བཙན་པོ་འདི་བའི་སྐུ་དུས་སུ་བོད་རང་གི་སྲིད་འབྱོར་རིག་གསུམ་གོང་དུ་འཕེལ་བའི་དགོས་མཁོ་དང་བསྟུན་ནས་ཁྲིམས་ཡིག་གསར་དུ་བཅོས།ཐང་བོད་དབར་གྱི་མཛའ་བརྩེའི་མཐུན་ལམ་གོང་དུ་སྤེལ།བྱེ་སྲང་ཞོ་སོགས་ལ་ལེགས་བཅོས་བཏང་།ཆབ་འབངས་རྒྱ་ཆེ་སྟེ་སྔར་ཡབ་མེད་ཀྱི་སྐུ་རིང་ལ་མ་འདུས་པ་ཤར་སྐར་མ་སྨིན་དྲུག་འཆར་བའི་འོག་རྒྱ་ནག་གི་སོ་ལོན་ཤན་གྱི་རི་རྒྱུད་དར་དཀར་གྱི་ཡོལ་བ་འདྲ་བ་ལས་གཏུགས།ལྷོ་ཕྱོགས་བྲམ་ཟེའི་ཡུལ་དུ་གཏུགས།ནུབ་སྟག་གཟིག་གི་སོ་མཚམས་སྦ་སྟག་དུང་གི་སྒོ་མོ་ལ་སླེབས།བྱང་ཧོར་གྱི་སོ་མཚམས་ཕྱེ་མ་སྒང་རིང་ཉ་རྨང་མའི་རྒྱབ་འདྲ་བར་གཏུགས་པ་སོགས་གནང་བབ་དེར་བོད་ཀྱི་ཆབ་སྲིད་དང་།དཔལ་འབྱོར།རིག་གནས།དམག་དོན་བཅས་ཕྱོགས་གང་ཐད་དབྱར་མཚོ་རྒྱས་པའི་དཔེ་བཞིན་གོང་དུ་འཕེལ་ཡོད་ཅེས་དེབ་ཐེར་ཀུན་གསལ་མེ་ལོང་དུ་འཁོད་པ་མདོར་བསྡུས་པའོ།