ཡུན་ནན་ཞིང་ཆེན་ནི་ཀྲུང་གོའི་ལྷོ་ནུབ་རྒྱུད་དུ་ཡོད་ལ་ཞིང་ཆེན་འདིའི་ལྟེ་བའི་གྲོང་ཁྱེར་ནི་ཁུང་མིན་ཡིན། སྤྱིའི་རྒྱ་ཁྱོན་ལ་ལེ་བར་གྲུ་བཞི་མ་ཁྲི38ལྷག་ཡོད་པ་དང་རྒྱལ་ཡོངས་ཀྱི་བརྒྱ་ཆའི་4.11བཟུང་ཡོད་པས། རྒྱལ་ཡོངས་ཀྱི་ཞིང་ཆེན་དག་ལས་ཨང8པའི་གོ་གནས་བཟུང་ཡོད། མི་གྲངས་ཁྲི4415(2004ལོ)ཡོད་ལ་རྒྱལ་ཡོངས་ཀྱི་མི་གྲངས་ཨང་རིམ12པ་ཡིན། རང་རྒྱལ་གྱི་ཟི་ཁྲོན་དང་། ཀོས་ཀྲིག ཀོང་ཞི། བོད་ལྗོངས། ཕྱིའི་འབར་མ་རྒྱལ་ཁབ་དང་ལོ་ཝོ་རྒྱལ་ཁབ། ཡའོ་ནན་རྒྱལ་ཁབ་བཅས་ནི་ཡུན་ནན་ཞིང་ཆེན་གྱི་ཁྱིམ་འཚེས་ཡིན། ཞིང་ཆེན་འདིའི་རང་བྱུང་ནམ་ཟླ་བཟང་ལ་ས་བབས་མཛེས་སྡུག་ལྡན་པས་ཡུལ་སྐོར་གྱི་གནས་མཆོག་ཏུ་གྱུར་ཡོད། དེའི་ནང་དུ་ལས་ཅང་གནའ་གྲོང་ནི་མཛེས་སྡུག་ལྡན་ལ་གནའ་བོའི་ཁྱད་ཆོས་འབུར་ཐོན་ཅན་གྱི་ཡུལ་སྐོར་ས་གནས་གྲགས་ཅན་ཞིག་ཡིན།

                                                                                                              
རོང་བཙན་ཁ་བ་དཀར་པོ།
 

གནས་རི་འདི་ནི་ཡུན་ནན་ཞིང་ཆེན་བདེ་ཆེན་བོད་རིགས་རང་སྐྱོང་ཁུལ་དུ་ཡོད་དེ། ཞིང་ཆེན་འདིའི་ཁོངས་ཀྱི་རི་བོ་ཆེས་མཐོ་ཤོས་ཡིན་ལ། སྲིད་པ་ཆགས་པའི་ལྷ་དགུ་དང་རྗེ་ཡི་མགུར་ལྷ་བཅུ་གསུམ་གྱི་གྲས་ཡིན། ངག་རྒྱུན་དུ་རོང་བཙན་ཁ་བ་དཀར་པོ་དང་དེའི་ཉེ་འགྲམ་གྱི་རི་རྩེ་ཞིག་ནི་ཕན་ཚུན་ལ་བརྩེ་འདང་ཆེ་བའི་བཟའ་ཟླ་ཡིན་པས། ན་གཞོན་ཕོ་མོ་ཟུང་དེར་གནས་མཇལ་དུ་སོང་ན་བརྩེ་སེམས་ལ་འགྱུར་བ་མེད་པར་བཤད། གནས་འདི་ལ་ལྗོངས་རྒྱུ་ལྟ་སྐོར་བྱེད་མཁན་དང་དད་ལྡན་མཇལ་སྐོར་བྱེད་མཁན་ཤིན་ཏུ་མང་།

                                                                                                                         
སེམས་ཀྱི་ཉི་ཟླ།
 

འདི་ནི་ངག་རྒྱུན་ཁྲོད་ཀྱི་ཤམ་བྷ་ལ་ཡིན། གནས་འདིའི་རི་ཆུ་མཛེས་སྡུག་ལྡན་ལ་རྩྭ་ཐང་ཁོད་ཡངས་བ་དང་། གཡའ་དག་པའི་ནམ་མཁའ་ས་གཞི་དང་འདྲེས་ཡོད་པས་ཁྱེད་རང་རྨི་ལམ་གྱི་ཞིང་ཁམས་ལ་སླེབས་པའི་ཉམས་སྣང་སྟེར་ངེས།

                                                                                                                                  
འབྲི་ཆུའི་ཁུག་སོ་དང་པོ།
 

ཆལ་ཆིལ་དུ་འབབ་པའི་གཙང་ཆུ་སྔོན་མོས་གནས་འདི་རུ་གཡུ་འབྲུག་གི་འཁྱུག་འགྲོས་ལྟ་བུའི་གར་སྟབས་བསྒྱུར་རྗེས་ཡང་བསྐྱར་རྒྱང་རིང་གི་ཕྱོགས་སུ་བཞུར་གྱིན་ཡོད་ལ། གནམ་འོག་གི་འབྲི་ཆུའི་ཁུག་སོ་དང་པོ(ཉི་ཟླའི་ཁུག་སོ་ཡང་ཟེར)འདི་ནི་ཡུན་ནན་ཞིང་ཆེན་གྱི་བདེ་ཆེན་བོད་རིགས་རང་སྐྱོང་ཁུལ་དང་ཟི་ཁྲོན་ཞིང་ཆེན་གྱི་སྡེ་རོང་རྫོང་གཉིས་ཀྱི་འབྲེལ་མཚམས་སུ་ཡོད།

ཡོན་ཡང་གི་སྐས་དབྱིབས་ཞིང་ས།
 

ཡོན་ཡང་རྫོང་གི་ལས་ལ་བརྩོན་པའི་ཧ་ཉི་མི་རིགས་ཀྱིས་གནས་འདིའི་རི་བོ་དག་སྣུམ་ཚོན་གྱི་རི་མོ་ལྟ་བུ་ཞིག་ཏུ་བསྒྱུར་ཡོད་པས། འགྲུལ་བཞུད་པ་མང་པོས་འཁྲེང་སེམས་ཀྱི་ཕྱི་མིག་གནས་འདི་རུ་ལུས་ཡོད།

  
ལོའོ་ཕེན་གྱི་སྐེ་ཚེའི་མེ་ཏོག
 

གསེར་མདོག་གིས་ཕྱུག་པའི་སྐེ་ཚེའི་མེ་ཏོག་ནི་ཟླ་གསུམ་པའི་ཡུལ་འདིའི་རྒྱན་ཆ་ཡིན་ལ། འགྲུལ་སྐྱེལ་རླངས་འཁོར་ལ་བསྡད་ནས་ཁུང་མིན་ནས་ལམ་ལ་ཆས་ན་དུས་ཚོད་བཞི་ལྷག་གིས་ཐོན་ཐུབ་ལ་སྐེ་ཚེའི་མེ་ཏོག་གི་དུས་ཆེན་སྐབས་སུ་ཡུལ་འདིར་འགྲོ་བའི་ཆེད་སྤྱོད་རླངས་འཁོར་ཡང་ཡོད།

ཏོང་ཁྲོན་གྱི་ས་དམར་ཁུལ།
 

ཡུན་ནན་ཏོང་ཁྲོན་རྫོང་གི་ས་གཤིས་ལ་ཁྱད་མཚར་གྱི་ཁྱད་ཆོས་ལྡན་པ་དང་ས་ཆ་མང་ཆེ་བ་དམར་པོ་ཡིན། དེ་བས་དུས་ཚིགས་མི་འདྲ་བ་རེ་རེའི་ནང་དུ་གནས་འདིའི་མཛེས་ལྗོངས་ཀྱི་ཁ་དོག་ཡང་མི་འདྲ་ལ་རང་ཉིད་རི་མོའི་ཁྲོད་བཞུད་པ་ལྟ་བུའི་ཚོར་སྣང་སྟེར་ཐུབ།  །