ཕེང་ཆིང་ཧྭ་ཡིས་མཇུག་བསྒྲིལ་གྲོས་ཚོགས་གཙོ་སྐྱོང་གནང་བས་མ་ཚད་གསུང་བཤད་གནང་།ཧོང་ཆང་དང་ཐེན་ཞང་ལི་གྲོས་ཚུགས་སུ་ཞུགས། ཝང་ཡན་ཧྥེ།ཏེང་ཡུང་།ལིའུ་ཕིང་།ཧོ་ཡན་ཀྲེན་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པར་བདམས་ཐོན་བྱུང་།ལིའོ་ཅན་ཡུས་ཞིང་ཆེན་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རེན་ལ་བདམས་ཐོན་བྱུང་།ཞིང་ཆེན་སྲིད་གཞུང་གི་ལས་དོན་སྙན་སེང་སྐོར་གྱི་གྲོས་ཆོད་སོགས་བརྡས་ཐག་བཅད་ནས་གྲོས་འཆམས་བྱུང་བ་རེད།

སྤྱི་ཟླ་དང་པོའི་ཚེས21ཉིན་གྱི་ཕྱི་དྲོར། སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་གྲོས་ཚོགས་ཐེངས་ལྔ་པའི་གྲོས་རིམ་ཁག་བདེ་བླག་ངང་གྲུབ་རྗེས་ཁྲེང་ཏུའུ་རུ་མཇུག་བསྒྲིལ་བ།

སྤྱི་ཟླ་དང་པོའི་ཚེས21ཉིན་གྱི་ཕྱི་དྲོར། སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་གྲོས་ཚོགས་ཐེངས་ལྔ་པའི་གྲོས་རིམ་ཁག་བདེ་བླག་ངང་གྲུབ་རྗེས་ཁྲེང་ཏུའུ་རུ་མཇུག་བསྒྲིལ་བ་རེད། ཞིང་ཆེན་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་གྲོས་ཚོགས་ཐེངས་ལྔ་པར་ཞུགས་དགོས་པའི་འཐུས་མི888ཡིན་པ་དང་མཇུག་བསྒྲིལ་གྲོས་ཚོགས་ནང་དངོས་སུ་ཞུགས་པའི་འཐུས་མི810ཡོད་པས་ཁྲིམས་བཀོད་མི་གྲངས་དང་མཐུན་པ་རེད།

ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི། མཇུག་བསྒྲིལ་གྲོས་ཚོགས་ཀྱི་ལག་བསྟར་ཀྲུའུ་ཞི་ཕེང་ཆིང་ཧྭས་མཇུག་བསྒྲིལ་གྲོས་ཚོགས་གཙོ་སྐྱོང་གནང་བ་རེད། ཚོགས་ཆེན་གྱི་ཀྲུའུ་ཞི་ཚོགས་པའི་རྒྱུན་ལས་ཀྲུའུ་ཞི།མཇུག་བསྒྲིལ་གྲོས་ཚོགས་ཀྱི་ལག་བསྟར་ཀྲུའུ་ཞི་ཝང་ཉིང་དང་ཝང་ཡན་ཧྥེ།ཝང་དབྱི་ཧུང་།ཁྲེན་ཝུན་ཧྭ།ཡེ་ཀྲོང་།དབྱང་ཧུང་པའོ།པའོ་ཧུའེ།ཕེང་ལིན།སུང་ཁྲའོ་ཧྭ།ཝང་ཧྥེ།ཅ་རུའེ་ཡུན་བཅས་ཀྲུའུ་ཞི་སྡིངས་ཆའི་མདུན་གྲལ་དུ་བཞུགས་ཡོད་པ་རེད།

ཞིང་ཆེན་ཏང་ཨུའི་ཧྲུའུ་ཅི་གཞོན་པ། ཞིང་ཆེན་སྲིད་གཞུང་གི་ཞིང་དཔོན་ཧོང་ཆང་དང་།ཞིང་ཆེན་སྲིད་གྲོས་ཀྱི་ཀྲུའུ་ཞི་ཐེན་ཞང་ལི་སོགས་མཇུག་སྒྲིལ་གྲོས་ཚོགས་སུ་ཞུགས་པ་དང་འབྲེལ་ཀྲུའུ་ཞི་སྡིངས་ཆའི་ཐོག་བཞུགས་ཡོད་པ་རེད།

གྲོས་ཚོགས་ཐོག《ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པ་ཁག་གཅིག་གི་ལས་ཁུར་དགོངས་ཞུ་དང་ལེན་བྱ་རྒྱུའི་སྐོར་གྱི་སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་ཚོགས་ཀྱི་གྲོས་ཚོགས་ཐེངས་ལྔ་པའི་གཏན་འབེབས》ལ་བརྡས་ཐག་བཅད་ནས་གྲོས་འཆམ་བྱུང་། ཁྲེན་ཝུན་ཧྭ་དང་།ཡེ་ཀྲོང་།པའོ་ཧུའེ་བཅས་ཀྱིས་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པའི་གོ་གནས་དགོངས་ཞུས་བྱས་པར་དང་ལེན་ཞུས་པ་རེད།

གྲོས་ཚོགས་ཐོག་རང་མིང་མི་འགོད་པའི་འདེམས་ཤོག་འཕེན་ཐབས་ལ་བརྟེན་ནས་ཝང་ཡན་ཧྥེ་དང་།ཏེང་ཡུང་།ལིའུ་ཕིང་།ཧོ་ཡན་ཀྲེན་བཅས་སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཀྲུའུ་རེན་གཞོན་པར་འདེམས་བསྐོ་བྱས་པ་དང་།ལེའོ་ཅན་ཡུས་སི་ཁྲོན་ཞིང་ཆེན་ལྟ་ཞིབ་ཨུ་ཡོན་ལྷན་ཁང་གི་ཀྲུའུ་རེན་ལ་འདེམས་བསྐོ་བྱས་པ།ཏེང་ཡུས་ཧྭ་དང་པའེ་དབྱིན།པའོ་ཧུའེ།ཀྲོང་པིན།ལི་ཝུན་གོ།ལི་དབྱིང་།དབྱང་ཁའེ།ཀྲང་ལི།ཁྲེན་ཀྲེང་།ཀྲོའུ་ལིང་ལིན།ལེའོ་རེན་སུང་བཅས་སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ཨུ་ཡོན་ལ་འདེམས་བསྐོ་བྱས་པ་རེད། གྲོས་ཚོགས་ཐོག་སི་ཁྲོན་ཞིང་ཆེན་སྐབས་བཅུ་གསུམ་པའི་མི་དམངས་འཐུས་མི་ཚོགས་ཆེན་གྱི་ཆེད་དོན་ཨུ་ཡོན་ལྷན་ཁང་གི་ཀྲུའུ་རེན་ཨུ་ཡོན་གྱི་མིང་ཐོར་བརྡས་ཐག་བཅད་ནས་གྲོས་འཆམ་བྱུང་བ་རེད།

གྲོས་ཚོགས་ཐོག་སི་ཁྲོན་ཞིང་ཆེན་མི་དམངས་སྲིད་གཞུང་གི་ལས་དོན་སྙན་སེང་སྐོར་གྱི་གྲོས་ཆོད་དང་སི་ཁྲོན་ཞིང་ཆེན་གྱི2021ལོའི་རྒྱལ་དམངས་དཔལ་འབྱོར་དང་སྤྱི་ཚོགས་འཕེལ་རྒྱས་འཆར་གཞི་ལག་བསྟར་བྱས་ཚུལ་དང2022ལོའི་འཆར་གཞིའི་སྐོར་གྱི་གྲོས་ཆོད། སི་ཁྲོན་ཞིང་ཆེན་གྱི2021ལོའི་སྔོན་རྩིས་ལག་བསྟར་བྱས་ཚུལ་དང2022ལོའི་སྔོན་རྩིས་སྐོར་གྱི་གྲོས་ཆོད་དང་།སི་ཁྲོན་ཞིང་ཆེན་མི་དམངས་འཐུས་མི་ཚོགས་ཆེན་རྒྱུན་ལས་ཨུ་ཡོན་ལྷན་ཁང་གི་ལས་དོན་སྙན་སེང་སྐོར་གྱི་གྲོས་ཆོད།སི་ཁྲོན་ཞིང་ཆེན་མཐོ་རིམ་མི་དམངས་ཁྲིམས་ཁང་གི་ལས་དོན་སྙན་སེང་སྐོར་གྱི་གྲོས་ཆོད།སི་ཁྲོན་ཞིང་ཆེན་མི་དམངས་ཞིབ་དཔྱོད་ཁང་གི་ལས་དོན་སྙན་སེང་སྐོར་གྱི་གྲོས་ཆོད་བཅས་བརྡས་ཐག་བཅད་ནས་གྲོས་འཆམས་བྱུང་བ་རེད།

གྲོས་ཚོགས་ཐོག་རྩ་ཁྲིམས་ལ་དམ་བཅའ་འཇོག་པའི་མཛད་སྒོ་སྤེལ་བ་རེད། ཚོགས་ཆེན་ཐོག་འདེམས་བསྐོ་བྱས་པའི་ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་གཞོན་པ་དང་།ཨུ་ཡོན།ཞིང་ཆེན་ལྟ་ཞིབ་ཨུ་ལྷན་གྱི་ཀྲུའུ་རེན་བཅས་དང་ཚོགས་ཆེན་ཐོག་བརྡས་ཐག་བཅད་ནས་གྲོས་འཆམ་བྱུང་བའི་ཞིང་ཆེན་མི་དམངས་འཐུས་ཚོགས་ཆེད་དོན་ཨུ་ལྷན་གྱི་ཀྲུའུ་རེན་ཨུ་ཡོན་གྱིས་ཚོགས་ཞུགས་འཐུས་མི་ཚོའི་ཐུན་མོང་གི་བདེན་དཔང་འོག་རྩ་ཁྲིམས་ཀྱི་དམ་བཅའ་བཞག་པ་རེད།

ཞིང་ཆེན་ཏང་ཨུའི་ཧྲུའུ་ཅི། ཞིང་ཆེན་མི་དམངས་འཐུས་ཚོགས་རྒྱུན་ལས་ཨུ་ལྷན་གྱི་ཀྲུའུ་རེན་ཕེང་ཆིང་ཧྭ་ཡིས་མཇུག་བསྒྲིལ་གྲོས་ཚོགས་ཐོག་གསུང་བཤད་གནང་བ་རེད། ཁོང་གིས་བསྟན་དོན།གྲོས་ཚོགས་འཚོག་རིང་འཐུས་མི་རྣམ་པས་མི་དམངས་ཀྱི་མངགས་བཅོལ་ཟབ་མོ་བློ་ལ་བརྟན་པོར་བཅངས་པ་དང་།རང་འགན་གཙང་སྒྲུབ་ནན་ཏན་བྱེད་པ།ཐབས་འདོན་ཇུས་འདོན་ཧུར་ཐག་བྱེད་པ།འཕེལ་རྒྱས་ཀྱི་ཇུས་ཆེན་ཐུན་མོང་ཐོག་དོན་གཉེར་བྱེད་པ་བཅས་ཀྱི་ཐོག་ནས་ཆབ་སྲིད་ཀྱི་སྤྲོ་སེམས་ཆེན་པོ་དང་འགན་འཁྲི་འཁུར་སེམས་ཆེན་པོ་མངོན་ཡོད། དེ་ནི་དར་ཆ་མཐོན་པོར་སྒྲེང་བ་དང་དམངས་གཙོ་མཐུན་སྒྲིལ།སེམས་ཤུགས་གཅིག་སྒྲིལ་བྱེད་པ།འབད་འབུངས་ཡར་བརྩོན་བཅས་ཀྱི་ཚོགས་ཆེན་ཞིག་ཡིན་པས་ཞིང་ཆེན་ཡོངས་ཀྱི་མི་རིགས་ཁག་གི་མི་དམངས་ལ་སྔར་བས་སྐུལ་ལྕག་དང་སྐུལ་སློང་བྱས་ཏེ་ཡིད་ཆེས་བརྟན་པོ་དང་དཔའ་ངར་ཆེན་པོས་མདུན་སྐྱོད་བྱས་ནས་སྤྱི་ཚོགས་རིང་ལུགས་ཀྱི་དེང་རབས་ཅན་གྱི་སི་ཁྲོན་སྒོ་ཀུན་ནས་འཛུགས་སྐྱོང་བྱེད་པར་འབད་འཐབ་ལྷོད་མེད་བྱ་དགོས།

ཕེང་ཆིང་ཧྭ་ཡིས་ནན་གསུང་གནང་དོན། 2022ལོ་ནི་སྤྱི་ཚོགས་རིང་ལུགས་དེང་རབས་ཅན་གྱི་རྒྱལ་ཁབ་ཁྱོན་ཡོངས་ནས་འཛུགས་སྐྱོང་བྱེད་པ་དང་ལོ་བརྒྱ་གཉིས་པའི་འབད་འཐབ་དམིགས་འབེན་རྒྱང་སྐྱོད་གི་ལམ་བུ་གསར་པར་སྐྱོད་པའི་གལ་ཆེའི་ལོ་ཞིག་ཡིན་ལ། རང་རེའི་ཏང་གིས་ཏང་གི་ཚོགས་ཆེན་ཐེངས་ཉི་ཤུ་པ་འཚོག་རྒྱུ་དང་རང་རེའི་ཞིང་ཆེན་གྱིས་ཏང་གི་འཐུས་མི་ཚོགས་ཆེན་ཐེངས་བཅུ་གཉིས་པ་འཚོག་རྒྱུ་ཡིན་པས་ད་ལོའི་ལས་དོན་ཡག་པོ་བསྒྲུབ་རྒྱུར་དོན་སྙིང་གལ་ཆེན་ལྡན་པ་རེད། ཞིང་ཆེན་ཡོངས་ཀྱི་གོང་འོག་ཚང་མས་ཞི་ཅིན་ཕིང་གི་དུས་རབས་གསར་པའི་ཀྲུང་གོའི་ཁྱད་ཆོས་ཀྱི་སྤྱི་ཚོགས་རིང་ལུགས་ཀྱི་དགོངས་པས་མཛུབ་སྟོན་བྱས། སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་སི་ཁྲོན་གྱི་ལས་དོན་ལ་གནང་བའི་མཛུབ་སྟོན་གལ་ཆེན་རབ་དང་རིམ་པའི་དགོངས་དོན་ཁྱོན་ཡོངས་ནས་ལག་ལེན་མཐར་ཕྱིན་བསྟར། ཏང་ཀྲུང་དབྱང་གི་སྲིད་ཇུས་དང་བྱེད་ཕྱོགས་གནད་ཆེ་བ་དང་ཞིང་ཆེན་ཏང་ཨུའི་ཐབས་ཇུས་བཀོད་སྒྲིག་དོན་འཁྱོལ་ནན་ཏན། རླབས་ཆེན་གྱི་ཏང་འཛུགས་སྐྱོང་གི་སྙིང་སྟོབས་དར་སྤེལ་ཤུགས་ཆེན་བཏང་ནས་འཕེལ་རྒྱས་ཀྱི་འདུ་ཤེས་གསར་པ་ཆ་ཚང་དང་།འཕྱུགས་མེད།ཁྱོན་ཡོངས་ནས་ལག་བསྟར་བཅས་བྱེད་པ་དང་།འཕེལ་རྒྱས་ཀྱི་རྣམ་པ་གསར་པ་དང་མཉམ་འདྲེས་ཧུར་ཐག་དང་དེར་ཞབས་འདེགས་ཞུ་བ།བརྟན་པོ་ཡོང་རྒྱུ་གཙོ་བོར་འཛིན་པ་དང་བརྟན་ཐོག་ཡར་བརྩོན་མཐའ་འཁྱོངས་བྱེད་པ།རི་སྔོན་ལ་དམ་འཛིན་ལྷོད་མེད་ཀྱི་སྒོ་ནས་སྤུས་ཚད་མཐོ་བའི་འཕེལ་རྒྱས་ལ་ནུས་ཤུགས་ཡོད་རྒུས་སྐུལ་འདེད་གཏོང་བ།དཔལ་འབྱོར་ལུགས་མཐུན་ངང་འཕར་བའི་མྱུར་ཚད་རྒྱུན་འཛིན།སྤྱི་ཚོགས་ཁྱོན་ཡོངས་བརྟན་ལྷིང་སྲུང་འཛིན་བཅས་བྱས་ནས་རྒྱུགས་སྤྲོད་པའི་ལམ་བུའི་ཐོག་ཕུལ་བྱུང་གི་རྒྱུགས་འབྲས་ལོན་གང་ཐུབ་བྱ་དགོས།

ཕེང་ཆིང་ཧྭ་ཡིས་བསྟན་དོན།རྒྱང་སྐྱོད་ཀྱི་ལམ་བུ་གསར་པར་རྟུལ་ཕོད་ཀྱིས་མདུན་སྐྱོད་བྱེད།དུས་རབས་གསར་པར་བྱས་རྗེས་བསྐྲུན་ནས་ ངེས་པར་དུ་“གཏན་འཁེལ་གཉིས་”ཀྱི་ཐག་གཅོད་རང་བཞིན་གྱི་དོན་སྙིང་ལ་གོ་བ་ཟབ་མོ་ལེན་དགོས། “འདུ་ཤེས་བཞི”སྔར་བས་ཇེ་དྲག་ཏུ་གཏོང་བ་དང་།“གདེང་ཚོད་བཞི”བརྟན་དུ་གཏོང་བ།“སྲུང་སྐྱོང་གཉིས”བྱེད་ཐུབ་པ་བཅས་བྱས་ནས་ཆབ་སྲིད་བརྡར་ཤ་གཅོད་ནུས་དང་།ཆབ་སྲིད་གོ་བ་ལེན་ནུས།ཆབ་སྲིད་ལག་བསྟར་ནུས་པ་བཅས་རྒྱུན་ཆད་མེད་པར་ཇེ་དྲག་ཏུ་བཏང་སྟེ་དུས་རབས་གསར་པའི་ཏང་གི་གསར་གཏོད་རིགས་པའི་གཞུང་ལུགས་ཀྱི་ཐོག་ནས་དུས་རབས་ཀྱི་བརྗོད་གཞིར་འགྲེལ་བཤད་རྒྱག་པ་དང་ལག་ལེན་གསར་པར་མཛུབ་ཁྲིད་བྱས་ཏེ་སི་ཁྲོན་བཅོས་སྐྱོང་དར་རྒྱས་ཀྱི་བྱ་གཞག་སོ་སོ་ཐོག་མཐའ་བར་གསུམ་དུ་སྤྱི་ཁྱབ་ཧྲུའུ་ཅི་ཞི་ཅིན་ཕིང་གིས་ཁྲིད་སྟོན་གནང་བའི་ཁ་ཕྱོགས་བརྒྱུད་ནས་མདུན་སྐྱོད་བྱ་རྒྱུར་འགན་ལེན་བྱ་དགོས།ངེས་པར་དུ་འཐབ་ཇུས་ཀྱི་ངེས་ཤུགས་སྲུང་འཛིན་བྱས་ནས་ལོ་རྒྱུས་ཀྱི་གོ་སྐབས་དམ་འཛིན་བྱས་ནས་ཁྲེང་ཏུའུ་དང་ཁྲུང་ཆིང་ས་ཁུལ་གྱི་གྲོང་ཁྱེར་གཉིས་ཀྱི་དཔལ་འབྱོར་གླིང་ཁུལ་འཛུགས་སྐྱོང་བྱ་རྒྱུ་དེ་འཐབ་ཇུས་ཀྱི་སྣེ་ཁྲིད་ལ་བརྩིས་ནས“གཞི་གཅིག་སྣེ་མང་།ས་ཁུལ་ལྔ་མཐུན་སྦྱོར་”དང་།“ཕྱོགས་བཞིར་རྒྱ་སྐྱེད།ས་ཁོངས་ཡོངས་སྒོ་འབྱེད”བཅས་ཀྱི་འཐབ་ཇུས་བཀོད་སྒྲིག་ལག་བསྟར་གཏིང་ཟབ་བྱས། ས་ཁོངས་མཐུན་སྦྱོར་འཕེལ་རྒྱས་ཀྱི་མ་ལག་དང་ཚན་རྩལ་གསར་གཏོད་མ་ལག། དེང་རབས་ཀྱི་ཐོན་ལས་མ་ལག། དེང་རབས་ཀྱི་རྨང་གཞིའི་སྒྲིག་བཀོད་མ་ལག། སྒོ་འབྱེད་འཕེལ་རྒྱས་ཀྱི་མ་ལག། “ཞིང་གསུམ”ལས་དོན་མ་ལག། སྐྱེད་ཁམས་དཔལ་ཡོན་གྱི་མ་ལག། དམངས་འཚོ་འགན་ལེན་མ་ལག། གནོད་འཚེ་སྔོན་འགོག་དང་ཉུང་གཏོང་གི་གེགས་སྐྱོབ་མ་ལག་བཅས་མགྱོགས་མྱུར་དུ་བཙུགས་ནས་བློ་བརྟན་འགྱུར་མེད་གྱིས་སི་ཁྲོན་གྱི་སྤུས་ཚད་མཐོ་བའི་འཕེལ་རྒྱས་ལ་སྐུལ་འདེད་གཏང་དགོས། ངེས་པར་དུ་མི་དམངས་ལྟེ་བར་འཛིན་པའི་འཕེལ་རྒྱས་ཀྱི་བསམ་བློ་ལག་བསྟར་ནན་ཏན་བྱས་ནས“ངས་མང་ཚོགས་ལ་དངོས་དོན་སྒྲུབ་པའི”ལག་ལེན་བྱེད་སྒོ་ཟབ་སྤེལ་བྱས་ཏེ།ཆུང་དུས་ནས་སློབ་གསོ་ཐོབ་པ་དང་སློབ་སྦྱོང་བྱས་ན་ཁྲིད་རྒྱུ་ཡོད་པ།ངལ་རྩོལ་བྱས་ན་ཐོབ་ཆ་ཡོད་པ།ནད་ཕོག་ན་སྨན་བཅོས་ཐུབ་པ།རྒས་ན་འཚོ་རྟེན་ཡོད་པ།སྡོད་ན་ཁང་པ་ཡོད་པ།ཞན་སར་རོགས་སྐྱོར་བྱེད་མཁན་ཡོད་པ་བཅས་ཀྱི་ཐད་མུ་མཐུད་ནས་ཤུགས་སྣོན་བརྒྱག་དགོས།དབུལ་ཐར་འགག་སྒྲོལ་གྱི་གྲུབ་འབྲས་སྲ་བརྟན་དང་རྒྱ་སྐྱེད་གཏོང་བ།ཡུལ་སྡེ་ཁྱོན་ཡོངས་ནས་དར་རྒྱས་གཏོང་བར་སྐུལ་འདེད་གཏོང་བ།ཞིང་སྡེའི་བཅོས་བསྒྱུར་རིགས་གཉིས་ཀྱི“ལེའུ་་རྗེས་མའི”བྱ་བ་གཏིང་ཟབ་དང་ཏན་ཏིག་ངང་ཡག་པོ་སྒྲུབ་པ་བཅས་བྱས་ཏེ།དམངས་འཚོའི་ཕན་བདེ་རྒྱུན་ཆད་མེད་པར་ཇེ་དྲག་ཏུ་གཏོང་བ་དང་ཐུན་མོང་ཐོག་ཕྱུག་པོར་ཆགས་པར་སྐུལ་འདེད་གཏང་དགོས། ངེས་པར་དུ་སྡུག་ཡོང་གི་འདུ་ཤེས་ཇེ་དྲག་ཏུ་གཏོང་བ་དང་།མ་མཐའི་མཚམས་ཐིག་གི་བསམ་བློ་མཐའ་འཁྱོངས་བྱེད་པ།འཐབ་རྩོད་ཀྱི་སྙིང་སྟོབས་དར་སྤེལ་གཏོང་བ།འཐབ་རྩོད་ཀྱི་འཇོན་ནུས་ཇེ་དྲག་ཏུ་་གཏོང་བ་བཅས་བྱས་ཏེ་ཆབ་སྲིད་དང་དཔལ་འབྱོར།སྤྱི་ཚོགས།རང་བྱུང་གནོད་འཚེ་སོགས་ཁྱབ་ཁོངས་ཀྱི་ཉེན་ཁ་དང་འགྲན་སློང་ནུས་ལྡན་ངང་བསལ་ནས་མདུན་སྐྱོད་ལམ་བུའི་ཐོག་གི་འགལ་རྐྱེན་མཐའ་དག་སེལ་ཏེ་དཔལ་འབྱོར་དང་སྤྱི་ཚོགས་འཕེལ་རྒྱས་ཀྱིས་རླུང་བརྟེན་རླབས་གཤགས་དང་བརྟན་པོའི་ངང་མདུན་སྐྱོད་བྱ་རྒྱུར་སྐུལ་འདེད་གཏང་དགོས། ངེས་པར་དུ་ཏང་གི་ལོ་རྒྱུས་ཕྱོགས་བསྡོམས་དང་སློབ་སྦྱོང་།སློབ་གསོ།དྲིལ་བསྒྲགས་བཅས་མུ་མཐུད་ནས་གཏིང་ཟབ་ཏུ་སྤེལ་ནས་རྒྱ་ཆེའི་ཏང་ཡོན་དང་ལས་བྱེད་པ།མང་ཚོགས་བཅས་ལ་ཏང་གི་ལོ་བརྒྱའི་འབད་འཐབ་ལོ་རྒྱུས་ཁྲོད་ནས་བློ་གྲོས་དང་སྟོབས་ཤུགས་བསྡུ་ལེན་བྱ་རྒྱུའི་ཁྲིད་སྟོན་བྱས་ཏེ་སི་ཁྲོན་གྱི་བྱ་གཞག་ཁག་འཕེལ་རྒྱས་འགྲོ་རྒྱུར་སྐུལ་འདེད་གཏོང་བའི་མཉམ་ཤུགས་ཆེན་པོ་ཞིག་ཆགས་པ་བྱ་དགོས།

ཕེང་ཆིང་ཧྭ་ཡིས་བསྟན་དོན། རིམ་པ་སོའི་མི་དམངས་འཐུས་ཚོགས་དང་དེའི་རྒྱུན་ལས་ཨུ་ཡོན་ལྷན་ཁང་གིས་མི་དམངས་འཐུས་མིའི་ཚོགས་ཆེན་གྱི་ལམ་ལུགས་མཐའ་འཁྱོངས་དང་འཐུས་སྒོ་ཚང་དུ་གཏང་རྒྱུའི་སྐོར་གྱི་སྤྱི་ཁྱབ་ཧྲུའུ་ཅི་ཞི་ཅིན་ཕིང་གི་དགོངས་པ་གལ་ཆེན་སློབ་སྦྱོང་དང་ལག་ལེན་མཐར་ཕྱིན་གཏིང་ཟབ་བྱས། ཀྲུང་དབྱང་དང་ཞིང་ཆེན་ཏང་ཨུའི་མི་དམངས་འཐུས་ཚོགས་ཀྱི་ལས་དོན་གྲོས་ཚོགས་ཀྱི་དགོངས་དོན་དོན་འཁྱོལ་ནན་ཏན་དང་།རྩ་ཁྲིམས་དང་བཅའ་ཁྲིམས་ཀྱིས་དཀྲིས་པའི་འགན་འཁྲི་ཁག་ལག་བསྟར་ཏན་ཏིག་བྱས་ཏེ།བརྒྱུད་རིམ་ཡོངས་ཀྱི་མི་དམངས་དམངས་གཙོ་འཕེལ་རྒྱས་དང་ལག་བསྟར་ཤུགས་ཆེན་དང་།དུས་བསྟུན་མདུན་སྐྱོད་ཀྱིས་དུས་རབས་གསར་པའི་སི་ཁྲོན་མི་དམངས་འཐུས་ཚོགས་ཀྱི་ལས་དོན་གསར་གཏོད་དང་འཕེལ་རྒྱས་ཡོང་བར་སྐུལ་འདེད་གཏང་དགོས། “ལས་ཁུངས་བཞིའི”བླང་བྱ་ལྟར་རང་ངོས་འཛུགས་སྐྱོང་ལ་ཁྱོན་ཡོངས་ནས་ཤུགས་སྣོན་རྒྱག་པ་དང་།ཏང་སྲོལ་སྲིད་གཙང་འཛུགས་སྐྱོང་ལ་རྒྱུན་སྲིང་ལྷོད་མེད་ངང་སྐུལ་འདེད་གཏོང་བ།འགྱུར་མེད་སྟོབས་ལྡན་གྱི་འགོ་ཁྲིད་ཚན་ཁག་དང་ལས་བྱེད་པའི་དཔུང་སྡེ་འཛུགས་སྐྱོང་ལ་ཤུགས་སྣོན་རྒྱག་པ་བཅས་བྱས་ནས་དཔེ་བཟང་ལས་ཁུངས་དང་ཉམས་སད་ཐེག་ཐུབ་པའི་དཔུང་སྡེ་གཏོད་དགོས། རིམ་ཁག་མི་དམངས་འཐུས་ཚོགས་ཀྱི་འཐུས་མིས་བློ་དཀར་སེམས་དཀར་གྱིས་མི་དམངས་ཀྱི་ཁེ་ཕན་དང་འདོད་བློའི་ཚབ་བྱས་ནས་མི་དམངས་ཀྱི་ཁྲོད་ནས་ཡོང་བ་དང་མི་དམངས་ཁྲོད་དུ་གཞི་ཚུགས་པའི་ཁྱད་ཆོས་ཀྱི་ལེགས་ཆ་འདོན་སྤེལ་གང་ལེགས་བྱས་ཏེ་ཏང་ཨུ་དང་སྲིད་གཞུང་གིས་མང་ཚོགས་དང་འབྲེལ་བ་དམ་ཟབ་བྱེད་པའི་འབྲེལ་ཟམ་ཡག་པོ་ཧུར་ཐག་བྱས་ནས་དམངས་ལ་རེ་འབོད་ཡོད་པ་དང་ང་ལ་ཨ་ལན་ཡོད་པ་བྱས་ཏེ་མི་དམངས་འཐུས་ཚོགས་ཀྱི་འཐུས་མིའི་དུས་རབས་ཀྱི་ཉམས་འགྱུར་གང་ལེགས་མངོན་པ་བྱ་དགོས།

ཕེང་ཆིང་ཧྭ་ཡིས་རིམ་ཁག་ཏང་ཨུས་མི་དམངས་འཐུས་ཚོགས་ཀྱི་ལས་དོན་ལ་ཁྱོན་ཡོངས་ནས་འགོ་ཁྲིད་བྱ་རྒྱུར་ཤུགས་སྣོན་བརྒྱབ་སྟེ་མི་དམངས་འཐུས་ཚོགས་ཀྱི་ལས་དོན་དེ་སྤྱི་ཡོངས་ཀྱི་ལས་ཀའི་བཀོད་སྒྲིག་ནང་བཞག་ནས་མི་དམངས་འཐུས་ཚོགས་དང་དེའི་རྒྱུན་ལས་ཨུ་ཡོན་ལྷན་ཁང་གིས་ཁྲིམས་ལྟར་འགན་འཁྲི་དང་དབང་ཆ་སྤྱོད་རྒྱུར་རྒྱབ་སྐྱོར་དང་འགན་ལེན་བྱ་དགོས། “སྲིད་གཞུང་། ཁྲིམས་ཁང་དང་ཞིབ་དཔྱོད་ཁང”གིས་མི་དམངས་འཐུས་ཚོགས་ལ་འགན་འཁུར་བ་དང་།མི་དམངས་འཐུས་ཚོགས་ཀྱི་ལྟ་སྐུལ་དང་ལེན་བྱེད་པའི་འདུ་ཤེས་ཇེ་དྲག་ཏུ་གཏོང་བ་དང་།ཁྲིམས་ལྟར་ལས་དོན་སྙན་སེང་ཞུ་བ།མི་དམངས་འཐུས་ཚོགས་ཀྱི་འགན་ནུས་སྒྲུབ་པར་གཞོགས་འདེགས་ཧུར་ཐག་བཅས་བྱས་ཏེ།ཁྲིམས་ལྟར་སྲིད་འཛིན་དང་།ཁྲིམས་ལྟར་ལྟ་ཞིབ།ཁྲིམས་འཛིན་དྲང་གཞག་བཅས་ཀྱི་ཆུ་ཚད་རྒྱུན་ཆད་མེད་པར་མཐོ་རུ་བཏང་ནས་མི་དམངས་འཐུས་ཚོགས་ཀྱི་འགན་ནུས་འདོན་སྤེལ་གང་ལེགས་བྱེད་པར་འགན་ལེན་ཏན་ཏིག་བྱ་དགོས།

ཚོགས་ཆེན་དེ་རྔམ་བརྗིད་ལྡན་པའི་རྒྱལ་གླུའི་ཁྲོད་རྒྱལ་ཁའི་ངང་གྲོལ་བ་རེད།

ཀྲུང་གུང་སི་ཁྲོན་ཞིང་ཏང་ཨུ་དང་ཞིང་ཆེན་མི་དམངས་སྲིད་གཞུང་།ཞིང་ཆེན་སྲིད་གྲོས།ཞིང་ཆེན་ཁྲིམས་ཁང་།ཞིང་ཆེན་ཞིབ་དཔྱོད་ཁང་།སི་ཁྲོན་དུ་བཅའ་སྡོད་བྱེད་མཁན་གྱི་དཔུང་སྡེའི་འབྲེལ་ཡོད་འགོ་ཁྲིད།འབྲེལ་ཡོད་ཕྱོགས་ཁག་གི་འཐུས་མི་སོགས་མཇུག་བསྒྲིལ་གྲོས་ཚོགས་སུ་ཞུགས་པ་རེད།།

ཡེ་མགོན་གྱིས་བསྒྱུར།