བོད་ཀྱི་ལྷ་མོའི་ལེའུ་གང་ཞིག་འཁྲབ་ཀྱང་རས་འབག་ཚོས་གཞི་འདྲ་མིན་སྣ་ཚོགས་གྱོན་པའི་སྲོལ་ཡོད།བོད་རིགས་ཀྱི་ལྷ་མོའི་སྒྱུ་རྩལ་ལ་ལུགས་མི་འདྲ་བ་གཉིས་ཏེ།སྔ་དར་བཀྲ་ཤིས་ཞོལ་པའི་འབག་ནི་གོང་གི་མགོ་སྐྱེས་སྐྲ་ལོ་ནས་འོག་གི་ཨོག་ཚོམ་བར་ཡོངས་རྫོགས་ལྷ་མོའི་སྒྱུ་རྩལ་གསར་གཏོང་མཛད་མཁན་གྲུབ་ཆེན་ཐང་སྟོང་རྒྱལ་པོའི་བཞིན་གྱི་བཀོད་པ་མཚོན་ཚུལ་དུ།འབག་གི་སྐྲ་ལོའི་དོད་དུ་རྭ་ལྦགས་དཀར་པོས་བརྒྱན་ཡོད།དེ་ཡང་ཐང་སྟོང་རྒྱལ་པོ་མཆོག་ནི་དགུང་ལོ་ཤིན་ཏུ་སྨིན་པས་དབུ་ལོ་དང་།ཞལ་རྒྱན།སྤྱན་སྤུ་བཅས་དཀར་པོ་དུང་གི་མདངས་ལ་འགྲན་པ་ལྟ་བུ་ཡོད་པས།   དེ་ལྟར་གསལ་བར་མཚོན་བྱེད་ཡིན་པའི་ཁར།ད་དུང་རྭ་ལྦགས་དཀར་པོས་རྒྱན་པ་དེ་ལ་“ཚེ་རིང་གཡང་ཆགས་”ཞེས་བརྗོད་སྲོལ་འདུག་པ་ནི་མི་རྒན་པ་རྣམས་ཚེ་རིང་ལ་ནད་དཀོན་པ་དང་།དར་མ་དང་གཞོན་སྐྱེས་རྣམས་མི་ནོར་ལོངས་སྤྱོད་ཤེས་རབ་འཕེལ་བའི་མཚོན་རྟགས་ཡིན།
ཕྱིས་དར་ལྷ་མོའི་འབག་སྔོ་ནག་ནི་དྲག་པོ་དང་།དཔའ་བོའི་མཚོན་བྱེད་ཡིན།གང་ལགས་ཞེ་ན།ལྷ་མོའི་སྔོན་འགྲོའི་འཁྲབ་ཚན་རྔོན་པའི་གྱོན་འབག་དེ་བཞིན་སྔ་དུས་འབག་དཀར་པོ་ཡིན་པ་ནས་རྗེས་སུ་སྔོ་ནག་དྲག་པོའི་ཆ་བྱད་ལ་བསྒྱུར་བར་དོན་འདི་ལྟར་ཞིག་ལྡན་པ་སྟེ།དུས་ནས་ཞིག་ལ་འབྲུག་སྨྱོན་ཀུན་དགའ་ལེགས་པ་ཡར་འབྲོག་གི་ཕྱོགས་སུ་ཕེབས་སྐབས།ཡར་འབྲོག་མཚོན་ཁར་གནས་སྡོད་བྱེད་པའི་ཉ་པ་རྣམས་ལ“ཁྱེད་ཡུལ་ཡར་འབྲོག་གི་ཉ་པ་རྣམས་ནི།མདོག་སྔོ་བ་ཡི་དམ་དྲག་པོ་ཕྱག་ན་རྡོ་རྗེ་དང་མཚུངས་”ཞེས་གསུངས་པས།རྒྱུ་མཚན་དེ་ལ་བརྟེན་ནས་རྔོན་པའི་འབག་གི་ཚོས་གཞི་སྔོ་ནག་བྱུང་སྐད་འདུགགཞན་ཡང་རྔོན་པའི་འབག་དེ་ལ་བཀྲ་ཤིས་རྟག་བརྒྱད་ཀྱི་གོ་དོན་ལྡན་པའི་རྒྱན་སྤྲོས་ཆ་ཚང་བ་ཞིག་ཡོད་པའི་མཚོན་ལུགས་ནི་གདོང་གོང་གི་མེ་ལོང་སྔོ་ནག་དེ་བཞིན་གཏེར་ཆེན་བུམ་པའི་མཚོན་རྟགས་དང་།ཁ་མིག་གཉིས་དང་སྨིན་མ།ཁུར་ཚོས།ལྐོག་མ་བཅས་ཀྱི་འཛོམས་རྒྱན་དག་ནི་པད་མ་འདབ་བརྒྱད་ཀྱི་མཚོན་རྟགས།སྣ་རྒྱན་པ་ཏྲ་ལ་སི་ཤན་ཚོས་སྣས་རྒྱན་པ་དག་ནི་དཔལ་བེའུ་མཚོན་བྱེད་ཡིན།དཔྲལ་བར་ཉི་ཟླའི་དཀྱིལ་འཁོར་གྱི་དབྱིབས་རིས་བཀོད་པ་ནི་ཆོས་ཀྱི་འཁོར་ལོའི་མཚོན་རྟགས།སྣ་ཁུང་གི་རྩེར་འགྲོན་བུ་རྡོག་གཅིག་འཕྱང་ཕྲུལ་དུ་བཏགས་པ་ནི་དུང་དཀར་པོ་གཡས་འཁྱིལ་གྱི་མཚོན་རྟགས།དཔྲལ་བའི་དབུས་ནས་རྣ་གཡོག་བར་ཁེབས་པའི་གོས་རྒྱ་སེའི་ཐོད་སྐོར་དག་ནི་གསེར་གྱི་ཉ་ཆུང་ཁ་སྤྲོད་ཀྱི་མཚོན་རྟགས།ནོར་བུས་བརྒྱན་པའི་ཐོར་ཅོག་དང་།དེའི་སྟེང་གི་འཁྱིལ་སྣ་གྱེན་དུ་ཕྱོགས་པ་ནི་རིན་ཆེན་གདུགས་དཀར་གྱི་མཚོན་བྱེད།གོས་ཚོས་སྣ་ཚོགས་ལས་གྲུབ་པའི་རྒྱབ་དར་དེ་བཞིན་ཆོས་ཀྱི་རྒྱལ་མཚན་གྱི་མཚོན་རྟགས་བཅས་ཡིན་འདུགའབག་ཚོས་གཞི་དམར་པོར་སྨ་ར་དང་སྨིན་མ་ནག་པོ་བྱས་པ་དེ་རིགས་ནི་ཡབ་རྒྱལ་པོ་སོགས་སྐྱེས་པའི་བརྗིད་རྔམས་མཚོན་བྱེད་ཡིན།ཡུམ་ཆེན་ཨ་མའི་ཞལ་འབག་ཚོས་གཞི་ལྗང་གུ་ཡིན་པ་དེ་ནི་སྔོ་ལྗང་མཚོན་གྱི་མཛེས་ཆ་ཡིན་ཟེར་བས་བུད་མེད་ཀྱི་མཛེས་མཆོས་མཚོན་ཞིང་།དྲང་སྲོང་གི་འབག་གཞི་སེར་སྐྱ་དང་སྨ་ར་སྨིན་མ་དཀར་པོ་སོགས་གོང་གསལ་ཐང་སྟོང་རྒྱལ་པོའི་ཞལ་མཚོན་བྱེད་ཡིན།ཡ་མ་གྷན་ཏེའི་འབག་ཕྱེད་དཀར་ཕྱེད་ནག་བྱས་པ་དེ་ནི་དབྱེན་སྦྱོར་དཀྲུག་ཤིང་མཁན་ངོ་གཉིས་མཚོན་བྱེད་ཡིན་པ་སོགས་སོ་སོར་རྒྱུ་མཚན་ངེས་ཅན་རེ་ཡོད།