སྒྱུ་རྩལ་མཚོན་སྟངས་ཀྱི་ཐད་སྒྲ་སྙན་རྡུང་ལེན་ལ་ཁྱད་ཆོས་བཞི་ཡོད་དེེ། དང་པོ་ནི། སྣ་མང་རང་བཞིན་ལྡན་པ། སྒྲ་སྙན་ལ་རིགས་མང་ཞིང་ནང་དོན་ཕུན་སུམ་ཚོགས་པ་དང་། འཁྲབ་སྟངས་རྣམ་པ་སྣ་ཚོགས་ཡོད། གླུ་ཚིག་ལ་གཏམ་རྒྱུད་བརྗོད་པའི་གླུ་དང་། གཏམ་གླུ་སྤེལ་མ་སོགས་ཡོད་ཅིང་། ལེན་སྟངས་ལ་ཁེར་ལེན་དང་། ཕོ་མོ་མཉམ་ལེན། མི་མང་མཉམ་ལེན་སོགས་ཡོད། བྲོ་ལ་མི་གྲངས་མི་མཚུངས་པའི་གླུ་གར་སྤེལ་མ་སོགས་ཡོད། གཉིས་པ་ནི་ཚད་ལྡན་རང་བཞིན་དང་རང་དགའ་རང་བཞིན་གཉིས་ལྡན་པ། ཚད་ལྡན་རང་བཞིན་གྱི་ཆ་ནས་བརྗོད་ན་དུས་ཚོད་དང་ས་གནས་གཏན་འཁེལ་བྱས་ཡོད། རང་དགའ་རང་བཞིན་ནི་དུས་ཚོད་དང་ས་གནས་ལ་ངེས་གཏན་མེད།གསུམ་ནི། མང་ཚོགས་ཀྱི་རང་བཞིན་ལྡན་པ། འཁྲབ་སྟངས་དེ་ནི་བོད་རིགས་མང་ཚོགས་ཀྱི་རང་བཞིན་ལྡན་པ། འཁྲབ་སྟངས་དེ་ནི་བོད་རིགས་མང་ཚོགས་ཀྱི་བསམ་པའི་ལོངས་སྤྱོད་ལྟ་བུར་གྱུར་ཡོད་ལ། ལྷག་ཏུ་མཚོ་ལྷོ་བོད་རིགས་རང་སྐྱོང་ཁུལ་ལ་མཚོན་ན་སྒྲ་སྙན་ནི་བོད་མིའི་འཚོ་བའི་ཁྲོད་མེད་དུ་མི་རུང་བའི་རོལ་རྩེད་ཅིག་ཏུ་གྱུར་ཡོད། བཞི་པ་ནི་ཁྱད་འཕགས་ཀྱི་སྒྱུ་རྩལ་རང་བཞིན་ལྡན་པ། སྒྲ་སྙན་གཏོང་ཞོར་གླུ་ལེན་ནི་གླུ་གར་ཟུང་འབྲེལ་གྱི་འཁྲབ་སྟོན་ཞིག་ཡིན།
སྒྲ་སྙན་རྡུང་ལེན་ནི་རྒྱལ་ཁབ་ཁག་རིམ་པའི་དངོས་མིན་རིག་གནས་
ཤུལ་བཞག་ཁག་གཉིས་པའི་མིང་ཐོར་བཀོད་ཡོད།
དེང་རབས་རིག་གནས་ཀྱི་གནོན་ཤུགས་ཆེན་པོའི་འོག་སྒྲ་སྙན་རྡུང་ལེན་རྒྱུན་ཆད་པའི་ཉེན་ཁ་ཆེན་པོར་འཕྲད་ཡོད། འཚོ་བཞེས་གནང་བཞིན་པའི་སྒྱུ་རྩལ་པ་དག་ཀྱང་ན་རྒས་སྟོབས་ཞན་གྱི་ཚད་དུ་སླེབས་ཡོད། རྒྱུད་འཛིན་མཁན་གསར་པ་གསོ་སྐྱོང་བྱེད་པའི་རིགས་གནས་ཀྱི་ཁོར་ཡུག་ཞན་པས་རྒྱུན་ཆད་པས་སྒྲ་སྙན་རྡུང་ལེན་གྱི་སྙིང་བཅུད་ཤོར་ལ་རོལ་དབྱངས་ཀྱི་ཁྱད་ཆོས་མེད་པར་གྱུར། གསུམ་ནས་མི་རྣམས་ཀྱིས་རང་འགུལ་སྒོས་སྒྲ་སྙན་རྡུང་ལེན་རྡུང་ལེན་བྱེད་བཞིན་ཞན་དུ་སོང་ནས། དུས་ཆེན་སྐབས་ཀྱི་འགན་ཁུར་རང་བཞིན་གྱི་འཁྲབ་སྟོན་ལྟ་བུར་གྱུར་ནས་དེའི་རིག་གནས་ཁྱབ་ཁོངས་ཇེ་ཆུང་དུ་སོང་བས་འཕེལ་རྒྱས་ཀྱི་ལམ་ཉག་ཕྲ་བའི་གནས་སུ་གྱུར་ཡོད།
ཐུན་མོང་མ་ཡིན་པའི་སྒྲ་སྙན་རྡུང་ལེན་གྱི་སྒྱུ་རྩལ་འདི་མྱུར་སྐྱོབ་བྱེད་ཆེད་དུས་རིམ་མི་མཚུངས་པའི་སྦྱོང་བརྡར་འཛིན་གྲྭ་འཛུགས་གཉེར་བྱས་ནས་མཉམ་མྱོང་བརྗེ་རེས་དང་། ལག་རྩལ་མཐོར་འདེགས། ཁྱབ་གདལ་གཏོང་བ་བཅས་པའི་བྱེད་ཐབས་སྣ་ཚོགས་ལ་བརྟེན་ནས་རྐང་འཛིན་སྒྱུ་རྩལ་པ་མང་པོ་གསོ་སྐྱོང་བྱ་དགོས། རིག་གནས་ཀྱི་ཁོར་ཡུག་ཡག་པོ་ཞིག་བསྐྲུན་ནས་དམངས་ཁྲོད་ཀྱི་སྒྱུ་རྩལ་པ་དང་། ལྷག་པར་དུ་ན་གཞོན་སྒྱུ་རྩལ་པ་རྣམས་ངེས་པར་འདིའི་ནང་དུ་འགུག་ཐབས་བྱ་དགོས། དེ་མིན་ད་དུང་མཐུན་ཚོགས་སྒྲིག་འཛུགས་བྱས་ནས་སྒྲ་སྙན་རྡུང་ལེན་དར་སྤེལ་དང་ཞིབ་འཇུག་གི་ལས་ཀ་རྒྱུན་ལྡན་ཅན་དང་ཡུན་རིང་ཅན་དུ་བསྒྱུར་དགོས་པ་དང་། ཐེབས་རྩ་ཚོགས་པ་བཙུགས་ནས་སྒྱུ་རྩལ་པར་སྲུང་སྐྱོང་དང་ན་གཞོན་སྒྱུ་རྩལ་པ་གསོ་སྐྱོང་བྱེད་དགོས། སྒྲ་སྙན་རྡུང་ལེན་དང་ཡུལ་སྐོར་རིག་གནས་གཉིས་ཟུང་འབྲེལ་བྱས་ནས་ས་གནས་རིག་གནས་ཀྱི་ཁྱད་ཆོས་ལྡན་པའི་འཁྲབ་སྟོན་གྲགས་ཅན་གསར་དུ་གཏོད་པའང་ད་ལྟ་གནའ་བོའི་སྒྱུ་རྩལ་སྲུང་སྐྱོབ་བྱེད་པའི་ཐབས་ཤེས་ཡག་པོ་ཞིག་ཡིན་ནོ། །