བདུད་བོན་དང་བཙན་བོན་སོགས་ཀྱིས་དམར་མཆོད་བྱེད་པ་ལ་སྟོན་པ་གཤེན་རབ་མི་བོ་ཆེས་དགག་པ་མཛད་ཅིང་།དམར་མཆོད་ཀྱི་དོད་དུ་སེམས་ཅན་གྱི་གཟུགས་བརྙན་སོགས་ཀྱིས་འཐུས་པར་གནང་བའི་མདོས་དང་ཡས་སོགས་ཀྱི་སྲོལ་གསར་དུ་བཏོད་ནའང་།དེས་དམར་མཆོད་ཀྱི་རིགས་ལ་ཚོད་འཛིན་ངེས་ཅན་ཞིག་ཐེབས་ཡོད་ཀྱང་རྩ་བའི་ཆ་ནས་སྔར་བཞིན་གནས་ཡོད་པ་བོད་ཀྱི་ལོ་རྒྱུས་ཡིག་ཚང་འགའ་ལ་བལྟས་པས་ཤེས་ཐུབ།བོད་བཙན་པོའི་རྒྱལ་རབས་རིམ་གྱིས་དར་བ་དང་ཆབ་སྲིད་སོགས་ཀྱི་དགོས་མཁོའི་དབང་གིས་དམར་མཆོད་ཀྱི་རིགས་དེ་མི་དང་མིའི་བར་དང་།ཡུལ་དང་ཡུལ་གྱི་བར་དང་།རྒྱལ་ཁབ་དང་རྒྱལ་ཁབ་ཀྱི་བར་ཉི་ཟླ་སྐར་གསུམ་དང་ལྷ་སྲུང་དཔང་དུ་བཙུགས་ནས་ཕན་ཚུན་བྲོ་མནའ་བོར་སྐབས།དམར་མཆོད་ཀྱི་རིགས་འདི་མནའ་ཚིག་དང་དམ་བཅའ་ལས་མི་འགལ་བར་བྱེད་པའི་ཆོ་གའི་རིགས་དམིགས་བསལ་ཅན་ཞིག་སྟེ་ཆབ་སྲིད་དང་ཐད་ཀར་འབྲེལ་བ་ཡོད་པ་ཞིག་ཏུ་གྱུར་འདུག འདིའི་སྐོར་《ཐང་ཡིག་གསར་རྙིང་ལས་བྱུང་པའི་བོད་ཆེན་པོའི་སྲིད་ལུགས》ཞེས་པའི་ནང་རྗེ་བློན་རྣམས་ཀྱིས་ལོ་རེར་འདུན་མ་ཆུང་ངུ་རེ་བསྡུ།དེ་དུས་ལུག་ཁྱི་སྤྲེལ་གསུམ་དམར་མཆོད་བྱེད།ལོ་གསུམ་ན་འདུན་མ་ཆེ་བ་རེ་བསྡུ།མཚན་གུང་ལ་མཆོད་དངོས་རྣམས་སྟེགས་སུ་བཤམས་ཏེ།མི་རྟ་གཡག་གསུམ་དང་བོང་བུ་སོགས་དམར་མཆོད་འབུལ།སྲོག་ཆགས་དེ་དག་གི་རྐང་ལག་འབྲེག དོན་སྣོད་མདུན་དུ་སྤུངས་ཏེ་བན་དེ་ཞིག་གིས་གལ་ཏེ་འདུན་མ་དང་འགལ་ན་སྲོག་ཆགས་འདི་རྣམས་བཞིན་དུ་མི་བགྱིད་རི་ཞེས་མནའ་དོར་རོ་ཞེས་དང་།དབོན་ཞང་མོལ་བའི་རྡོ་རིང་ནུབ་ངོས་ཀྱི་ཡིག་ཕྲེང་༦༡དང་༦༦བར་འདི་ལྟར་བཀོད་ཡོད་དེ།དཀོན་མཆོག་གསུམ་དང་།འཕགས་པའི་ལྷ་རྣམས་དང་།ཉི་ཟླ་སྐར་ལ་ཡང་དཔང་དུ་གསོལ་ཏེ།ཐ་ཚིག་གི་རྣམ་པས་ཀྱང་བཤད།སྲོག་ཆགས་བསད་དེ་མནའ་ཡང་བོར་ནས།གཙིགས་བཅས་སོ།།ཞེས་འཁོད་ཡོད་པ་ལས་རྒྱལ་སྲིད་དང་འབྲེལ་བའི་ལས་བྱ་དུས་སྲོག་ཆགས་བསད་དེ་དམར་མཆོད་བྱེད་པའི་སྲོལ་ཡོད་པ་ཙམ་མ་ཟད།དམར་མཆོད་ཀྱི་སྲོལ་འདི་བོད་དུ་སངས་རྒྱས་ཆོས་ལུགས་རྒྱ་ཆེན་དར་བའི་ཆོས་རྒྱལ་མེས་དབོན་རྣམ་གསུམ་གྱི་ཡ་གྱལ་བཙན་པོ་ཁྲི་གཙུག་ལྡེ་བཙན་ཁྲི་རལ་བ་ཅན་གྱི་དུས་སུའང་དར་སོ་ཆེན་པོ་བྱུང་ཡོད་པ་རྟོགས་ཐུབ་པས།ཁྲི་རལ་གྱི་སྐབས་དམར་མཆོད་བྱེད་པ་དེ་ཐང་རྒྱལ་རབས་ཀྱི་ལུགས་སུ་བྱས་པ་མིན་ན་སྐབས་དེ་དུས་བོད་ནང་ཁུལ་དུ་བོན་ཆོས་ཀྱི་ཤུགས་རྐྱེན་གཏིང་ཟབ་པ་དང་།དེས་བོན་བཙན་པོའི་ཆབ་སྲིད་ཐད་ཕན་ནུས་མི་དམན་པ་ཞིག་ཐོན་གྱི་ཡོད་པས་བོད་ཀྱི་རྒྱལ་པོས་སྲིད་སྐྱོང་པ་ལ་སྔར་བཞིན་བོན་གྱི་འགྲོ་ལུགས་སུ་བྱེད་པ་དང་།ཆོས་དང་རིག་གནས་སྤེལ་བ་ལ་ནང་ཆོས་དར་སོ་ཆེན་པོ་བྱས་པར་འདོད། རྒྱལ་པོ་ཁྲི་སྲོལ་ལྡེ་བཙན་གྱིས་སྤྱི་ལོ༧༥༩ལོར་མལ་དྲོ་ཟུར་ཕུད་རྐྱང་བུ་ཚལ་གྱི་ཕོ་བྲང་མདུན་དུ་ཆོས་དང་བོན་གཉིས་རྩོད་གླེང་བྱེད་སྐབས་བོན་རྣམས་ཕམ།རྒྱལ་པོས་བོན་རྣམས་སྟོད་མངའ་རིས་ཞང་ཞུང་གི་ཡུལ་དུ་མཐའ་བསྐྲོད་བཏང་ཞིང་།བོན་པོའི་ཆོས་དཔེ་ཡོངས་རྫོགས་བསྡུས་ནས་ཁག་ཅིག་ཆུ་ལ་གཡུགས།ཁག་ཅིག་བསམ་ཡས་སུ་མཆོད་རྟེན་ནག་པོ་གཅིག་བཞེངས་པ་དེའི་འོག་ཏུ་མནན།མི་གསོན་པོ་དང་གཤིན་པོའི་རིམ་གྲོར་སེམས་ཅན་གསོད་པའི་དམར་མཆོད་འབུལ་མི་ཆོག་པ་དང་།སངས་རྒྱས་ཆོས་ལུགས་མ་གཏོགས་བོན་པོའི་ཆོས་བྱེད་མི་ཆོག་པའི་ཁྲིམས་བཅས་ནའང་།སྔོན་སྟོན་པ་གཤེན་རབ་ཀྱིས་དམར་མཆོད་མ་ཁོག་པ་བཞིན་རྒྱལ་པོ་ཁྲི་སྲོང་ལྡེ་བཙན་གྱིས་ཁྲིམས་ལ་བརྟེན་ཀྱང་མ་ཁོག་པའི་ཚུལ་ཁྲི་རལ་དུས་ཀྱི་རྡོ་རིང་ལས་མཐོང་ཐུབ་པས་དམར་མཆོད་ཀྱི་རིགས་འདི་ཆོས་སྲིད་གང་ལའང་སྤྱོད་ཆེ་བ་དང་དེས་སྐབས་དེའི་སྤྱི་ཚོགས་ལ་ཕན་ནུས་ངེས་ཅན་ཐོན་ཐུབ་ཀྱི་ཡོད་པ་ཤེས་ཐུབ་མོད།འདི་དུས་ནས་བཟུང་བོད་དུ་སངས་རྒྱས་ཆོས་ལུགས་ཤུགས་ཆེན་དར་བ་དང་བསྟུན་དམར་མཆོད་ཀྱིས་མཚོན་པའི་བོན་ཆོས་ཀྱི་ཆོ་གའི་རིགས་མང་པོ་ཞིག་ངང་ངམ་ཤུགས་ཀྱིས་ཉམས་ཞན་དུ་ཕྱིན་པ་ནི་དམར་མཆོད་ཀྱི་དོད་དུ་དམར་བསང་བྱུང་བའི་ལོ་རྒྱུས་དང་རིག་གནས་ཀྱི་རྒྱབ་ལྗོངས་རྣལ་མ་ཞིག་ཡིན་ལ་དམར་བསང་གི་ཁུངས་ཀྱང་འདི་ནས་བྱུང་བ་ཡིན་ནོ།།
 བཞི་བ།དམར་བསང་གི་ཁྱད་ཆོས།
ད་ལྟའི་དུས་སུ་སྤྱི་བསང་ལ་དམར་བསང་དང་དཀར་བསང་ཞེས་རིགས་ཆེ་བ་གཉིས་སུ་དབྱེ་ཆོག སྔོན་གྱི་ལོ་རྒྱུས་སོགས་ལ་གཞིགས་ན་དམར་བསང་བྱུང་སྔ་བ་དང་།དཀར་བསང་ནི་བོད་དུ་སངས་རྒྱས་ཆོས་ལུགས་དར་བའི་རྗེས་སུ་འགྱུར་ལྡོག་ཤུགས་ཆེན་བྱུང་བ་ཞིག་རེད།རྒྱལ་པོ་ཁྲི་སྲོང་ལྡེ་བཙན་གྱིས་བོན་པོའི་ཆོས་ལུགས་བསྣུབས་སྐབས་གཡང་སྒྲུབ་པ་དང་།མདོས་གླུད་གཏོང་བ།རོ་བསྲེགས་པ།ལྷ་བསང་གཏོང་བ།ཧོམ་བསྲེགས་པ་སོགས་མེད་པར་མ་བཟོས་པར་བཞག་པ་ནི་སྟོན་པ་གཤེན་རབ་མི་བོ་ཆེའི་རིང་ནས་གསར་གཏོད་དང་འཕེལ་རྒྱས་ཕྱིན་པའི་བོན་གྱི་ཆོ་ག་མང་པོ་ཞིག་བོད་རིགས་མི་དམངས་ཀྱི་མོས་ངོ་དང་མཐུན་པར་མ་ཟད་ཆོ་ག་འདི་རིགས་ཀྱིས་བོད་མི་དམངས་ཀྱི་བསམ་བློའི་བརྒྱ་ཆའི་མང་ཙམ་ཟིན་ཡོད་པའི་མཚོན་རྟགས་ཀྱང་རེད།བན་བོན་གཉིས་ཀྱི་ལྟ་སྤྱོད་གཅིག་ཏུ་བསྲེས་པའི་སྐབས་ཐོག་མའང་འདི་དུས་ནས་ཡིན་པས་དམར་བསང་ཡང་སྔོན་གྱི་དམར་མཆོད་ཀྱི་རྣམ་པ་ལས་འགྱུར་ནས་མདོས་གླུད་གཏོང་བ་དང་ལྷ་བསང་གཏོང་བ་སོགས་རང་སོར་བཞག་པའི་གོ་སྐབས་དང་འགྲོགས་ཏེ་ད་བར་གནས་ཐུབ་པ་བྱུང་པ་འདི་ཡིན།
 བོད་ཀྱི་ལོ་རྒྱུས་ཐོག་སྟོན་པ་གཤེན་རབ་ཀྱིས་དམར་མཆོད་ཀྱི་རིགས་དེ་དག་ལ་དགག་པ་མཛད་པ་དང་།གྲི་གུམ་བཙན་པོས་བོན་བསྣུབས་རྩིས་བྱས་པ།ཁྲི་སྲོང་ལྡེ་བཙན་གྱིས་ནང་ཆོས་མ་གཏོགས་བོན་ཆོས་བྱ་མི་ཆོག་པའི་ཁྲིམས་བཅས་པ་སོགས་ལོ་རྒྱུས་དོན་ཆེན་མང་པོ་བྱུང་མྱོང་ཡང་།སྔོན་དུས་བོད་རང་ས་ནས་བྱུང་བའི་ཆོས་ལུགས་ཀྱི་ཆོ་ག་དེ་རིགས་ཉམས་དམས་སུ་མ་ཕྱིན་པར་བོན་ཆོས་དང་ནང་ཆོས་ཀྱི་ཁྲག་ལམ་བརྒྱུད་ཅིང་ད་ལྟའང་དམར་བསང་ཞེས་མིག་གིས་བལྟ་རྒྱུ་དང་སྣ་ལ་སྣོམ་རྒྱུ་ཞིག་གནས་ཡོད་པ་ལས་བོད་མི་རིགས་ཀྱིས་ལྷ་ལ་དད་མོས་བྱེད་པའི་སེམས་ཁམས་དང་གོམས་སྲོལ་དེ་གནའ་དུས་ནས་བཟུང་རྩ་བ་བརྟན་པའི་བསམ་བློའི་རྒྱབ་བརྟེན་གཙོ་བོ་ཞིག་ཡིན་པ་ངེས་ཐུབ།
 དམར་བསང་ལ་དམར་གསུར་ཡང་ཟེར།དམར་བསང་ཞེས་པ་ནི་གཙོ་བོ་སེམས་ཅན་གཞན་གྱི་ཤ་ཁྲག་ལ་བརྟེན་ནས་མཆོད་འབུལ་བྱེད་པའི་བསང་གི་རིགས་ཏེ་ཕུལ་ཡུལ་ནག་ཕྱོགས་པའི་ལྷ་རྣམས་ཡིན་པར་བཤད།དཀར་ཕྱོགས་པ་དང་ནག་ཕྱོགས་པའི་ཁྱད་པར་ནི་སངས་རྒྱས་ཀྱི་བསྟན་པ་སྐྱོང་ཞིང་སེམས་ཅན་ལ་ཕན་འདོགས་མཁན་དེ་དཀར་ཕྱོགས་ཀྱི་ལྷ་དང་།དེ་ལས་ལྡོག་ན་ནག་ཕྱོགས་ཀྱི་ལྷ་ཟེར་བ་ཡང་ནང་བསྟན་བོད་དུ་དར་བའི་རྗེས་སུ་བྱུང་བའི་དབྱེ་སྲོལ་ཞིག་རེད།ཡིན་ནའང་བཤད་ཚུལ་འདི་གཅིག་ཏུ་མ་ངེས་ཏེ་སྡེ་བ་ཚོ་པའམ་མི་སྒེར་སོགས་དོན་གལ་བོ་ཆེ་ལ་ཐུག་ན་དཀར་ཕྱོགས་པར་གཏན་འཁེལ་བའི་ལྷ་སྲུང་རྣམས་ལ་དམར་བསང་གིས་བརྔན་ཞིང་སྐྱབས་གྲོགས་བཅོལ་པའི་སྲོལ་བོད་ཀྱི་ས་ཆ་མང་པོར་དར་འདུག་ལ།མཚམས་རེར་དགོས་དབང་གིས་གཞན་ལ་གསང་བའི་སྒོ་ནས་ཕུལ་བའང་མང་པོ་ཡོད།
  ད་ལྟ་རྒྱལ་ཁབ་ཕྱི་ནང་གི་མཁས་པ་འགའ་ཤས་ཀྱིས་ཡ་ཐོག་གི་མིའི་རིགས་ཀྱི་སྤྱི་ཚོགས་བརྒྱུད་རིམ་ལ་སྔོ་ལོ་ཐོགས་པ་དང་།རི་དྭགས་རྔོན་པ།ཞིང་ས་རྨོ་བ་བཅས་བརྒྱུད་རིམ་ཆེན་པོ་གསུམ་དུ་དབྱེ་ཡོད་པ་ངེས།བོད་ལ་མཚོན་ནའང་གོས་སུ་ཤིང་ལོ་གྱོན་པ་དང་ཟས་སུ་མ་རྨོས་པའི་ལོ་ཏོག་སྟེ་སྔོ་ལོ་སོགས་ཐོགས་པའི་བརྒྱུད་རིམ་དང་པོ་བརྒྱུད་ཡོང་པ《ཆོས་འབྱུང་མཁས་པའི་དགའ་སྟོན》སོགས་སུ་གསལ།ཡ་ཐོག་སྤྱི་ཚོགས་ཀྱི་བརྒྱུད་རིམ་གཉིས་པ་རི་དྭགས་རྔོན་པའི་དུས་རིམ་ལ་སླེབས་ཡོང་དུས་བོད་དུ་བདུད་བོན་དང་བཙན་བོན་སོགས་གདོད་མའི་ཆོས་ལུགས་ཀྱི་སྟོབས་ཤུགས་ཆེས་ཆེར་རྒྱས་ཤིང་།རང་བྱུང་ཁམས་ཀྱི་གནོད་པ་སོགས་ལས་རྣམ་པར་རྒྱལ་ཆེད་ཆོས་ལུགས་ཀྱི་གནོད་པ་སོགས་ལས་རྣམ་པར་རྒྱལ་ཆེད་ཆོས་ལུགས་ཀྱི་གནོད་པ་སོགས་ལས་རྣམ་པར་རྒྱལ་ཆེད་ཆོས་ལུགས་ཀྱི་བསམ་བློ་ལ་བརྟེན་ནས་བཙན་སོགས་མིའི་སྟོབས་ཤུགས་ལས་བརྒལ་བར་འདོད་པའི་ལྐོག་གྱུར་གྱི་ཡུལ་ལ་དད་མོས་དང་།སྐབས་དེའི་ངལ་རྩོལ་གྱི་འབྲས་བུ་རི་དྭགས་རྔོན་པའི་ཤ་ཁྲག་གིས་དམར་མཆོད་རྒྱ་ཆེན་ཕུལ་བ་སྟེ་ཆོས་ལུགས་ཀྱི་ནང་དོན་དང་ངལ་རྩོལ་གྱི་འབྲས་བུ་གཉིས་དོ་མཉམ་བྱུང་ཡོད་པའི་སྐབས་དེའི་དམར་མཆོད་ཀྱི་རིགས་འདི་ད་ལྟའི་དམར་བསང་གི་ཁུངས་སུ་གྱུར་ཡོད།ཡ་ཐོག་སྤྱི་ཚོགས་ཀྱི་བརྒྱུད་རིམ་གསུམ་པ་ཞིང་ས་རྨོ་བའི་དུས་སྐབས་སུ་སླེབས་ཡོང་དུས་མི་གྲངས་མང་དུ་ཕྱིན་པ་དང་རང་བྱུང་གི་ཆ་རྐྱེན་ཇེ་ངན་དུ་གྱུར་པ།མིའི་རིག་གནས་ཀྱི་ཆུ་ཚད་དང་བསམ་བློའི་གོ་རྟོགས་མཐོ་རུ་ཕྱིན་པ་སོགས་ལ་བརྟེན།དུས་རབས་མང་པོའི་རིང་སྔོན་གྱི་སེམས་ཅན་ཁྲི་ཕྲག་མང་པོ་དུས་གཅིག་ཏུ་དམར་མཆོད་བྱེད་པའི་གདོད་མའི་ཆོས་ལུགས་ལ་ཚོད་འཛིན་དང་བསྒྱུར་བཅོས།འགོག་རྒོལ་སོགས་བརྒྱུད་ད་ལྟའི་དམར་བསང་གི་རིགས་འདི་བྱུང་བ་ཡིན་ནོ།།