དེ་ཡང་འདིར་གཅིག་གྱུར་གྱི་བོད་ཆེན་པོའི་རྒྱལ་ཁབ་མ་ཚུགས་གོང་ལ་བོད་ཡུལ་ན་གནས་པའི་རྒྱལ་ཕྲན་ཟུར་བ་འགའ་ཞིག་གི་ཚུལ་ཇི་ལྟར་ཡིན་པ་ཅུང་ཟད་གླེང་ན།སྔོན་ཆད་རྒྱའི་གནའ་རབས་ཀྱི་ཡིག་ཆ་དང་ལོ་རྒྱུས་རྣམས་སུ་མདོ་དབུས་མཐོ་སྒང་གི་གནའ་བོའི་རིགས་རྒྱུད་དག་ལ་སྤྱི་མིང་དུ་ཆྰང་ཞེས་འབོད་སྲོལ་དར་ལ།དེ་ལས་འཕྲོས་ཏེ་མདོ་དབུས་ཡུལ་གྲུ་ཀུན་གྱི་བོད་མིའི་འཚོ་བ་དང་མི་སྡེ་རྣམས་ལའང་ཆྰང་གི་ཚོ་བ་དང་ཆྰང་གི་མི་སྡེ་ཞེས་ཆྰང་བྱ་བའི་ཐ་སྙད་ཁོ་ནས་སྦྱར་ཞིང་།ཐ་ན་བོད་ཆེན་པོའི་སྲོག་ཤིང་ལྟ་བུའི་ཡར་ཀླུང་གི་སྤུར་རྒྱལ་ཚོ་བ་ལའང་བྷོད་ཆྰང་ཞེས་འབོད་བཞིན་མཆིས་པས།རྒྱ་རིགས་མཁས་པ་ཚང་མས་བོད་ཀྱི་རིགས་རྒྱུད་ནི་ཆྰང་ལས་ལོགས་སུ་བཀར་བ་ལྟ་བུ་ཞིག་སྒྲོག་བཞིན་འདུག་པ་ལ།རང་རེའི་མཁས་པ་མང་བོ་ཞིག་གིས་འདོད་པ་དེར་མི་འཐད་པའི་རྣམ་འགྱུར་འཛིན་ཡང་རིག་གཞུང་ཐད་དགག་གཞག་གི་སྤྲོས་པ་བཀོད་ཡོད་པ་ད་སྔ་ཉུང་བས།དེ་ཡང་མཐའ་གཅིག་ཏུ་སྙན་ལ་གཟོན་དགོས་པའི་རྒྱུ་མཚན་ཆེར་མི་ལྡན་སྙམ་སྟེ།དེ་ལ་ང་ཚོས་འདིར་བསམ་བློ་ཅུང་ཟད་ཅིག་བཏང་ན་བློ་ངོར་འབབ་ཐུབ་པའི་གནས་ལུགས་ཤིག་ཀྱང་ཡོད་སྲིད།སྤྱིར་མི་རིགས་གང་དང་གང་ཡིན་རུང་ཕལ་ཆེ་བར་རང་གིས་འཛིན་པའི་མིང་དང་གཞན་གྱིས་འབོད་པའི་མིང་སྟེ་རིགས་གཉིས་མཆིས་ཤིང་།ཕྱི་མ་ལའང་རིགས་སོ་སོར་རང་རང་གི་འབོད་སྲོལ་མི་གཅིག་པ་སྣ་ཚོགས་ཤིག་ཡོད་པ་བཞིན་དུ་འདིར་ཆྰང་ཞེས་པའང་རྒྱའི་སྔ་རབས་ཡིག་ཚང་དུ་གནའ་བོའི་བོད་མི་སྤྱིའི་ཡབ་མེས་ལ་འབོད་པའི་མིང་ཞིག་ཏུ་གྲུབ་པ་ཙམ་ལས་བོད་རང་གིས་འཛིན་པའི་སྤྱི་མིང་ནི་མ་ཡིན།དེའང་ཐོག་མར་སྔོན་ཐོས་གཙོར་བཟུང་གི་ཚུལ་དུ་རྒྱའི་ཡི་གེར་བཀོད་པ་ཁོ་ནར་བརྟག་དཔྱད་མི་བྱེད་པ།ཆྰང་བྱ་བ་ཅི་ཞིག་ཡིན་པ་བཅས་ཀྱི་ཐད་དུ་བརྟག་ཅིང་དཔྱད་པས་ན།ད་གཟོད་ཆྰང་དང་བོད་བར་གྱི་འབྲེལ་བ་དང་མིང་འདིའི་གདོད་མའི་རྣམ་པ་ལེགས་པར་རྟོགས་ནུས་སྙམ།ཡིན་ན་ཡང་ད་སྔ་རང་རེ་བོད་ཀྱི་དེབ་ཐེར་རྣམས་སུ་ཆྰང་བྱ་བའི་ཐ་སྙད་དང་དེའི་གོ་དོན་ནམ་རྒྱུ་མཚན་སོགས་བཀོད་པ་གསལ་བོ་ཞིག་མ་མཐོང་བས་འདིར་ཁུངས་བཙན་ཞིག་འགོད་པར་མི་ནུས་མོད།འོན་ཀྱང་ཕྱིས་ཀྱི་མཁས་པ་དང་དེང་གི་དཔྱོད་ལྡན་ལ་ལས་གནད་དོན་འདི་ལ་བསམ་གཞིགས་བགྱིས་ཡོད་པར་གཞི་བྱས་ཏེ་བརྟགས་ན།འགའ་ཞིག་གིས་ཆྰང་བྱ་བ་ནི་ཕྱོགས་ཀྱི་ཆ་ནས་བོད་སྐད་ཀྱི་བྱང་ཞེས་པའི་སྒྲ་ལས་བྱུང་བར་འདོད་ཀྱང་དེ་ནི་རིག་འདེད་ཙམ་དུ་ཟད་པས་དཔྱད་རིན་མེད་ཅིང་།ཡང་ཁ་ཤས་ཀྱིས་བོད་སྐད་ཀྱི་སྤྱང་ཟེར་བའི་སྒྲ་བསྒྱུར་ཡིན་པ་དང་།སྔོན་དུས་མ་སྤྱངས་སྤུན་དགུ་ཟེར་བ་ཕྱིས་སུ་མ་སངས་སུ་གྱུར་པའི་གོ་རིམ་སོགས་ཀྱི་སྒྲུབ་བྱེད་དུ་བཀོད་ཡོད་པ་མཐོང་ཞིང་།དེ་ཡང་རྒྱུ་མཚན་མེད་པ་ཞིག་མིན་ཏེ།སུམ་པ་ཆོས་འབྱུང་དུ་མདོ་སྨད་བསང་ཆུ་ལ་སྤྱང་ཆུ་དང་བསང་ཁོག་ལ་སྤྱང་ཁོག་ཞེས་བཀོད་པ་བཞིན་ནོ།  ཡང་ལ་ལས་ཆྰང་བྱ་བ་བོད་ཀྱི་ཁྲོམ་ཞེས་པའི་དོན་ཡིན་པ་དང་།རྒྱུ་མཚན་ནི་སྔོན་ཆད་བོད་ཀྱི་རུས་རྒྱུད་ཚོ་ཁག་རེ་རེར་བླ་ཟོག་བཀུར་བའི་སྲོལ་ཡོད་པ་བཞིན་བོད་རང་གི་རུས་ཆེན་པོའི་ཡ་གྱལ་སྒ་ལྡོང་གི་རིགས་ཀྱི་བླ་ཟོག་ནི་ལུག་སྟེ་ཁྲོམ་ཡིན་པར་བཤད་ལ།དེའང་སྔོན་བརྡ་རྙིང་ལ་ཁྱོམ་ཞེས་བཀླགས་པས་དེ་ལས་སྒྲ་མཆེད་པར་འདོད་ཅིང་།དེར་མ་ཟད་རྒྱ་ཡིག་ཏུ་ཆྰང་གི་གོ་དོན་ཡང་ནུབ་ཕྱོགས་ཀྱི་ལུག་འཚོ་བའི་རིགས་ཞེས་དང་།དེ་མིན་ཆྰང་ཞེས་པའི་རྒྱའི་གནའ་བོའི་དཔེ་རིས་ཅན་གྱི་ཡི་གེའི་གཟུགས་ཀྱང་མིའི་མགོ་ན་ལུག་ཡོད་པ་ལྟ་བའི་དབྱིབས་བྲིས་ཡོད་ཚུལ་བཅས་སྒྲུབ་བྱེད་དུ་བཀོད་པ་དང་།ཡང་ཐང་ཡིག་གསར་རྙིང་དུ་ཐད་ཀར་འཇང་ཞེས་བསྒྱུར་བ་སོགས་མཁས་པ་དང་དཔྱོད་ལྡན་སོ་སོར་བཞེད་ལུགས་མི་མཐུན་པ་སྣ་ཚོགས་འབྱུང་ཡང་།རྩ་བའི་འདོད་ཚུལ་ནི་ཆྰང་བྱ་བའི་མིང་འདི་བོད་སྐད་ཀྱི་སྒྲ་གང་རུང་ཞིག་ལས་བྱུང་བར་བསམས་པ་དེ་གཅིག་མཐུན་དུ་སྣང་།དེ་ཡང་མཁས་པས་བཤད་ན་ཅི་ཡང་བདེན་ཞེས་པའི་རྗེས་སུ་འགྲོ་ནའང་།གང་ལྟར་ཆྰང་ཞེས་པའི་མིང་དེ་བོད་གནའ་བོའི་སྐད་གང་རུང་ཞིག་ལས་ཟུར་ཆག་སྟེ་བྱུང་བ་ནི་གདོན་མི་ཟ་ཞིང་།སྒོས་སུ་མིང་འདི་ཡང་ཐོག་མར་རྒྱ་རིགས་དང་ཉེ་བ་མདོ་སྨད་གཙོས་པའི་ཡུལ་སྡེའམ་ཚོ་བ་ངེས་ཅན་ཞིག་གི་མིང་ལས་བྱུང་སྟེ་ཁྱབ་ཇེ་ཆེར་སོང་བས་སྤྱི་མིང་དུ་ཐོགས་པར་སེམས་སོ། དེ་བཞིན་སྔོན་ཆད་མི་མང་བོ་ཞིག་གིས་གནའ་དུས་མདོ་དབུས་མཐོ་སྒང་དུ་མིའི་འགྲོ་མེད་པར་བསམས་པའི་ལུགས་ལྟར་བོད་རིགས་ནི་ཆྰང་ལས་ཆད་པ་དང་བོད་ཁུངས་ཆྰང་རིགས་ཡིན་འདོད་པའི་བཤད་རྒྱུན་དེ་ཅུང་ཟད་ཁྱབ་ཆེ་ནའང་།དེ་ལ་དེང་སང་ཚན་རིག་གི་བརྟག་དཔྱད་དང་སྒོས་སུ་གནའ་བརྟག་སློག་འདོན་གྱི་སྟེང་ནས་མདོ་དབུས་མཐོ་སྒང་དུ་དུས་སྔ་མོ་ཞིག་ནས་མིའི་འགྲོ་བ་ཡོད་པའི་དཔང་རྟགས་བསྙོན་མེད་པར་ར་སྤྲོད་བྱུང་བ་ནས་བཟུང་།ད་ལྟ་སྔར་གྱི་བོད་ཁུངས་ཆྰང་ཡིན་པར་འདོད་པའི་ལུགས་དེ་མགོ་མཇུག་ལྡོག་དགོས་པའི་འོས་ལ་བབས་ཤིང་།མདོ་དབུས་མཐོ་སྒང་གི་ཡུལ་མི་ནི་བོད་ཡིན་པ་མ་ཟད་ཆྰང་ཁུངས་ཀྱང་བོད་སྤྱིའི་རྒྱུད་ལ་ཐུག་པའི་ལྟ་བ་དེ་འཛིན་དགོས་སྙམ།དེ་ལྟར་ཆྰང་བྱ་བ་ནི་རྒྱས་བོད་མིའི་ཆ་ཤས་ཀྱི་མིང་ནས་སྤྱི་མིང་ལ་འདོད་པ་དེའང་རྒྱ་ལ་མཚོན་ན་བོད་ལ་ཆྰང་ཞེས་འབོད་སྲོལ་སྔ་བ་ཙམ་གྱིས་མ་དག་རྒྱུད་འབྱམས་སུ་གྲགས་པར་མངོན།དེ་ལྟར་གོང་གི་འདི་ལྟ་བུའི་མིང་རང་ངོས་ནས་འབྱུང་ཁུངས་ཀྱི་ཁྱད་པར་མེད་པ་དང་།བོད་རིགས་ནི་རང་ས་ནས་བྱུང་འཕེལ་ཡོང་བ་བཅས་པའི་རྒྱུ་མཚན་གྱི་སྒོ་ནས་ཆྰང་བྱ་བ་དེ་མི་རིགས་གཞན་ཞིག་ལ་གོ་བ་དང་བོད་ནི་དེའི་ནང་གསེས་ཀྱི་གྲུབ་ཆ་ལྟ་བུར་རྩི་བ་ནི་སྔ་ལབ་རྗེས་འབྲང་གི་ལུགས་ཙམ་དུ་ཟད་དོ།།
  སྤྱིར་དེ་དག་ཀྱང་མིང་གི་འདོགས་ལུགས་ཀྱི་དབྱེ་བ་ཙམ་མ་གཏོགས་གདགས་གཞི་གཅིག་ཡིན་པ་དང་།དེས་མི་ཚད་མིང་དེ་ཡང་རྒྱ་ཡིས་ཚུར་བཏགས་པ་ཞིག་ཡིན་པ་བཅས་ཀྱི་དབྱེ་བ་ལེགས་པར་རྟོགས་ཚེ།གཞི་ནས་ཆྰང་ལ་བརྟག་དཔྱད་བྱ་བའི་སྡོམ་ཚིག་དེ་ལུགས་དང་མཐུན་པ་ཞིག་བཟོ་ཐུབ་ཅིང་།དེ་ལྟར་གནའ་སྔ་མོར་མདོ་དབུས་མཐོ་སྒང་གི་ཡུལ་མི་ལ་བོད་ཅེས་མི་འབོད་ཀྱང་ཡུལ་འདི་བོད་མིའི་མིན་ཟེར་མཁན་སུ་ཞི་ཡོད།འདི་ནི་ངོ་སྤྲོད་ཀྱི་ཚུལ་དུ་སྨྲས་པ་ཙམ་ལས་ཆྰང་གི་སྐོར་རྒྱས་པ་ཟུར་དུ་འབྲི་འོས་པས་མང་བོ་འབྲི་བར་མི་སྤྲོས་སོ།། དེ་ཡང་འདིར་རྩ་བའི་འབྱུང་ཁུངས་དང་ཁྱབ་ཁོངས་དབྱེ་བ་བཅས་ཀྱི་གནས་ཚུལ་ཤེས་ན་དེར་རྒྱས་ཆྰང་གི་ནང་ཚན་དུ་བཤད་པའི་ཚོ་བ་ཁག་ཀྱང་ངོས་འཛིན་དང་གོ་བ་ལེན་ཐུབ་ལ།དཔེར་ན་སྔོན་གྱི་རོང་ཆྰང་དང་སྡེ་ཆྰང་ངམ་ལྡོང་ཆྰང་བྱ་བ་སོགས་ནི་བོད་ཀྱི་གནའི་ཚོ་བ་ཁོ་ན་ལགས་ཤིང་།ཡང་ཕྱིས་ཀྱི་སུམ་པ་དང་ཞང་ཞུང་སོགས་ཀྱང་རྒྱ་ཡིག་ཏུ་ཆྰང་གི་ཁོངས་སུ་འདྲེན་པའི་རྒྱུ་མཚན་ཡང་གནད་དེ་དག་ལ་ཐུག་ཡོད་པ་ཤེས་པར་བྱ་ལ།དེ་མིན་དེང་སང་རང་རྒྱལ་ན་ཆྰང་རིགས་ཞེས་པ་དང་བོད་སྐད་དུ་འཇང་བྱ་བ་ནྰ་ཞིས་རིགས་སུ་འབོད་པ་རྣམས་ནི་སྐབས་བབ་གནའི་རྒྱ་ཡིག་གི་ཆྰང་དང་ཁྱད་པར་ཆེ་ལ་དབྱེ་བའང་དུ་མ་ཡོད་པ་ཤེས་སོ།མདོར་ན་ཆྰང་བོད་བར་གྱི་འབྲེལ་བ་ནི་མིང་གི་འབོད་ལུགས་ཀྱི་དབང་གིས་མ་གཏོགས་བོད་ཁུངས་ཆྰང་མ་ཡིན་ཏེ་ཆྰང་ཁུངས་བོད་（གནའ་བོའི་བོད་མི）ཡིན་པར་འདོད་དོ།།