སྡེ་རོང་རྫོང་ནི་སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་གྱི་རྫོང་ཁག་བཅོ་བརྒྱད་ནང་གི་ལྷོ་རྒྱུད་ཀྱི་རྫོང་ཞིག་ཡིན། དེ་ནི་ཤར་ཕྱོགས་སུ་ཡུན་ནན་ཞིང་ཆེན་བདེ་ཆེན་ཁུལ་གྱི་སེམས་ཀྱི་ཉི་ཟླ་རྫོང་དང་འབྲེལ་ཡོད་པ་དང་། ལྷོ་ནུབ་ཏུ་ཡུན་ནན་ཞིང་ཆེན་གྱི་འཇོལ་རྫོང་ནས་ཕར་ཚུར་མཐོང་ཐུབ། བྱང་ཕྱོགས་སུ་འབའ་ཐང་དང་ཕྱག་ཕྲེང་རྫོང་གཉིས་དང་ས་མཚམས་འབྲེལ་ཡོད། སྡེ་རོང་རྫོང་ནི་གང་སྤྱིར་ཁྱད་ཆོས་འབུར་དུ་ཐོན་པ་ཞིག་ཡིན་པས། ཡུལ་སྐད་ཡང་དེ་བཞིན་བོད་གངས་ཅན་གྱི་ས་ཆ་གཞན་དང་མི་འདྲ་ས་མང་པོ་འདུག  དེའི་ཕྱིར་བོད་པ་གཉིས་ཕྲད་པའི་སྐབས་ལ་ཡུལ་སྐད་མི་འདྲ་བས་ཕན་ཚུན་རྒྱ་སྐད་ཀྱིས་སྐད་བརྡ་མ་བྱེད་ཀ་མེད་ཐུག་ཡོད།

  བོད་གངས་ཅན་ཡུལ་ལ་ཆ་བཞག་ན། སྡེ་རོང་སྐད་ནི་གོ་བརྡ་སྤྲད་དཀའ་ཤོས་ཀྱི་ཡུལ་སྐད་ནང་ལ་ཚུད་ཡོད་དེ། བོད་གངས་ཅན་ཡོངས་ལས་སྡེ་རོང་སྐད་ནི་ཡུན་ནན་ཞིང་ཆེན་བདེ་ཆེན་ཁུལ་དང་། ཕྱག་ཕྲེང་རྫོང་དང་འབའ་ཐང་རྫོང་། ད་རུང་སྨར་ཁམས་རྫོང་གི་མི་དམངས་ཕལ་ཆེ་བར་བརྡ་འཕྲོད་པ་མ་གཏོགས་གཞན་བོད་ཡུལ་མང་ཆེ་བ་དང་གོ་བརྡ་མི་འཕྲོད་པ་རེད། འོན་ཀྱང་གང་འདྲ་ཡིན་ཡང་རྩ་བ་བོད་སྐད་ཡིན་པས། སྐད་གདངས་ཀྱི་ཁྱད་པར་དང་ཡུལ་སྐད་ཕན་ཚུན་ཅུང་མི་འདྲ་བ་ཕུད་སྤྱིར་ཁྱད་པར་ཆེར་མེད། གལ་སྲིད་ཡུལ་སྐད་ཀྱི་ཁྱད་ཆོས་ངོས་ཟིན་ན་ཕུན་ཚུན་བརྡ་འཕྲོད་པ་ཡང་ཅུང་སླ་བ་ཡོང་སྲིད་སྙམ་ནས་སྡེ་རོང་སྐད་ཀྱི་ཁྱད་ཆོས་འགའ་གཤམ་ལ་བཀོད་པ་ཡིན། འོན་ཀྱང་། སྡེ་རོང་གི་ཡུལ་ལུང་སོ་སོ་ལའང་སྐད་གདངས་ཅུང་མི་འདྲ་ས་ཡོད་པས། གལ་སྲིད་འདི་ནས་མི་འགྲིག་ས་ཡོད་ན་སྙིང་ཐག་པ་ནས་དགོངས་དག་ཞུ།

༡ ཕྱ་ཡིག་ཕལ་ཆེར་ས་རུ་འདོན།

དཔེར་ན། ཕྱེད་ཀ་ལ་སེད་ཀ་འབོད། ཕྱེ་ལ་སེ་ཟེར། ཕྱི་ལ་སི་འབོད། ཕྱག་ལ་སག  ཕྱགས་མ་ལ་སགས་མ། ཕྱུག་པོ་ལ་སུག་པོ།

༢ ལ་ཡིག་ཕལ་ཆེར་ཡ་རུ་འདོན།

དཔེར་ན། ལག་པ་ལ་ཡག་པ་ཟེར་བ། ལ་ཁ་ལ་ཡ་ཁ་འབོད་པ། ལམ་ལ་ཡམ་ཟེར་བ། ལས་ཀ་ལ་ཡས་འབོད།ཡར་ལངས་ལ་ཟར་ཡངས་འབོད། ལོན་ལ་ཡོན། ལེན་པ་ལ་ཡེན་པ། ལུང་པ་ལ་ཡུང་པ། ལོ་ལ་ཡོ། ལུག་ལ་ཡུག  མིག་ལོང་ལ་མྱིག་ཡོང་། ལུ་བ་ལ་ཡུ་བ། ལུད་ལ་ཡུད། རྗེས་སུ་ལུས་བའི་ལུས་ལ་ཡུས།

༣ ཡ་ཡིག་ཕལ་ཆེར་ཟ་རུ་འདོན།

དཔེར་ན། ཡར་འགྲོ་ལ་ཟར་འགྲོ་ཟེར། ཡང་མོ་ལ་ཟང་མོ་དང་། ལམ་ཡངས་མོ་ལ་ཡམ་ཟངས་མོ་འབོད། གཡས་ལག་ལ་གཟས་ཡག་འབོད། ཡུན་རིང་ལ་ཟུན་རིང་ཟེར་བ།ཡི་གེ་ལ་ཟི་གེ་འབོད། ཕ་ཡུལ་ལ་ཕ་ཟུལ་ཟེར། ཡུ་བ་ལ་ཟུ་བ། ཡོད་ལ་ཟོད། ཡོང་ལ་ཟོང་། གཡོག་ལ་གཟོག  གཡར་ལ་གཟར། གཡུ་ལ་གཟུ།

༤ ཡ་ཡིག་འགའ་རེ་ཡིག་སྐད་དང་འདོན་ལུགས་འདྲ་བ།

དཔེར་ན། ཡག་པོ། གཡང་འཁོར་བ། ཡོན་ཏན།  ཡ་ག  ཡུར་མ་བཅས་ཡོད།

༥ སྐྱ་ཡིག་ནང་གི་མིང་གཞི་ཀ་ཕལ་ཆེར་བཀབ་ནས་འདོན་པ།

དཔེར་ན། སྐྱུར་ལ་སུར། སྐྱིད་ལ་སིད།སྐྱེལ་ལ་སེལ། སྐྱ་ཐེར་ཐེར་ལ་ས་ཐེར་ཐེར། སྐྱོན་ལ་སོན། སྐྱེས་པ་ལ་སེས་པ། སྐྱིན་པ་སྟེར་ལ་སིན་པ་སྟེར་ཟེར། སྐྱེ་ལ་སེ།

༦ མ་ཡིག་འགའ་རེ་ཡ་བཏགས་འདོགས་ནས་འདོན་པ།

མི་ལ་མྱི། མེ་ལ་མྱེ། མེད་ལ་མྱེད། མིང་ལ་མྱིང་། མིད་ལ་མྱིད། མིག་ལ་མྱིག

༧ གྱ་ཡིག་འགའ་ནི་ཛ་རུ་འདོན།

དཔེར་ན། གྱོན་ལ་ཛོན། གྱོད་ལ་ཛོད། རྒྱབ་ལ་རྫབ། རྒྱུ་དག་ལ་རྫུ་དག   བརྒྱ་ལ་བརྫ། བརྒྱད་ལ་བརྫད། བརྒྱབ་ལ་བརྫབ། རྒྱུག་ལ་རྫུག  མགྱོགས་པ་ལ་མཛོགས་པ། བཀའ་བསྟན་འགྱུར་ལ་བཀའ་བསྟན་འཛུར།

༨ བྱ་ཡིག་འགའ་ནི་ཟ་རུ་འདོན།

དཔེར་ན། འདབ་ཆགས་བྱ་ལ་ཟ། བྱི་བ་ལ་ཟི་བ། བྱེའུ་ལ་ཟེའུ། བྱུ་རུ་ལ་ཟུ་རུ། བྱོན་ལ་ཟོན། བྱོལ་སོང་ལ་ཟོལ་སོང་།  བྱེ་ཐང་ཟེ་ཐང་ཞེས་པ་ལྟ་བུ་རྣམས་སོ།།