སྤྱི་ཟླ9པའི་ཚེས27ཉིན། རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང་གིས་གསར་འགྱུར་བསྒྲག་སྤེལ་ཚོགས་འདུད་འཚོགས་ནས་རྒྱལ་སྟོན་གུང་གསེང་རིང་གི་ཕྱིར་བསྐྱོད་ཞབས་ཞུའི་འགན་སྲུང་སྐོར་གྱི་འབྲེལ་ཡོད་གནས་ཚུལ་ངོ་སྤྲོད་བྱས། 

   འགྲིམ་འགྲུལ་སྐྱེལ་འདྲེན་པུའུ་གཞུང་ལམ་ཅུས་ཀྱི་ཅུས་ཀྲང་ཀྲོའུ་རུང་ཧྥུང་གིས། རྒྱལ་སྲིད་སྤྱི་ཁྱབ་ཁང་གི་འབྲེལ་ཡོད་བླང་བྱ་གཞིར་བཟུང་ནས། ད་ལོའི་རྒྱལ་སྟོན་དུས་ཆེན་གྱི་གུང་གསེང་རིང་། འདུག་སྟེགས་བདུན་མན(འདུག་སྟེགས་བདུན་ཅན་ཚུད)གྱི་འགྲུལ་སྐྱེལ་རླངས་འཁོར་ཆུང་གྲས་རིན་མེད་ངང་ཤར་བགྲོད་བྱ་ཆོག་པའི་སྲིད་ཇུས་མུ་མཐུད་དུ་ལག་ལེན་བསྟར་རྒྱུ་ཡིན་ཞིང་། རིན་མེད་ངང་ཤར་བགྲོད་བྱ་ཆོག་པའི་དུས་ཚོད་ནི་སྤྱི་ཟླ10པའི་ཚེས1ཉིན་གྱི་ཆུ་ཚོད0ནས་ཚེས7ཉིན་གྱི་ཆུ་ཚོད24བར་ཡིན་ཞེས་བཤད་པ་རེད།

གཅིག། ནམ་ཚོད་ལ་མྱུར་བགྲོད་གཞུང་ལམ་ཏུ་བསྐྱོད་ན་རིན་མེད་ཡིན།

     མྱུར་བགྲོད་གཞུང་ལམ་དུ་རིན་མེད་ངང་བགྲོད་པ་ནི་རླངས་འཁོར་མྱུར་བགྲོད་གཞུང་ལམ་ལས་ཁ་བྲལ་བའི་དུས་ཚོད་གཞིར་འཛིན་རྒྱུ་རེད། ཁྱེད་རང་ག་དུས་མྱུར་བགྲོད་གཞུང་ལམ་ཐོག་བསྐྱོད་ཀྱང་རིན་མེད་འགྲོ་སྐྱོད་དུས་མཚམས་སུ་ཁ་བྲལ་ཚེ། རིན་མེད་འགྲོ་སྐྱོད་ཀྱི་སྲིད་ཇུས་ལོངས་སུ་སྤྱོད་ཆོག།

གཉིས། རིན་མེད་འགྲོ་སྐྱོད་ཀྱི་དུས་ཚོད་མཇུག་སྒྲིལ་གྲབས་ཡོད་ཀྱང་ད་དུང་དམིགས་སར་མ་སླེབས་ན་གང་འདྲ་བྱ་དགོས།

     དེའི་གོང་། ས་གནས་ཁག་ཅིག་ཏུ་ཁ་ལོ་བས་རིན་མེད་འགྲོ་སྐྱོད་དུས་མཚམས་སུ་མྱུར་བགྲོད་གཞུང་ལམ་ལས་ཁ་བྲལ་མ་ཐུབ་པས། སྐར་མ་ཁ་ཤས་མ་གཏོགས་བརྒལ་མེད་མོད། འོན་ཀྱང་ལམ་ཚད་ཧྲིལ་པོའི་མྱུར་བགྲོད་གྲོན་དངུལ་བསྡུ་བའི་གནས་ཚུལ་ཐོན་མྱོང་ཡོད།

     ཀྲོའུ་རུང་ཧྥུང་གིས། གལ་སྲིད་ཁྱེད་ཀྱི་རླངས་འཁོར་གཏོང་བའི་དུས་ཚོད་དེ་རིན་མེད་དུས་མཚམས་དང་མཚམས་འཇོག་པའི་དུས་ཚོད་ལ་སླེབས་ཉེར་ཡོད་པ་སྟེ། སྤྱི་ཟླ10པའི་ཚེས7ཉིན་གྱི་གུང་གསེང་གི་ཉིན་མཐའ་མའི་ཆུ་ཚོད24ལ་སླེབས་ཀྱང་། སྐབས་དེར་ད་དུང་དམིགས་སར་འབྱོར་མེད་ཚེ། ཐག་ཉེ་སའི་གྲོན་བསྡུའི་ས་ཚིགས་ནས་སྔོན་ལ་མྱུར་བགྲོད་གཞུང་ལམ་ལས་ཁ་བྲལ་ཆོག། དེ་ལྟར་བྱས་ཚེ་ཁྱོད་ཀྱིས་སྔོན་གྱི་ལམ་ཐག་ལ་རིན་པ་སྤྲོད་དགོས་ཀྱི་མེད།  རིན་མེད་ཤར་བགྲོད་སྲིད་ཇུས་ལོངས་སུ་སྤྱད་རྗེས། སླར་ཡང་ཐག་ཉེ་སའི་མྱུར་བགྲོད་གཞུང་ལམ་ཐོག་བསྐྱོད་དེ་དམིགས་སར་འབྱོར་བའི་ཚེ། འགྲོ་སྐྱོད་ལྷག་མ་རྣམས་ཀྱི་གྲོན་དངུལ་ལས་སྤྲོད་དགོས་ཀྱི་མེད། ཚང་མས་ལུགས་མཐུན་ངང་གུང་གསེང་གི་འཆར་གཞི་བཟོ་རྒྱུའི་དྲན་སྐུལ་ཞུ་རྒྱུ་ཡིན་ཞེས་གསུངས་པ་རེད།

      ཞིབ་འཇུག་དང་བརྡར་ཤ་བཅད་པ་བརྒྱུད། ད་ལོའི་རྒྱལ་སྟོན་གུང་གསེང་རིང་སྤྱི་དམངས་ཕྱི་ལ་ཡུལ་སྐོར་དུ་སྐྱོད་པ་དང་ཕ་ཡུལ་དུ་ལོག་ནས་གཉེན་འཕྲད་འགྲོ་བ་གཙོ་བོ་ཡིན་པ་དང་། སྔོན་དཔག་བྱས་ན་སྤྱི་ཚོགས་ཡོངས་ཀྱི་ས་ཁོངས་ལས་བརྒལ་བའི་མི་ཐེངས་དུང་ཕྱུར19.4ཟིན་རྒྱུ་དང་། ཉིན་རེར་ཆ་སྙོམས་མི་ཐེངས་དུང་ཕྱུར2.77ཟིན་རྒྱུ་ཡིན་པ་དེ་ན་ནིང་གི་དུས་མཚུངས་ལས་ཉིན་རེར་ཆ་སྙོམས་བརྒྱ་ཆ0.7འཕར་རྒྱུ་དང2019ལོའི་དུས་མཚུངས་ལས་ཉིན་རེར་ཆ་སྙོམས་བརྒྱ་ཆ19.4འཕར་རྒྱུ་རེད།