བོད་མིའི་མིང་འདོགས་ཚུལ།

ས་གོང་དབང་འདུས།        2011-04-06

བོད་ཀྱི་ལོ་རྒྱུས་དེབ་ཐེར་ལ་གཞིགས་ན་སྔར་གྱི་དུས་སུ་བོད་མིར་རུས་མིང་ཡོད་པ་མ་ཟད།དེ་ལའང་རིགས་སུ་ཕྱེ་ན།ཁག་བཅོ་བརྒྱད་ཙམ་ཡོད་པར་གསུངས།བོད་ཡུལ་ལ་སངས་རྒྱས་ཆོས་ལུགས་དར་རྗེས་རུས་མིང་གིས་འཛིན་པ་ཇེ་ཉུང་དུ་ཕྱིན་ཏེ་རིམ་བཞིན་རུས་ཀྱི་མིང་མི་འདོགས་པའི་སྲོལ་དར་ཞིང་།བླ་མས་ཕྲུ་གུར་བཀྲ་ཤིས་པ་དང་།ཆོས་ལུགས་ཀྱི་དོན་དང་ལྡན་པའི་མིང་།དེ་མིན་ཕ་མ་གཉིས་ཀྱི་མིང་གི་ཟུར་སྦྱར་བ་བཅས་ཀྱི་ཐོག་ནས་མིང་འདོགས་པའི་ལམ་སྲོལ་དར་བ་རེད།དཔེར་ན་བཀྲ་ཤིས་དོན་གྲུབ་དང་།ཚུལ་ཁྲིམས་ཆོས་འཕེལ།བསྟན་འཛིན་ལྟ་བུ།ཡང་ན་ཕ་མིང་བསོད་ནམས་ཚེ་རིང་ཡིན་ན་དེའི་བུ་ལ་བསོད་ནམས་དོན་གྲུབ་ཅེས་འདོགས་པ་ལྟ་བུ་རེད།དེ་ལས་གཞན་མང་ཚོགས་ཁྲོད་ཕྲུ་གུའི་སྐྱེས་སྐར་གཟའ་སྐར་གྱི་འཕྲོད་སྦྱོར་ལྟར་དེ་འབྲེལ་གྱི་མིང་འདོགས་ཏེ།དཔེར་ན།ཉི་མ།ཟླ་བ།ལྷག་པ།ཕུར་བུ་སོགས་མང་བོ་ཞིག་ཡོད།ཡང་འགའ་རེས་ཚེས་གྲངས་གལ་ལ་སྐྱེས་པ་ལྟར་མིང་འདོགས་སྲོལ་ཡང་ཡོད་པ་ནི།དཔེར་ན།བཅོ་ལྔ་ཚེ་རིང་།ཚེས་བརྒྱད་ཆོས་གསུམ།གནམ་གང་ལ་སོགས་པའི་མིང་འདོགས་པ་ལྟ་བུའོ།།ཡང་རབ་ཏུ་བྱུང་བ་ཞིག་ཡིན་ན་ངེས་པར་དུ་ཆོས་མིང་འདོགས་པར་བྱེད་དེ།དཔེར་ན།ཆོས་ལ་མ་ཞུགས་གོང་བཀྲ་ཤིས་ཞེས་འབོད་ཀྱང་རབ་ཏུ་བྱུང་རྗེས་བློ་བཟང་བཀྲ་ཤིས་ཞེས་འདོགས་སྲོལ་ཡོད།དེ་མིན་བདོ་མིའི་མིང་འདྲ་མཚུངས་མང་བོ་ཡོད་པར་བརྟེན་མིང་མི་ནོར་བའི་ཆེད་འབོད་སྲོལ་འགའ་ཞིག་ཡོད་དེ།ལ་ལས་ཁྱིམ་མིང་དང་སྦྱར་ནས་འབོད་སྲོལ་ཡོད་པ་སྟེ།པ་སྣམ་དངོས་གྲུབ།ཨ་མདོ་བཀྲ་ཤིས།ཁང་དམར་ཡེ་ཤེས་སོགས་དང་།ཡང་ལ་ལས་ཆེ་འབྲིང་ཆུང་གསུམ་གྱིས་དབྱེ་ནས་འབོད་སྲོལ་ཡོད་པ་ནི།ལྷག་པ་རྒན་པ།ལྷག་པ་འབྲིང་བ།ལྷག་པ་ཆུང་བ་ལྟ་བུ་དང་།ད་དུང་ཕོ་མོ་སོ་སོར་མིང་མི་འདྲ་བ་ཡོད་ཀྱང་ལ་ལ་ཉིས་འཇུག་གི་མིང་ཡོད་སྟབས་ཕོ་མོའི་དབྱེ་བ་སྦྱར་ནས་འབོད་སྲོལ་ཡོད་དེ།དཔེར་ན།བུ་ཚེ་བརྟན།བུ་མོ་ཚེ་བརྟན་ཟེར་བ་ལྟ་བུ་ཡིན།
བོད་མིའི་མིང་འདོགས་སྟངས་ལའང་ཁྱད་ཆོས་ཆེན་པོ་ཞིག་ཡོད་དེ།མིང་གི་ཐོག་ནས་རིམ་གྲས་མཐོ་དམའ་དང་།ཡུལ་ལུང་གང་གི་མི་ཡིན་མིན་གསལ་བོར་རྟོགས་ཐུབ།དེའང་སྤྲུལ་སྐུའམ་སྐུ་དྲག་གང་རུང་ལ་ཡིག་འབྲུ་བཞིའི་ཡན་ལས་གྲུབ་པའི་མཚན་ཡང་ཡོད་དེ།དཔེར་ན།བློ་བཟང་ཆོས་ཀྱི་ཉི་མ་དཔལ་བཟང་བོ་ཞེས་པ་ལྟ་བུ་ཞིག་ཡིན་ན་བླ་སྤྲུལ་ཞིག་ཡིན་པ་གསལ་བོར་རྟོགས་ཐུབ་པ་དང་།འཇིགས་མེད་དབང་ཕྱུག ཆོས་རྒྱལ་ཉི་མ།ཐུབ་བསྟན་ཉི་མ་ཟེར་བ་སོགས་ནི་སྐུ་དྲག་གི་མིང་ཡིན་པ་ཤེས་ཐུབ།ཉི་མ།ཟླ་བ།ཕུར་བུ།གནམ་གང་སོགས་ནི་མི་སེར་དཀྱུས་མའི་མིང་ཡིན་པ་གསལ་བོ་རེད།ཆོག་པ།ཕུར་ཚིང་།ཕན་ཐོགས།ལྷག་ཚིང་སོགས་ནི་གཙང་གི་མི་ཡིན་པ་ཤེས་ཐུབ།ཡར་འཕེལ།དབང་མོ།དགྲ་ལྷ་ལྟ་བུ་ནི་ཐོས་པ་ཙམ་གྱིས་ཕལ་ཆེར་མདོ་ཁམས་ཕྱོགས་ཀྱི་མི་ཡིན་པ་ཤེས་ཐུབ།ད་དུང་འགའ་ཤས་ཀྱིས་སྐྱེ་སྒོ་འགོག་ཆེད་ཕྲུ་གུའི་མིང་ལ་མཚམས་གཅོད་དང་ཆོག་པ།ཆུང་བདག་སོགས་ཀྱི་མིང་འདོགས་སྲོལ་ཡོད།ཡང་འགའ་ཤས་ལ་ཕྲུ་གུ་བུ་མོ་མ་གཏོགས་བུ་མེད་ན།བུ་ཞིག་བྱུང་ན་སྙམ་པའི་རེ་བ་མཚོན་ཆེད་བུ་འཁྲིད་ཅེས་འདོགས་སྲོལ་ཡང་ཡོད།ཕྲུ་གུ་མང་པོ་སྐྱེས་ཀྱང་འདས་ནས་མ་འཚོ་བ་ལ་ཕྲུ་གུ་འཚོ་སྡོད་ཡོང་ཕྱིར་སྐྱེས་མ་ཐག་རྫ་མའི་ནང་འཇོག་ཙམ་བྱས་ནས་མིང་ལའང་རྫ་སྐྱེས་ཞེས་འདོགས་པ་དང་།ཡང་ན་ཕག་སྐྱག་གམ་ཁྱི་སྐྱག་ཅེས་བཏགས་ནས་མིང་གི་ཐོག་ནས་ཚེ་ཡི་གནོད་པ་བཟློག་པའི་ཐབས་ལམ་མཚོན་པར་བྱེད་སྲོལ་ཡོད།
  • ལེ་ཚན་སྔོན་མ།:བོད་ཀྱི་དམངས་ཁྲོད་དུ་དར་བའི་ཁང་ཚོན་རི་མོའི་སྐོར་ངོ་སྤྲོད་མདོར་བསྡུས།
  • ལེ་ཚན་རྗེས་མ།:ཁ་བཏགས་ཀྱི་བྱུང་བ་དང་གཏོང་ཚུལ།