འབྲོག་མིའི་འཚོ་བའི་གཞི་བརྟེན་ནི་དེ་དག་ལ་གང་ཡོད་པའི་སྒོ་ཕྱུགས་ཀྱི་རིགས་རྣམས་ཡིན་འདུག་ཅིང་།དེ་དག་ལ་ཡོད་པའི་སྒོ་ཕྱུགས་ཀྱི་གཙོ་བོ་ནི་འབྲི་གཡག་དང་ལུག་སོགས་ཡིན་པ་རེད།གཡག་ནི་འབྲོག་མི་ལ་ཕན་ནུས་ཁྱད་པར་ཅན་གྱི་སྒོ་ཕྱུགས་ཤིག་རེད།སྤྱིར་བཏང་འབྲི་གཡག་གང་ཡིན་ཡང་རུང་དགུན་དུས་སུ་འབྲོག་ཡུལ་གྱི་གྲང་ངད་དྲག་པོ་དག་བཟོད་ཐུབ་པ་དང་།གངས་དང་ཆབ་རོམ་གྱིས་ཁེངས་པའི་ཡུལ་ཕན་ཚུན་དུ་འགྲུལ་བཞུད་བྱེད་ཐུབ་པ་དང་།དེ་དག་ལས་འབྲོག་མིའི་སྦྲ་བཟོ་བྱེད་ཀྱི་རྩིད་པ་འཐོན་ཐུབ་པ་དང་།མ་ཟད་འབྲི་གཡག་ནི་གསོ་སྐྱོང་སླ་ཞིང་འཕེལ་སྟོབས་ཆེ་བའི་སྒོ་ཕྱུགས་ཀྱི་འོ་མ་ལས་ཤིན་ཏུ་ཉུང་ནའང་།འབྲི་འོའི་རོ་བཅུད་ནི་འོ་མ་གཞན་དག་ལས་ཆེས་བཟང་བ་དང་།འབྲི་འོ་ཉུང་ངུ་ལས་མར་མང་དུ་འབྱུང་ཐུབ་པ་དང་།དེ་ཡང་རོ་བཅུད་ཕུན་སུམ་ཚོགས་པ་ཞིག་ཡོད་པ་རེད།དེ་ཙམ་དུ་མ་ཟད་འབྲི་གཡག་གི་ཤ་ཡང་འབྲོག་མིའི་བཟའ་བ་གལ་ཆེ་ཤོས་ཤིག་ཡིན་འདུག་པ་དང་།ཁམ་ཞེས་བྱ་བ་ཀོ་བའི་གོས་སྒམ་དང་།ཀོ་སྒྲོ་ཆེ་ཆུང་སྣ་ཚོགས་དང་།རྟ་འབོག་སོགས་རྒྱུན་གྱི་ཉེར་སྤྱོད་བཟོ་བ་ལ་ཕན་ནུས་ཧ་ཅང་ཆེ་བ་ཞིག་ཡིན་པ་རེད།ལུག་ནི་འབྲོག་ཡུལ་དུ་རྣམ་གྲངས་ཧ་ཅང་མང་ཞིང་འཕེལ་སྟོབས་ཆེ་བའི་སེམས་ཅན་ཞིག་ཡིན་འདུག་པར་མ་ཟད་འབྲོག་མིའི་རྒྱུན་གྱི་བཟའ་བའི་གཙོ་བོ་ནི་ལུག་ཤ་དང་།བཏུང་བའི་གཙོ་བོ་ནི་ལུག་ཞོ་དང་།གྱོན་པའི་གཙོ་བོ་ནི་ལུག་ལྤགས་ཡིན་འདུག་པ་ལྟར་འབྲོག་མིའི་འཚོ་བའི་ཐོག་ཏུ་ཕན་ནུས་ཁྱད་པར་ཅན་གྱི་སེམས་ཅན་ཞིག་ཏུ་ངོས་འཛིན་བྱེད་འོས་པ་ཞིག་རེད།གཞན་ཡང་འབྲོག་པའི་སྒོ་ནོར་དུ་མཛོ་དང་།མཛོ་མོ།ར་བཅས་མི་ཉུང་བ་ཡོད་འདུག་ནའང་།དེ་དག་ནི་འབྲོག་མི་ལ་ཕན་ནུས་ཆེ་བའི་སྒོ་ཕྱུགས་མིན་པ་དང་།བ་ཕྱུགས་ནི་ས་གཤིས་དམའ་བར་འཚོ་ཐུབ་པའི་སེམས་ཅན་ཞིག་ཡིན་པ་ལྟར་འབྲོག་ཡུལ་དུ་གཏན་ནས་མེད་ཅིང་།འབྲོག་མི་ཕལ་ཆེ་བས་བ་ཕྱུགས་ཞེས་པ་གང་ཡིན་ངོ་མི་ཤེས་པ་རེད། འབྲོག་མིའི་རྒྱུན་གྱི་བཟའ་བཅའི་རིགས་གཙོ་བོ་ནི་འབྲོག་ཡུལ་རང་གི་དངོས་པོ་ཤ་དང་།མར།ཕྱུར་ར།ཐུད་དང་གྲོ་མ་བཅས་ཡིན་འདུག་པ་དང་།གཞན་ཡང་རོང་ཡུལ་ནས་ཐོན་པའི་འབྲུ་རིགས་ནས་དང་།གྲོ།འབྲས།སྲན་མ་དང་།ཡུངས་མ་དང་།ཤིང་ཏོག་སྐམ་པོའི་རིགས་རྣམས་ཀྱང་གང་འཚམས་བེད་སྤྱོད་བྱེད་སྲོལ་ཡོད་འདུག་ནའང་།དངོས་པོ་དེ་དག་ནི་ཧ་ཅང་ས་ཐག་རིང་ཞིང་རི་ལུང་བརྒྱ་ཕྲག་མང་པོ་བརྒལ་བའི་རོང་ཡུལ་ཁག་ནས་གཡག་ལ་བརྟེན་ནས་སྐྱེལ་འདྲེན་བྱེད་དགོས་པར་བརྟེན་མོད་པོ་རང་མི་འདུག་བཏུང་བའི་གཙོ་བོ་ནི་ལུག་ཞོ་དང་འོ་མ་བཅས་ཡིན་འདུག་ཅིང་།འབྲོག་མི་རྒན་རིགས་རྣམས་ནས་ཇ་འཐུང་སྲོལ་འདུག་ནའང་།ཇ་ནི་རྒྱ་ནག་ནས་འཐོན་དགོས་པར་བརྟེན་ཇ་ཡི་རིན་ཐང་ཆེ་ཞིང་ཆེས་དཀོན་པར་སྣང་ངོ་།།མདོར་ན་འབྲོག་མིའི་ཉིན་དུས་ཀྱི་བཟའ་བ་གལ་ཆེ་ཤོས་ནི་མར་ཕྱུར་དང་།བཏུང་བ་གལ་ཆེ་ཤོས་ནི་ལུག་ཞོ་སྟེ་དཔེར་ན་བོད་ཀྱི་རོང་ཡུལ་ཁག་གི་རྒྱུན་