སྤྱི་ཟླ9པའི་ཚེས27ཉིན་གྱི་སྔ་དྲོར། རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་གྱི་གཟེངས་བསྟོད་ཚོགས་ཆེན་འཚོགས་པ་རེད། ཏང་ཀྲུང་དབྱང་དང་རྒྱལ་སྲིད་སྤྱི་ཁྱབ་ཁང་གི་མིང་ཐོག་ནས་གཟེངས་བསྟོད་འདི་སྤེལ་བ་ནི་ཏང་དང་རྒྱལ་ཁབ་ཀྱི་ལོ་རྒྱུས་ཐོག་ཐེངས་དང་པོ་ཡིན། གཟེངས་བསྟོད་ཐོབ་པའི་དཔེ་བཟང་ནི་རྒྱལ་ཡོངས་ཀྱི་ས་གནས་ཁག་དང་ལས་རིགས་ཁག་ནས་ཡོང་བ་ཡིན་པ་དང་། ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་འདུ་ཤེས་ཟབ་ཏུ་གཏོང་བའི་ལས་ཀའི་གྲུབ་འབྲས་མངོན་གསལ་དོད་པོ་ཡིན་ལ། དཔྱད་འདེམས་གཟེངས་བསྟོད་བྱེད་པའི་དམིགས་ཡུལ་ནི་མི་རིགས་ཁག་གི་མི་དམངས་ཀྱི་སྣེ་ཁྲིད་དེ་མེས་རྒྱལ་རླབས་ཆེན་དང་། ཀྲུང་ཧྭ་མི་རིགས། ཀྲུང་ཧྭ་རིག་གནས། ཀྲུང་གོ་གུང་ཁྲན་ཏང་། ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་བཅས་ལ་ཚད་མཐོའི་ངོས་འཛིན་གཅིག་མཐུན་ཡོང་བར་བྱས་ནས་རྒྱང་སྐྱོད་ཀྱི་ལམ་བུ་གསར་པར་མཐུན་སྒྲིལ་འབད་འཐབ་དང་དུས་རབས་གསར་པར་ཧུར་ཐག་གཏོད་ཆེད་ཡིན་པ་རེད། ཁོང་ཚོའི་ནང་མྱ་ངམ་ཐང་དུ་གཞི་ཚུགས་ནས་མེས་རྒྱལ་གྱི་ཆེད་དུ་མཐའ་མཚམས་སྲུང་མཁན་འབྲོག་པ་དང་། ལྕགས་རི་རིང་པོའི་གཤམ་དུ་བརྟན་སྲུང་བྱས་ནས་རྒྱལ་ཁབ་ཕྱི་ནང་གི་ཡུལ་སྐོར་བར་ཀྲུང་ཧྭ་མི་རིགས་གཅིག་མཐུན་འདུས་གྲུབ་ཀྱི་གཏམ་རྒྱུད་བཤད་མཁན་གྱི་སྒྲོག་འགྲེལ་པ། རྒྱལ་ཁབ་ཀྱི་འབོད་སྐུལ་དང་ལེན་ཞུས་ནས་མཐའ་མཚམས་སློབ་གྲྭར་བསྐྱོད་དེ་མི་རིགས་མཐུན་སྒྲིལ་གྱི“ས་བོན”འདེབས་མཁན་གྱི་སློབ་སྐྱོར་ཞབས་ཞུའི་རུ་ཁག་སོགས་ཡོད་པ་རེད།     ཚོགས་འདུར་རང་ཁུལ་གྱི་པ་སངས་སྒྲོལ་མ་དང་ལེགས་སྨོན་གཉིས་ལ“རྒྱལ་ཡོངས་ཀྱི་མི་རིགས་མཐུན་སྒྲིལ་ཡར་ཐོན་དཔེ་བཟང་མི་སྒེར”གྱི་མཚན་སྙན་ཐོབ་པ་རེད། 

 པ་སངས་སྒྲོལ་མ། （བུད་མེད། བོད་རིགས）སི་ཁྲོན་ཞིང་ཆེན་དཀར་མཛེས་བོད་རིགས་རང་སྐྱོང་ཁུལ་ཨུའི་འཐབ་ཕྱོགས་གཅིག་གྱུར་པུའུ་རུ་བཅའ་སྡོད་བྱེད་པའི་ཁུལ་སྒྲིག་ཨུའི་ལྟ་ཞིབ་ཨུ་ལྷན། ཁུལ་ཨུའི་འཐབ་ཕྱོགས་གཅིག་གྱུར་པུའུ་ཡི་སྒྲིག་བཤེར་ལྟ་ཞིབ་ཚོ་ཆུང་གི་མགོ་གཙོ་གཞོན་པ་དང་རིམ་པ་གཉིས་པའི་ལྟ་ཞིབ་མགོ་གཙོ་བཅས་ཡིན། 

 ལེགས་སྨོན།（བོད་རིགས）ཁྲེང་ཏུའུ་ལེགས་སྨོན་རི་མོའི་སྒྱུ་རྩལ་ལྟེ་གནས་ཀྱི་འགན་འཁུར་བ་ཡིན།