མཚོ་ཕུ་ལུང་རང་བྱུང་སྐྱེ་ཁམས་སྲུང་སྐྱོང་ཁུལ་ནི་འབའ་ཐང་རྫོང་གི་བྱང་ཕྱོགས་ཏེ་ཚ་ལུ་ཡུལ་ཤོག་གི་མངའ་ཁོངས་སུ་གནས་པ་དང་། རྒྱལ་ཁབ་རིམ་པའི་གཞུང་ལམ318པ་ལུང་བའི་ཟུར་ནས་བརྒྱུད་ཅིང་། འབའ་ཐང་རྫོང་དང་བར་ཐག་སྤྱི་ལེ105དང་ལི་ཐང་རྫོང་ནས་སྤྱི་ལེ120ཙམ་གྱི་མཚམས་སུ་ཡོད། རང་བྱུང་ཡུལ་ལྗོངས་ལྟ་ན་སྡུག་པའི་ལྗོངས་ཁུལ་གྱི་སྣོད་བཅུད་ཁོར་ཡུག་གངས་རི་དང་། ནགས་ཚལ། གྲོག་རོང་། སྤང་ཐང་། ཆུ་ཚན། རི་སྐྱེས་སྲོག་ཆགས་བཅས་ལས་གྲུབ་ཡོད།

ལྗོངས་ཁུལ་གྱི་སྤྱིའི་རྒྱ་ཁྱོན་ལ་སྤྱི་ལེ་གྲུ་བཞི་མ400ཡོད་ཅིང་། མཚོ་འཕགས་སྨི3200ནས་4500ཡི་དྲང་འཕྱང་ཁྱབ་ཁོངས་སུ་སྐྱེ་དངོས་ཁྱུ་ཚོགས་ཀྱི་ས་རྒྱུད་གསལ་བ་དང་། གདོད་མའི་ནགས་ཚལ་སྟུག་ཅིང་སྐྱེ་ཁམས་མ་ལག་ཆ་ཚང་ལ། རི་སྐྱེས་སྲོག་ཆགས་ཧ་ཅང་འབེལ། གནས་དེར་ད་དུང་མཐོ་སྒང་གི་ཁབ་དབྱིབས་ལོ་མའི་ནགས་ཚལ་དང་། མཐོ་སྒང་གི་སྡོང་ཕྲན་ནགས་ཤིང་། རྩྭ་ཐང་དང་རྡོ་ཟེགས་སྔོ་ཁེབས་ཀྱིས་ཡོངས་སུ་ཕྱུག་ཡོད། སི་ཁྲོན་ཞིང་ཆེན་གྱི་ས་གཤིས་གླིང་ག་ཆེན་མོ་བཅུའི་གྲས་སུ་གཏོགས་པའི་ས་དོང་ཆུ་ཚན་ཚོགས་ཁྱུ་ཡང་ཡོད་དོ།།