དེ་ནས་སྤུར་རྒྱལ་བོད་ཀྱི་བཙན་པོའི་རྒྱལ་རབས་ཀྱི་སྐོར་དང་།རྒྱལ་མོ་རོང་གི་ལོ་རྒྱུས་ཀྱི་སྐོར།རྒྱལ་རོང་གི་སྐད་ཡིག་གི་སྐོར།རྒྱལ་རོང་དུ་བོན་ལུགས་དང་ནང་བསྟན་ཆོས་ལུགས་དར་ཚུལ་གྱི་སྐོར།རྒྱལ་རོང་དུ་མཁས་ཆེན་དང་མི་ཆེན་མང་པོ་བྱུང་བའི་སྐོར།རྒྱལ་རོང་གི་ས་གཤིན་ཡུལ་ཁམས་ཀྱི་སྐོར་ནི་ལོགས་སུ་བྲིས་ཡོད་པས་འདིར་རྒྱས་པར་མི་སྤྲོའོ།། གང་ལྟར་གདོང་དམར་བོད་ཀྱི་རུས་རྒྱུད་བསྙོན་དུ་མེད་པ་ཤར་རྒྱལ་མོ་རོང་གི་མི་རྣམས་ནི་ལས་ལ་བརྩོན་ཞིང་ཁྲེལ་གཞུང་ལྡན་པ་དང་།བློ་རིག་རྣོ་ལ་དཔའ་ངར་ཆེ་བས་རྒྱལ་ཡོངས་སུ་སྙན་པའི་གྲགས་པ་འབར།ཁོ་ཚོས་ལོ་རྒྱུས་འཕེལ་རིམ་ནང་དུ་མདོ་དབུས་ཁམས་གསུམ་དུ་གནས་པའི་རང་རིགས་མི་དམངས་དང་ཆབས་ཅིག་འོད་སྟོང་འབར་བའི་བོད་ཀྱི་ཤེས་རིག་གསར་སྐྲུན་དང་འཕེལ་རྒྱས་ཀྱི་བརྒྱུད་རིམ་ཁྲོད་དུ་བྱས་རྗེས་གསུབ་ཏུ་མེད་པ་བཞག་ཡོད་པར་མ་ཟད།ཐུན་མོང་མ་ཡིན་པའི་ས་ཁུལ་རང་བཞིན་གྱི་རིག་གནས་ཀྱང་བསྐྲུན་ཡོད་ལ།ཁྱད་པར་དུ་རྒྱལ་རོང་བོད་མི་ཚོས་ལོ་རྒྱུས་ཐོག་ཏུ་རང་རྒྱལ་སྤུན་ཟླ་མི་རིགས་གཞན་དག་དང་དཔུང་གདང་མཉམ་སྦྲེལ་གྱི་སྒོ་ནས་བཀས་བཀོད་རྒྱུད་འཛིན་གོང་མའི་ལམ་ལུགས་ལ་ངོ་རྒོལ་དང་།མེས་རྒྱལ་མཐའ་མཚམས་སྲུང་སྐྱོབ་བྱེད་པའི་ཆེད་དུ།ཤར་ཕྱོགས་ཞི་བདེ་རྒྱ་མཚོའི་ཆེན་པོའི་བས་མཐའ་དང་།ནུབ་ཕྱོགས་བལ་པོའི་ས་མཚམས་སུ་མ་རུང་ཕྱི་དགྲའི་བཙན་འཛུལ་འགོག་རྒོལ་དུ་བསྐྱོད་དེ་དཔའ་ངར་ཆེར་བསྐྱེད་དང་རང་སྲོག་ཕལ་བསྡོས་ཀྱིས་དགྲ་བོར་རྡུང་རྡེག་བྱས་ཏེ།ཁེངས་དྲེགས་རང་རློམ་ཅན་གྱི་སྡང་དགྲའི་སྙིང་རྩ་འདར་བར་བྱས་ཤིང་།དཔའ་མཛངས་རྟུལ་ཕོད་ཀྱི་སྙན་པ་དབྱར་གྱི་རྔ་གསང་བཞིན་དུ་འཛིན་མའི་ཁྱོན་ཀུན་ལྡིར་ཏེ།རྡོ་རིང་པཎྡིཏའི་རྣམ་ཐར་ལས།༼རྒྱལ་མོ་རོང་པའི་དཔོན་དམག་རྣམས་དཔུང་བུ་ཆུང་གི་ཚུལ་དུ་རྐང་འགྲོས་ལ་རྟ་ལས་ཀྱང་མགྱོགས་པར་བསྐྱོད་དེ་ཕས་རྒོལ་རི་ནགས་སུ་བྲོས་པ་རྣམས་ལ་ཐག་རིང་བར་མེ་མདའ་དང་།ཉེ་བར་རལ་གྲིའི་འཕྲུལ་འཁོར་གྱི་སྒོ་ནས་གོར་དམག་ས་སྲུང་པ་རྣམས་ཚང་མ་མཚན་འགེབས་ཀྱི་བཅོམ་ཐོག་སྐྱིད་གྲོང་རྫོང་སྲུང་དུ་ཡོད་པའི་གོར་དཔུང་རྣམས་ལའང་སྤྱང་ཀིས་ལུག་ཁྱུ་མཐོང་བ་ལྟར།རྫོང་འཚངས་བྱས་ཏེ་རེ་གཉིས་ཙམ་བྲོས་ནས་ཐར་བ་ལས།དེ་བྱིངས་ཚང་མ་གཏན་བརླག་ཏུ་བཅོམ་སྟེ་གཡུལ་ལས་རྣམ་པར་རྒྱལ་བའི་དཔའ་རྟགས་ཀྱི་རུ་མཚོན་སྲིད་རྩེར་བསྒྲེངས།༽ཞེས་དང་།༼རི་བོང་སྟེང་དུ་བྱ་ལྡིང་བའམ།ལུ་གུར་སྤྱང་ཀིས་ཇི་བཞིན་གོར་དམག་རྣམས།ཤེ་མོང་བཙན་པོས་ཕ་མཐར་སྐྲོད་པ་ལ།།སོ་ལོང་སྦ་དུར་རྒྱལ་རོང་དཔུང་ཚོགས་དཔའ།༽ཞེས་བྱུང་ངོ་།།ཁ་རྒྱུན་དུའང༼མདོའི་ཉྭ་ནག་གིས།ཕུ་ཡི་གོར་ཁ་བཟློག༽ཅེས་དྲང་བདེན་ཉམ་ཆུང་གིས་ཁེངས་དྲེགས་སྟོབས་ལྡན་དགྲ་བོ་ཆམ་ལ་ཕབ་སྲིད་པའི་གཏན་ཚིག་དེ།གནའ་མི་བོད་ཀྱི་གཏམ་དཔེར་ཆགས། མེས་རྒྱལ་འཛུགས་སྐྲུན་གྱི་བྱ་བཞག་རླབས་པོ་ཆེའི་ཁྲོད་དུ་འང་།ཁོ་ཚོས་བློ་རྩལ་དང་ནུས་ཤུགས་ཡོད་རྒུ་སྐྱེས་སུ་ཕུལ་ཏེ་གྲུབ་འབྲས་གཟེངས་སུ་ཐོན་པ་བླངས།
ཉེ་བའི་ལོ་བཅུ་ཕྲག་དུ་མར་ཏང་དང་སྲིད་གཞུང་གི་ཡང་དག་པའི་འགོ་ཁྲིད་འོག་ཚན་རིག་དང་མཐུན་པར་བོད་ཁུལ་འཕེལ་རྒྱས་གཏོང་བའི་ལྟ་བ་ལག་ལེན་དང་དོན་འཁྱོལ་བྱས་ཏེ་དངོས་པོའི་དཔལ་འབྱོར་ཐད་མཆོངས་སྐྱོད་ལྟ་བུའི་འཕེལ་རྒྱས་ཆེན་པོ་བྱུང་བས།དམངས་ཚོགས་ཀྱི་འཚོ་གནས་ཀྱང་སྔར་བྱུང་མ་མྱོང་བར་ཇེ་ལེགས་སུ་གྱུར།
 གནས་ཚུལ་བཟང་པོ་འདི་འདྲའི་འོག་ཏུ་ང་ཚོས་མདུན་དུ་ལྷག་པའི་ཁ་ཚ་དགོས་གཏུགས་ཀྱི་ལས་འགན་ཞིག་ནི།མེས་པོ་གོང་མ་རྣམས་ཀྱི་བློ་གྲོས་ཡོད་རྒུ་བཏོན་ནས་གྲུབ་པའི་མཛད་རྗེས།དངོས་པོ་མ་ཡིན་པའི་ཕུལ་བྱུང་རིག་གནས་ཤུལ་བཞག་རྣམས་རྒྱུད་འཛིན་ལེགས་པོ་བྱས་པའི་རྨང་གཞིའི་ཐོག བོད་རང་ཉིད་ཀྱི་རིག་གནས་མ་བརླག་པའི་སྒོ་ནས་དེང་གི་རིག་གནས་གསར་པ་སློབ་སྦྱོང་བྱ་རྒྱུ་ཡིན་ནམ།ཡང་ན་རང་ཉིད་ཀྱི་རིག་གནས་དང་སྐད་དང་ཡི་གེ་ལ་སོགས་པ་ཐམས་ཅད་ཐུར་དུ་དབྱུག་ནས།གཞན་ཁོ་ན་ལ་རེ་བ་བྱ་རྒྱུ་ཡིན་ནམ།འདི་ནི་དངོས་གནས་མིག་ལ་ཕོགས་ཤིང་།སྣ་ལ་འཕྲད་པའི་གནད་དོན་ཞིག་ཡིན་པར་སྙམ། ཉེ་ཆར་རང་རིགས་ཀྱི་གཞོན་རབས་ལས་བྱེད་པ་རེ་གཉིས་ཀྱིས་རང་ཉིད་ཀྱི་རང་གི་ཡི་གེ་བོད་ཡིག་མི་ཤེས་པ་རྒྱུ་མཚན་དུ་བྱས་ནས་ང་ཚོ་རྒྱལ་རོང་བ་ལ་སྐད་ཡོད་པ་མ་གཏོགས་ཡི་གེ་མེད།ཅེས་བརྙན་འཕྲིན་གྱི་ཐོག་ནས་ཁྱབ་བསྒྲགས་བྱས་པ་ཐོས།དེ་ལྟར་ན་ད་དུང་ལོ་བཅུ་ཕྲག་དུ་མ་སོང་རྗེས།རང་ཉིད་ཀྱིས་རང་གི་སྐད་རྒྱལ་མོ་རོང་གི་ཡུལ་སྐད་མི་ཤེས་པ་རྒྱུ་མཚན་དུ་བྱས་ནས།ང་ཚོ་རྒྱལ་རོང་བ་ལ་ཡི་གེ་མེད་ཅིང་།སྐད་ཀྱང་མེད།ཅེས་ཟེར་ཉེན་གདའོ།།
དེས་ན་མིག་སྔར་གྱི་གནས་ཚུལ་འདི་ལྟ་བུའི་འོག་ཏུ།ང་ཚོས་རང་རིགས་དང་རང་ཡུལ་གྱི་ཕུལ་བྱུང་རིག་གནས་མྱུར་སྐྱོབ་རྒྱུན་འཛིན་བྱེད་པ་དང་།དུས་མཚུངས་སུ་འགྲོ་བ་མིའི་རིགས་ཀྱི་གསར་དར་ཚན་རིག་ལག་རྩལ་རྣམས་སློབ་སྦྱོང་བྱེད་མཁས་པོའི་སྒོ་ནས་ནང་འདྲེན་བྱས་ཏེ།བོད་ཀྱི་ཤེས་རིག་གམ་བོད་ཀྱི་རིག་པ་ཞེས་པ་དེ་ཉིད་དགེ་མཚན་ལྡན་པའི་རིག་གནས་ཀུན་འདུས་ཀྱི་ཆེས་ཕུན་སུམ་ཚོགས་པ་ཞིག་ཏུ་འཕེལ་རྒྱས་གཏོང་ཐུབ་དང་མི་ཐུབ་ཀྱི་གནད་དོན་འདི་ནི།ང་ཚོ་མི་རབས་འདིས་ཐག་གཅོད་དགོས་པའི་ལོ་རྒྱུས་ཀྱི་ལས་འགན་ཞིག་ཏུ་རེད་སྙམ་པ་ལགས།
གོང་གསལ་གྱི་གནད་དོན་འདི་དག་ནི་རྒྱལ་རོང་ཞིབ་འཇུག་ལ་ཐུགས་ཁུར་ཆེ་བཞེས་གནང་མཁན་གྱི་མཁས་དབང་རྣམས་ལ་དཔྱད་གཞིའི་ཚུལ་དུ་ཞུས་པ་ཡིན་པས་མཁྱེན་ལྡན་གཟུ་བོར་བཞུགས་པ་རྣམས་ཀྱིས་ཐུགས་བརྩེ་བའི་སྒོ་ནས་དགེ་སྐྱོན་ཡོ་བསྲང་གི་དགོངས་འཆར་ལྷུག་པོར་གནང་བར་ཞུ།ཞེས་གསོལ་ལོ།།