ཉེ་ཆར།སྐད་གྲགས་ཅན་གྱི་མུ་འབྲེལ་བརྙན་འཕྲིན་འཁྲབ་ཚན་ལེའུ་སོ་གཉིས་ཅན་གྱི་《དར་མདོའི་མཛའ་གཞས》དང་《གའན་བོའི་ཇ་འདྲེན་བརྡལ་ལམ》གཉིས་ལ་ཡིག་སྒྱུར་དང་སྐད་སྒྱུར་ཕབ་གནང་ཡོད་པས་བོད་ཁུལ་གྱི་ཕྱོགས་ཡོངས་ནས་དགའ་བསུ་དང་བསྟོད་བསྔགས་ཡང་ཡང་ཐོབ་པས་སྒྲ་སྦྱོར་ཐད་སྒྱུ་རྩལ་གྱི་རིན་ཐང་ཆེ་བ་སྔོན་སྲོལ་ན་བྱུང་མྱོང་མེད་པའི་རྣམ་པ་གསར་ཞིག་བསྟན་ཡོད།ད་དུང་བཀྲ་ཤིས་དཔལ་འབྱོར་ལགས་ནས་གློག་བརྙན་འཁྲབ་ཚན《དར་མདོའི་མཛའ་གཞས》ནང་མི་སྣ་དུ་མ་ཞིག་ལ་སྒྲ་སྦྱོར་ཕབ་གནང་བའི་ཁྲོད་དུ་ལྡོག་ཕྱོགས་མི་སྣ་བདེ་ཆེན་ལ་དལ།སལ།སྒྲ་སྦྱོར་གནང་བ་དེ་སྐད་སྒྱུར་གྱི་ཉམས་ཕུལ་དུ་བྱུང་ལ་སྒྲ་གདངས་དག་ལ་སྲ་ལྷོད་འཚམས་པ་མི་སྣ་ཡི་བསམ་པ་ཡོངས་སུ་གསལ་ཐག་གཅོད་མངོན་ཐུབ་པས།རྒྱ་ཆེ་བའི་གཟིགས་མོ་བ་ཡོངས་ནས་བསྟོད་བསྔགས་ཀྱི་མེ་ཏོག་ཡང་དུ་མཆོད།བཀྲ་ཤིས་དཔལ་འབྱོར་ལགས་ཀྱིས་སྤྱི་ལོ༢༠༠༢ལོ་ནས་ལི་ཐང་རྫོང་གི་རྫོང་དཔོན་གཞོན་པའི་འགན་བཞེས་གནང་བའི་སྐབས་སུ་དཀའ་ལས་དུ་མ་ལ་མ་འཛེམས་ནས་རྫོང་དེའི་ཤང་ཁག་ཡོངས་སུ་ཕེབས་ནས་དམངས་ཁྲོད་ཀྱི་གླུ་གར་དང་གཞས་མོ་ཁག་བསྡུ་སྒྲིག་གང་ཅི་ཐུབ་གནང་ནས་ད་སྐབས་ཀྱི་རོལ་ཆ་གསར་པ་དང་མཉམ་སྦྱོར་བྱས་པའི་རྫོང་བྲོ་གསར་པ་ཞིག་ཀྱང་ལེགས་པ་ཕབ་གནང་བས།《ལྷ་བྱ་འཕུར་བའི་གནས་མཆོག》ཅེས་པའི་སྒྲ་ཐག་རི་མོ་ཅན་ཞིག་ཀྱང་ཡོངས་སུ་པར་བསྐྲུན་གནང་ཡོད།ད་དུང་《ལི་ཐང་གི་ལོ་རྒྱུས་དང་སྲོལ་རྒྱུན་རིག་གནས་སྐོར་གྱི་ངོ་སྤྲོད་བསྡུས་པ།》ཞེས་པའི་དེབ་ཀྱང་གཙོ་འགན་ཐུགས་ཁུར་གནང་དེ་དཔར་སྐྲུན་གནང་ལ།ལི་ཐང་རྫོང་དབྲ་བ་ཤང་ན་སློབ་གྲྭ་དང་ཟམ་པ་འཛུགས་ས་ལ་གང་ཅི་ཐུབ་ཀྱིས་རོགས་སྐྱོར་བཙལ་གནང་མཛད་པ་དང་ཚོ་གསུམ་ཤང་ན་ཤིང་མྱ་ངན་འདས་ལྕང་བཙུགས་པ་དང་སྨན་མ་ཎི་བཅས་གསར་འཛུགས་སྒོ་སྐྱོང་གནང་བས་རྣམ་དཀར་དགེ་བའི་ལས་ནས་ཟླ་བཅད།གཅིག་ན་ཁོར་ཡུག་གསོ་སྐྱོང་དང་གཉིས་ན་དམངས་ཀྱི་དཔལ་འབྱོར་མི་ཉམས་གོང་འཕེལ་དང་འཚོ་བ་ལ་ཡར་རྒྱས་ཐོབ་པས་ས་ཁུལ་ཁག་གི་རྒྱ་ཆེ་བའི་དམངས་ཚོགས་ཡོངས་ཀྱིས་བསྟོད་བསྔགས་དང་ཐུགས་རྗེ་ཆེ་ཞུས།
དེང་སང་ཁོང་གིས་རིག་གནས་ཁང་གི་འགོ་གཙོ་ཡི་འགན་བཞེས་ནས།དེ་སྔར་ཕ་ཡུལ་ཀོ་སྨན་གྲོང་ན་མི་དམངས་དངུལ་སྒོར་ཁྲི་ཚོ་བདུན་ལྷག་གི་རོགས་སྐྱོར་བཙལ་ཏེ་སློབ་ཆུང་ཞིག་ཀྱང་གསར་འཛུགས་གནང་བ་དང་།ཁམས་སྡེ་དགེ་ཡུལ་གྱི་དམངས་ཁྲོད་རིག་གནས་དར་སྤེལ་བཏང་ཐུབ་ན་དགོངས་པས་སྡེ་དགེའི་འདུན་བྲོ་དང་གླུ་ཤག་ལོ་རྒྱུས་གཏམ་དཔེ་སོགས་དེབ་བཅུ་ཙམ་བསྡུ་སྒྲིག་དང་རྒྱ་ཡིག་ཐོག་སྒྱུར་བཞིན་ཡོད།
བཀྲ་ཤིས་དཔལ་འབྱོར་ལགས་ནས་ལོ་དུ་མ་ཞིག་གི་ཁྲོད་དུ་རྒྱལ་ཕྱི་ནང་གི་རིག་གཞུང་ཁག་ལ་འབད་འབུངས་རྒྱུན་མི་ཆད་པའི་སྒོས་རང་ཉིད་མི་རིགས་ཀྱི་རླབས་ཀྱི་ཆེ་བའི་སྲོལ་རྒྱུན་གྱི་རིག་གནས་དེ་མ་བརླག་དར་སྤེལ་དང་གོང་འཕེལ་བཏང་ཞིང་།དེང་སང་གསར་དར་གྱི་རིག་གཞུང་ཁག་ལའང་སློབ་སྦྱོང་དང་ཞིབ་འཇུག ཁྱད་པར་དུ་སྒྱུ་རྩལ་གྱི་ཐད་དུ་གྲུབ་འབྲས་ཕུལ་དུ་བྱུང་ཞིང་།ཞབས་བྲོ་དང་གླུ་གར།ཁ་མཚར།སྙན་ངག་རྒྱང་སྒྲོག་གློག་བརྙན་སྐད་སྒྱུར་སོགས་ཀྱི་ཐད་དུ་བྱང་ཆུབ་ལ་ལྷག་པར་དུ་གློག་བརྙན་སྐད་སྒྱུར་སོགས་ཀྱི་ཐད་དུ་གངས་ལྗོངས་ཡུལ་ན་སྐད་སྒྱུར་གྱི་ཆུ་ཚད་མཐོ་ཤོས་སུ་ཕྱིན་ཟིན།