ཧོར་བྲག་མགོ་དཔོན་ཚང་ནི་སོག་པོའི་རྒྱལ་རྒྱུད་ཡིན་པར་ལམ་བྲག་དང་པོ་སྐལ་བཟང་རྣམ་རྒྱལ་གྱི་ཏྲེ་ཧོར་ལོ་རྒྱུས་སོགས་སུ་བཤད། སོག་པོའི་རྒྱལ་པོ་དག་བོད་ཀྱི་ལྷ་བཙན་པོ་གྲི་གུམ་བཙན་པོའི་སྲས་གསུམ་གྱི་ཆུང་བ་ཉ་ཁྲིའི་རིགས་རྒྱུད་ཡིན་པར་ཧོར་གྱི་ཆོས་འབྱུང་དང་། སོག་པོའི་དེབ་ཐེར་སྔོན་པོ། གསེར་གྱི་རྒྱལ་རབས། དེབ་ཐེར་མེས་པོའི་ཞལ་ལུང་། བོད་ཀྱི་ལོ་རྒྱུས་ཀུན་དགའི་མེ་ལོང་། དུང་དཀར་ཚིག་མཛོད་སོགས་སུ་གསལ་བར་གསུངས། ལོ་རྒྱུས་སྨྲ་བ་འགའ་རེས་ཏུན་ཧོང་གཏེར་ཡིག་སོགས་སུ་གྲི་གུམ་བཙན་པོ་ལ་སྲས་གཉིས་ལས་ཡོད་པར་མ་བཤད་པས་སོག་པོའི་དཔོན་རིགས་རྣམས་བོད་བཙན་པོའི་གདུང་རྒྱུད་ཡིན་པར་བཤད་པ་ལ་རྒྱུ་མཚན་མི་འདུག་ཟེར་མོད། ལྷ་བཙན་པོའི་བཀའ་ཆེམས་ཀ་ཁོལ་མ། ཚལ་པའི་དེབ་ཐེར་དམར་པོ། བུ་སྟོན་ཆོས་འབྱུང་། རྒྱལ་རབས་གསལ་བའི་མེ་ལོང་། ཆོས་འབྱུང་མཁས་པའི་དགའ་སྟོན། རྒྱ་བོད་ཡིག་ཚང་མཁས་པ་དགའ་བྱེད། གུ་གེ་མཁན་ཆེན་ངག་དབང་གྲགས་པས་མཛད་པའི་མངའ་རིས་རྒྱལ་རབས། ཡར་ལུང་ཇོ་བོ་ཤཱཀྱ་རིན་ཆེན་གྱིས་མཛད་པའི་ཆོས་འབྱུང་། ལྡེའུ་ཆོས་འབྱུང་། མངའ་བདག་ཉང་གི་ཆོས་འབྱུང་། ཧོར་ཆོས་འབྱུང་སོགས་ལོ་རྒྱུས་ཡིག་ཆ་རྙིང་བ་དུ་མ་ཞིག་ཏུ་གྲི་གུམ་བཙན་པོ་ལ་སྲས་ཤ་ཁྲི། བྱ་ཁྲི། ཉ་ཁྲི་གསུམ་ཡོད་པར་དངོས་སུ་གསུངས་འདུག་པས་རྒྱུ་མཚན་ཡོད་པར་འཛིན་ཏོ།།

     དེས་ན་དང་པོ་བོད་ཀྱི་རྒྱལ་པོ་ཐོག་མ་གཉའ་ཁྲི་བཙན་པོ། དེའི་སྲས་མུ་ཁྲི་བཙན་པོ། དེའི་སྲས་དིང་ཁྲི་བཙན་པོ། དེའི་སྲས་སོ་ཁྲི་བཙན་པོ། དེའི་སྲས་མེར་ཁྲི་བཙན་པོ། དེའི་སྲས་གདགས་ཁྲི་བཙན་པོ། དེའི་སྲས་སྲིབ་ཁྲི་བཙན་པོ། དེའི་སྲས་གྲི་གུམ་བཙན་པོ། བོད་རྒྱལ་བརྒྱད་པ་གྲི་གུམ་བཙན་པོ་བློན་པོ་ལོ་ངམ་ཞེས་པས་བཀྲོངས་པས། རྒྱལ་སྲས་བྱ་ཁྲི། ཤ་ཁྲི། ཉ་ཁྲི་གསུམ་ཀོང་ཡུལ་དུ་བྲོས་པ་ལས། སྲས་ཆེ་བ་བྱ་ཁྲི་རྗེས་སུ་བོད་ཀྱི་རྒྱལ་སར་འཁོད་དེ་མཚན་ལ་པུ་དེ་གུང་རྒྱལ་དུ་གྲགས། སྲས་འབྲིང་བ་ཤ་ཁྲི་ཀོང་ཡུལ་དུ་བཞུགས་ནས་ཡུལ་དེའི་རྗེ་བོ་མཛད། སྲས་ཐ་ཆུང་ཉ་ཁྲིས་ཀོང་པོ་ནས་གོ་མ་རལ་ཞེས་པ་བཙུན་མོར་ཁྲིད་དེ་སོག་ཡུལ་དུ་བསྐྱོད། སྦེ་གཱལ་ཟེར་བའི་ཆུ་འགྲམ་གྱི་ཏིན་པུར་ཧན་གལ་ཏུན་ཟེར་བའི་ས་ཆའི་པེ་ཧེ་སྡེ་བའི་ནང་དུ་ཁྱིམ་གཞིས་བཟུང་། ཡུལ་དེའི་མི་སྡེ་ཐམས་ཅད་ཀྱིས་བརྩི་བཀུར་བྱས་ཤིང་རིམ་གྱིས་པེ་ཧེ་སྡེ་བའི་དཔོན་དུ་གྱུར་ཞིང་མཚན་ལ་པོར་ཏ་ཆེ་ནོ་ཟེར། དེའི་བུ་བཱ་ད་ཆི་གན། དེའི་བུ་ཐམ་ཆག དེའི་བུ་ཆི་ཇི་མེར་གན། དེའི་བུ་ ལའུ་ཇང་བྷེ་རེ་འོལ། དེའི་བུ་པས་ཀ་ནི་དུན། དེའི་བུ་སེམས་ཟའུ་ཇི། དེའི་བུ་ཁ་ཇི། དེའི་བུ་ ཐོ་བུ་མེར་ཁན། དེའི་ཆུང་མ་ཨ་ལན་ཁོ་ལ་ཉི་ཟླའི་ཟེར་ལས་སྐྱེས་པའི་བུ་ སྦོ་ཐོན་ཆར་མོང་ཁན། དེའི་བུ་གི་ཆུ། དེའི་བུ་སྦེ་ཁིར། དེའི་བུ་མ་ནན་ཐོ་དུ་གན། དེའི་བུ་ གི་ཐུ་གན། དེའི་བུ་བི་ཤིང་། དེའི་བུ་ཁོར་དོག་ཤིང་། དེའི་བུ་དུམ་བུ་ནི་གན། དེའི་བུ་ག་བུ་ལ་ཁན། དེའི་བུ་བར་ཐན་བ་དུར། དེའི་བུ་ཡེ་སུ་ག་བ་དུར། དེ་དང་བཙུན་མོ་ཧོ་ལུན་གཉིས་ཀྱི་སྲས་ཧོར་ཆེན་པོ་གཅིག་གྱུར་གྱི་རྒྱལ་ཁབ་འཛུགས་མཁན་སོག་ཇིང་གིར་རྒྱལ་པོ། ༼ ༡༡༦༢─༡༢༢༧༽ ༼ གོང་གི་པོར་ཏ་ཆེ་ནོ་ནས་ཇིང་གིར་བར་གྱི་མི་རབས་རྣམས་ཀྱི་མིང་སོག་སྐད་ཀྱི་མིང་བོད་ཡིག་ཏུ་བྲིས་ཕྱིར་དེབ་ཐེར་རྣམས་གཅིག་མཚུངས་ཤིག་མི་འདུག་ཀྱང་གྲངས་གཅིག་མཚུངས་ཡིན།༽

    དེའི་སྲས་བཞི་པ་རུའུ་ཙུང་ཐོ་ལེ། དེའི་སྲས་བཞི་པ་གོང་མ་སེ་ཆེན་རྒྱལ་པོ་ཧུའུ་པེ་ལེ༼ ༡༢༡༥─༡༢༩༤༽ འདིས་ཧོར་གྱི་མིང་ཡོན་རྒྱལ་རབས་སུ་བསྒྱུར་ནས་རྒྱལ་ས་སོག་ཡུལ་ནས་པེ་ཅིན་མཁར་དུ་སྤོས། ས་སྐྱའི་འགྲོ་མགོན་ཆོས་རྒྱལ་འཕགས་པ༼ ༡༢༣༥ ─༡༢༨༠༽ རྒྱ་ཡུལ་དུ་གདན་དྲངས་ནས་ཆོས་ཞུས། དེ་ཡང་སྔོན་དྲི་མེད་ཀོ་ཤའི་མཚོ་གླིང་དུ་ཙན་ཏན་ལས་རང་བྱོན་པའི་དཔལ་ལྡན་མགོན་པོའི་སྐུ་ཞིག་བཞུགས་པ་ཨོ་རྒྱན་ཆེན་པོས་གདན་དྲངས་ནས་པཎྚི་ཏ་དྷཱརྨ་པ་ལ་ལ་གནང་། དེས་ལོ་ཆེན་རིན་ཆེན་བཟང་པོ་ལ་གནང་བ་རིམ་གྱིས་དཔལ་ས་སྐྱའི་དམ་པ་རྣམས་ཀྱི་ཐུགས་དམ་གྱི་རྟེན་དུ་བཞུགས་པ་སོགས་རྟེན་གསུམ་དུ་མ་འཇམ་མགོན་ས་པཎ་གྱིས་སོག་ཡུལ་དུ་བསྣམས་ཏེ་ཕེབས་པ་སོག་རྒྱལ་གོ་དན་གྱི་མཛོད་དུ་བཞུགས། དེ་རྗེས་འགྲོ་མགོན་འཕགས་པས་ཙན་དན་གྱི་མགོན་སྐུ་རང་བྱོན་གྱིས་གཙོས་པའི་རྟེན་གསུམ་གྱི་ནང་གཟུངས་ཅན་གྱི་མགོན་ཁང་ཞིག་བཞེངས་ན་བསྟན་འགྲོ་སྤྱི་ལ་ཕན་པ་རྒྱ་ཆེན་པོ་འབྱུང་བར་དགོངས་ནས། སེ་ཆེན་རྒྱལ་པོ་ལ་ངེད་ཀྱི་བླ་མ་གོང་མས་གདན་དྲངས་པའི་རྟེན་གསུམ་རྣམས་ངེད་ལ་ཚུར་གནང་ན་དེ་དག་ནང་གཞུག་བྱས་པའི་ཆོས་སྐྱོང་གི་སྐུ་ཞིག་བཞེངས་དགོས། དེའི་སྦྱིན་བདག་ཀྱང་ཁྱེད་ཡབ་སྲས་ནས་མཛོད་གསུངས་པས་། སེ་ཆེན་གྱིས་དེ་ལྟར་ཞལ་གྱིས་བཞེས། དེར་ཁོང་གིས་ཙན་དན་གྱི་མགོན་སྐུ་རང་བྱོན་གྱི་གཙོས་རྟེན་གསུམ་རྣམས་དྲེའུ་དཀར་མོ་ཞིག་ལ་བཀལ་ཏེ། སྒ་ཨ་གཉན་དམ་པ་ཀུན་དགའ་གྲགས༼ ༡༢༢༩─༡༣༠༣༽ དང་སེ་ཆེན་གྱི་སྲས་ཝང་གི་མིང་ཅན་སྟེ་བུ་གཉིས་པ་ཀྲིན་ཅིན་ཝང （真金王1243-1285）གཉིས་ལ་གཏད་ནས་དྲེའུ་འདི་གང་དུ་ཉལ་བའི་ས་དེར་རྟེན་འདི་དག་ནང་བཞུགས་བྱས་པའི་གུར་མགོན་གྱི་སྐུ་ཞིག་བཞེངས་དགོས་གསུངས། དེར་ཁོང་རྣམ་གཉིས་འཁོར་ཚོགས་དང་བཅས་རིམ་གྱིས་ཕེབས་ནས་ཏྲེ་ཤོད་མཎྚལ་ཐང་དུ་སླེབས་ཚེ་དྲེའུ་དེ་ཉལ་ནས་ཇི་ལྟར་བྱས་ཀྱང་འགྲོ་རུ་མ་ཉན་པས་བླ་མས་ལུང་བསྟན་པའི་ས་དེ་ཡིན་པར་ཐག་བཅད་ནས་རྒྱལ་སྲས་ཝང་གིས་སྦྱིན་བདག་བྱས་ནས་དཀར་མཛེས་སྡེ་མགོན་ཁང་། ནང་རྟེན་གུར་མགོན་སྡེ་བརྒྱད་དང་བཅས་པ་རབ་བྱུང་ལྔ་པའི་ནང་དུ་གསར་བཞེངས་མཛད། སྐབས་དེར་ཏྲེ་ཤོད་སྒོམ་ཚན་གྲོང་གི་དངོས་གྲུབ་ཕུན་ཚོགས་ཞེས་པའི་དུད་ཚང་གི་བུ་མོར་རྒྱལ་སྲས་ཝང་གི་སྲས་ཤིག་འཁྲུངས་པ་ལ་ཧོར་མ་བསམ་བུ་ཟེར། དེའི་སྲས་ཧོར་ནག་འཇའ༼ ཧོར་ནོར་འཇམ་བྲིས་པ་ཡང་འདུག༽ དེའི་སྲས་ཨ་རྒྱས། དེའི་སྲས་འབུམ་དགེ་རྒྱས། དེའི་སྲས་བླ་མ་སྐྱབས། དེའི་སྲས་ནམ་མཁའ་བློ་བཟང་། དེའི་སྲས་ནམ་མཁའ་རྒྱལ་མཚན། འདིས་རྫ་ཁོག་ཡི་གོང་མན་ཆད། ན་ཐོག་སྲང་མདོ་ཡན་ཆད། རྟའུ་ཆོ་ལོ་སྣ་ཡན་ཆད། མགོ་ལོག་ལྕགས་མོ་ཚུན་ཆད་མངའ་འབངས་སུ་བསྡུས་པར་བཤད། དཔོན་འདི་ལ་བཙུན་མོ་གསུམ་ཡོད། བཙུན་མོ་རེ་རེ་ལ་སྲས་གཉིས་རེ་འཁྲུངས། བཙུན་མོ་ཆེ་བ་ལ་སྲས་དབང་ལུ་དང་། ཆོས་རྗེ་ངག་དབང་ཕུན་ཚོགས་ལྷ་དབང་ཕྱོགས་ལས་རྣམ་རྒྱལ་གཉིས། བཙུན་མོ་འབྲིང་བ་ལ་སྲས་ཨོ་ཆེན་ནོ་ཡོན་ངག་དབང་གྲགས་པ་དང་། མཁན་པོ་ངག་དབང་དཔལ་བཟང་གཉིས། བཙུན་མོ་ཆུང་བ་ལ་ཧོར་སྲས་ནོར་བུ་དང་། མཁན་པོ་བསྟན་འཛིན་གཉིས་ཏེ་སྲས་དྲུག་ཡོད། སྲས་དབང་ལུས་མ་ཟུར་དུ་དཔོན་ས་བཟུང་། ཨོ་ཆེན་ནོ་ཡོན་ཏྲེ་བོའི་དཔོན། ནོར་བུས་བྲག་འགོའི་དཔོན་བྱས་ནས་དཔོན་རྒྱུད་རིམ་པར་བྱུང་བ་ལས་ཧོར་བྲག་འགོའི་དཔོན་རབས་ནི། དཔོན་རབས་དང་པོ་ནོར་བུ། གཉིས་པ་ཡབ་ཆེན་དཀོན་མཆོག་བསམ་གྲུབ། གསུམ་པ་དྲིན་རྗེ་བདེ་བར་གཤེགས་པ་ཚེ་བརྟན་ནོར་བུ། དེའི་བུ་ཧོར་ག་གའམ་མགོན་པོ་བསམ་གྲུབ་གཡུ་ཁོག་དཔོན་མོ་བསོད་ནམས་སྒྲོན་མའི་དམག་པར་བསུས་པ་ཡིན་པར་འདུག་སྟེ། རྒྱུ་མཚན་ནི་དཔོན་ཚེ་བརྟན་ནོར་བུ་རབ་བྱུང་བཅུ་གསུམ་པའི་དཀྱིལ་སྨད་ཙམ་དུ་བྲག་མགོའི་དཔོན་ཡིན་པར་བཤད་ཅིང་། ཁྱད་པར་པཎ་ཆེན་སྐུ་ཕྲེང་བདུན་པ་དཔལ་ལྡན་ཡེ་ཤེས༼༡༧༨༡─༡༨༥༤༽ ཀྱི་རྣམ་ཐར་དུ། ཁོང་གིས་འབྲས་སྤུང་དུ་བྲག་མགོའི་དཔོན་ནོར་བུ་ལ་ཚེ་དབང་བསྐུར་ཚུལ་གསུངས། རབ་བྱུང་བཅུ་བཞི་པའི་ལྕགས་སྦྲུལ༼༡༨༢༡༽ ལོར་གཡུ་ཁོག་ཏུ་དཔོན་ཀརྨ་ཆོས་གྲགས་ཡིན་པ་དང་། ཆུ་ལུག༼༡༨༢༣༽ ལོར་མགོན་པོ་བསམ་གྲུབ་ཡིན་ཚུལ་ཁྱུང་ལུང་རས་པ་དམ་ཚིག་རྡོ་རྗེའི་རྣམ་ཐར་དུ་གསལ་བར་མ་ཟད། གཞན་ཡང་གཡུ་ཁོག་གི་རྒན་རབས་ཚོའི་ངག་རྒྱུན་དུ་གཡུ་ཁོག་དཔོན་ཚང་ལ་ཆེ་བསྟོད་ཀྱི་ཚིག་ཏུ་ཧོར་བྲག་མགོ་དགོན་གྲྭ་ཚང་སྟོང་དང་དགུ་བརྒྱའི་མངའ་བདག་དཔོན་དྲིན་རྗེ་བདེ་བར་གཤེགས་པའི་གདུང་རྒྱུད་ཡིན་ཞེས་དང་། ཧོར་དྲིན་རྗེ་བདེ་བར་གཤེགས་པས་བྲག་མགོའི་དགོན་བཞེངས་ཚུལ། དགོན་དེར་གྲྭ་ཚང་སྟོང་དང་དགུ་བརྒྱ་ཡོད་པ་ལ་ཇ་འགྱེད་བཏང་ཚུལ་སོགས་དང་ཧོར་ག་ག་ཟེར་བ་དེ་ཚང་གི་བུ་ཡིན་སོགས་བཤད་པ་དག་ཧ་ཅང་ར་འཕྲོད་པར་འདུག ཁོ་བོས་གཡུ་ཁོག་ལོ་རྒྱུས་ཀྱི་དེབ་ཐེར་དུ་ཞིབ་ཆ་མ་ཐོན་པའི་ནོར་འཁྲུལ་ཤོར་འདུག

སྤྱིར་གཡུ་ཁོག་དཔོན་ཚང་གི་མི་རྒྱུད་གྱེས་ཚུལ་ནི།

ཀརྨ་པ་སྐུ་ཕྲེང་བཅུ་པའི་དུས་གཡུ་ཁོག་དཔོན་གྱི་གདན་ཐོབ་རྟ་རྒྱུག་གི་གཏང་མར་ལེན་པའི་དཔོན་ཝ་ཤུལ་དང་། ཀརྨ་པའི་ཚ་མོ་གཉིས་ཀྱི་སྲས་ཀརྨ་དབང་ཕྱུག དེའི་བུ་ཀརྨ་དོན་གྲུབ། དེའི་ཀརྨ་ཆོས་གྲགས། ཀརྨ་ཆོས་གྲགས་ལ་བུ་མེད་ཅིང་བུ་མོ་ཞིག་ཡོད་པ་དཔོན་མོ་བསོད་ནམས་སྒྲོན་མ། དེས་ཧོར་ག་ག་དམག་པར་བསུས་པས་ཁོང་གཉིས་ལ་སྲས༼ ༡ བཙུན་པ་རིག་འཛིན་དཔལ་བཟང་། ༼ ༢ ཧོར་སྲས་བསོད་ནམས་དབང་འདུས། ༼ ༣ ཧོར་སྲས་ནམ་མཁའ་དཔལ་ཆེན། ༼ ༤ སྲས་མོ་ལྷ་ཐོ་དང་བཞི་ཡོད། ༡ རིག་འཛིན་དཔལ་བཟང་ནི་བླ་མ་རབ་བྱུང་ཞིག་ཡིན་པར་སྣང་། འདི་ལ་དཔོན་བླ་རིག་ལོ་ཡང་ཟེར།

༢ ཧོར་སྲས་བསོད་ནམས་དབང་འདུས་ལ་གཡུ་སྲས་ཀརྨ་དབང་དྲག༼ འདི་རྡོ་རྗེ་གཡུ་ཁྲོམ་གྱི་འཕྲུལ་སྲས་ཡིན་པར་གྲགས།༽ དཔོན་བླ་དགེ་འདུན་རྒྱ་མཚོ། པེ་ལོ། བསྟན་འཛིན་འོད་ཟེར་རམ་བསྟན་གཅེས། སྲས་མོ་ཀུན་བཟང་དབང་མོ། རྟ་མགྲིན་དབང་མོ་དྲུག་ཡོད། ཀརྨ་དབང་དྲག་དང་། དཔོན་བླ། སྟན་གཅེས་གསུམ་ལ་བུ་རྒྱུད་མེད། པེ་ལོ་ལ་བུ་མོ་གཅིག་ཡོད་པ་ནི་གཡུ་བཟའ་གཡུ་མཚོ། དེ་ལ་བུ་བསོད་ནམས་དབང་རྒྱལ། དར་དྲིས། བསྡུ་བ། བུ་མོ་ལྷ་གྱོ། ཀླུ་གྱོ་བཅས་ལྔ་ཡོད། ཀུན་བཟང་དབང་མོ་དང་ཁྲོ་སྐྱབས་དཔོན་གྱི་སྐུ་མཆེད་རླན་ཏེ་ལ་གཉིས་ལ་སྲས་སྐལ་བཟང་དབང་ཕྱུག༼ འདི་ལ་སྲས་སྐར་ཟེར།༽ དང་། སྲས་མོ་ཡིད་བཞིན་དབང་མོ་གཉིས། སྲས་སྐལ་བཟང་དབང་ཕྱུག་གི་བུ་བཙན་ལོ། དགྲ་ལོ། འགྱུར་མེད་ཚེ་དབང་། བུ་མོ་གཉིས་ཡོད། ཡིད་བཞིན་དབང་མོ་ལ་སྲས་གྲགས་པ་དང་། བློ་གསལ་དགའ་བ། ཚེ་འཛིན་རྡོ་རྗེ། སྲས་མོ་བློ་ཐོ་དང་བཞི། རྟ་མགྲིན་དབང་མོ་ལ་སྲས་ཨོ་རྒྱན་རྣམ་གྲོལ། དབང་ཆེན་བདུད་འདུལ། བསོད་ནམས་རྒྱལ་མཚན། སྐལ་བཟང་དབང་ཆེན༼ འདི་ལ་དཔོན་འཇིགས་ཀྱང་ཟེར༽། ལྷ་མགོན། རྣམ་དཀར་དབང་མོ།༼ འདི་ལ་མ་ལོ་དབང་མོ་ཟེར།༽ སྙན་གྲགས་སྒྲོན་མ༼ འདི་ལ་ཉན་འདྲིས་ཟེར༽། སྲས་མོ་མཁའ་སྤྱོད་དབང་མོ་བཅས་བརྒྱད་ཡོད་དོ།།

༣ ཧོར་སྲས་ནམ་མཁའ་དཔལ་ཆེན་ལ་སྲས་ཚེ་དཔལ་ནོར་བུ། གཞན་ཕན་ཉི་མ། སྲས་མོ་སྐལ་བཟང་དབང་མོ་གསུམ། སྲས་ཚེ་དཔལ་ནོར་བུ་ལ་བུ་གནམ་མཚོ་སྤྲུལ་སྐུ་འགྱུར་མེད་གཞན་ཕན། ཀོང་སྤྲུལ་པདྨ་དགྱེས་པ། ར་ཧོར་མཁན་སྤྲུལ་འཇམ་དབྱངས་དཔལ་ལྡན་སྙན་གྲགས། ཨོ་རྒྱན་དབང་ཕྱུག འཆི་མེད་གསང་འདུས། སྲས་མོ་བསོ་གཅེས་དང་དྲུག རྡོ་རྗེ་དབང་མོ་དང་བདུན་ཡོད། སྲས་གཞན་ཕན་ཉི་མ་ལ་བུ་འཆི་མེད་མགོན། པ་བཟང་། གནས་བརྟན་ཚེ་རིང་། འགྱུར་མེད་བཟང་པོ། བུ་མོ་ཆོས་པོ་དང་ལྔ། ཚེ་འཛིན་ལྷ་མོ་དང་། ཤིང་ཉག་མེ་ལོ་བཅས་བདུན་ཡོད། སྲས་མོ་སྐལ་བཟང་དབང་མོ་ལ་སྲས་གཅིག་ཡོད་པ་ཆུང་དུས་ནས་གྲོངས། དེ་ནས་མོ་རང་གིས་ཇོ་མོ་བྱས་པར་བཤད་དོ།།

༤ སྲས་མོ་ལྷ་ཐོ་ཤིང་ཉག་དཔོན་ནམ་མཁའ་བསྟན་འཛིན་གྱིས་བཙུན་མོར་བསུས་པས། བུ་རབ་ལོ། གདོར་ལོ། རིག་འཛིན་དོན་གྲུབ། བྱང་ཆུབ། བསོ་གཅེས། སྲས་མོ་བཀྲ་ཤིས་ལྷ་མོ༼ འདི་ལ་སྲས་མོ་བཀྲ་ལོ་ཟེར།༽ བཅས་ཡོད། རབ་ལོ་ལ་བུ་རྒྱུད་མེད། གདོར་ལོའི་བུ་རྒྱུད་ཤིང་ཉག་དཀོན་མཆོག་ཚེ་རིང་། ཤིང་ཉག་དགེ་ལེགས། བསོ་འཕན། སྒྲོན་སྐྱབས། ཤིང་ཕུན། བུ་མོ་ཤིང་བཀྲ་མ་སོགས་ཡོད། སྲས་མོ་བཀྲ་ཤིས་ལྷ་མོ་གེ་འཕན་ལི་རྔ་སྙན་གྲགས་ཀྱི་མནའ་མར་ཕྱིན་པ་ལ་བུ་གེ་འཕན་དགྲ་འདུལ། དགེ་ལེགས་སོགས་ཡོད། རྗེས་སུ་གེ་འཕན་ཀུན་བཟང་མཁས་གྲུབ་དང་། ལི་རྔ་བ་འགྲས་ནས་སྲས་མོ་བཀྲ་ཤིས་ལྷ་མོའི་ཁྱོ་ག་རྡིའི་བག་འཚེར་ལ་ཁ་རུ་བསད་པའི་ཤ་ལན་དུ་དགྲ་འདུལ་སོགས་ཀྱིས་ཀུན་བཟང་མཁས་གྲུབ་བསད་ནས་རྔ་སྨད་དུ་སོང་བའི་རྒྱུད་པ་དེང་སང་དེ་ཕྱོགས་སུ་ཡོད།

དེ་མན་ཆད་ཀྱི་མི་རབས་རྣམས་ནི་ཀུན་ལ་གསལ་ཕྱིར་འགོད་པར་མ་བྱས་སོ།།

རྩོམ་སྒྲིག་པ། མགར་རྒྱལ་སྲས།