སྨན་འཇིམ་འབག་མགོ་ནི་བོད་རང་གི་ཁྱད་ཆོས་འབུར་དུ་ཐོན་པའི་བཟོ་རྩལ་ཞིག་ཡིན་ལ་ཁམས་ཁུལ་ལ་ཆ་བཞག་ན་ཉག་རོང་རྫོང་དུ་ལག་རྩལ་དེ་མ་ཉམས་གོང་འཕེལ་དུ་འགྲོ་བཞིན་ཡོད།སྨན་འཇིམ་འབག་མགོ་ནི་ཤིང་གི་གྲི་དང་དབྱུག་གུ།ཐོ་བ།འབིག་སོགས་ལག་ཆ་ཉི་ཤུ་ཙམ་ལས་བཟོས་པ་ཞིག་ཡིན།རྒྱུ་ཆ་ནི་མཚོ་ངོས་ལས་མཐོ་ཚད4600ཡན་གྱི་མཐོ་སའི་ས་དང་ཆུ་གཉིས་སྦྱར་རྗེས་དེའི་ནང་དུ་རིང་བསྲེལ་དང་རྩྭ་སྨན།རིན་པོ་ཆེ་སོགས་སྦྱར་ཡོད།འབག་མགོ་བཟོས་ཚར་རྗེས་རབ་གནས་བྱས་ཏེ་ཉིན་བདུན་གྱི་རིང་ལ་ཆུ་ནང་སྦངས་ན་བཀྲག་མདངས་ལྡན་ཞིང་དྲི་ཞིམ་འཐུལ་བ་ཞིག་ཏུ་གྱུར།སྨན་འཇིམ་འབག་མགོ་ལ་རུལ་རྒྱུ་མེད་ལ་མདོག་ཡལ་རྒྱུ་མེད་པ་དང་ཁྱེར་བདེ་བའི་ཁྱད་ཆོས་འཛོམས།བཤད་སྲོལ་ལྟར་ན་འབག་མགོ་ལ་རབ་གནས་ཐོབ་པས་སྲུང་མའི་འབག་མགོ་དང་སྐུ་འདྲ་གང་ཡིན་རུང་བགེགས་འགོག་བར་ཆད་བསལ་ཞིང་དངོས་གྲུབ་སྩོལ་བའི་ནུས་པ་ལྡན་པ་མ་ཟད་རྒྱུ་ཆའི་ནང་དུ་སྨན་རིགས་མང་པོ་འདུས་ཡོད་པས་ཆམ་ནད་དང་ངལ་དུབ་སེལ་བའི་ནུས་པ་ཆེན་པོ་ཡོད་པར་གྲགས།