གྱི་བཟའ་བཏུང་གི་གཙོ་བོ་རྩམ་པ་དང་།ཇའམ་ཆང་བཅས་དང་འདྲ་བར་སེམས་སོ།།

འབྲོག་མི་ཚོས་དབྱར་དུས་ཀྱི་ཆེད་དུ་ཤ་བམ་ཞེས་བྱ་བ་ཞིག་ཀྱང་བཟོ་སྲོལ་ཡོད་འདུག་ཅིང་།དེ་ནི་སྟོན་དུས་སྒོ་བཤས་བྱེད་སྐབས་སུ་གཡག་ཤ་བཟང་གྲས་གཟུག་ཁ་ཤས་སམ།ཤང་ན་སྤུ་ཁོག་ཅེས་བྱ་བ་ལུག་ཁོག་ལྷུ་གཟུག་ཚང་བའི་ནང་དུ་ནང་ཆ་རྣམས་གཙང་མར་བཀྲུས་ཤིང་སླར་བཅུགས་ཏེ།མི་ཚང་སོ་སོའི་དགུན་མཚེར་རྣམས་སུ་ལྕི་འབམ་ཞེས་བྱ་བ་ཕྱུགས་ཀྱི་ལྕི་བ་ཟླུམ་པོར་བརྩིགས་པའི་ནང་དུ་ཤིང་སྤེན་དམར་གྱི་བར་འཚང་དང་བཅས་ཏེ་འཇོག་གི་ཡོད་པ་རེད།དེ་ནི་དཔྱིད་སྨད་དམ་དབྱར་སྟོད་དུ་བེད་སྤྱོད་བྱེད་ཅིང་།འབྲོག་ཡུལ་གྱི་ས་གཤིས་མཐོ་ཞིང་རྟག་པར་རླུང་སེར་གྱི་ངད་དང་ལྡན་པ་ཡིན་སྟབས་ཤ་བམ་དུ་བཞག་པའི་ཤ་དེ་རིགས་ལ་དྲི་ངན་སོགས་མི་འབྱུང་ཞིང་།ཕྱིར་ཅུང་ཟད་རིད་ཅིང་ནང་དུ་ཤ་སྨུག་རོ་བཅུད་དང་ལྡན་པ་ཞིག་ཏུ་ཆགས་ཡོད་པ་རེད། ཡང་འབྲོག་མི་ཁ་ཤས་ཀྱིས་སྟོན་དུས་སུ་ཞོ་རྒན་ཞེས་བྱ་བ་ཞོ་བཟང་པོར་འོ་མའི་ཁ་སྤྲིས་མང་ཙམ་བླུགས་པ་ཟོ་བ་ཆེན་པོ་ཞིག་ཏུ་བསགས་ཤིང་འཕྱིང་བའི་གཡོགས་དང་བཅས་ཏེ་སྟོན་མཚེར་གྱི་ལྕི་འབམ་ནང་དུ་འཇོག་སྲོལ་ཡོད་འདུག་ཅིང་།དེ་ནི་དགུན་སྨད་དང་དཔྱིད་སྟོད་བཅས་འོ་ཞོ་དཀོན་པའི་དུས་སུ་བེད་སྤྱོད་བྱེད་སྲོལ་ཡོད་པ་རེད། འབྲོག་ཡུལ་གྱི་བུད་ཤིང་གི་གཙོ་བོ་ནི་ཕྱུགས་ཀྱི་ལྕི་བ་ཡིན་འདུག་ཅིང་།དེ་ཡང་སྟོན་དུས་སུ་འབྲོག་པའི་བུ་དང་བུ་མོ་གཞོན་ནུ་དག་གིས་དགུན་མཚེར་ཁག་ཏུའམ།སྟོན་མཚེར་རྣམས་སུ་ཕྱུགས་ལྕི་སྐམ་པོ་སྡུད་གསོག་བྱེད་ཅིང་ལྕི་འབམ་མང་དུ་འཇོག་གི་ཡོད་འདུག དེང་ནི་དགུན་དུས་འབྲོག་ཡུལ་གྱི་རི་ལུང་ཚང་མ་ཁ་བས་ཁེངས་ཤིང་བུད་ཤིང་འཚོལ་ཐབས་བྲལ་བའི་ཚེ་ཕན་ཐོགས་ཤིང་།བུད་ཤིང་ཐོག་གི་དཀའ་ངལ་བསལ་ཐུབ་ཀྱི་ཡོད་པ་རེད།དགུན་དུས་སུ་ནང་མ་རེ་བཞིན་འབྲོག་མོ་དག་གིས་ཨ་སྒང་ཞེས་བྱ་བ་ཕྱུགས་ཀྱི་ལྕི་བ་ལྷགས་པས་འཁེངས་ཏེ་རྡོ་ལྟར་མཁྲང་པོར་གྱུར་པ་དེ་རིགས་ཕྱུགས་ལྷས་ནས་ཕྱིར་བཏོན་ཏེ།སྐབས་འགར་ཕྱུགས་ཀྱི་ར་བར་བརྩིག་པ་དང་།སྐབས་འགར་ལྷས་ཀྱི་ར་བར་བརྩིག་པ་དང་།སྐབས་འགར་ལྷས་ཀྱི་ཉེ་འདབས་ཐང་ཞིག་ཏུ་བཀྲམས་ཏེ།རིམ་བཞིན་སྐམ་པོར་གྱུར་པ་དག་གིས་ལྕི་འབམ་བཟོ་དགོས་ཀྱི་ཡོད་འདུག་པ་དེ་དག་གིས་དབྱར་དུས་ཆར་ཞོད་ཆེ་བས་བུད་ཤིང་འཐོབ་དཀའ་བའི་ཚེ་ཕན་ཐོགས་ཀྱིན་ཡོད་པ་རེད།
 འབྲོག་མིའི་རྒྱུན་གྱི་གྱོན་ཆས་གཙོ་ཆེ་བ་ནི་ལུགས་ལྤགས་དང་།ལུག་ཚར།ལུག་བལ་གྱིས་བཟོས་པའི་འཕྱིང་བ་རྣམས་ཡིན་འདུག་ཅིང་།དར་གོས་དང་ལྭ་བ་སོགས་ནི་དམིགས་བསལ་གྱི་གཟབ་མཆོར་སྤྲོད་ཆས་ཙམ་ལས་དར་སྲོལ་མེད་པ་མ་ཟད་ཕྱི་ཡུལ་ནས་ཐོན་པའི་དངོས་པོ་དེ་དག་འཐོབ་ཐུབ་པའང་དཀའ་བ་དང་།རྒྱུན་གྱི་སྤྱོད་ཆས་ཐོག་ཕན་པའང་ཆུང་བར་མངོན་ནོ།