ཀྲུང་དབྱང་བརྙན་འཕྲིན་ཁང་གིས་ལེའུ༢༠ཡོད་པའི་མུ་འབྲེལ་བརྙན་འཕྲིན་རིང་མོ༼དགེ་རྟག་སྤྲུལ་སྐུ༽ཞེས་པ་དེ་འཛམ་གླིང་ཡོངས་སུ་ཁ་ཕྱོགས་ནས་བཏང་རྗེས་འཛམ་གླིང་ཐོག་གི་བོད་རིག་པ་ཞིབ་འཇུག་བྱེད་མཁན་དང་བོད་རིགས་ལ་དགའ་ཞེན་ཆེ་བའི་མི་ཚོས་ཚད་མི་འདྲ་བའི་ཐོག་ནས་བསྟོད་བསྔགས་དང་དེའི་གནས་ཚུལ་བཤད་ཀྱིན་ཡོད།ལྷག་པར་དུ་བོད་རིགས་ས་ཁུལ་དུ་དགེ་རྟག་སྤྲུལ་སྐུ་ལ་དེ་བས་རྒྱུས་མངའ་ཆེ་བས་ཚང་མས༼དགེ་རྟག་སྤྲུལ་སྐུའི༽བརྙན་འཕྲིན་ལ་བལྟས་རྗེས་ཁོང་གིས་མི་རིགས་མཐུན་སྒྲིལ་དང་མེས་རྒྱལ་གཅིག་གྱུར་གྱི་ཐད་ལ་རང་སྲོག་བློས་བཏང་བས་རླབས་ཆེན་གྱི་སྙིང་སྟོབས་ལ་དད་བཀུར་དང་བསྔགས་བརྗོད་ཡང་ཡང་བྱེད་བཞིན་ཡོད།དཀར་མཛེས་བོད་རིགས་རང་སྐྱོང་ཁུལ་ནི་དགེ་རྟག་སྤྲུལ་སྐུ་འཁྲུངས་ཡུལ་དང་གསར་བརྗེའི་ས་ཁུལ་ཞིག་ཡིན་པས༼དགེ་རྟག་སྤྲུལ་སྐུའི༽བརྙན་འཕྲིན་བཏང་རྗེས་བོད་བརྒྱུད་ནང་བསྟན་ལས་རིགས་ཀྱིས་སྤྱི་ཚོགས་ཁྲོད་དུ་ཤུགས་རྐྱེན་ཆེན་པོ་ཆགས་པ་རེད།
བརྙན་འཕྲིན་དེའི་ནང་དགེ་རྟག་སྤྲུལ་སྐུའི་སྲིང་མོ་ཡེ་ཤེས་ལྷ་མོ་ནི་ལེའུ༢༠ལས་ལེའུ་བཅུ་བདུན་ཙམ་གྱི་ནང་དགེ་རྟག་སྤྲུལ་སྐུ་དང་མཉམ་དུ་གསར་བརྗེའི་ལས་དོན་ནང་ཞུགས་ནས་རང་ནུས་ཅི་ཡོད་ཀྱིས་དམར་དམག་ལ་རོགས་སྐྱོར་བྱས་ཤིང་།ཁོ་མོ་དང་དམར་དམག་བར་ལ་འོ་ཆུ་ལྟ་བུའི་འབྲེལ་འདྲིས་ཆགས་པ་སོགས་མཚོན་པའི་འཁྲབ་ཚན་ཞིག་ཡིན་པས་བརྙན་འཕྲིན་དེའི་ནང་འཁྲབ་ཚན་ཆེས་མང་བའི་མི་སྣ་གལ་ཆེན་ཞིག་ཀྱང་ཡིན་པས་ལྟ་མཁན་ཚང་མའི་སེམས་ལ་བསུབས་སུ་མེད་པའི་བག་ཆགས་མི་འདྲ་བ་འཇོག་ཡོད་པ་གདོན་མི་ཟའོ།། འོ་ན་ཁྱེད་ཀྱིས་ཡེ་ཤེས་ལྷ་མོ་འཁྲབ་སྟོན་པའི་བུད་མེད་མཛེས་མ་དེ་སུ་ཞིག་ཡིན་པ་ཤེས་འདོད་དམ།དྲང་མོ་བཤད་ན་ཁོ་མོ་ནི་རང་ཁུལ་གྱི་གླུ་གར་ཚོགས་པའི་ཚོགས་དཔོན་གཞོན་པ།རྒྱལ་ཡོངས་ཀྱི་གསེར་གྱི་མེ་ཏོག་ཅེས་པའི་མཛེས་མ་ཨང་དང་པོའི་མིང་རྟགས་ཐོབ་མཁན།བྱང་སྡེ་རྫ་ཆུ་ཁ་ནས་འཚར་ལོངས་བྱུང་བའི་བོད་རིགས་བུ་མོ་ཡེ་དགའ་ཞེས་པ་དེ་རེད། ཡེ་དགའ་ནི་དཀར་མཛེས་ཁུལ་རང་ཉིད་ཀྱིས་གསོ་སྐྱོང་བྱས་པའི་བོད་རིགས་ཀྱི་ན་གཞོན་འཁྲབ་སྟོན་པ་ཞིག་དང་ཞབས་བྲོ་རྩོམ་མཁན་གྲགས་ཅན་ཞིག་ཡིན།མོ་རང༡༩༨༨ལོར་སི་ཁྲོན་ཞིང་ཆེན་ཟློས་གར་སློབ་གྲྭ་ནས་སློབ་མཐར་ཕྱིན་རྗེས་ཁུལ་ཟློས་གར་ཁང་དུ་འཁྲབ་སྟོན་པའི་ལས་དོན་བསྒྲུབས།ཁོ་མོ་སྔོན་རྗེས་སུ་ཕུལ་བྱུང་གི་ཟློས་གར་གལ་ཆེན་མང་དག་གསར་རྩོམ་དང་འཁྲབ་སྟོན་བྱེད་པའི་ནང་ཞུགས་ཤིང་ལྟ་མཁན་ཚོའི་དགའ་བསུ་ཆེན་པོ་ཐོབ་ནས་རིམ་བཞིན་ཟློས་གར་ཁང་དེའི་གཙོ་བོའི་འཁྲབ་སྟོན་པ་ཞིག་དང་ཟློས་གར་གསར་རྩོམ་བྱེད་མཁན་ཞིག་ཏུ་གྱུར།དེ་ནས་བཟུང་ཟློས་གར་ཁང་དེར་གལ་ཏེ་ཆེས་གལ་ཆེ་ཞིང་རྒྱ་ཆེ་བའི་ཟློས་གར་གསར་རྩོམ་བྱེད་པའམ་ཡང་ན་འཁྲབ་སྟོན་པའི་ལས་འགན་ཞིག་ཡོད་པ་ནས་བཟུང་ཁོ་མོ་ནི་མེད་དུ་མི་རུང་བའི་མི་སྣ་གཙོ་བོ་ཞིག་ཏུ་གྱུར་ནས་སྔོན་རྗེས་སུ་ཟློས་གར་ཆེན་མོ༼གླིང་གེ་སར་རྒྱལ་པོ།༽དང༼ཁ་བཏགས་དམར་པོ།༽༼དར་མདོའི་མཛའ་གཞས་ཀྱི་ཕ་ཡུལ།༽སོགས་ཀྱི་གསར་རྩོམ་དང་འཁྲབ་སྟོན་ནང་ཞུགས་པ་དང་།མ་ཚད་པར་ལྗར་པན་དང་ཧན་གོཧང་ཀང་།ཐའེ་ཝན་སོགས་རྒྱལ་ཁབ་དང་ས་ཁུལ་དག་ཏུ་གལ་ཆེའི་འཁྲབ་སྟོན་བྱེད་སར་ཞུགས་མྱོང་།  ལྷག་པར་དུ་ཁོ་མོ་སྐབས་རིམ་པའི་རྒྱལ་ཡོངས་དང་ཞིང་ཆེན་གྱི་གྲངས་ཉུང་མི་རིགས་སྒྱུ་རྩལ་དུས་ཆེན་གྱི་འགྲན་སྡུར་ནང་ཧ་ལམ་ཐེངས་གཅིག་ཀྱང་ཆད་མྱོང་མེད་པར་མ་ཟད་ད་དུང་རིམ་པ་མཐོ་བའི་བྱ་དགའ་ཐེངས་མང་ཐོབ་མྱོང་བ་རེད།
༡༩༩༢ལོར་ཁོ་མོ་ལ་རྒྱལ་ཡོངས་ཀྱི་ཐེངས་གཉིས་པའི་མི་རིགས་རིག་གནས་དངོས་མང་སྟོན་ཚོགས་ཐོག་མི་རིགས་ཀྱི་མེ་ཏོག་ཅེས་པའི་མཛེས་མ་འགྲན་སྡུར་གྱི་བྱ་འགུལ་ནང་བོད་རིགས་ཀྱི་གསེར་གྱི་མེ་ཏོག་ཞེས་པའི་མཛེས་མ་ཨང་དང་པོའི་མིང་རྟགས་ཐོབ།༡༩༩༧ལོར་སྐབས་བདུན་པའི་རྨ་བྱའི་གསེར་བུམ་རྟགས་ཅན་གྱི་གྲངས་ཉུང་མི་རིགས་ཀྱི་ཞབས་བྲོ་འགྲན་བསྡུར་ནང་ཕུལ་བྱུང་གི་བྲོ་བརྩམས་མཁན་དང་བྲོ་འཁྲབ་མཁན་གྱི་བྱ་དགའ་ཐོབ།༢༠༠༢ལོར་ཁོ་མོ་གསར་རྩོམ་བྱ་བ་དང་འཁྲབ་སྟོན་ནང་ཞུགས་པའི་ཟློས་གར་ཆེན་མོ༼དར་མདོའི་མཛའ་གཞས་ཀྱི་ཕ་ཡུལ།༽ལ་སི་ཁྲོན་ཞིང་ཆེན་གྲངས་ཉུང་མི་རིགས་སྒྱུ་རྩལ་དུས་ཆེན་ཐོག་བྱ་དགའ་ཨང་དང་པོ་ཐོབ།   ༢༠༠༤ལོར་ཁོ་མོ་གསར་རྩོམ་བྱ་བ་དང་འཁྲབ་སྟོན་ནང་ཞུགས་པའི་ཟློས་གར་ཆེན་མོ༼གླིང་གེ་སར་རྒྱལ་པོ༽ཞེས་པ་ལ་སྐབས་བཞི་པའི་ཁམས་པའི་སྒྱུ་རྩལ་དུས་ཆེན་ཐོག་དམིགས་བསལ་གྱི་བྱ་དགའ་ཐོབ།  ༢༠༠༤ལོར་ཧན་གོ་རྒྱལ་ཁབ་ཏུ་སྤེལ་བའི་སྐབས་དང་པོའི་འཛམ་གླིང་རིག་གནས་སྒོ་འབྱེད་ཚོགས་འདུའི་ཐོག་ཁོ་མོ་སོགས་ཀྱིས་འཁྲབ་སྟོན་བྱས་པའི༼དར་མདོའི་མཛའ་གཞས་ཀྱི་ཕ་ཡུལ༽ལ་འཛམ་གླིང་གི་ཞི་བདེའི་བྱ་དགའ་ཆེན་མོ་ཐོབ།