ནང་སོག་རང་སྐྱོང་ལྗོངས་ཀྱི་ལྟེ་བ་ཧུའུ་ཧོ་ཧའོ་ཐེར་བཞུགས་པའི་བོད་ལུགས་མཆོད་རྟེན།



 

བྱང་ཆུབ་ཆོས་ཀྱི་མཆོད་རྟེན་ལ།།གདན་གྱི་ས་འཛིན་ཐེམ་སྐས་གསུམ།།ཐིག་གདན་སེང་ཁྲི་བད་ཆུང་དང་།།གཟུགས་སྣེ་བད་ཆེན་རྨང་དགེ་བ།།དེ་སྟེང་སྤྱི་ལ་བང་རིམ་བཞི།།བུམ་རྟེན་བུམ་པ་བྲེ་རྟེན་དང་།།བྲེ་འདེགས་པད་མ་འོད་ཟེར་ཕྲེང་།།ཕོ་འཁོར་མོ་འཁོར་བཅུ་གསུམ་དང་།།ཐུགས་རྗེ་མདོ་གཟུངས་གཞུ་རྒྱ་གྲམ།།གདུགས་དང་ཆར་ཁེབས་ཟླ་ཕྱེད་ཉི།།ནོར་བུ་ཏོག་དང་བཅས་པའོ།། མཆོད་རྟེན་གྱི་ཆ་དབྱེ་བར་རྣམ་དག་སློབ་དཔོན་ཤྰནྟི་གརྦྷས་གསུངས་པའི་དོན་ནི།བད་གཟུངས་རྗེས་སུ་དྲན་པ་དྲུག །བད་ཆེན་དགེ་བཅུ་རྨངས་ཚད་མེད།།ཡང་ན་དེ་གཉིས་ལྡོགས་པའང་བཤད།དེས་རྡོ་རྗེའི་ས་ལམ་བཅུ་གསུམ་མཚོན་པའང་གསུངས་ཏེ།།དེ་རྣམས་ནི།༡རབ་ཏུ་དགའ་བ།༢དྲི་མ་མེད་པ།༣འོད་བྱེད།༤འོད་འཕྲོ།༥སྦྱང་དཀའ་བ།༦མངོན་དུ་གྱུར་པ།༧རིང་དུ་སོང་བ།༨མི་གཡོ་བ།༩ལེགས་པའི་བློ་གྲོས།༡༠ཆོས་ཀྱི་སྤྲིན།༡༡དཔེ་མེད་པ།༡༢ཡེ་ཤེས།༡༣རྡོ་རྗེའི་ས་ལམ་བཅས་སོ།།  བང་རིམ་བཞི་པོ་རིམ་པ་བཞིན།།དྲན་པ་ཉེར་བཞག་ཡང་དག་སྤོང་།།རྫུ་འཕྲུལ་རྐང་བཞི་དབང་པོ་ལྔ།།བུམ་རྟེན་སྟོབས་ལྔ་བུམ་པ་ནི།།བྱང་ཆུབ་ཡན་ལགས་བྲེ་འཕགས་ལམ།།རྒྱུ་ཡི་ཆོས་རྣམས་རྣམ་པར་དག།སྲོག་ཤིང་ཀུན་རྫོབ་ཕ་རོལ་སེམས།།རྗེས་དྲན་བདེན་བཞི་ཟད་མི་ཤེས།།ཤེས་པ་བཅུ་གཉིས་ངོ་བོ་དང་།།པད་མ་ཐབས་དང་ཤེས་རབ་སྟེ།།འཁོར་ལོ་སྟོབས་བཅུ་དྲན་ཉེ་གསུམ།།ཆར་ཁེབས་ཐུགས་རྗེ་ཏོག་ཆོས་སྐུ།།མཆོད་རྟེན་ཉིད་ཀྱི་ངོ་བོ་བཤད།།ཅེས་དང་། ཡང་།རྒྱན་རྣམས་རྒྱལ་བའི་ཡོད་ཏན་ཏེ།།རྡོ་རིམ་མི་འཇིགས་བཞི་དང་ལྡན།།ཐེམ་སྐས་སྲུང་བ་མེད་པ་བཞི།།རྒྱལ་མཚན་བདུད་བཞིའི་གཡུལ་ལས་རྒྱལ།།མེ་ཏོག་ཕྲེང་བ་མཚན་དཔེ་འབར།།རྒྱལ་མཚན་བཞི་ནི་བདེན་བཞིའི་དོན།།དྲིལ་བུ་ཚངས་དབྱངས་དྲུག་ཅུའི་གསུང་།།ཉི་ཟླ་ཡེ་ཤེས་སྣང་བ་སྐྱེས།།མེ་ལོང་ཡེ་ཤེས་བཞི་དང་ལྡན་པ།།ཅོད་པན་ཆོས་ཀྱི་རྒྱལ་སྲིད་ཐོབ།།བ་དན་ཆོས་ཀྱི་སྙན་པས་ཁྱབ།།འབྲས་བུ་ཆོས་རྣམས་དག་པའོ།།སྒོ་མང་བདེན་བཞི་རྣམ་ཐར་བརྒྱད།།རྟེན་འབྲེལ་སྟོང་ཉིད་བཅུ་དྲུག་གོ།།གློ་འབུར་ཁྱད་པར་འཕགས་པ་ཡི།།རྣམ་པར་འཕྲུལ་པས་འགྲོ་དོན་མཛད།།ཐེམ་སྐས་སངས་རྒྱས་གཞན་དོན་བྱོན།།པདྨ་འཁོར་བའི་སྐྱོན་མ་གོས།།བང་རིམ་མེད་པ་སྲིད་པ་ཡི།།འཇིག་པ་བྲལ་ཞིང་སྤྲོས་པ་མེད།།དབྱེན་ཟླུམ་དེ་རྒྱུ་དུག་གསུམ་དང་།།ལྟོ་བཅད་རྣམ་ཐར་བརྒྱད་མཚོན་ནོ།།ཞེས་སྐུ་གདུང་ཆ་བརྒྱད་ཀྱི་བརྡ་ཁྱབ་དང་རྒྱན་གྱི་ཡོན་ཏན་བཅས་པའི་ཚིགས་སུ་བཅད་པ་འདི་ནི།ཤེས་བྱ་ཀུན་ཁྱབ་ཀྱི་ཐུགས་རྟེན་བཤད་པ་ལ་གཞིར་བྱས་ནས་བྲིས་པའོ།།