ཚོན་འདི་དག་སྤྱད་ནས་ཞལ་ཐང་གསར་པ་འབྲི་ཐུབ་པ་བྱུང་ན་ཅི་མ་རུང་སྙམ་པའི་འདོད་བློ་སྐྱེས་ཏེ་སྤྱི་ལོ་1997ལོར་མི་ཉག་བ་རྡོ་རྗེ་དོན་འགྲུབ་དང་མཉམ་དུ་མདོ་ཁམས་ལྷ་སྐུ་གླིང་ཞེས་པ་བཙུགས་ཏེ་འཕགས་པའི་གནས་རྟེན་བཅུ་དྲུག་དང་།ཐུབ་པའི་མཛད་པ་བཅུ་གཉིས།གུ་རུ་མཚན་བརྒྱད་སོགས་ཀྱི་ཞལ་ཐང་ལ་རྡོ་ཚོན་དང་རིན་ཆེན་སྣ་ལྔ་སྤྱད་ནས་ཀརྨ་སྒར་ལུགས་བྲིས་རྒྱུན་ལྟར་བྲིས་པས།མཛེས་རྩལ་མཁས་ཅན་མང་པོ་དང་།བོད།རྒྱ།ཕྱི་གླིང་བ་སོགས་ཀྱི་དགོན་སྡེ་མང་པོའི་བླ་སྤྲུལ་རྣམས་ཀྱིས་དགའ་པོ་བྱེད་པས་མ་ཚད་བསྔགས་བརྗོད་ཡང་ཡང་གནང་།1999ལོར་སི་ཁྲོན་ཁྲེང་ཏུའུ་གྲོང་ཁྱེར་ལ་ཁོང་གིས་ཀརྨ་བི་ཤྭ་གངས་ལྗོངས་སྒྱུ་རྩལ་རིག་གནས་དར་སྤེལ་མཐུན་གཉེར་ཁང་ཞེས་པ་བཙུགས་ཏེ་བོད་ཀྱི་བཟོ་རྩལ་སྐོར་གྱི་ཐོན་རྫས་སྣ་ཁ་བརྒྱ་ལྷག་གསར་སྐྲུན་བྱེད་ཐུབ་པར་གྱུར།ལྷག་པར་དུ་མཆོག་སྤྲུལ་ཐུབ་བསྟན་ཚེ་རིང་ལགས་ཀྱིས་འཇིམ་གྱི་བཟོས་པའི་གླིང་གེ་སར་རྒྱལ་པོའི་འདྲ་སྐུ་བླུག་དཔེར་བྱས་ཏེ་ལི་ཐང་རྫོང་དང་སྡེ་དགེ་རྫོང་ལ་མཐོ་ཚད་སྨི་དགུ་ཙམ་ཡོད་པའི་ལི་སྐུ་གཉིས་གསར་བཞེངས་བྱས།དེ་བཞིན་པེ་ཅིང་དང་བོད་ལྗོངས།  མཚོ་སྔོན།ཀན་སུའུ།ཡུན་ནན་སི་ཁྲོན་བཅས་ཀྱི་དགོན་སྡེ་མང་པོ་ལ་སྐུ་འདྲ་བརྐོས་བླུག་བཅའ་གསུམ་བྱས་པ་དང་།ད་དུང་བོད་ཀྱི་བཟོ་རྩལ་ཐོན་རྫས་དེ་དག་ཨ་རི་དང་དབྱིན་ཇི།ལྗར་པན།ཐེ་གོ  རྒྱ་གར།བལ་ཡུལ་སོགས་ཕྱིའི་རྒྱལ་ཁབ་མང་དག་ལ་ཚོང་ལམ་ཧ་ཅང་བྲིན་པ་བྱུང་ཡོད།
1997ལོར་དཀོན་མཆོག་བཀྲ་ཤིས་རང་གིས་ལོ་མང་རིང་ལྷ་འབྲི་ས་པའི་ཉམས་མྱོང་ལ་བརྟེན་ནས་གླིང་གེ་སར་གྱི་རྟོགས་བརྗོད་ཡོངས་སུ་མཚོན་ཐུབ་པའི་ཞལ་ཐང་ཆེན་མོ་ཞིག་འབྲི་རྒྱུའི་འཆར་གཞི་བཀོད་ནས་མདོ་དབུས་ཁམས་གསུམ་ལྷ་པ་གྲགས་ཅན་མང་དག་གདན་དྲངས་ནས་འཛམ་གླིང་ཐོག་ཆེས་རིང་བའི་གེ་སར་ཞལ་ཐང་འབྲི་རྒྱུའི་འགོ་བརྩམས།སྤྱི་ལོ་2001ལོར་སྡེ་དགེ་རྫོང་ཨུ་དང་མི་དམངས་སྲིད་གཞུང་གཉིས་མཉམ་དུ་གླིང་གེ་སར་རྒྱལ་པོའི་རྟོགས་བརྗོད་ཞལ་ཐང་མཐོང་བ་ཀུན་སྨོན་ཅེས་པ་གསར་བྲིས་བྱ་རྒྱུའི་གྲོས་འཆམ་བྱུང་།སྤྱི་ལོ་2002ལོའི་ཟླ་6པའི་ཚེས་22ཉིན་དཀར་མཛེས་བོད་རིགས་རང་སྐྱོང་ཁུལ་གྱིས་ཀྱང་རྒྱབ་སྐྱོར་ཆེན་པོ་གནང་ནས་དངོས་སུ་ལས་གྲྭ་བཙུགས་ཏེ།དེང་གི་ལྷ་བཟོ་བ་བརྒྱད་ཅུ་ལྷག་གི་ཁོང་གི་འཆར་བཀོད་ལྟར་དར་མདོ་རུ་གླིང་རྗེ་གེ་སར་རྒྱལ་པོའི་སྟོང་ཐང་དེ་རྒྱ་ཁྱོན་ཆེན་མོའི་ཐོག་ནས་འབྲི་བའི་ལས་འགོ་དངོས་སུ་བཙུགས་པ་རེད།
གཞན་ཡང་ཁོང་གིས་དུས་རྒྱུན་དུ་དབུལ་པོ་ལ་རོགས་སྐྱོར་བྱ་རྒྱུ་དང་ཕ་ཡུལ་དུ་སློབ་གྲྭ་གསར་འཛུགས་བྱ་རྒྱུ།ལམ་དང་ཟམ་པ་བཟོ་བ་དང་ཁོར་ཡུག་སྲུང་སྐྱོང་སོགས་སྤྱི་ཚོགས་ལ་ཕན་པའི་བྱ་བ་མང་པོ་བསྒྲུབས་པ་གྲངས་ཀྱིས་མི་ཟིན།དཔེར་ན་ཁྱིམ་དུད་དཀའ་ངལ་ཅན་གྱི་བུ་རྒྱུད་དང་དབང་པོ་སྐྱོན་ཅན་དག་ལ་བཟོ་རིག་ལག་རྩལ་གསོ་སྐྱོང་བྱས་པའི་མི་རྐྱང་པ་ཡང་མི་བརྒྱ་ལྷག་ལས་བརྒལ་ཡོད།
དཀོན་མཆོག་བཀྲ་ཤིས་ནི་བོད་ཀྱི་བཟོ་རྩལ་ལ་དགའ་ཞེན་ཆེན་པོ་ཡོད་པས་ཁོའི་ནུས་ཤུགས་ཡོད་ཚད་བོད་ཀྱི་བཟོ་རྩལ་ལས་དོན་འཕེལ་རྒྱས་གཏོང་བར་ཕུལ་བས་ད་ལྟ་ཁོའི་བཟོ་རྩལ་ཚོང་གཉེར་ཐད་གྲུབ་འབྲས་ཆེན་པོ་ཐོབ་ནས་ཚོང་ལས་ཀྱི་མ་རྩ་ཡང་སྒོར་ཁྲི་ལྔ་སྟོང་ལས་བརྒལ་བའི་ཚོང་དཔོན་ཆེན་པོ་གྱུར་ཡོད་ཀྱང་ད་ལྟ་ཁོང་ལས་དོན་དེ་ཙམ་གྱིས་ཡིད་ཚིམས་ནས་མི་སྡོད་པར་བོད་ཀྱི་བཟོ་རྩལ་དང་བཟོ་གྲྭའི་གཞི་ཁྱོན་ཇེ་ཆེ་རུ་བཏང་ནས་ན་ལོར་ཡང་ཡུན་ནན་བདེ་ཆེན་བོད་རིགས་རང་སྐྱོང་ཁུལ་རྒྱལ་ཐང་གྲོང་དུ་ཤམ་བྷ་ལ་རིག་གནས་འགྲེམ་སྤེལ་ལྟེ་གནས་བཟོ་རྒྱུའི་གན་རྒྱ་བཞག་སྟེ།བོད་ཀྱི་རིག་གནས་དང་བོད་ཀྱི་བཟོ་རྩལ་ལས་དོན་ཡུན་ནན་དུ་འཕེལ་རྒྱས་གཏོང་རྒྱུའི་བྱ་བར་འགོ་རྩོམ་བཞིན་ཡོད།།